ivanliresearch

美股由頭掃到尾，2020年11月以嚟最強一星期。連升6日，低位升返10%，「連跌8星期可能會再跌喎」「熊市喎」「20000點失守喎」高盛話通脹見頂，「我一早講咗」。但量化指標重要過呢啲narrative，咁到底PCE數字如何？「其實預示唔投資你就向下流」Nvidia Costco Dollar Tree Dollar General 拼多多，港股只講一隻港交所388 (Patreon)

Published:

2022-05-30 01:27:01

Edited:

2022-05-30 02:30:36

Imported:

2022-09

Downloads

Download 明報　20220530.docx

Content

美股由頭掃到尾，2020年11月以嚟最強一星期。連升6日，低位升返10%，

「連跌8星期可能會再跌喎」「熊市喎」「20000點失守喎」

高盛話通脹見頂，「我一早講咗」。但量化指標重要過呢啲narrative

咁到底PCE數字如何？「其實預示唔投資你就向下流」

Nvidia Costco Dollar Tree Dollar General 拼多多

港股只講一隻港交所388

應該幾開心啦？除非你係低位沽走咗。呢幾日市況好返好多，亦都多嘢想講，但反而有啲難整理。但真係記住，由相當悲觀嘅3月4月，到而家納指低位彈返10%，港股低位彈返14%，都只係一兩個月嘅事，甚至絶大多數升幅係呢個星期先發生。

美股由頭掃到尾，2020年11月以嚟最強一星期。連升6日，低位升返10%，

1. 星期五篇文，寫咗星期五嘅港股，所以今篇只寫星期五美股，但都夠多嘢寫。

2. 首先見到，美股係全日由頭掃到尾，高位收市。不經不覺就連升6日，納指低位返升10%—而對有啲人嚟講，跌10%佢已經覺得好大件事（當然有啲升10%仲走去take profit嘅，仲衰）。

3. 可以幾肯定嘅係，當然會有啲人心動入市，但又會驚追咗入去再跌。會唔會？梗係有可能啦，跌返10%有幾出奇？但呢啲擔心係多餘嘅，你一係克服自己嘅心態，一係永遠冇得投資。事實你任何一日買股票，都係「有機會之後再跌」的。有時你以為「冇乜機會大跌」，就只係你錯誤地「以為」，而嗰啲情況多數係最大風險—你睇過去大半年就知。

4. 所以幾時都話，飛出飛入，有乜意思？上面個圖貼過，你一錯過咗最好嘅一啲日子，投資回報就大打折扣，而美股上星期五日已經升返7%，唔好忘記股市平均一年都係十幾%回報。追咗跌返又驚，沽咗又唔知幾時買返，仲要影響埋你心情，影響埋你「本業」搵錢。搞咁多嘢，點解唔簡單啲，stay invested，有錢就買股票？

5. 正如上面講，美股扭轉之前連跌8星期嘅跌浪，三大指數升返6-7%，係2020年11月以嚟（當時應該係有疫苗嘅消息），最好嘅一星期，你沽咗嘅，咁就錯過咗。

「連跌8星期可能會再跌喎」「熊市喎」「20000點失守喎」

6. 順手借呢個機會，鞭打下啲「可能會再跌」嘅諗法。頭先已經講咗部份，你另外可以諗下，連跌6星期時，有人可以話走勢差，好大機會跌7星期。咁連跌７星期又可以再講，但點解會跌到8個星期就唔跌？成個講法根本唔make sense．當然你勉強地可以睇啲熊市周期（陣間討論），要跌幾多先見底—但就算睇呢啲，你都應該睇幅度，而唔係幾多個星期。

7. 然後講開「熊市」，今年標普指數已經掂過熊市位啦，係咪？但一樣彈返上嚟，咁你話你夾硬去睇「熊市要跌幾多」，意義何在？更唔好講恒指在咩20000點嘅「支持位」「阻力位」插出插入咗幾千次。

高盛話通脹見頂，「我一早講咗」。但量化指標重要過呢啲narrative

8. 講到尾，升乜？固然係星期五個PCE數字靚仔（下面詳細講），然後高盛又話通脹見底了，扯，「我一早講咗啦」。另外亦都留意，因為加息預期低咗，美匯走弱，跌到近一個月低位，咁就人人開心。傳統上一般美金強都係避險意識高，不利股市。順手講埋，亦係因為咁，所以點解有時（記住係有時）你見港紙7.85時港股就弱，因為多數係美金強，而往往全世界股市都差，例如2018。呢啲嘢在篇萬字文講過了，所以真係環環相扣的。

9. 亦都同時間講下，早排都有講過美股見底，雖然之後略為穿過寫嗰時嘅位，但大約都算不錯。唔止係認叻，而係大家都留意下個思考過程。除咗係「質化」narrative嘅嘢（估通脹見頂，估停加息），亦都有量化嘅嘢（VIX，債息，Fear and Greed Index之類），你真係問我，後者更為重要，反正故事嘅嘢人人識講，往往係升完跌完先解，又或者只係反映嗰一刻嘅情緒，而多數係滯後。但當然了，即使量化嘅指標，都冇可能100%準，甚至七八成都難，你有五成幾六成已經幾難得。

10. 當然，量化指標仲要睇埋市盈率同債息，債息成日講，市盈率……聽日講，或者你睇住呢個圖先。

咁到底PCE數字如何？「其實預示唔投資你就向下流」

11. 星期五篇文，有同大家講星期五晚嘅PCE十分關鍵，但我寫明我係傾向樂觀嘅，果然如此，市場而家就講晒話估通脹見頂，而5月12號我都有寫（CPI高位回落，債息又冇再升）．

12. 可以快手睇下PCE嘅數，按年升6.3%，上次係6.6%。核心PCE（扣除能源食品）就按年升4.9%，上次係5.2%。兩者都比上個月回落咗，今年第一次減速，亦冇高過預期，所以難怪市場相當放心。

13. 不過另外可以留意，同時間亦有其他嘢出埋。入面有講，4月個人收入按月升0.4%，就低過預期，支出就按月升0.9%，高過預期。咁夾埋即係點？即係，啲咩加人工，真係假象，你補唔返物價升幅的。所以唔投資就多數往下流。

Nvidia Costco Dollar Tree Dollar General 拼多多

14. 另外仲可以延伸到一樣嘢，上星期篇文已經有講，Costco就因為啲客收入高過Walmart而業績好，Gap就因為啲品牌顧客係低收入人士，而搞到蝕錢。更好笑係「十蚊店」Dollar General 同Dollar Tree業績就好，因為呢啲公司專掠窮人。最後You know what？雖然唔係美國，但拼多多嘅業績相當好，虧轉盈，股價大升。

15. 絶對係環環相扣，仲有，你可以睇返我年頭寫嘅文，講貧富懸殊下嘅投資機會，我最新明報篇文都有寫（Attachment有）

16. 個股嘅，反而我不用多講啦，百花齊放。成個倉唯獨啲防守股差啲，但絶大多數都升。留意成堆Big Tech都強。

17. 特別想講Nvidia，之前出業績，首季好，第二季展望差（唔少公司都係咁），明明就盤後大跌，但之後都可以連升兩日。而隻嘢從來都係貴，高位跌咗一半都不見得平，所以你真係等到極殘，又唔知等到幾時。我都仲係就咁坐住，而我都仲執緊三成。如果捉唔到幾時買，就唔好諗咁多啦，雖然盡量應該避免人人都好興奮嗰時買。

18. 另外就係Costco，都係比較「近期」（半年前？）買嘅股票，唔使點輸。之前業績OK，不過盤後要跌，但到星期五亦回升返。