道指連升4日，之前講見底都唔算錯啩？Nvidia 業績。聯儲局議息聲明：完全唔驚衰退喎。但市場估加息就快停？美國國會預算辦公室：滯脹？乜滯脹？—調高經濟增長，仲話通脹好快回落。樂觀的投資者很多時候也過於悲觀。 (Patreon)

道指連升4日，之前講見底都唔算錯啩？

Nvidia 業績。

聯儲局議息聲明：完全唔驚衰退喎。但市場估加息就快停？

美國國會預算辦公室：滯脹？乜滯脹？—調高經濟增長，仲話通脹好快回落

樂觀的投資者很多時候也過於悲觀

道指連升4日，之前講見底都唔算錯啩？

Nvidia 業績

1. 不經不覺，道指己經連升4日，雖然累積升幅都未夠3%，但似乎……可以扭轉之前連跌8個星期嘅頹勢啦啩？之前講話股市見底，應該都未算錯得太緊要。

2. 近期美股固然好多人留意啲個股業績後大跌，包括之前Snap，A&F，或者零售嘅Walmart，Target 之類咁。但正如之前講過，亦唔算真係一面倒地差。即使係零售商，你見Nordstrom都仲可以勝預期，仲可以調高全年預測，昨晚股價都升返14%。

3. 同樣地出咗業績嘅，仲有Nvidia，我都有，唔少讀者都有。星期三晚收市後先出的，業績都係麻麻地，第一季嘅業績就勝預期，但第二季嘅指引就比市場預期低。結果盤後都要跌6%—又好似唔係好過份，但公司高位股價已經跌咗一半。都係估值問題，而呢啲係冇得搞的。

4. 可以點？就只能夠在啲東西唔好咁貴時追入去。例如係而家。遲下會唔會再平啲？有機會寫篇文講，但短答案係：點知？不過而家跌咗落嚟唔買，升晒先買，就係好多人嘅通病。照計呢一年幾大家都受咗唔少教訓。

5. 既然股票係要買嘅，而又唔應該升晒先追入去，咁應該幾時買？似乎都係「其他時間」。幾時係「其他時間」？怕且而家都算係。

6. 當然仲有一個前題，你間公司係應該有「護城河」，同埋應該有盈利基礎—其實係冋一樣嘢，有護城河自然就啲盈利有保證，可能因為經濟周期會暫時受壓，但之後都係會返返嚟，然後股價都會慢慢跟住返嚟。但如果你間公司根本唔係呢回事，就往往冇得翻身了

7. 而Nvidia應該係一間盈利可以翻身嘅公司。

聯儲局議息聲明：完全唔驚衰退喎。但市場估加息就快停？

8. 另外仲有不少宏觀嘢想講，首先當然係聯儲局嘅議息會議記錄。坦白講，我……都唔係好明。

9. 大家都知道，呢期係又驚衰退，又驚通脹（同時驚埋加息）。到底驚邊樣多啲？都難啲答到你。

10. 而睇返個會議紀錄，明顯地打算未來幾次加息0.5厘—但呢個應該大家都預咗，唔會太意外。

11. 但我認為最值得留意嘅，係聯儲局依然預期第二季經濟會穩健增長，全年亦都接近或高於趨勢水平。

12. 咦？即係點？即係似乎係聯儲局有信心，再加息都好，經濟都唔會衰退。

13. 呢個本身係好消息定壞消息？都係任你演繹，但我覺得更加奇怪嘅，係之後嘅市場反應。唔係指股市（幾百點上落完全冇特別），而係債息，同埋利率期貨。

14. 相當奇怪地，啲利率期貨市場，而家唔再認為聯儲局會兩次都加息0.5厘（呢度都有講），咁即係點？明明議息聲明話未來幾次都0.5厘，當然亦可能只係因為一啲技術問題錯價，亦不出奇。

15. 但同時間，又見到美債債息都有一定回落，而家大約2.7厘咁水平，呢個就應該對股市幾有利。

16. 然後又同時間，段market round up有講：

17. 「有分析認為，議息紀錄或暗示，聯儲局未來3次會議如果各加息0.5厘，當局可能會結束當前收緊貨幣政策周期，為下半年投資市場反彈鋪路，」

18. 而我係完全唔明背後嘅邏輯，即係點？明明聯儲局對經濟幾樂觀喎，點解覺得咁快會「結束當前收緊貨幣政策周期」？定因為聯儲局講「未來幾次會加息0.5厘」，就有人理解做「即係加多3次0.5就收工」？咁都得？

19. 就真係唔係好明。

20. 不過返返去最原本，我都係相信，通脹係見咗頂嘅。亦都相信下半年美股應該會好啲。

美國國會預算辦公室：滯脹？乜滯脹？—調高經濟增長，仲話通脹好快回落

21. 然後呢單，更加奇怪。

22. 呢個美國國會預算辦公室（CBO），有啲生面口，我都唔係好做乜的。如果你知可以話我知。就咁睇，就好似即係國會預算，入面用嘅經濟假設

23. 留意，呢個CBO，唔止上調咗出年同後年嘅經濟增長。仲有，亦只係預期今年聯邦基金利率係1.9厘，即係加多1厘息（而聯儲局暫時官方講係2.5厘）。

24. 仲有，佢亦估計，PCE通脹今年會升到去3.8%—但後年已經會去到2%，官方嘅目標水平。（而家係6.6%，如果計核心PCE就5.2%，又提埋你，聽日會出）

25. 咁樂觀？

樂觀的投資者很多時候也過於悲觀

26. 講起樂觀，同大家分享篇文，我覺得呢個作者寫得幾好（而我唔識佢的）。應該未來幾日仲會分享多一篇。

27. 佢用嘅例子係2020年3月，我都成日用。最好用嘅地方係，因為真係唔係好耐之前，你嘅記憶仲猶新，亦記得當時嘅心情（又，我好似好一排冇講，但以前寫過，trade log幾重要，你唔使真係好詳細咁做，求其錄音記得自己當時點睇市況，或者當時點解做呢個買賣，就己經夠。重要係第時可以搵返出嚟，檢討返。當然如果本身會寫文寫日記之類嘅，就更加有先天優勢）

28. 記唔記得，2020年3月，真係覺得世界末日？我都覺得係。果時史兄（冇錯係嗰個史兄）雖然唔係金融KOL，但佢都有講，你諗下，咁大嘅災難，會唔會話咁快市場就冇事？

29. 我講返呢件事，唔係抽佢水。而係，我當時都好同意佢講—但結果，我同佢都係錯嘅。2020年3月之後乜事，大家好清楚。5個月就創歷史新高—唔止係收復失地，係創歷史新高。

30. 然後可以諗下，2008年金融海潚，亦真係覺得好大鑊。你問我，肯定嗰時嘅恐懼仲勁過2020年3月，但當然2008年我仲係搏殺嘅分析員（2020年己經極hea），仲要不停應付同事同客嘅問題，加上嗰時亦冇咁多人生經驗，呢啲嘢都會影響你點睇事情。

31. 留意，如果講長線，人往往放大咗downside risk，而低估咗upside risk—即係你成日以為股災跌九成，但冇你想像中咁多。反而往往市好時升N倍，你就低估咗。

32. 當然你會話，嗰兩次係因為放水嘛。咁你又知今次唔會？況且，股市升，唔需要咩特別理由。實情2010嗰浸，咩歐債危機，都係幾驚的。可能冇金融海嘯咁驚，但都驚，又話歐豬連環違約，又話歐元區解體咁—但而家好多人已經唔多記得呢件事

33. 諗諗下，我都有呢個問題，我係樂觀嘅投資者，但有時都乎太悲觀，因為總會受其他人影響。又或者我未夠富有，又或者我仲未夠老。邊個最樂觀？你睇畢菲特就係，我真係咁多年好似冇見過佢好悲觀，覺得世界從此玩完。

34. 值得你諗下：畢菲特係股神（唔使拗啦？），而佢又係極樂觀嘅人，兩者係咪厉合？同樣地，你見你身邊嗰啲好悲觀，今日又驚台海打仗聽日又驚俄羅斯嘅人，有冇邊個有發達？

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6