道指又收復500點失地，今年已跑贏納指16%。Snap大插，A&F大插，美國爆煲定公司問題？why not both？聯儲局3年縮表2.5萬億喎，反正我信了．李澤鉅講嘢：長建1038，長和1，長實1113。英鎊跌點算？點解唔一注獨贏？ (Patreon)

道指又收復500點失地，今年已跑贏納指16%。

Snap大插，A&F大插，美國爆煲定公司問題？why not both？

聯儲局3年縮表2.5萬億喎，反正我信了

李澤鉅講嘢：長建1038，長和1，長實1113。英鎊跌點算？點解唔一注獨贏？

道指又收復500點失地，今年已跑贏納指16%。

1. 美股嘅情況，都分化得幾嚴重。你見道指又再低位升返500點，倒升收市，但標指就差啲，納指更差。今年道指先跌12%，但標指已經跌18%，而納指直頭去到28%，都爭好遠下。嫌我煩都要講，早早叫咗你唔好滿手科技股了。

2. 而你唔好忘記，跌咗12%，你只係要升返14%。但跌咗28%，你要升返39%。

3. 整體市況，就唔係太差嘅，勉強有啲舊經濟股頂住下，當然個別股票可以跌得好勁下，亦會係我一直講嘅，最好你都唔好偏離得指數太遠。

4. 亦都照舊，我認為債息嘅走勢，都算係幾正面—或者至少冇太負面，一路都冇點再上返上3厘。而家只係2.75厘左右。

5. 另一方面，你睇呢度有講，第一季當中，標普成份股回購咗2700億美元嘅股票，都幾大金額（留意之後聯儲局講縮表都只係950億個月）。之後可能會更多，呢個亦唔多唔少會支持到大市。亦係點解咁多企業之前明明有錢，都仲要舉債，反正當時息口夠平。

Snap大插，A&F大插，美國爆煲定公司問題？why not both？

6. 個股方面，又有讀者問Snap同A&F，當然兩間都大插，原因亦差不多。前者就係因為調低咗下一季嘅展望，A&F就直頭係出埋業績，意外虧損。

7. 經濟麻麻地，就好肯定架啦。但我一路諗一個問題：你見4月尾嗰堆業績，又整體冇乜問題喎。咁到底係一個月之前情況差咁多？定係只係呢排出嘅嗰堆公司唔得？當然係兩樣都有啲，但我傾向覺得後者係主要原因

8. 你亦見到真係唔係一面倒地差（雖然都幾差），即使講零售商，之前Walmart同Target唔得，但你見NordStrom又好地地。BestBuy亦都唔差。

9. 話說回頭，Snap就直頭連招股價都跌破埋，高位跌咗8成幾。我都有買，但亦係好少，一兩萬港紙，就係認為佢太貴。當然舊年就個個如痴如醉，我都不會完全例外，但至少我有幾分清醒，唔會買得好大。

10. 至於A&F，一路都唔鍾意呢間公司，名氣就大，實情外強中乾。你望下幾多市值？10億美金都唔夠，實情並唔係咩有影響力嘅公司。你可以比較下，Zara嘅母公司Inditex，而家市值係……630億美金咁滯。同樣地多災多難嘅GAP，都仲有35億市值。A&F市值，實情同間大家樂差不多

11. 亦都順手講埋，昨日先講過，啲公司跌咗落嚟，就會有機會畀人收購。之前講嘅係博通BroadComm買VMWareh。最新呢？就係Wendy’s．不過成件事比較接近係私有化，好可能過幾年又推返出嚟上市。照舊，好多跌咗嘅股票，你而家沽走，就會錯失咗呢啲機會。

聯儲局3年縮表2.5萬億喎，反正我信了

12. 可以留意下，呢個報導（引返紐約聯儲局），講未來3年縮表規模2.5萬億美元。影唔影響股市？怕且都影響。雖然有啲難量化，但都可以睇下啲數字。

13. 首先講下，呢個2.5萬億點嚟。因為話假設每個月縮表800億（不過官方講係950億），一年咪大約1萬億。今年下半年開始，2023，2024，兩年半，就2.5萬億，大約咁計

14. 不迥，可以睇下上面呢個圖，就係聯儲局嘅資產負債表。懶睇嘅，咁講你知，疫情前嘅資產負債表規模，係4萬億左右。而家係9萬億，即係發大咗5萬億。即使按以上嘅講法，都只係會收到一半。

15. 當然仲有另一個問題：我本人極之懷疑，到底有冇可能縮表縮到2025？唔好忘記，而家已經話衰退。

16. 然後你可以睇下再上一次嘅縮表，亦只係一年半左右（2018年頭至2019年中），你可以見到，只係縮得少少，完全同之前擴張嘅速度冇得比

李澤鉅講嘢：長建1038，長和1，長實1113

17. 港股方面，繼續都係比較悶，順手可以講下李澤鉅，即係長建1038，長和1同埋長實1113。早排股東會，李澤鉅都講咗唔少嘢，可以留意下，即使冇買或冇興趣嘅都可以望下。三隻今年都有得升，三隻我都有，但當然係長建最多，另外兩隻好少

18. 所以講咗長江基建先。你見公司負債相當低，講明有機會做收購。而家呢啲情況最好，好多公司叫晒救命，上咗市嘅股價就跌唔少，抵買，冇上市嘅亦都一樣估值受拖累，最開心就係有實力嘅公司。亦都正如佢講，好可能可以夾埋系內其他公司做，甚至又有啲重組亦不定

19. 仲有我覺得有一部份好值得睇嘅：英鎊。

20. 之前都有讀者問我關於外匯嘅問題，有啲又問點樣去管理呢啲風險。我嚟緊篇文會寫，但短答案其實係：冇得避，亦唔需要避

21. 我講你唔信，咁李澤鉅講你信啦？公司唔少業務同資產在英國，當然英鎊跌會有影響。但公司有冇擔心？有冇特登點去「管理」啲風險？又好似冇。因為呢個係遊戲嘅一部份嚟嘛，正如你冇可能買股票話想唔要聽日忽然股災嘅風險，呢啲風險永遠存在，因為係你回報嘅一部份。以前都寫過，price of admission，正如因為你接受咗呢啲嘢，你買股票先有回報，而唔係因為你點咁叻。

22. 你見公司講，英鎊升又見過，跌又見過，都係咁玩架啦，長遠拉勻咪又係升升跌呹，唔通英鎊跌嗰時就沽晒啲業務佢？

23. 仲有最後，你見到公司好強調自己係「環球公司」，十分聰明。既有政治上嘅原因，亦有金融上嘅原因。邊度好，咪去邊度。然後你見連李嘉誠都會分散啲業務，唔同行業，唔同地域—點解叫你地買股票分散啲，都係咁難架呢？會唔會太高估自己嘅智慧？

24. 至於長和方面，最主要就係講賣咗啲業務後，有機會拎啲錢做回購。此外，亦都一樣係強調全球，甚至講到明話啲業務可以互相幫補。我買股票都又港股又美股啦，而我唔明白點解好多讀者覺得美股無敵，然後而家又叫救命

25. 至於長實，講嘅嘢都係差不多，我就不重覆了。

26. 認真，聽李澤鉅講嘢，就好過聽李澤楷了。你見佢堆公司都大好多，國際化好多。