衰退？Jamie Dimon話唔驚喎，仲調高指引。Snap大插，Zoom反彈，VMware畀人買起。綠債居然穿底，點解？點算好？順手解啲基本嘢。綠債居然穿底，點解？點算好？順手解啲基本嘢。 (Patreon)

衰退？Jamie Dimon話唔驚喎，仲調高指引。

Snap大插，Zoom反彈，VMware畀人買起。

綠債居然穿底，點解？點算好？順手解啲基本嘢。

冋場加映：債息升點會對保險公司有利？啲債價跌喎，咪蝕錢

1. 我發現，日頭寫Patreon嘅效率極低。其他文都還可以，Patreon真係唔掂。你話朝早七八點寫都還好，但只要去到其他人開始活動，我就會分心了。雖然我off notification，但有時寫完一段都會望下whatsapp 之類，就會分咗神甚至睇其他嘢寫其他嘢。同樣地，有時我會係在Whatsapp check其他嘢，搵返啲嘢寫Patreon，但途中又可能會望到其他message又去覆

2. 所以我都依然係搵緊一個最好嘅寫Patreon時間，理論上真係半夜三四點最好。

衰退？Jamie Dimon話唔驚喎，仲調高指引。

3. 昨晚嘅美股，都幾有趣，你睇指數就見到有個幾好嘅反彈，同埋都算全面。但背後唔少嘢亦可以討論下。

4. 首先，你見銀行股係特別強嘅。係咪都有啲奇怪？唔係話衰退？然後就要講，JP Morgan嘅Jamie Dimon最新講嘅嘢，都幾令人意外。公司年頭已經話做唔到原本目標，而家改口話做到，仲調高咗收入指引。

5. 呢個動作都幾唔尋常，你諗下正常公司管理層，梗係借機調低預測啦，乜都可以賴大環境，投資者可以理解。邊會自己伸個頭出嚟仲調高你嘅期望？所以幾令人意外，或者反映公司真係充滿信心。

6. 另外，亦因為Jamie Dimon真係稱得上德高望重，而佢唔止講係自己公司做得好，而係覺得美國經濟都強勁。所以你見唔止自己股價大升，連帶其他銀行股又升，大市都升。至於佢嘅睇法，係定唔係？遲下先知。

7. 另外，早少少嘅東西，仲可以留意拜登話考慮取消部份對中國嘅關稅（都講咗好耐了，另外不妨又留意下，2018年時，你網上啲專家點講？而家見唔見到關稅最後邊個受害？）。

8. 此外，仲有聯儲局官員講，9月可能暫停加息—但，暫停啫，唔係話咁快就加夠。況且，此人今年係冇投票權嘅，但只係畀你知道如果見到通脹見頂，啲「加息預期」可以跌得好快，特別係又話個個驚衰退了。

Snap大插，Zoom反彈，VMware畀人買起

9. 個股方面，見到Snap下調咗個業績指引，股價盤後大跌。有讀者問我，係公司嘅問題，定成個市場嘅問題？答案係：都好難講，兩樣都有啲。但樓上你見JP Morgan充滿信心，而Snap亦只係一間細公司。不過同時間，你又見到Facebook股價盤後都大跌，明顯係因為Snap唔掂，大家擔心佢都唔掂。

10. 咁經濟開始唔多掂，越嚟越多人講。但讀者話，咁經濟有問題，係咪決定要沽科技股？當然唔係，而家沽，太遲了吧？正路你係應該經濟好時沽，經濟差時買。做唔到嘅，就唔好太過自信去time the market 了—講真，如果你眼光咁好嘅，就唔係而家仲拎住咁多科技股啦，應該一早沽咗啦，係咪？既然卜次你都估唔到，點解覺得今次會估到個走勢？

11. 況且，估值幾時都係一個大問題。經濟差影響好多公司，科技股反而係比較少受影響—但你見跌幅就最大。原因就因為估值。但上年同你講呢啲，根本冇人會理我

12. 同時間你見到，Zoom都出咗業績，股價反應又唔差喎，盤後一度大升添，雖然最後都收窄返。個關鍵係，首先，Zoom都之前跌咗好多好多，另外，公司始終係賺錢嘅，你睇啲估值，又唔係去到極離譜嘅地步。

13. 最後，亦可以留意下有單收購。BroadComm博通會買VMware，600億美金，都係幾大嘅deal，暫時應該今年最大。2020年SPGI買Markit，440億美金，已經係當年最大（但當然嗰年係疫情）。

14. 啟示係……啲股票跌到咁上下，就有機會被有實力嘅公司買起，例如Twitter亦都係。VMware之前亦都高位跌咗一半，我沽咗佢嘅，咪會錯失咗佢畀人買呢下？

綠債居然穿底，點解？點算好？順手解啲基本嘢

15. 港股方面，除咗隻凱知樂2122外，冇乜咩特別好講。回返少少，比較悶。所以不如講下隻零售綠債4252，居然穿咗底，上市幾日都一路潛水，抽到居然要蝕錢，夠晒奇。

16. 講返，原本有讀者叫我寫，我都唔記得寫。但如果我有寫嘅，都可以話你知，我係肯定會叫你抽返幾萬蚊嘅，我唔會事後孔明話「一早會叫你唔好抽」咁假。

17. 點解一定會叫你抽？因為本質同iBond差不多，「政府派錢」。按幾個掣，執幾百蚊，幾咁好。

18. 咁但點解今次會「蝕錢」？如果真係買咗又潛咗水點算？就呢度講。

19. 首先諗下，點解會穿咗底？係咪政府會還唔到錢？梗係唔係，當然你鍾意可以又話聯匯爆煲嘅，但港紙嘅嘢，「印都印到畀你啦」。

20. 然後有人講，因為高通脹，通脹預期高。只係啱細半。如果我冇睇錯，隻綠債派息會跟通脹調整，通脹高啲就派多啲息，咁高通脹唔係更加好咩？收多啲息喎。咁點解仲會跌？

21. 原因就同我呢排成日講嘅一樣嘢有關：債息

22. 首先，留意冇一個定律話債息升一定影響其他嘢，但往往係咁。呢個例仔畀你睇到，點解債息高對咁多嘢不利。因為一樣嘢，叫做「機會成本」，我唔買綠債唔買股票，可以買乜。

23. 學術啲講，計discount rate，未來嘅100蚊（你可以連埋啲派息，原理一樣），折返去今日，當然唔值100蚊。咁個discount rate越大，你個價值咪越低。而好多時計discount rate會用債息，雖然你可以話呢啲係紙上談兵嘢

24. 但另一個睇法亦一樣，通脹預期升咗，債息升咗，我做債主，咪冇咁著數咯，所以隻嘢跌咗。

25. 呢度留意返，只係講「利息」已經有幾個唔同概念。呢個情況你嘅派息係同個通脹掛勾，而計咩discount rate 機會成本嗰個係債息。雖然兩者似乎有一定關係，唔多唔少因為通脹升，而債息都升咗，但本身唔係同一樣嘢。

26. 所以呢個幾簡單嘅例子，都示範咗一啲簡單嘅概念。記住債息升，就好多嘢都冇乜運行。

冋場加映：債息升點會對保險公司有利？啲債價跌喎，咪蝕錢

27. 咁買咗嘅點？呢度又返去另一個概念。實情，你係唔會「蝕錢」的。

28. 正如話說早排我同保險agent食飯（冇錯係熊本料理，我Facebook Page有貼），佢提出咗個問題，可能你地都有人想問，我都有諗過。點解話債息升或者加息有利啲銀行股保險股？債息升唔係債價跌咩？咁保險公司拎住啲債券咪仲跌價咯，點解有利？（你可以諗下呢個問題）

29. 答案係：其實呢，你唔會真係「蝕錢」，只要唔係爆咗煲，咁你中途價格嘅波動，係唔影響你任何嘢—你渣到期，一樣係收到咁多息，一樣拎返晒個本金。咪同你而家隻綠債一樣

30. 咁你話中間跌價係咩回事？亦同你隻綠債一樣，你可以話提早鎖定咗個息放債畀人，咪「蝕底」咗，但呢種「蝕底」唔係真係會計上嘅loss，況且會計唔會同你計time value，今年嘅10蚊同十年後一樣。而中途啲升價跌價，如果係長期債券，一般都唔需要咩 mark to market每半年反映價格（但股票就要，呢啲技術嘢唔解了）

31. 實際上嘅，你拎住綠債，你坐佢3年，咪拎返本嘅10000蚊，加埋中間會收6次息，點會「蝕本」？

32. 但掉轉，你蝕嘅係「機會成本」咯，你啲錢鎖定咗息嘛，同埋畀通脹蠶食咗（但唔好忘記，你個派息又會多返）。

33. 所以點處理？其實冇乜所謂。我係你嘅，可能就唔介意「蝕讓」，都係一百幾十蚊啫，照計買股票，三年後嘅回報會好過你隻綠債。但，當然冇得包生仔。咁你綠債點都好過放銀行嘅，暫時。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6