港股7.85後升返1400點，明明又話資本外逃。美股：連跌8星期，對上一次係100年前！標普指數熊市。「點算」。邊個話衰退股市唔可以升？咁唔衰退係咪實升丫？股市只係返返2021年頭嘅位，救乜市？你輸錢當然係你問題。基金經理持現金水平21年最高，「好大鑊」，「一定係睇淡後市」 (Patreon)

港股7.85後升返1400點，明明又話資本外逃。

美股：連跌8星期，對上一次係100年前！標普指數熊市。「點算」

邊個話衰退股市唔可以升？咁唔衰退係咪實升丫？

股市只係返返2021年頭嘅位，救乜市？你輸錢當然係你問題

基金經理持現金水平21年最高，「好大鑊」，「一定係睇淡後市」

1. 今日開始寫就係星期一中午13:40，因為早少少仲寫咗篇文答你地啲聯匯問題，獨立一篇，之後出。但一如以往，之前嘅準備先多功夫，打字同諗嘢我使幾多時間？仲有之後嘅執圖呀，分段之類。所以以前用錄音真係慳我好多時間，但對讀者（即係你）肯定唔係最好。又，我地而家仲有錄音版的，由我朋友主理。20或40美金會員限定。

港股7.85後升返1400點，明明又話資本外逃。

2. 港股方面，都真係不用多講，上星期升返800點，懶理美股跌，星期五就升返600點。容許我再講一次，之前出面好多人，見到港匯掂到7.85啦，又話大鑊啦資本外逃啦外資沽貨啦脫勾啦有排跌啦。

3. 結果呢？你睇下，正係嗰個位，就開始升返上嚟，1400點。完全係相反指標。講到實牙實齒嗰班，完全係唔識嘢的。

4. 值得留意嘅，就係66隻藍籌，有64隻都升，算係幾全面。你見我在Facebook Page都有講，如果係純香港股（例如你買美國上市嘅EWH），再強啲，今年只係跌6%。你計埋分段買再收埋息，分分鐘唔使輸錢。我個港股倉嘅情況都差不多

5. 恒指季檢方面，有幾隻冷門入選，今日升得幾好，但平時都好少睇呢堆嘢。另外，被踢出嘅瑞聲2018就大跌了。

美股：連跌8星期，對上一次係100年前！標普指數熊市。「點算」

6. 美股方面，星期五嘅情況，都真係睇你點睇。標普指數係一度由高位跌咗20%，實情已經係「熊市」，但早排都講過根本唔使浪費太多時間討論呢啲，19.9%又點？20.1%又點？有乜分別？

7. 而成個星期計，道指不經不覺連跌8個星期。對上一次咁長跌浪係100年前！標指納指亦都連跌7星期，2001年以嚟最勁。

8. 但我就覺得係正面嘅。你見道指低位可以收復600點失地，倒升收市，止咗瀉。另一方面，見到債息都幾大幅回落，落到2.8厘樓下，都係相當正面。可以講，既然指數又跌咗，債息又跌咗，股市係雙重地吸引咗，但當然跌到幾多先「夠」就冇人答到你，不過似乎現在水平，都有唔少人肯入市。但你話係咪代表啲人都冇完全最絶望（似乎係丫），未有終極一跌，所以未見底？冇答案，舊文都寫過。

邊個話衰退股市唔可以升？咁唔衰退係咪實升丫？

9. 順手留意幾樣嘢，首先，上篇文講咗通脹，有啲人話會（呢度，呢度），有人話唔會。大家都係估估下，但明顯呢個唔係一個可以忽略嘅事件。

10. 但，又如何？我見好多人話，衰退喎，咁唔好買股票啦喎。錯得很，好可能就係衰退先要買股票，因為股市炒預期。衰退時買，到有人覺得就快復蘇時，股市就升。

11. 況且衰退前往往跌一轉勁（好似而家咁？又，都話炒預期），股票就會平。你話等咩「確認」晒經濟好返先買？蚊都瞓，而且你必定買貴貨

12. 記住，股市行得早過經濟，而經濟又行得早過啲數據出嚟。你睇住啲數據，往往係摸咗去下個周期。

13. 我話衰退股市未必定，你唔信？咁畀個例子你：2020，或者2009。咁你話，因為放水。你又知今次唔會？況且，股市從來唔使「因為」某啲嘢而升，錢印咗咁多，一路都在，只係而家大家如夢初醒覺得太貴又太唔明朗咁解。你可以睇下，聯儲局疫情下印咗5萬億美金，而家一個月先縮幾百億，縮到幾時？（有機會細講呢個）

14. 仲唔信嘅？表面十分鷹派嘅布拉德，都講明，如果通脹壓咗落嚟，可能下年就減息。原來係短期鷹長期鴿，當然個前題係要通脹落到嚟—所以，未來只要你稍為聞到通脹可能見頂嘅味，股市大可以反彈。

15. 仲唔信？咁思想實驗，你覺得經濟好時，股市係咪實升？答係嘅，你睇下過去大半年美股跌咗幾多。咁既然經濟好時股市可以大跌，點解經濟差時股市唔可大升？一切都係睇個時間差之嘛。

股市只係返返2021年頭嘅位，救乜市？你輸錢當然係你問題

16. 不過仲有一樣嘢留意返，希望大家唔好咁天真。官員都講到明，股市唔係重點。之前股市回落唔少，我見有人講等聯儲局「救市」，傻的嗎？聯儲局嘅要務，從來都唔係令你在股市唔會輸錢（雖然往往佢地最後係間接咁造成呢個效果）。

17. 美股而家只不過係跌到2021年頭咁嘅位，同2020年頭（疫情前）相比，都仲升咗兩成。救乜市？金融機構輸錢？幾時都有人輸錢架啦，問題係，呢啲唔會係咩系統性風險。

18. 然後有人會話，唔係喎，我見2020年3月股災時聯儲局又救市，2008年金融海嘯股災時又救市。呢啲亦係美麗嘅誤會，嗰時，就真係系統性危機啦，一般都係金融系統出問題，流動性短缺，銀行間互不信任—然後當然股市因為呢啲嘢大跌。但聯儲局去解決嘅，唔係股市嘅問題。你見聯儲局總唔會直接入市買股票的（雖然2020年3月都有間接地做，但始終金額唔多，主力都係放水）

基金經理持現金水平21年最高，「好大鑊」，「一定係睇淡後市」

19. 另外，之前篇文講過啲見底指標，都講過VIX，期權，Greed and Fear Index之類，但仲有提過「基金經理現金水平」—而家就見到，個現金水平，21年新高。新手可能會話，「嘩基金經理都一早散晒貨呀，仲唔係知道好大鑊？佢地都係等之後跌先買，即係仲有排跌」，但我理解，呢啲應該比較係相反指標，持現金水平高嘅，照計之後幾個月回報不太差。或者相反講你更加明，如果基金全部持現金水平極低嘅，仲邊有購買力？所以多數係見頂先兆，反之亦然

20. 當然我只係大約憑個印象，照計你得閒可以搵下實際上個關係係點，又或者係領先幾多個月，大把人做呢啲研究（或者我遲下send畀你）。最後都提醒返，世事無絶對，特別不能只睇單一指標，況且我一路都覺得啲基金經理係咪如實作答？特別係當知道其他人又會睇住呢啲東西做指標時。

21. 寫完就14:40，比想像中快。記住仲有篇答讀者問題。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6