Off notification 有益身心．港股依然相當強，說好了的資本外逃。我挑。標普指數跌19.9%，「但其實跌乜？」到底通脹有冇拖累盈利？ (Patreon)

Off notification 有益身心

港股依然相當強，說好了的資本外逃。我挑。

標普指數跌19.9%，「但其實跌乜？」

到底通脹有冇拖累盈利？

Off notification 有益身心

1. 寫文時大約星期五中午點。早兩日出完篇港紙世紀大作（好睇的），都元氣大傷，你地嘅反應幾好，令我覺得付出咁多時間都值得，不過最好推介埋我個Patreon畀朋友。而同時間我發現，在Facebook Page呢篇文嘅推廣，就冇乜人理的。我估係因為時間問題，如果我求其寫但上星期三四出，街外人嘅反應會好啲

2. 但又畀你見到一樣嘢：好多人對好多事情，特別係金融新聞，都係十分「反射」，十分短視。嗰期有人講嗰啲嘢，佢咪覺得嗰樣嘢好重要—但覺得好重要嘅嘢，三日後就冇人講，又變得唔重要。呢個係而家世界嘅現象（因為社交網仲有通訊軟件），唔止係金融。亦係人性，你同我都會，但儘量避免。強調返，唔止係重覆咁叫你「睇長線，忽略啲雜音」。仲有就係唔好咁「responsive」。畀其他嘢牽住你走，嗰期興乜你就買乜，嗰期多人買嘢你就買，所以我其實經常建議大家上少啲社交網

3. 但即使你唔上社交網唔睇新聞都好，whatsapp TG你好難避，不過另外留意，我係長期off notification 的—呢個應該係所有人都應該做。唔關我唔使返工事，我返工時都係咁。Notification 係一樣令人極分心嘅嘢。

4. 好似講遠咗，但因為呢兩日又睇醫生又各樣嘢，結果道指大跌1100點嗰（星期三晚）都冇出文講，因為星期四朝出咗篇世紀大作１。但呢排市場上有不少嘢我想講返的，可能係早一兩日嘅嘢，但都值得思考。好可能我週末都會講埋。

5. 另外，部份讀者對篇世紀大作嘅跟進問題，可能我都會週末或星期一在文入面答。

港股依然相當強，說好了的資本外逃。我挑。

6. 港股方面，冇乜想講，係OK強的，「明明又話走資」，你見跑贏晒美股。先重溫下，星期二大升（有寫到），星期三升些少，星期四就跌返500點，但留意星期三晚美股跌1100點喎，加上騰訊業績唔得，咁先500點，實則好強。然後到星期五暫時我見到恒指都幾好，近期啲中概股都強，似乎啲政策真係轉向。我對中資科技股嘅睇法，應該都不用再重覆，都係而家可買，但買大唔買細。

7. 仲有個別股票想講，可能留返週末或星期一講。重點都係講美股。

標普指數跌19.9%，「但其實跌乜？」

8. 美股方面，又係同你重溫下，都有啲難捉摸（所以，點「確認」？）。星期二晚彈得幾好啦，但留意嗰晚Walmart出業績，股價已大插，但冇影響大市。到星期三晚呢，大件事，道指跌1100點，2020年以嚟單日跌幅，原因？嗰日到Target 出業績，咁Target固然大跌，但拖跌埋成個股市。呢個係有啲奇怪的，星期二Walmart就冇拖晒其他嘢，反而到星期三Target先會？但我只係指出呢樣嘢，而唔係話「唔合理」—股市嘅嘢就係咁。

9. 然後到星期四晚，美股都係麻麻地，但至少跌幅低位收窄返啲。留意到Kohl's調低盈利預測，但股價單日係由大跌變返升的。

10. 再建議你，睇下呢兩日信報嘅美股round up（星期三晚，星期四晚）—平時未必會叫你睇，呢兩日比較多嘢睇。

11. 好啦，揀幾樣嘢嚟講。首先，之前我估見底，但呢兩日嘅跌幅已經跌突咗，標普已經再試今年低位。甚至講標普指數好接近「熊市」—但當然，幾時我都話呢啲量度冇乜意思，19.9%又點？20.1%又點？有乜分別？但好可能嚟緊呢兩日掂一掂，你又會收到好多news alert講「熊市」。而事實上，標指而家高位就剛好跌咗19.9%—低位3859，高位4819。另外你亦留意，有時啲人用收市計，有啲就計埋intraday，更加複雜。

12. 我比較肯定嘅係，現水平我都仲係算放心買。咁你話我幾時都放心，但留意債息仲要跌咗啲（雖然唔係好多）。

到底通脹有冇拖累盈利？

13. 好啦，到底…….呢幾日又跌乜？可以分開幾個層面睇。首先，上面講咗嘅零售商業績，一致地差，亦幾明顯同通脹有關。於是有呢個「通脹拖累企業盈利」嘅講法—但留意，只係講理論，冇乜意思，睇下實數。以前都見到，公司往往可以將壓力加落消費者度，呢浸亦見到之前唔少公司真係可以（例如Johnson and Johnson, P&G之類）。

14. 咁到底情況係點？又記得，上一浸嘅業績期（4月尾），普遍都唔太差的。一百萬嘅問題就係，到底只係呢幾間呢排出業績嘅零售商嘅問題，定係4月尾嗰浸嗰堆公司業績仲OK，只係因為時辰未到，未反映？

15. 答案係……兩樣都有啲。而你見呢排應用材料Applied Materials，或者思科Cisco出嘅業績，都係麻麻地的，所以越嚟越多人擔心，係咪通脹會打擊埋啲企業盈利。

16. 記住所謂通脹對股市嘅打擊（唔一定次次出現），嚟自兩方面。正如成日講，市值係盈利X市盈率（即係估值）。通脹可能會打擊部份公司嘅盈利，但未必係多數公司，況且就算會打擊，都只係短期—因為你見人類嘅歷史就係不停咁通脹，企業越賺越多，只係轉成本轉嫁去消費者身上，或者減成本（炒人？）要啲時間。

17. 所以通脹對股市往往更大嘅打擊，嚟自估值　—因為有時通脹跟埋加息同債息升，往往就拉低估值—變咗你公司盈利可能根本在通脹下有得升，但補唔返估值下跌。

18. 解完一大輪後，想講嘅係：照計你話通脹對「估值」嗰部份嘅打擊，應該都反映咗唔少（未必全部），你見啲債息呢排都係上上落落，冇再破頂。但反而對「盈利」有幾大打擊，就仲未知。原本以為唔太大，但如果之後一路嘅業績見到比預期大，就係「新嘅嘢」，記住，股市係會反映新嘅東西，咁就有機會再有哦下跌空間—但我冇話一定會發生，又繼續觀察下咯。

19. 正面嘅係，通脹似乎係見咗頂嘅，所以即使你之後見到啲盈利唔得，都可能滯後晒，記住股市炒將來，不過唔好忘記一樣嘢，仲有「衰退」，就真係週末或星期一先講。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6