［101掃盲文］香港聯匯點運作。全世界各種匯率機制。港紙做乜弱勢。有乜影響。會唔會守唔住。 (Patreon)

掃盲篇—香港聯匯

香港點解會用美金？點解唔係用英鎊/人民幣/Bitcoin？

到底聯繫匯率點操作？點解可以守住7.85？會唔會乾塘？

掃盲篇—全世界各種匯率機制

點解唔可以又有自己貨幣政策，又資本自由進出，又唔怕匯率波動？

各個制度有乜優點缺點？有冇一個完美嘅貨幣制度？

爆煲篇

點解美國加息香港冇加？唔跟加有乜後果？

但唔係話香港冇自己貨幣政策咩咁點加息？

點解呢排港紙咁弱？之後會點？

金管局不停接錢，會唔會乾塘？

一日走幾億港紙，好驚喎。

銀行體系結餘到底係乜春？點解3000億咁少？一人5萬蚊？

金管局一日接幾十億喎，3000億銀行結餘，好快清零！

銀行體系結餘幾多先「夠」？一路跌會點？

到底香港有幾多「錢」？點先提得爆？

股市篇

「我明明見到2018年港紙弱恒指又跌喎」

聽日世界大戰篇

香港應該用乜？又會用乜？（留意係兩個唔同問題）

用錯機制有乜後果？歷史兩個：索羅斯狙擊英鎊，亞洲金融風暴

聯繫匯率使唔使美國「同意」先可以用？

香港會唔會被踢出SWIFT？踢出咗又有乜後果？

咁我使唔使將啲港紙換晒美金？

超長，你可以分開幾日甚至幾個星期睇。但睇完一次以後就明晒了

1. 呢篇文，首先一個短引子，然後畀啲數字你抄低。之後講兩樣基本嘢：第一係聯繫匯率嘅機制。第二係各種貨幣制度嘅比較，同優劣。有咗呢啲基本知識，之後答上面嘅一抽問題就唔難。

2. 上面呢堆問題，唔係完全順序答，因為好多都互相關連，但大約都筫順序，睇晒成篇就答晒。仲有，開頭嗰堆，可能你未必好有興趣，悶同長氣啲，但好多人連基本嘅嘢都搞錯晒。反而了解咗開頭堆嘢後，最尾你最關心嘅一堆問題，就相當易答。

3. 其實啲友最關心嗰堆問題，絶大多數都係冇乜意義。等於你問中美會唔會開戰，我生唔生仔好。

引子

4. 呢個課題，每幾年就翻炒一次，特別係在人人扮專家嘅年代，亦加埋近年嘅政治氣氛。但，2019年有人講，我會理解，畢竟社會不穩，開口埋口都講政治。但而家先忽然又講，我就完全不能理解，仲要近期港股幾好。就係因為港紙掂到7.85？你未見過咩？定因為雷鼎鳴講嘢？

5. 在呢個課題上，雷鼎鳴就肯定唔係唔識嘢嘅，但佢有乜動機，係放風定主動獻計就唔知，有冇人會聽佢講，亦唔知，我估冇乜人理佢。而如果你睇真啲個訪問，佢講嘅嘢冇乜特別，只係話而家「冇咁適宜」，亦都有講應該做好準備。但當然媒體同你啲網友就只會標題黨無限放大。無論如何只係就事論事，最尾會討論佢提出嘅嘢

數字

6. 好啦，首先畀幾個數字你。你可以抄低佢。香港而家嘅銀行體系結餘，3000億（港紙，下同）多啲，日日公佈。香港銀行總存款，15萬億港紙，當中一半係港紙存款，另外大約一半係美金）一個月公佈一次，政府有，金管局仲早（但個Excel好煩的）。香港股市成交，一日1000億。

7. 呢啲數字，就冇可能造假的，如果你覺得係假嘅，咁真係唔使再討論。

8. 例如存款，你睇上市公司年報，匯豐6萬億，中銀香港2.3萬億，恒生1.2萬億（留意全部包埋外幣存款，但以港紙計），全部係同總額15萬億啱數的。呢啲全部要出面audit，邊有得長年造假？睇少啲垃圾KOL吧。（順帶一講，呢幾間銀行嘅數當然唔係完全準，例如恒生會有埋大陸，中銀香港有東南亞。而匯豐，留意係睇「香港上海滙豐銀行」，唔係HSBC，否則就會數多咗。仲有，你諗真啲，實情匯豐個數，係包埋恒生的）。

9. 記住，齋講廢話好易，「日日去銀行拎兩萬蚊可以拖冧銀行」。但你睇埋數字咪知得唔得。

掃盲篇—香港聯匯

香港點解會用美金？點解唔係用英鎊/人民幣/Bitcoin？

到底聯繫匯率點操作？點解可以守住7.85？會唔會乾塘？

10. 好啦，關於香港貨幣制度嘅歷史，極速講，實在維基百科都講得好詳細（中文都有），唔明做乜好多人都搞錯。二次大戰前用銀本位，日本軍票就唔講了，戰後掛英鎊直到1970年代—但留意當年英鎊都唔係自由浮動（都話尼克遜廢除金本位先剛剛50年），之後掛咗一陣美金，然後又自由浮動咗一排（1974-1983）。然後就好多人知，1983，前途問題（中國收返香港），人心惶惶，就定咗固定掛住美金，7.8—差不多就去到今日都冇乜嘢變過。

11. 唯獨係咩7.75 - 7.85呢個band，係2005年出現嘅，呢度你要留意下，雖然只係一個小小嘅優化，但2005年前就冇7.75-7.85呢回事。

12. 到底點運作？點樣保持呢個7.75-7.85？主要係兩樣嘢，第一，有樣叫「負債證明書」嘅東西，certificate of indebtedness，在發鈔銀行盤數會見到（即係匯豐渣打同中銀香港，in case有人剛偷渡落嚟），留意非發鈔銀行就冇嘅。

13. 詳細機制唔解，但總之，你要發港紙，就要存等值嘅美金去金管局。

14. 這很重要，因為咁亦即係話，你見到嘅所有港紙，都係有等值嘅美金back up！「其實我覺得講到呢度，呢篇文都講完」。實際上，back up嘅美金，係流通港紙嘅幾倍（好似大約7倍），因為金管局同政府仲有其他東西。

15. （仲有，如果你好好學，見唔見到上面嘅表有「政府發行流通紙幣和硬幣」？留意新10蚊紙（膠嗰啲），同埋硬幣，就唔係發鈔銀行嘅，係政府發，你可以拎上手睇下）

16. 咁當然你可以話，扯，美國制裁你就全部變廢紙啦，都好似係的（亦係雷生講嘅嘢之一），雖然我唔係好肯定係咪有識認—但，亦即係除非你見到美國全部充公晒或唔認數，否則，好多討論就真係廢話。我不能因為聽日有機會撞車死，就唔出街的。

17. 第二，關於嗰個7.75 - 7.85嘅東西，主要就係靠一樣嘢：套戥（arbitrage），亦即係市場上啲友會「套利」，將啲「近乎冇風險」嘅利潤拎走。

18. 假設我係套利者，只要我相信港紙美金唔會脫勾（佢地往往炒幾日，而反正上面講咗香港有more than enough嘅美金），就計到數了。

19. 假設港紙嘅拆息同美金嘅拆息唔同（留意，拆息係銀行之間拆借嘅利息，唔係債息，亦唔係你去銀行存錢或借錢嘅息口，完全市場機制，陣間會詳細解），例如港紙1厘 美金2厘咁，咁有乜事會發生？我梗係借平存貴，用1厘息成本借港紙，然後轉做美金，收2厘息，白賺1厘息。只要你唔脫勾，咪實賺。當然你可以話幾時都有個好細嘅機會脫勾，正如出街都會撞車，但個機會夠細，誘因夠大咪得。

20. 咁但，上述過程不停咁有人去將港紙轉做美金。亦即係沽港紙買美金，所謂嘅「走資」就只係呢樣嘢，亦係你呢排見到嘅嘢，咁會點？不停賣港紙，你咪會見到港紙一路弱，一路去到7.85。然後往往去到某個時間，金管局就會「入市」，接走啲友沽出嚟嘅港紙，啲港紙在市場消失咗。少咗港紙會點？銀根緊咗，供應少咗，咪難咗拎，當然港紙拆息就會升返，慢慢就由1厘升返上去貼近美金2厘嘅位。

21. 刁！就係咁之嘛！呢個咪而家發生嘅事咯。真係好難明？邊忽同咩「沽股票」「撤資」有關？都話，金管局接盤，而家都不過係幾十億，你睇下香港股市幾多成交？何況，只係呢排接啫，平時好多人都玩手指，拉勻平均，一日得幾億港紙。

22. 如果係港紙2厘息美金1厘息呢？咪掉返轉，你自己作一次文，當練習啦。

23. 好啦，問題時間。你話，係咪真係有人咁做？梗係日日有啦，銀行啲Dealer咪做呢啲嘢，我以前都做過。理論上只要有著數，就有人做架啦，做到好大額都得（因為個息差往往好細，當然要做到幾十億先有so）

24. 實際上有乜其他問題？都有啲技術細節

25. 首先，因為種種問題，有時你見個息差存在，但都冇人去套利的。近年可能係compliance嘅問題，Dealer少做少錯，賺咗又唔係自己，有乜事仲要畀人將軍。以前冇咁多呢啲問題，所以你見以前有少少息差就有人去套，而家要再多啲息差先有人做嘢。

26. 上面個圖係過去十幾年嘅情況，但個圖好難睇，我亦不細解，一條線美金拆息一條港紙拆息，你可以留意右邊嘅最高最低同平均值

27. 第二個圖就只係今年，易啲明，見到個息差一路升，港紙咪一路跌，有幾難明？

28. 另外，有時真係個息差好大都冇人去馬。原因？就真係冇信心，估你會脫勾。多數金融危機就會咁，例如1998年嘅亞洲銀融風暴。陣間會細解，但若果你經濟好差，咁應該係在匯率會反映—如果你固定住個匯率，就會在其他嘢反映—例如股樓會跌，例如會通脹或通縮咁。有啲國家會選擇棄守。但香港嘅「往績」幾良好，寧願付啲代價都要頂住，嗰時任志剛話，你郁得一次，下次就冇人信你真係不惜代價架啦。

29. 講到呢度，大家應該幾清楚，不過仲要講多樣嘢：到底呢個世界上有乜匯率機制？有乜好壞？點解香港要用聯匯？唔用得唔得？

有冇其他匯率機制啱用？各自有乜優點缺點？

30. 詳情你可以睇舊文（呢篇寫得幾好），呢度只大約講。世界上不同嘅匯率機制，到頭嚟都係三樣東西。但，我地先講呢個著名嘅「不可能三角」：

31. 即係乜？即係，任何匯率機制都好，以下三樣嘢，只能三選二，不能三樣兼得。邊三樣？第一，固定（或者叫做穩定）匯率。第二，資金自由進出。第三，獨立自主嘅貨幣政策

32. 呢三樣聽落都係好東西，回定匯率就免除好多因為匯率波動造成嘅不便同動盪。資金自由進出當然有利金融或者貿易。獨立自主嘅貨幣政策就令你可以對症下藥，揀最啱自己嘅東西。

33. 但，任何地方都好，只能三選二，不能要晒。原因在舊文已寫過，簡單嚟講，會有市場力量郁動你嘅匯率，除非你落閘限制資本進出。

34. 英國日本之類，就要資本自由進出（留意都係近幾十年嘅事咋下），要獨立貨幣政策，於是匯率會唔穩定。香港呢？要資本自由進出，要匯率穩定，但冇咗自己嘅貨幣政策（請記住呢點！）。大陸呢？簡單，要匯率穩定，但又要有自己貨幣政策，所以啲資本就不能自由進出。（至於歐元區，比較複雜，視乎你睇一個個國家，定成個區咁睇。各自國家，咪冇咗貨幣政策，但對區內其他國家匯率係穩定的，資本亦自由進出。如果成個歐元區一舊嘢咁睇，咪好似日本英國咁）

35. 好啦，邊種政策最好？其實各有不同，亦因時而變。唔好忘記，都話尼克遜廢除金本位先係50年，啲國際貨幣自由亂浮，歷史更加短。冇人話一定係最好。

36. 香港應該用邊套？又會用邊套？最尾講。但提示：你可以諗下香港嘅經濟周期，最受邊度影響。N年前可能係英國，「日佔時期係日本」（可能都唔使括號），後來（二戰後）係美國，而家？你話呢？但當然，掛人民幣，講就易，實情好難。

37. 好啦，大家上面啲基本功做得好，之後啲問題，就好易明，亦唔使我重覆。

點解美國加息香港冇加？唔跟加有乜後果？

但唔係話香港冇自己貨幣政策咩咁點加息？

38. 呢個問題，由問到答，都會試到好多人，根本完全唔知，亦都唔嚴謹。

39. 美國點解加息，大家知啦，通脹嘛。點加息？咪嗰班友開個會，然後出嚟講加息。但加嘅係咩息？係聯邦基金利率Fed Fund rate，呢個東西係短息，但可以慢慢傳導去市場，就會影響美金拆息—留意拆息都係短息，一般幾日或者幾個月，唔會超過一年

40. 留意，去到債息，係另一回事。2年嘅債息，都會受聯儲局間接影響，但主要係基於大家預期。例如聯儲局忽然講明今年加8次息，咁你2年債息當然受好大影響。但去到10年，就未必係咁大影響了，因為你都係話今年加8次啫，5年10年後點知，都只係主要係市場力量（除非聯儲局直接入市買，一路都有，但係另一回事，同議息無關）

41. 咁但，上面咪講咗，香港冇自己嘅貨幣政策架嘛！金管局有個貼現利率，但只係畀銀行借救命錢用，亦一般係完全自動波跟美國，你唔會見到金管局有班人開會討論通脹呀經濟呀失業呀然後決定加唔加息—咪話咗香港冇自主貨幣政策！

42. 咁成日聽人講，香港冇跟（或者有跟）美國加息，又係咩一回事？呢啲就美麗的誤會了。

43. 你睇傳媒見到嘅，其實係講香港銀行嘅最優惠利率（P，prime），事實上係商業決定，從來冇話要跟美國—有時跟得幾足，但有時完全唔足。上次加息周期，美國加咗9次息，但prime只係升咗0.125（半次）。

44. 但，實情，又如何？應該好大多人都知，近N年，個個供樓都用H按（港紙拆息HIBOR做基準），好少會用p．咁係咪完全冇影響？又唔係，因為H按有「封頂」，多數同個p有關，有間接影響。所以郁咗個P，咪自然有機會供樓供貴啲（或平啲）。

45. 至於點解銀行冇加p？就真係商業決定。最近呢兩次美國加息，香港都冇加p，亦因為錢太多，個銀行體系結餘好多錢—但好可能會流走，呢幾日你咪見到。流流下會點？錢少咗，就會有加息壓力。亦係上面講嘅嘢。

46. 但亦都同樣地，香港嘅拆息，亦係市場機制。就唔需要你金管局或銀行出嚟「加減」的。正係因為港紙拆息低，咪觸發咗上面我地講過嘅機制，你咪見到港紙一路弱，然後金管局一路接，港紙結餘越嚟越少，咪扯高返個拆息。明冇？

47. 最後，邊度睇拆息？港紙嘅，「報紙有報」，金管局每日數據都有，或者上銀行公會網，你揀唔同日期，會好清楚見到拆息升咗。美金呢？我都唔係好肯定，以前用BBA（英國銀行公會），而家應該用ICE（洲際交易所）。或者睇呢度。

48. 順帶一提，好多借錢，包括供樓嘅，都係同H（港紙拆息）掛勾，所以，你根本唔使等銀行「加息（P）」，自然就供多咗架啦，我都係，之後會供多更多，因為拆息會一路上。所以嚴格嚟講，點會係「冇跟加息」？

點解呢排港紙咁弱？之後會點？

金管局不停接錢，會唔會乾塘？

一日走幾億港紙，好驚喎。

銀行體系結餘到底係乜春？點解3000億咁少？一人5萬蚊？

金管局一日接幾十億喎，3000億銀行結餘，好快清零！

銀行體系結餘幾多先「夠」？一路跌會點？

到底香港有幾多「錢」？點先提得爆？

49. 點解港紙咁弱？好簡單，因為之前太多「港紙」（你可以當係「銀行體系結餘」，陣間解係乜）。所以個拆息偏低，低過美金。咁根據我地篇文最初講嘅機制，你咪知會發生乜事咯。咪會掂到7.85—根本同咩資金外流冇關。（雖然，技術上都係「資金」外流）

50. 然後睇下金管局接錢，呢度就係最新嘅紀錄，5次，一日幾十億咁。全部對得返傳媒報導，你亦可以抄低，陣間會有用到。但，再講一次，股市都一日1000億成交啦，呢啲錢根本唔係咩沽股票嘅錢，而係套利嘅錢。

51. 金管局會唔會乾塘？咪講過，你有幾多港紙，背後就有幾多美金。你街外人邊度變多啲港紙出嚟沽？

52. 呢度，就解埋咩係「銀行體系結餘」—實情都有少少難解。但，你可以理解做，呢啲就係各銀行放在金管局嘅「現金」。留意只係「現金」，因為銀行放在金管局嘅，仲可以係以「外匯基金票據」嘅形式存在，咪高啲息。

53. 你要記住，銀行係好唔鍾意「現金」嘅，因為近乎冇息收，白蝕，以前我在招行就做呢啲嘢。咁你會見到，銀行同業會有拆借，我有錢咪拆畀你（畀同業收嘅息當然好過畀金管局），而有啲外資行長期係借同業錢的，例如之前發輪嗰啲咩SocGen（法興）之類。唔係佢地「好唔掂」，而係商業計算—我問同業借，好過自己又要開分行又要同啲有錢佬打交道啦。於是乎，有啲行多錢就拆畀行家，有人就缺錢要問人借—但成個體系嘅net position，係好少錢的！因為太多錢，銀行就寧願買其他嘢（外匯基金票據，普通債券又得，甚至我轉做美金買美債都得）

54. 有幾少？上面講過，銀行體系結餘，得3000億。但銀行體糸存款，係15萬億。50倍！你話得唔得？梗係得！再少都得！

55. 呢度插播一句，之前咪話金管局啲操作，會令市場嘅「港紙」多咗少咗嘅，其中一部份就係呢個「銀行體系結餘」。所以，近期金管局不斷接錢，銀行體系結餘咪不停跌。佢網頁有好詳細話你知。不過好多時夾埋幾次（多數係早晚，但有時一日幾劑），

56. 例如圖中你見到嘅69.47億，就係40.82億加28.65億。留意你可以睇返之前每一日

57. 其他將來日子亦都見到。點解會之後幾日先反映？因為外匯結算唔係即日（好似）

58. 呢度亦可以重覆講一次，「銀行體系結餘」（之後簡稱叫結餘，費事打咁多字），唔係香港有幾多「錢」或幾多「港紙」呀大佬。我計600萬人（齊頭易計），3000億「銀行體系結餘」，一人5萬蚊，你覺得合唔合符你常識？係咪15萬億嘅存款，一人250萬，比較合符常識？

59. 但當然有好多技術細節，包括啲錢唔少未必係香港人，而人嘅財富又未必係放咗銀行，亦有好多根本係企業嘅存款。但即係咁講。

60. 如果真係想知，有幾多「港紙」，大約可以參考下呢個「港元貨幣基礎」。講到尾，咩係「錢」？都唔係咁易答。

61. 肯定嘅係，金管局一路接錢，個結餘，真係不停跌的，上面你睇金管局網頁嘅數都見。於是你心諗，喂，金管一日接幾十億，你個結餘3000億，咪好快歸零？仲唔大亂？同埋，個結餘，跌到幾多會有危險？

62. 於是乎，又可以睇歷史，唔係好耐之前。見唔見，2015尾，當年結餘，係4300億？一路跌到2019頭，差不多800億。然後，到2020頭，大半年內就上返4500億，舊年年中再開始跌。

63. 好啦，比你估下，係因為乜？好簡單，咪就係因為美國嘅政策。2015，咪美國開始加息。咪就係加到2019停，所以你咪見港紙有壓力，個結餘係咁跌。然後咪2020爆肺炎，美國咪極速減息印錢，個結餘咪即時大升。到舊年開始講加息縮表，咪跌！完全就係跟足美國。

64. 亦都可以反駁啲咩政治青講嘅嘢。如果你話呢啲叫「走資」？你睇，「走資」，係2015-2018嘅嘢，根本2019年示威前已走晒，「之後行國安法就啲錢返晒嚟添」。

65. 於是再答到你，根本個結餘，2019年跌到700億你都仲未見有乜異樣，市場仲係太多游資了（多得美國印錢）。只係兩年前，咁當年夠，點會而家唔夠？

66. 再畀長啲歷史你睇，你見個結餘，係2008年尾開始極速膨脹。2007年先100億，2008年尾去到1600億！知唔知2008年尾發生乜事？正係雷曼爆煲後嘅印銀紙QE，明冇？

67. 固然，2007年到而家，銀行體系大咗唔少。但你睇存款貸款，都只係升咗幾倍。但個結餘升咗幾十倍（2007係100億，而家3000億）—所以呢個結餘，甚至同你銀行啲存款數字都係脫節的。（話埋你知，呢啲圖係Blomberg，以前在公司save落，而家冇得用了。但你上金管局或政府網頁都有，不過要自己執咁解）

68. 然後計下數，咪話2015嗰浸，由4000億「走」到700億？大約4年。咁即係，一年大約「走」800億，一日兩三億嘢　—　係咪你心目中嗰啲「外資切尼」？仆街（要講粗口了），一日一個大陸佬買層樓都唔止啦。

69. 銀行體系結餘一路跌咁會點？咁呢幾日你見點丫？「股市升咯」。但你話，3000億咋喎（係事實），一日又減幾十億（都係事實），咁一路減落去會點？係咪好快去到零？去到乜位危險？

70. 可以重覆一次上面講嘅嘢，2019年，你見跌到700億，都冇乜事發生，除咗你啲傻仔網友不停話爆煲，完全冇見有咩異樣，係咪？

71. 事實上，一路跌落去，正如上面解，結餘越嚟越少，街上嘅港紙越嚟越少，「供求定律」（是咁用的）話你知，拆息自然會升，畢竟利息就係cost of money．2015-2019嗰幾年亦係咁。

72. 之前講過，個調節機制，係靠套利。你話，會唔會啲友明明見到有套利機會，都唔去做，特登製造不穩？相信機會好微，特別係，中資嘅銀行，同埋中銀香港都可以做。況且，我亦唔相信恒生匯豐之類，會「特登製造不穩」，

「我明明見到2018年港紙弱恒指又跌喎」

73. 然後講下股市，畀港匯你睇，又畀埋恒指你對下。有冇關係？好似有少少關係，但絶對唔明顯。

74. 2005年前根本冇7.75-7.85呢回事，所以唔睇咁遠，睇近10年。港紙幾時係轉弱過？就係2016年好短一浸，仲有2017至2018年頭。之後2019年都係貼7.85多，2020年又去返強，2021年開始變弱

75. 好啦，關係明唔明顯？呢兩年就好似真係港紙弱港股又差，但今年都唔見得特別差過美股。2020年港紙強咩？港股咪又跌。2019年港紙差，你話咩政局不穩走資，但嗰年港股升喎。2018年就真係港紙弱港股弱。但2017年港紙弱港股又照升喎

76. 兩者有乜關係？我就睇唔到有乜好明顯關係，我唔明點解啲人不停覺得好有關係。

77. 但值得補充嘅係，頭先都講過，銀行體系結餘升跌，好大程度同美國放水收水有關。而美國一放水，當然結餘升，美匯多數弱，股票多數又升，所以呢個先係主要原因。

78. 最後解答你啲地疑難：

用錯機制有乜後果？歷史兩個：索羅斯狙擊英鎊，亞洲金融風暴

79. 有啲人嘅諗法，覺得決定用乜制度，係一國主權，點會外判比人？但事實並唔係咁。一個字：EURO。人地全部都唔要貨幣政策主權，用一隻唔屬於自己嘅貨幣。同樣地，英殖年代港紙都已經掛美金啦。

80. 學術啲嘅，聽過「歐元之父」蒙岱爾啦可？佢講「最優貨幣圈」，一句到尾，你嘅經濟周期係跟邊度，咪用邊隻貨幣比較合適。

81. 夾硬嚟會有乜後果？用啲唔適合自己嘅貨幣有乜後果？即係衣不稱身買錯bra咁。可以睇返我舊文。你用一啲唔適合嘅匯率機制，就往往有一定後果。抽象啲講，如果香港經濟好差但美國經濟好好，咁人地要加息，你焗跟，會點？好可能拖累你嘅經濟同埋資產價值。掉轉，美國經濟唔好要寬鬆，但香港經濟好，咁又會點？

82. 未有咁多政治陰謀論前，例如2014年之前，過去十幾年香港啲樓價狂升，當時就有好多人講香港跟美國聯匯，而美國係咁印錢，搞到啲樓係咁升，係有一定道理的。「不過嗰時個個話聯匯拖累香港」「而家又話郁咗好大鑊」

83. 講真實例子嘅，篇舊文有寫。亞洲金融風暴，就係因為東南亞各國緊盯美元，但又唔敢落資本管制（唯獨馬來西亞敢，結果畀鬼媒不停鬧，但亦因為咁馬來西亞復蘇最快，所以啲鬼佬嘢唔好信十足）。

84. 另一更出名嘅例子，索羅斯狙擊英鎊。當時英國跟歐洲匯率機制，變相差不多要跟德國嘅貨幣政策—但德國統一後通脹，要加息，而英國就經濟差。最後發現代價太大，唯有退出＝索羅斯就係睇死呢樣嘢而大賺一筆。

85. 香港在亞洲金融風暴嘅情況，都有啲似。你要記住，除非你落資本管制，否則市場係會自己調節的。香港當時一路都冇郁過聯匯，咁好簡單，你匯率唔變，啲樓咪會跌，亦因為咁當時通縮。

香港應該用乜？又會用乜？（留意係兩個唔同問題）

86. 既然香港冇獨立過，咁所以自己有獨立貨幣政策嘅機會，近乎冇。以前英國冇畀你，而家中國更加唔會畀你，應該冇人反對？

87. 咁以前，英殖年代去到回歸初期，掛美金，相當合理。原因好簡單，同官方講嘅差不多，香港係一個外向型經濟，本土冇乜產業，做嘅係全球貿易同金融。咁既然美國最大，當然就掛美金。唔通掛紐西蘭紙？

88. 用美金，亦都係因為香港嘅經濟周期，或多或少會同美國同步，特別係二戰後嗰幾十年。美國一國獨大。

89. 但最近20年真係有啲改變。主要就係因為……中國經濟規模大咗好多，同香港往來亦多咗好多。亦變相令到香港嘅經濟周期，好可能係跟大陸多過跟美國。況且，美國在全球嘅經濟份額亦係跌咗（亦係多得中國，同埋印度）。再加埋回歸咗大陸。

90. 所以，實情呢，掛人民幣就係最合理的。

91. 咁但，點解唔掛？好簡單，兩個問題。第一，中國同香港行唔同制度嘛。我唔係講政體（香港有民主咩？），或者咩資本主義共產主義（大陸真係共產咩？）

92. 而係樓上講咗，大陸行自主貨幣政策匯率穩定但唔要資金自由進出。香港資金自由進出匯率穩定但唔要自主貨幣政策

93. 咁你話，大家用同一套咪得。而你應該唔會幻想大陸跟你嗰套架可？咁即係香港都用嗰套，得唔得？掛人民幣咯

94. 問題就嚟啦，人民幣唔係自由流通嘛，而你見人民幣自由流通呢樣嘢，十幾廿年前都仲係有啲進展，而家反而更倒退。可見將來都唔會做。咁既然你唔係自由流通，上面講嗰啲聯匯機制，完全做唔到喎。

95. 咁你話，掛美金會畀人制裁喎，唔畀你用點算？呢個問題下面詳細討論。但，你掛英鎊掛歐羅都係有機會畀人制裁架啦！而又掛唔到人民幣。咁你話，唔掛美金，可以有乜選擇？

96. 我驚你以為我hea答你，但以下嘅問題（即係樓上未討論嘅），多數都係冇意思嘅。2019年夠個個講到爆煲啦，港紙爆煲未？踢咗香港出SWIFT未？Kyle Bass發左達未？

聯繫匯率使唔使美國「同意」先可以用？

97. 劏房波講過，「唔使經美國同意」。真定假？again, yes and no，大家亦係立場行先，你睇大紀元咪話荒謬，你睇星島咪話唔使外國同意。

98. 真相？事實當年香港用聯繫匯率，的確唔使美國同意。但，當年係英殖年代嘛，梗係冇問題。回歸後亦不見得要美國同意。之但係，一直默許，同埋「同意」，又係兩回事。而「唔使佢同意」，同埋「如果佢反對有乜後果」，又係兩回事。

99. 只能答你，「其實都係問錯問題」。Technically，都真係唔使美國同意，都講過，香港有幾多港紙，就有幾多等值嘅美金頂住。問題係，你講到「最極端」嘅，扯，禁晒你所有銀行交易都得，充公晒你都得，邊個換美金就邊個係恐怖份子，邊間香港銀行開門就射核彈，「有乜唔得」

100. 係真喎，發唔發現，呢啲問題都係冇意思？

101. 比較值得問嘅係，要做嘅，一早可以做啦。咁點解之前唔做？要而家做？我睇唔到而家有乜情況係比2019年更緊張喎。

香港會唔會被踢出SWIFT？

102. 其實，絶對係問錯問題。等於你問「聽日會唔會核戰？」咁。會又點，唔會又點？當然被踢出SWIFT嘅機會，點都大過核戰，所以唯有答你：機會當然有，但相當細—好啦，答咗你，咁你又點？

103. 你有冇發現啲人根本唔係想討論問題，甚至唔係想問問題？覺得會嘅，咪日日話會（但唔見佢瞓身家沽空港股喎），覺得唔會嘅，咪唔會。最後咪又係嘥時間噴口水

104. 但正經啲答，既然可以將俄羅斯踢走，當然可以對住中國或者香港照辦煮碗。但，正如可以禁俄羅斯出口，當然都可以禁中國禁香港—但做乜未做？總有不同盤算。再認真啲答，既然之前俄羅斯吞埋克里米亞都未有事，咁你可以當，中國唔去打台灣之類，怕且就唔會有呢啲嘢發生。

105. 滿意未？

106. 或者重覆頭先講嘅，要嘅，幾時都可以架。正如要射核彈炸咗金管局都得架。但，既然一路都可以做，又冇做，咁點解無啦啦會而家做？就係因為你啲網友講？

被踢出SWIFT有乜後果？

107. 「望下俄羅斯咪知」，咁當然經濟會重挫，特別係香港，丁屎咁細。但，你未見過經濟衰退咩？而當然正路地股樓都會大跌—但，唔通你今日開始日日瞓身沽空？

108. 見到冇？好多問題，問嚟，其實係…..幾廢的。

109. 不過可以肯定嘅係，睇完俄羅斯情況，中國同香港當然有準備過呢啲情況—但，「就唔係話你有準備就冇事嘅」。怕且佢地會諗啲方法將個影響減低。同埋亦認真講，中國嘅經濟規模比俄羅斯大N倍，內需亦都強N倍，美國係咪可以長期制裁中國，應該都有啲疑問。可能對中國係10個痛，對美國係3個痛，但唔好忘記美國要4年選一次總統，而中國唔使（當然，中國嘅威脅又遠比俄羅斯大，所以話唔定美國或美國人肯受更多苦？唔知噃）

我使唔使換晒美金？

110. 「而家先問？」，其實根本2019年甚至1997年你都可以問同樣嘅問題，答案亦都係一樣。亦都同樓下間銀行擠提，甚至係傳封城你去搶午餐肉差不多—你問花生友學者，當然話你知機會好細，「你啲人羊群心態小農DNA」。但係咪冇可能？又唔係。而反正去排隊拎錢，或買午餐肉，或轉啲錢轉晒做美金，用嘅時間同成本又唔多。唔放心嘅，咪轉咯。

111. 「但就唔好真係當樓下間銀行好快執笠」

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6