美股：納指低位升返8%，「明明話熊市」．港股：強力反彈，低位升返13%。．「明明話7.85走資」「明明20000點好關鍵穿咗就有排跌」Elon Musk彈出彈入壓價Twitter嘅啟示 (Patreon)

美股：納指低位升返8%，「明明話熊市」

港股：強力反彈，低位升返13%。

「明明話7.85走資」「明明20000點好關鍵穿咗就有排跌」

Elon Musk彈出彈入壓價Twitter嘅啟示

1. 港紙文已經寫完晒，入直路，執緊文配緊圖分緊段（你估易？），真係1萬字，但自覺幾滿意。

美股：納指低位升返8%

2. 真係冇呃你，話見底，就真係見了底。但當然好大程度都係主觀靠估。有關咩「確認」見底種種，昨日篇文有好詳細嘅討論，好睇的

3. 不重覆舊文，講啲新嘢。見到而家，標指低位升返6%，納指低位升返8%，恒指低位升返13%。當然，冇可能捉到個底。仲有，同高位比亦都仲爭一截（而唔好忘記一隻股票跌咗30%後，係要升返42%先回本）。

4. 但同時係示範你睇，真係好難「確認」見底，低位升返一成你地都冇人覺得「確認」啦。而當然人都係會同自己嘅成本比，我都會，但如果你係而家呢啲時間買嘅嘢，第時個市再反彈啲後，雖然你其他股票可能仲未回家，但新買嘅可能己經升唔少，補返啲。

5. 美股不詳細講，但首先留意，道指跑輸，主要係因為Walmart業績唔得，跌11%，但你見冇影響市場整體情緒。另外，亦見啲垃圾股好似都不錯，可能都係投資者再變得大膽嘅訊號。

港股：強力反彈，低位升返13%。「明明話7.85走資」

6. 好啦，港股星期二升得幾好，甚至比我預期中更好。我只講一句：你諗下，上星期四先成堆傻仔，又話「港紙弱走資」。見到冇？好多時睇多兩日，你就知好多講法荒謬之至。

7. 而贈多你一句：市場短期波動，往往好難解釋，所以有啲咩「因為咁咁咁就會一定咁咁咁」嘅，錯嘅機會都幾高。正如我唔係話「港紙越弱恒指越升」，我只係話你知，根本冇乜關係。

8. 同樣地，亦好多人迷信啲咩「支持位」「阻力位」，你見亦係好無聊的。我頂多會同你講歷史高位低位，或者52星期新高新低，作為一個參考。好偶然你會見我講250天線（所謂的「牛熊分界線」，但其實都唔準，不過又有時分分鐘準過你計咩高位跌20%）．

9. 正如你睇，恒指彈出彈入，20000點又得而復失又失而復得。之前有啲又話跌穿咗關鍵位又點有排跌，你見，真係絶大多數都係廢話。最大鑊係有啲人仲要同你講，唔係喎，有衍生工具在嗰啲位喎，有程式賣盤喎　—　係丫，但後來嘅發展，咪話你知啲講法站不住腳。況且，「有程式賣盤夠會有程式買盤捉你呢啲程式賣盤啦」。所以真係的，識少少嘅人，係大鑊過乜都唔識。

10. 但攻擊完一輪，我又要講返，我絶對明白大家點解會信呢啲嘢—因為需要安全感。人係鍾意搵pattern嘅動物（中國外國人古時都會見到天上星星聯埋一起做星座啦），係好難接受啲嘢就係「無常」。

11. 最後可以贈你一句：又唔係真係乜都冇得捉冇得解。但話你知，往往係長期，就會見到乜嘢先係真正影響，短期嘅，好多真係雜音。

12. 雖然，我好相信，港股係因為人民幣強勢所以強返，正如我都會話你知，好多時我睇美債債息。咁都好多時唔係完全準的（邊有得完全準），例如剛剛星期二晚，債息升返但美股照升仲係納指幾強，吹咩—但至少呢啲指標準確性，似乎高過咩「港紙走資」「2萬點好關鍵」。仲有，我幾時都唔會講得太盡。

13. 然後你諗下，咁多人會聽「港紙走資」論，根本同佢準唔準無關。係只係因為好多人「想佢發生」，呢啲話題永遠多人聽—但，股市嘅嘢，個個都想發達，但你見發達嘅係少數人定多數人？

14. 港股方面，真係OK的，你見今年仲跑贏美股（但講過多次，短線可能港股跑贏，長線，例如幾年，我都係估美股跑贏）。如果你話純計「香港」股仲勁，以前講過美國上市嘅EWH，純香港股ETF，冇大陸公司，冇騰訊冇內銀，你見，今年只係跌7%，跑贏晒啲指數

15. 至於做得好啲嘅，除咗上面兩個圖入面嘅東西，主要係科技股同汽車股。中資科技股嘅，我幾時都係有戒心，但唔係完全唔買，買少啲咁解，我只有一隻騰訊700，但你話呢啲位買阿里巴巴9988甚至京東9618之類，我覺得都OK。去到再差再冇盈利嗰啲，我就不了。另外汽車股，之前都提過下，呢排繼續強，但我一直都冇乜興趣，純粹話你知。

Elon Musk彈出彈入壓價Twitter嘅啟示

16. 超多啟示，但唔止同Twitter有關，冇買都睇下呢段

17. Twitter方面，都真係大師冇點你—早幾日我已經寫到明，Elon Musk係想壓價。而家佢都差不多講出口了。詳細故事，舊文有，我就不再重覆。

18. 最表面嘅教訓：當初已經同你講，唔好追入去。好多人只係諗，「有好消息」（佢買起），但，你都聽到嘅「好消息」，仲邊有人唔知？點推個股價再上？相反，你係要小心一啲你未知，或者市場都冇人估嘅壞消息（佢彈弓手）。你見股價一路冇去到佢提出收購嘅位，一路有啲OK大嘅折讓，當然係有原因，有人唔睇好。

19. 但再畀啲新嘅思考畀你。首先，有錢人都係會講價嘅，可以畀90蚊買到嘅，做乜要畀100蚊？呢個同投資未必好有關，但可能幫到大家做人處世。人地好多錢，同會畀錢你，係兩回事。對李嘉誠李澤楷嚟講，肯定幾百萬真係散紙啦，但，你試下食飯撞到佢，叫佢畀幾百萬，睇下制唔制？大家創業呀，做生意呀之類，真係要諗呢樣嘢。「係呀我Patreon只係100蚊」，對好多人嚟講真係過年畀看更都唔止（冇錯一年一次，但好多個看更嘛），但，你憑乜叫人科水？係要「有啲嘢」的。

20. 但第二，真係唔好以為「首富」好有錢。Elon Musk亦唔只係講價，亦真係有啲財政壓力，你見佢都想搵其他人合作，或者搵投行借錢！大家有冇諗過，個故事可能同好多人想像唔同？

21. Elon Musk作為人類史上最有錢嘅，唔係應該一切都隨心所欲，想買乜就買乜？當然大家知佢唔夠錢買起間蘋果，但，Twitter呢間看似唔大，股價又跌咗好多嘅公司，居然佢老哥都唔係話買就買，仲要搞咁多嘢？

22. 當中啟示，首先就係，好多鬼佬富豪，冇你想像中咁「有錢」（當然都仲係好有錢）。例如Elon Musk，係好有錢，但佢啲身家絶大多數就係Tesla股票—唔係話「只係紙上富貴」，佢當然亦可以拎去抵押借錢，亦可能沽咁啲，但拎住2000億Tesla股票，同拎住2000億美金，都真係幾唔同。

23. 點解我強調鬼佬？因為亞洲富豪，就唔係好一樣，上市公司嘅股票，未必佔佢地身家最多，或者至少比例低過鬼佬。呢啲同文化歷史都有關，但你見亞洲富豪，梗係另外好多房地產，好多現金或者收藏品。

24. 但，以上呢個現象，係咪亦都話到你知，點解美股跑贏全球？Elon Musk大半副身家都在Tesla，畢菲特大半副身家都在巴郡，命根嚟嘛。相反唔少亞洲公司，根本都唔係老闆命根，邊有動力去做好佢？再賤格啲嘅，直頭拎間公司嚟資助自己私人開支添。

25. 呢個亦同文化歷史有關，你想像你係大陸首富，你會唔會成副身家放在自己上市公司？梗係唔會啦，容乜易聽日畀人打沉你間公司，梗係啲錢買下海外樓咁（亦因為咁，香港啲樓好難平）。但美國，Donald Trump憎到Jeff Bezos死，但總不能封咗Amazon

26. 仲有，仲畀你見到一樣嘢：全球首富，買一間好似唔係太大仲跌咗好多嘅公司，都咁吃力—亦即係話，三流嘅企業，都仲勁過大過頂尖嘅個人。事實亦係咁，首富Elon Musk，2000億美金身家。但全球最大市值嘅公司蘋果，24000億市值。

27. 當中有乜啟示？可能Facebook page寫多啲，但同時留意埋：見唔見蘋果微軟呢啲，係唔會有一個「大股東」咁？亦唔係家族生意。CEO只係個打工仔，你永遠只係靠Steve Jobs或Bill Gates嘅，再叻都好，都會老，都會死，點做得大？

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6