［101］［心法］專題（算係）：點「確認」見底？ (Patreon)

「確認」見底未？問錯問題，亦係嘥時間

港股就係應該真係見咗底，美股就…..可能見咗底

啲友幾時「確認」見底？咪飛入去摸頂嗰時

投資嘅路係孤獨嘅，其實好多嘢都係

但唔想咁反社會人格做天煞孤星，咁可以點？

下一個牛市，就係靠你而家買嘅嘢

專家話未有「終極一跌」，市場未夠驚，未見底—有啲道理

係喎，以往見「終極一跌」，就見底

但，2020嗰次之前，「終極一跌」係幾時？2008？

「嚟多次沙士我就買樓」—如果唔嚟呢？等到幾時？

指標嘅嘢，同擇偶一樣：太鬆就好多人渣，太緊就等發霉

順手睇埋其他指標

1. 仲寫緊篇「港紙」嘅專題，大製作，寫咗3000字，「應該一半都未夠」。但開咗頭當然會完成，應該星期三前會有。

2. 今日（星期一）市況靜啲，港股美股都係，所以唔寫市，直頭成篇講心法嘢。主要係就係講：「見底」。好睇的。冇時間就save低遲啲睇

3. 拿，呢篇你都可以當專題文了。另外，應該見到我啲狀態返晒嚟了（隻眼都唔錯，但當然未完全回復）（留意我講「隻眼」，唔係「對眼」，用字好精準）

4. 又，今日我連幾點開始寫都唔記得，可見寫得好投入。

確認見底未？問錯問題，亦係嘥時間

港股就係應該真係見咗底，美股就…..可能見咗底

5. 上星期四都講過大市似有機會見底，然後星期五有個強嘅反彈。之後又有啲讀者問，「確認」見底未？

6. 都唔止講過一次，呢個問題都係……冇乜意思。只能畀個大約感覺你。事實就算有人好肯定答到你，咁又點？係咪聽日你就入市？又好似唔係。唔信？我之前都話港股今年見咗底，但你有冇再飛入去？冇丫嘛。

7. 實情就算見咗底，但你冇買，當升返10%，咁好多人又唔敢買。最正係如果又跌返5%，你又驚原來只係熊市反彈會破底。若果你係升咗10%時買然後跌5%嘅仲驚。

啲友幾時「確認」見底？咪飛入去摸頂嗰時

8. 然後你發現，啲人去到咩位先唔驚？咩位先「確認」見底？之唔係去到啲嘢升晒，一街股神，人人講股票，盲毛都好似贏錢嘅時間。萬試萬靈，你睇下2021年？而嗰時時間，當然係並唔太適合買股票的。

9. 事後睇返，最適合買股票嘅，當然係2020年第二三四季。但唔只係叫你睇返個圖事後孔明，而係你應該諗下，當時嘅市場氣氛係點？正係大家仲好擔心，唔知係咪真係見咗底嗰時。股市就係在呢啲懷疑之中成長的。

10. 當然走勢唔會每次都一樣，你亦可以講幾十樣嘢話而家唔同2020年3月，的確係。但個大調不變。

11. 唔止一次寫過，股票嘅嘢，都真係要精神分裂：你覺得最唔應該買嗰時，往往就最應該買。你覺得合埋眼都發達嗰時，往往就最唔應該買。

12. 你只要有幾年投資經驗，望下過去幾年，都體會到呢樣嘢。

13. 但亦講過，要實行係好難的，特別係「正常人」。因為你會上網，你會有朋友，有人在Whatsapp同你傾計，屋企人會講，同事會講，男女朋友會講，新聞都會講—除非你真係天煞孤星嗰類，冇朋友，唔受媒體影響。

投資嘅路係孤獨嘅，其實好多嘢都係

14. 唔好話乜，我都已經係冇乜朋友又冇乜屋企人。埃汾太同我個妹唔會同我講股票，我老豆同佢老婆就偶然會—事後亦見到，到佢地好興奮時，市場就危險。但即使係咁，我都有讀者（呢度嘅，或者Facebook Page嘅），都會影響我嘅情緒，例如讀者會PM我，或者會回我嘅post，點都會有啲影響

15. 但我唔係怨讀者，食得鹹魚抵得渴，既然我搞呢個Patreon同埋 Facebook Page，呢啲當然係代價。

16. 事實的確係，投資要成功（甚至好多事情都係），就注定係孤獨嘅。由於我都唔係太孤獨，結果都唔係太成功。況且，亦真係認真可以諗下，畀你有好多錢，但又冇朋水冇知音同屋企人又反晒枱，又有乜意義先？

但唔想咁反社會人格做天煞孤星，咁可以點？

17. 所以嘛，要克服以上講嘅嗰種精神分裂，都係幾難的。人人仆入去，今日買聽日升嗰時，梗係爽啦，好難抗拒，我都會犯呢種毛病，之前呢年都有—但至少我唔會錯得好離譜，我唔會買得太多，同埋更要要係：我唔會「只係」呢啲狂熱時間先買嘛。

18. 正如而家咁，好似未知係咪見底，但我都係個個月照買。

下一個牛市，就係靠你而家買嘅嘢

19. 經常有人話，我成日講啲2016甚至更早買嘅股票嚟講回報，「冇乜意思」，我係極之反感嘅。有機會（可能呢幾日）再詳細講呢個課題。但，到下一個牛市時，你睇返，而家，咪可能就係「2018」咁上下，第時你嘅回報，就係靠今日呢類時機買嘅嘢，而唔係靠升晒先仆入去。

專家話未有「終極一跌」，市場未夠驚，未見底—有啲道理

20. 忽然間寫得太長心法，其實係想講呢篇報導。美股低位反彈 專家料未宜撈底—扯，咁星期五買上去嗰啲係咩人？

21. 但我又唔係完全覺得篇文嘅「專家」講嘢全無可取。記住睇嘢唔好咁兩極，好多事都係一個光譜咁，兩邊鐘擺。我話「應該見咗底」，「專家料未宜」，當中未必真係好大矛盾。你見我估見底，都加句「應該」，即係信心唔算好大的。

22. 點解？上星期五嘅文都提過下。但絶對唔係咩通脹高企（講咗幾耐？）加息（同上）俄羅斯（同上）之類。冇錯，唔應該睇呢啲newsflow，因為真係narrative，所以真係睇指標（不過補充，有時唔好低估「感覺」，但指標同主觀兩樣嘢都要有啦，唔係互相排拆的）。

23. 星期五篇文提過，債息係一樣嘢，一路都唔係好跌，令人唔係太放心。但至少見到暫時都仲冇再升上去，回返少少，最新見到2.9厘都唔到。

24. 然後睇返我想講嘅呢篇，有專家睇到個VIX，係值得討論的。都有唔少人講，個市場都冇一下「大插」，冇一下遍地鮮血，所以始終啲沽壓未釋放晒云云。即係要有「終極一跌」。

係喎，以往見「終極一跌」，就見底

25. 呢種講法，係幾合理的。例子，你睇港股今年3月中嗰兩日，每日跌1000，咪係「終極一跌」咁情況。真係完美示範。

26. 但美股呢，今年甚至舊年，都好似冇呢種日子（雖然美股都有跌成1000點—但人地係35000跌1000，恒指係20000唔夠）。反而美股，2020年3月嗰啲，就真係見「終極一跌」

但，2020嗰次之前，「終極一跌」係幾時？2008？

27. 但我嘅諗法傾向覺得，有「終極一跌」固然往往多數見底，同時間你見啲咩見底日，往往係V型反彈單日由大跌變大升（所以，點「確定」？點捉？）。有「終極一跌」就見底，但見底又未必一定要實有「終極一跌」嘅。

28. 好啦，唔好咁虛，講數字。睇VIX咯。文中專家有講VIX，冇錯2020年3月去到成80。而呢浸都只係30幾咁。文中專家話，見到個VIX一日抽到40點以上，先真係叫做見啲終極恐慌

29. （插一句：中文版寫話「單日反升40點以上」，夠晒誤導，我以為講單日要抽40點，咁咪上到70？結果，原文係寫spike to a level of at least the mid-40s—所以識英文幾咁重要。但仲有，你應該讚下我，有疑問就會睇返原文，唔會亂咁估）

30. 我嘅睇法：真係抽到40幾，就梗係「好」，因為真係夠驚。但，what if 一路都唔抽？你損失嘅有幾多？

「嚟多次沙士我就買樓」—如果唔嚟呢？等到幾時？

31. 一個類似嘅比喻係，經過「沙士」嘅慘痛（我指嘅係：冇買樓嘅慘痛），真係識唔少人發毒誓話，「下次嚟多次沙士我實飛去買樓」—但你諗下，一等幾多年？（結果打後嘅事，就係即使嚟一次世紀疫症，加埋移民潮封城國安法甚麼，你見而家嘅樓價，仲高過沙士嗰時一大截）

32. 實在啲，睇圖。我梗係知VIX 40好，「80仲好添」。但，要等幾耐？將來10年都唔出現，咁你點？你會損失幾多嘢？

33. 望下個圖，2020年3月之前，對上一次VIX升高過40，你望唔望到幾時？咁又唔使去到2008金融海嘯嘅，2011年都見過（乜事？好似係歐債危機）。2011年後，就等11年先再見到VIX去到40。你可以睇下股票升咗幾多，都唔好同你講太古城貴咗幾多巨無霸貴咗幾多，你錯失股票升浪，仲輸晒購買力。

34. （補充：呢個圖未必準，因為拎嘅時間太長，所以佢啲數會7日一次，有機會中間見過40而個圖睇唔到。但，得嗰幾日，你點捉？）

35. （補充2：應該好多人都醒唔起2011年發生過咩事．見到未？好多嗰一刻你以為好大件事嘅嘢，十年八年後，根本無關重要。其實做人都係）

36. 所以你見我唔止一次提，VIX去到30樓上，都應該係幾好嘅入市訊號。當然你要睇返幾個月，唔好諗住今日買聽日升—你諗下2020年3月時，VIX 40時你飛入去，仲要食多幾棍大跌，去到VIX 80先見頂，你估易捱？幾時都話做短線係自廢武功。

指標嘅嘢，同擇偶一樣：太鬆就好多人渣，太緊就等發霉

37. 長氣都講多次，但真係哲學嘢。呢啲指標，係拎個中庸之道。你拎太過緊嘅（例如要VIX到80先買），冇錯會準確度高，次次都冇走雞—但你會錯失好多機會。太鬆嘅，VIX 25就飛入去嘅，咪多入市機會，但準確度低。

38. 即係用個不倫不類嘅比喻，「好似揀男女朋友，甚至公司請人咁」。太求其嘅，就梗易搵到人，但中伏嘅機會都大。但你要求好高嘅，係唔會揀到啲卡拉蘇呀，但你要等幾耐先搵到一個人？（同埋：佢又係咪揀你？）

順手睇埋其他指標

39. 篇文入面，專家仲有講，「期權交易數據也未有見底的跡象」，甚至咩「投資者現金比重」，亦係幾好嘅指標。但原理差不多，我就不細講。

40. 不過補充兩樣。關於「期權交易數據」，實情CNN嘅Fear and Greed Index，就有計及呢樣嘢—無獨有偶，呢個Index就係上星期四五跌到單位數，代表「極恐慌」—所以你只睇VIX，又錯過啲嘢了。

41. 不過呢，以前都貼過，你跟呢個Index入市，實情都未必好有效—否則個個發咗達啦。都係一個參考

42. 第二，「投資者現金比重」，我以前啲「每日一圖」有貼過的。你大約都估到，梗係啲基金經理個個渣重股票時，就最危險（因為，仲邊有錢買？），人人渣多現金時就值得入市。可惜數據往往都滯後幾多，同埋我一路懷疑啲基金經埋係咪會如實作答。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6