ivanliresearch

拿，大市真係見底呀，美股：又話唔驚加息啦。納指2年最大單日升幅，我嘅幾十隻美股就得一隻跌，Elon Musk彈出彈入，又話買又話唔買Twitter，玩乜？港股：星期五升突星期四嘅跌幅添，明明又話港匯走資，大師冇點你：長江基建1038 52周新高—但高位80，而家55，維他奶345 盈警照升，預咗啦 (Patreon)

Published:

2022-05-14 23:53:22

Edited:

2022-05-15 01:55:47

Imported:

2022-09

Content

拿，大市真係見底呀，

美股：又話唔驚加息啦。納指2年最大單日升幅，

我嘅幾十隻美股就得一隻跌，

Elon Musk彈出彈入，又話買又話唔買Twitter，玩乜？

港股：星期五升突星期四嘅跌幅添，明明又話港匯走資，

大師冇點你：長江基建1038 52周新高—但高位80，而家55，

維他奶345 盈警照升，預咗啦

1. 開始寫時係星期日朝早6點多啲，又唔算係特別版，講返星期五嘅市啫。另外，應該呢兩日會出篇特別版，講甚麼金管局入市呀　港紙7.85呀聯匯呀之類，夠詳細。簡單評就早兩日已寫咗—簡單嚟講，完全唔係你要擔心或關心嘅嘢，但當然你供樓嘅就肯定會供貴咗，差不多美國加幾多你就貴幾多，甚至可以更多。不過，畀人鬧我都要講：加幾厘息就供唔起樓嗰啲，當初買樓根本就係錯嘅決定啦。

拿，大市真係見底呀

2. 上一篇除咗講過聯匯，仲有提過我估大市應該見底。結果有個好開始，星期五港股升得幾好，如果堅持咩「走資係沽港股」嘅講法，咁你見到星期五升定跌？甚至升突星期四嘅跌幅添。同時間，美股星期五亦都反彈得幾好。不如先講美股，再講港股。仲會有兩隻港股會講。

美股：又話唔驚加息啦。納指2年最大單日升幅

3. 美股嘅，不用多講啦。納指嘅單日升幅，甚至係2020年11月以嚟最勁。當然我冇可能知道係咪「確認」見底，但你見大市要反彈可以好快，一日納指升返4%

4. 以前都貼過呢個圖，你只要過錯極少數股市最好嘅日子，你嘅投資回報已經大打折扣。所以你見我在呢個跌浪，一樣係一股都冇沽過，冇呃你。之前咩跌幾個%我講一股不沽你都覺得唔難，但你而家見到我身體力行，跌夠兩三成，我一樣唔會亂咁沽。永遠Stay invested．

5. 同時你可以睇下，道指已經連跌7星期，係20年嚟最長嘅跌浪。標指都連跌6星期，就係10年最長嘅跌浪。代表乜？冇乜。除咗代表跌得好多外，冇乜特別意義。但真係認真講，跌得多之後你估再跌嘅機會大定再升嘅機會大？當然係升嘅機會大。原因兩個。第一，平咗。第二，股票多數係升嘅。唔好笑話廢話，你可以睇真啲，股市可以連升5年，但你好少見會連跌5年。

6. 升乜？都冇乜特別嘢，「又話信服加0.5厘喎」，唔驚大手加息喎。你見亦不過係鮑威爾再出嚟，將幾日前嘅嘢重覆一次。但點解市場信？真係讚下上一篇Patreon，入面話埋你知，PPI數字令市場有信心

7. 但再講一次，我話「應該」見底啫，唔少時侯都會錯（否則發咗達），你就唔好走去成副身家而家瞓落去然後跌多10%又嚇走。

8. 認真，令我覺得唔係太有信心嘅，係你見債息星期五都仲升（又升返上2.9厘樓上）—當然夾硬講嘅你可以話債息升納指都升證明真係夠強，但整體嚟講，債息太高都係令人難以太放心。

我嘅幾十隻美股就得一隻跌

9. 最後睇少少我個倉內啲股份嘅表現。啲大瀉股反彈都幾勁，亦見普遍係啲細公司跑出。又，講明先，遲下我呢個list會踢走YALA 同WISH—唔係我沽走佢（跌剩幾千蚊沽都嘥藥費），而係唔想佢地霸咗個位，令你睇唔到其他嘢嘅郁動，而偏偏呢啲垃圾股往往大起大落，成日都霸咗升得最多或跌得最多頭幾位。特登話你知，費事你以為我唔出聲八萬五搬龍門。

10. 最後我想你留意嘅係，成個list幾十隻美股，就只得兩隻跌。GLDM都唔算股票，係黃金ETF。所以真係跌嘅只有Twitter，即時就同你講。

Elon Musk彈出彈入，又話買又話唔買Twitter，玩乜？

11. 重覆一次，Twitter我係有嘅，但只係好少，亦冇乜讀者問，所以我比較少講。但天地良心，之前我有睇過話Elon Musk可能彈弓手嘅講法，亦有諗過寫，但最後因為好似冇乜人關心作罷。

12. 好啦，而家個故事係，星期五開市前Elon Musk忽然話單deal on hold．原因係要睇下Twitter上面有幾多假戶口，係咪一如公司所講。

13. 成個故事相當有趣，你可以睇明報嘅報導，但我呢度再解你聽。

14. 我認為，單deal會繼續去馬。咁Elon Musk想搞乜？想壓價。點解想壓價？好簡單，因為佢話完買之後，成個市都散晒，佢可能覺得自己買貴咗，或者睇死調低收購價，你班友一樣會就範，因為Twitter只係因為呢個收購之前冇跟市場跌。至於咩假用戶？當然係一個藉口，總不能話自己想壓人價，如果話「明明公司話得5%假戶口，我發現唔係喎，即係你誤導我啫」，件事就好似合理啲。

15. 至於你問，可以咁樣彈弓手架咩？答案係可以，甚至唔買都得。只係要畀分手費，10億港紙。而如果可以買平啲，好大可能慳返唔止10億，搏得過。

16. 有人問好唔好而家買Twitter？梗係唔好。你點知佢會壓到幾錢買？甚至真係唔買？

港股：星期五升突星期四嘅跌幅添，明明又話港匯走資

17. 港股方面，星期五做得幾好，升突埋星期四嘅跌幅。你可以諗下，星期四金管局第一次入市，又有人話走資啦所以港股跌。但到星期五佢地就完全扮睇唔到的。嗰啲垃圾評論，少睇為妙。

18. 入面嘅股票，我都唔講太多，不過見到星期五內房股同汽車股做得唔錯，但我一般都唔會買，實情我連中資股都少買，雖然中海外688同華潤置地1109一路都幾好。

大師冇點你：長江基建52周新高—但高位80，而家55

19. 唯獨留意我一路有推嘅長江基建1038去到52週新高了，今年升11%。都幾難得，唔好忘記佢有唔少海外業務，其實美金強對佢都有啲負面影響。

20. 順帶一提，隻嘢我係月供嘅，唔記得幾多年，可能三五七年。你可以留意下個圖，其實隻嘢歷史高位近80蚊，而家55蚊。但我平均成本只係50蚊左右，仲收咗唔少息。呢個例子畀你見到分段入市嘅好處。但當然如果你隻嘢一路只跌唔升嘅，就神仙難救。或隻你隻嘢係長升不跌嘅，咁當然會賺少咗—事實如果知道隻嘢長升唔跌嘅，Day one就應該當埋條底褲借盡孖展買添—但有冇可能事先知隻嘢只升不跌？早兩年夠好多人做槓杆買TQQQ，最後又點？