債息跌，通脹好似見頂，細價跑出，股市…..見底啦啩？「但標普指數差少少就熊市，分分鐘今晚就見」美國PPI，半杯滿定半杯空？金管局兩日三次入市，又「走資」幾十億，點算好？ (Patreon)

債息跌，通脹好似見頂，細價跑出，股市…..見底啦啩？

「但標普指數差少少就熊市，分分鐘今晚就見」

美國PPI，半杯滿定半杯空？

金管局兩日三次入市，又「走資」幾十億，點算好？

1. 我嘅身心情況好似好返啲，結果呢篇係香港時間（以後唔強調了）朝早7點半開始寫—但呢個時間係計開始打字，未計之前睇嘅嘢同準備，你當找大約6點左右開始準備吧

2. 理論上呢個時間都還好，美股又收咗市，我寫完就去食早餐（好似都晏得滯？），但睇下之後維唔維持到，多數唔得。

債息跌，通脹好似見頂，細價跑出，股市…..見底啦啩？「但標普指數差少少就熊市，分分鐘今晚就見」

3. 我認為，個股市已經…….差不多見底啦下話？純係一種直覺。當然如果想科學啲就「計數」，但未必好過直覺好多。至於睇咩「有利」「不利」消息，就好多係廢話，講過股市炒預期，況且消息嘅嘢，升市自然乜都好消息。

4. 港股昨日（星期四）都弱，跌444點，但又冇想像中咁差。原因？我就唔認為係閞咩「港匯弱勢」事（下面會細講），主要係人民幣呢排都一直跌。

5. 至於美股嘛，都仲係比較「過山車」（我亦都唔知啲人可以點樣睇咩「5分鐘圖」之類），之前有時就蒸發晒所有升晒，到星期四晚就係道指一度跌600點，然後收市只係跌100。標指差不多唔使跌，納指直頭有得升。

6. 原因呢？又係嗰幾味，但見到美債債息的確開始回落，去到近2.8厘咁嘅水位（剛見到係近2.9）厘。原因？一如以往，唔太清楚。但可以留意兩樣嘢：第一，鮑威爾（剛剛肯定咗連任，但一早預咗）再出嚟重申「未來兩次只係加0.5厘」，似乎開始壓返低市場期望。而同樣地，亦因為似乎有數字支持：見到個PPI數字似乎OK（陣間詳細解），暫時似乎市場大調比較傾向「通脹見頂論」（但當然呢啲嘢，話變就變，特別係下個月出返今個月嘅CPI，6月10日）

7. 睇股份嘅走勢，就幾得意，或者幾奇怪。見到個別細啲嘅公司都做得幾好，反而大公司微軟蘋果就差，蘋果甚至已經跌入「熊區」，高位回咗20%（實情全不出奇，納指高位回咗超過30%）。

8. 呢種細股升大股跌嘅情況近期好似較少見，我亦唔係好有信心講：但大股跌細股升，似乎係見底嘅訊號？（留意跌市初期就往往係大股頂住細股瀉）。

9. 話時話，標指原來真係爭少少就「熊區」，真係爭些少，亦有可能星期五晚見，但不用太執著呢啲嘢，19.9%同20.1%，有乜分別？。

美國PPI，半杯滿定半杯空？

10. 講返美國嘅PPI。首先講，PPI Producer Price Index你可以當係「wholesale inflation」，出廠嘅價格。但用最簡單嘅方法講，出完廠再要去零售，零售再去消費者，當中啲價邊個「食」，就係另一個問題（視乎邊個有牙力）。但睇而家情況，似乎係會傳導咗去消費者。所以唔少人睇PPI嘅走勢，去估CPI（消費物價指數，平時你講嘅「通脹」）

11. 講完理論，睇實數。雖然個數字（11%）高過預期（10.7%），但按月增長就同預期一樣—記唔記得昨日先講過，「一般好少會按年就高過預期，按月就唔係」？今次你就見到了。原因？都係啲技術問題，再上個月嘅數字revise咗。

12. 但更重要嘅係，核心嘅PPI按年就升8.8%，低過預期（8.9%）。按月就0.4%，又低過預期（0.7%）。所以似乎開始唔少人覺得通脹見頂。

13. 順帶一提，一般我少講呢啲經濟數據嘢，「唔係我唔識，係冇乜用」。但你見既然呢期市場係擔心呢啲嘢，「我一樣識講」，總之你有需要知嘅嘢，我就會畀你知。

金管局兩日三次入市，又「走資」幾十億，點算好？

14. 呢個課題亦係快講，因為要詳細講極長篇。但見到嘅係，金管局第三次入市，最新呢次係星期五朝早，兩日第三次。做埋個紀錄你睇，第一次係15.9億港紙，第二次係40.8億港紙，最近一次係28.7億港紙。

15. 順帶一提，呢啲嘢「透明公開公正」，在金管局網頁會見到。但有時如果一日幾次會Group埋，又同埋，最新嗰次可能你未見到。我呢度嘅圖，就顥示咗15.9億同40.8億嗰兩次。

16. 咩回事？極速解，就當然係因為港匯掂咗7.85，金管局要入市買港紙，所謂「支持聯匯」。咁然後，個銀行體系結餘，就會跌，就係因應以上嘅銀碼跌。

17. 你見好多人就會話，係「走資」，咁技術上都係。但唔係你想像中嗰啲「沽晒啲股票走」嘅情況，完全唔make sense

18. 比幾個數字你睇，你見金管局入市，都只係幾十億港紙係咪？而銀行體系結餘，亦「不過」係3000億多啲。「上一次」嘅周期，就真係由4300億跌到760億。

19. 好啦，首先，你見到上次走咗3000億港紙，一樣冇乜事。同埋你可以諗下，港股一日都成1000億成交喎！你咩「走資」，幾年先3000億，平均一日幾億，根本唔係咩「沽股票」嗰樣嘢。一隻騰訊一樣都百幾億成交啦老細。

20. 好啦，咁你話個銀行體系結餘一路跌會點？上次咪見到，4300億跌到760億，一樣冇問題，而打後一年間已經返晒嚟。理論上，你個銀行體系結餘跌到咁上下，港紙拆息咪會升，自然就支持返個港元匯價咯，就係一個咁嘅恒溫機制。

21. 最後一樣嘢，好多人都唔明。銀行體系結餘，而家3000億多啲。「嗰時有人話提爆銀行，就睇呢佪數」。我當香港600萬人（「聽講移晒民」，其實係齊頭好計啲），一人5皮嘢—你覺得合唔合符你嘅常識？「有冇睇我Facebook講香港人好有錢？」。何況，你未計「其他人」添喎。

22. 比個「真實」嘅數字你，香港銀行體系嘅總存款，係15萬億。只計港紙就大約7.5萬億。一人250萬存款（計港紙就125萬），咁就差不多啱數（但首先我只係計600萬人，貪齊頭，另外亦好多係企業存款，仲有好多係境外嘅人。但即係咁誁）

23. 見唔見到，個存款總額，係銀行體系結餘嘅50倍？

24. 再講一次，你「走資」嘅，一日講緊幾億，而成個銀行體系結餘幾千億。但港股成交一日都千幾億。而香港總存款係15萬億。你可以自己細想下，一日走資幾億，或幾年走資幾千億，到底有乜咁多？唔好忘記仲要係一年已經可以返晒嚟。

25. 寫完係9點，不過今日寫得比較慢，因為啲嘢比較深，要搵多啲資料畀你。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6