ivanliresearch

美股日日開得高收Day low，搞乜？今年IWD跌10%，納指跌28%，早叫你做好你嘅配置．點解通脹回落但美股又照跌？港紙7.85 金管局入市嘅嘢　港紙又爆煲？（上次提爆咗中銀未？）。香港股災未（今年恒指跑贏納指幾多？） (Patreon)

Published:

2022-05-12 00:05:27

Edited:

2022-05-12 00:17:20

Imported:

2022-09

Content

美股日日開得高收Day low，搞乜？

今年IWD跌10%，納指跌28%，早叫你做好你嘅配置

點解通脹回落但美股又照跌？

港紙7.85 金管局入市嘅嘢　港紙又爆煲？（上次提爆咗中銀未？）。香港股災未（今年恒指跑贏納指幾多？）

1. 寫文時間香港星期四早上6點，美股已收市。實情寫呢個Patreon都一定程度令到我嘅作息時間受咗啲干擾，最理想當然係我朝早八九點起身寫，但一來錄音版未必出得切，二來我係好難呢個時間起到身嘅。以往你見我有時兩三點寫，都可以，但近期美股往往好波動，我又唔想寫嗰時升然後你又見到收市跌之類。

2. 即係點？即係為我自己身心健康著想，可能遲下我都會係早少少寫。咁所以話定畀你知我幾點開始寫，順手話埋你知我幾點寫完，等你知道點解有時我寫嗰時升但你睇就跌。

美股日日開得高收Day low，搞乜？

3. 美股，就當然難睇。早段有得升我都已經奇怪，因為個通脹數據都幾唔掂（下面詳細講），然後你見中段就跌了，納指就更加難睇。

4. 道指一度升423點，收市跌326點，多就唔係好多，只係1%，但走勢難睇，星期二晚一樣係反彈乏力，蒸發500點升幅。

5. 當然納指就更差，而我個美股倉整體就跌2.6%，還好，咪就係介乎標指同納指之間。所以又係重覆嗰句，你睇今年道指「只係」跌13%，但標指跌18%，納就跌28%，滿倉科技股嘅，真係十分大鑊。但真係好多讀者都係咁。如果係啲細嘅發夢股契媽股網紅股更恐怖添，講真，有啲你買嗰時都知冇錢賺架啦，係跟風之嘛。

6. 當然你睇我貼嘅嘢，都分享過渣得最大都係Apple Microsoft Amazon Facebook之類，我都係「太多」科技股嘅，舊年已經有講呢個問題，「奈何啲新錢入得唔夠快」。

今年IWD跌10%，納指跌28%，早叫你做好你嘅配置

7. 但我反覆講以上嘅嘢，唔係只係講「一早話咗」之類。咁將來你應該點？咁如果你未完全放棄投資嘅（應該唔會吧？否則你仲睇我啲文？），咁你最後都係會再買返股票架啦。好啦，就真係唔該，借呢個教訓，之後啲配置做得平衡啲啦。我都會咁做，但因為我都「相對地」唔係十分不不衡，所以個情況都唔太嚴重，都話有啲舊經濟股，價值股（IWD嘛），甚至港股頂住下。

8. 重申一次，IWD今年跌10%唔夠，跑贏晒啲指數，IWF就跌27%，差天共地。記唔記得今年真係有幾次都見有幾日係科技股跑返贏？都好多讀者想仆入去，我都話幾日嘅趨勢我唔會太放心。況且，以我所知呢啲讀者本身就已經一倉科技股，仲飛入去？

9. 你話你有錢應該買乜股嘅，好視乎你本身有啲乜，所以唔好只係睇人買乜。你如果全部舊經濟股嘅（好少咁嘅人，但都有讀者係差不多只係買巴郡，犀利），咁梗係可以買Facebook Google，但本身都成堆科技股嘅，就梗係買其他嘢啦

10. 然後帶到又係最重要嘅問題，「跌乜」。上面講咗，因為通脹數字（下面仲會詳細講）。但同時間，你都估到最直接影響股市嘅，往往係債息。通脹數據一出，債息又彈返上3厘樓上，美股即散，特別係納指。不過有啲奇怪嘅係，尾段債息跌返，但美股都照跌。原因不明，但今年債息狂升，就係科技股重挫嘅原因。亦因為咁，一日未見債息回得多，一日我都唔會太放心買太多科技股（亦因為，我本身已經有唔少啦，仲買？）

點解通脹回落但美股又照跌？

11. 講講個通脹數據，如果你冇心機睇太多字嘅，我Facebook Page都有快評。昨日亦有預告。一句：係比上次嘅數（40年高位喎）回落，但回落嘅幅度冇預期咁快，所以都係令人擔心嘅。（留意剛剛係出4月嘅數，所以「上次」係指4月時出3月嘅數）

12. 詳細嘅，我地睇睇。個「大數」，上次按年升8.5%，40年新高。今次就按年升8.3%，係回落丫，但街係估8.1-8.2%，即係仲係高過預期，梗係唔好。另外，可以睇埋按月，上次係按月升1.2%，今次係按月升0.3%—好似幾好啦？但經濟師估係0.2%，所以同樣係高過預期（順手提下，照計呢，如果按年高過預期，按月就唔會低過預期嘅，掉轉亦係，除非啲經濟師計錯數—好少見，但唔係冇試過）

13. 睇埋核心（扣除食品同能源）嘅數字，都仲係麻麻，見到個通脹壓力唔止係嚟自能源同食品呢啲傳統上比較波動嘅嘢。核心數字嘅，上次係按年升6.5%，今次係按年升6.2%，冇錯係回落，但街估6.0%—即係高過預期，同「大數」情況一樣。核心數字按月又點？上次按月升0.3%，今個月仲要加速添，升0.6%，亦係高過預期嘅0.4%。

14. 睇細數，仲值得一提嘅有兩樣：食品價格按年升9%（但核心數字冇計呢舊），一來你會見到啲餐廳（麥當勞之類）係有能力加價，二來扯遠啲，應該知道食品價格升最影響窮人（你人工升10倍食個早餐唔會貴10倍的），你可以想像再咁落去，民主黨嘅中期大選都極之危（甚至係一早已經返魂乏術？）。另外，機票價格按年升19%，固然係因為re opening，但你亦見到航空公司將啲燃油成本轉嫁落客度，所以見到佢地第一季業績幾好的。

15. 結論？之前都提過，實情通脹唔見得大大打擊啲企業盈利—問題係，你債息升令到個估值跌咗。

16. 好啦，之後又點？昨日都提過下，舊年5月同6月都係高基數，所以照計6月出嘅5月數字，應該都唔會高過之前嘅咩40年高位（8.5%）。問題係，剛剛出嘅數，見到按月啲非核心物價升幅仲要加速，就比較令人擔心。最後，留意埋，5月嘅數字，6月10號出，而聯儲局會14-15號議息，到時應該都有啲波動，但我相信都係……差不多見底啦啩？