ivanliresearch

都係由聯儲局議息講起，明明縮表慢過預期，加息步伐又慢過預期，做乜美股係咁跌？原原因一：債息．原因二：有人睇死聯儲局轉軚．債息同股市嘅關係就比較明顯，但乜嘢影響債息？就……標普指數連跌5星期，就快入熊，穿4000點，但又如何？今個星期睇啲乜：「星期三好關鍵」．港股：又冇你想像中咁差 (Patreon)

Published:

2022-05-10 19:48:57

Edited:

2022-05-10 23:46:32

Imported:

2022-09

Content

都係由聯儲局議息講起，明明縮表慢過預期，加息步伐又慢過預期，做乜美股係咁跌？

原因一：債息

原因二：有人睇死聯儲局轉軚

債息同股市嘅關係就比較明顯，但乜嘢影響債息？就……

標普指數連跌5星期，就快入熊，穿4000點，但又如何？

今個星期睇啲乜：「星期三好關鍵」

港股：又冇你想像中咁差

1. 寫文時係香港時間星期三02:00左右，之前放假，同埋因為有啲事（詳情呢度），所以隔咗幾日先寫。之後都會維持返每日寫。今日亦都寫返長啲

2. 又，邊啲Facebook 文我先會貼嚟Patreon，都冇一個準則。但你唔想睇嘅，好簡單，在你個email自己整個filter。我貼親Patreon嘅Facebook文都會有tag寫明係「FB文」，如果係「非金融」嘅亦會寫明。唔想睇嘅，自己filter走佢，因為有其他人想睇，正如你買咗份報紙，唔鍾意睇馬經嘅，掉咗佢。

都係由聯儲局議息講起，明明縮表慢過預期，又話唔會加0.75厘，做乜美股係咁跌？

3. 強調返，寫文時間係香港時間星期三02:00，原本想回顧返美股上星期五晚同星期一晚嘅情況，但不如直頭由上星期三講起，等你知道發生咩事，喚醒返你嘅記憶。上星期三晚，聯儲局議息，議息聲明後美股勁升（我有寫），當時講法當然係話：縮表速度比預期慢，仲有主席強調唔會加0.75厘，道指升成1000點。而真係呃晒，人人以為美股見底，到星期四呢，忽然間又話擔心（我亦有寫），話消化咗唔會加0.75厘，「變為擔心呢兩次會加0.5厘」，喂，咁都得？太牽強了吧。

原因一：債息

4. 真正原因係乜？兩樣嘢。首先，上次篇文都有提過嘅，美國債息（一般睇10年美債），近排差不多所有嘢都係望住呢樣東西。上星期三晚議息後債息就跌返少少，美股就大升。但上星期四又抽返上嚟，美股即插。似乎用呢個去解股市比較好。

5. 然後到星期一晚，美股又再大跌（樓上個圖），元兇亦係因為美債債息再升，甚至一度見過3.2厘。不過到星期二（剛剛），就稍為回落啲，試過跌到3厘樓下，亦令股市算係穩返少少。

第二原因：有人睇死聯儲局轉軚

6. 好啦，呢度又可以拉返到第二個呢排大跌嘅原因，就直接同聯儲局有關。點解星期二（剛剛）嘅債息跌？似乎係因為聯儲局官員，繼續講唔需要加0.75厘。

7. 可以同你講返成件事嘅前因後果，記唔記得剛剛先話上星期三議息後，主席近乎講明唔會加0.75厘？但，相當奇怪嘅係，去到星期四晚，利率市場期貨，依然覺得6月加0.75厘嘅機會，去到75%。

8. 呢個情況係相當少見嘅。即係點？即係儲局主席講明唔會，但市場都唔信。亦即係睇死主席會轉軚，或者覺得佢過份樂觀，「條友識唔識架」？都幾大問題。咁聯儲局可以點算？講過多次，聯儲局係極不願意做啲市場預料之外嘅嘢（特別係加息，差不多一定唔會有意外，減息就有時緊急做）。可以做嘅，一係就轉軚，既然市場有預期0.75，就打倒昨日之我，加咪加。但，咁樣做，會唔會令人覺得聯儲局進退失據，即係擺明主席都唔識嘢，要市場點醒佢。

9. 真實答案，應該唔會知。因為聯儲局用咗另一個方法：繼續出口術。留意呢個星期一大堆官員出嚟講嘢。正如上面提到，星期二晚博斯蒂克出嚟講，話0.5厘已經好夠，就似乎暫時壓低咗個債息。

債息同股市嘅關係就比較明顯，但乜嘢影響債息？就……

10. 會唔會睇到一頭霧水？咁再簡單啲，實情真係見到債息升呢，股市多數冇運行，特別係啲科技股，呢個相當肯定。舊年寫過下，有機會遲下再寫。至於點解債息影響股市，亦係舊文有提。

11. 但問題係，到底乜嘢影響債息？答案係……好深，好難講。如果你話一兩年嘅債息，當然會受聯儲局加息預期影響。但你話去到10年嘅債息，實情比較多係市場力量，睇啲投資者對長期經濟嘅睇法，當然亦包括埋佢地嘅避險情緒。而有啲時侯亦會受聯儲局嘅加息預期影響，但只係一時時。

12. 點捉？係好難捉嘅。但比較令人安慰嘅係，債息低嗰時，你去買股票，似乎都有幾足夠嘅時間畀你慢慢買。你睇2020年下半年，真係任買。3月股災，你當然擔心，之後回穩你都未必敢買住，亦驚個經濟真係好大鑊。但你見去到7月至11月嗰浸，啲經濟數據出晒嚟，企業業績又出晒嚟，係差但唔係去到世界末日，而你睇啲債息1厘樓下，股票真係任你買。

標普指數連跌5星期，就快入熊，穿4000點，但又如何？

13. 好啦，瞻前顧後，我地睇下啲慘況。道指就己經連跌咗6個星期，標指同納指都連跌咗5個星期。如果睇標普指數，已經跌穿埋4000點，同高位比已經跌咗17%。記唔記得上次先提過有機會進入「熊市」（一般指高位跌20%），但正如我多次講，咩4000點關口呢啲，實際意義等於零。同樣地，亦有讀者問我係咪熊市，甚至係熊一定熊三之類—而我唔明呢啲討論有乜意思。你用正宗嘅講法，美股根本未熊市（17%之嘛）—但大家都已經輸唔少錢啦，大把人投晒降啦，係咪？所以有何意思？

今個星期睇啲乜：「星期三好關鍵」

14. 今個星期要睇嘅，好重要一樣嘢，就係星期三晚出嘅4月美國通脹數據，CPI同埋核心CPI。非常，非常，非常重要。上個月嘅數字，3月CPI按年升8.5%，40年新高。今次就預4月嘅數字，按年升8.1或8.2%左右—留意，係比3月嘅數低咗，而你大約可以睇到，舊年5月就已經開始個基數高—即係話，如果今次出嘅數字（4月）同預期唔爭太遠，就似乎會有人會講「通脹已經見頂」。因為4月嘅數已經低過3月嘅40年新高，而相信之後幾個月唔會可以再高過3月。

15. 所以我對美股，當然都未係絶望，實情永遠都唔會絶望。話唔定出完呢個通脹數據後就股市反彈。當然你都知，市場嘅嘢，自然有事後解釋。如果數字符預期但市照跌嘅，咪照有人話「雖然合預期又低過3月但仲係在高位」，而如果不幸地個數字超出預期嘅，甚至可能仲有得跌

16. 但，始終我傾向覺得星期三晚出完CPI後股市會有啲反彈，又睇下點。