美股2020年後最大單日跌幅。跌乜？睇份議息聲明要好耐？引狼入室：平保推匯控分拆亞洲業務嘅嘢（三千幾字呀下）。點解要分拆？「反映價值」。係喎，買其他嘢返嚟時又話協同效應。咁會點分拆？中間界一刀一開二？Partition Magic咁？其實最似嘅係…….大新金融440分拆大新銀行2356 (Patreon)

美股2020年後最大單日跌幅。跌乜？睇份議息聲明要好耐？

引狼入室：平保推匯控分拆亞洲業務嘅嘢（三千幾字呀下）

點解要分拆？「反映價值」。係喎，買其他嘢返嚟時又話協同效應

咁會點分拆？中間界一刀一開二？Partition Magic咁？

其實最似嘅係…….大新金融440分拆大新銀行2356

1. 今日呢篇夠長。因為之前見有時間，寫咗篇「匯控分拆亞洲業務」，原本想呢兩日冇乜大事就出。點知星期三就議息大升，星期四就大跌，又唔想完全唔寫大跌 — 但只寫星期四大跌又太短，所以索性連埋「匯控分拆亞洲業務」一齊出。

2. 咁星期五晚嗰篇就可能寫短啲了。

美股2020年後最大單日跌幅。跌乜？睇份議息聲明要好耐？

3. 美股星期四嘅表現夠晒嚇死人，最慘係星期三議息後狂升，呃晒。最後星期四晚當然係嘔突星期三嘅升幅。

4. 星期四嘅跌幅，係2020年以嚟最大單日跌幅。我堆嘢就當然都唔掂，美股倉都跌近5%，幸好有啲港股頂住先冇咁傷。

5. 問題又係：跌乜？其實都係……唔係好知。你見媒體嘅報導（信報都係引外媒啫），都相當牽強。喂，星期三香港時間兩點已經出聲明，點會星期三晚只係留意唔會加0.75，然後到星期四晚先識留意下兩次會加0.5厘？睇份嘢睇成粒鐘咩。

6. 但你見我亦都highlight咗，真正原因，我認為就係美債債息升穿咗3厘，過去一兩個月都經常講。我發現好多人低估咗呢樣嘢嘅重要。成個原理，我有機會可能在Facebook寫篇文講。你亦可以睇我Patreon 2020年尾嘅舊文。

7. 咁可以點？答案係冇乜點。除非好等錢用，否則全無必要而家沽貨。有錢繼續慢慢買，至少呢個係我做嘅嘢。

8. 另外你見到，VIX又上返超過30。Fear and Greed Index 亦都差不多去到極度恐慌嘅水平。呢啲嘢出現，往往之後會急彈。

9. 聽日會講多啲，或者講少少息口方面嘅嘢。

引狼入室：平保推匯控分拆亞洲業務嘅嘢

10. 呢壇嘢都有趣，詳情你可以睇返明報（唔係我唔識英文，而係FT要訂戶先睇到，我係，但好多讀者唔係）。最初就傳係平保，最後大陸媒體又話唔係平保提出，但平保都贊成。最新就話兩間公司嘅高層會見面

11. 標題夠晒惹火，講到好似中資將匯控拆骨咁。但首先平保都係「建議」下，冇能力去強推。二來，呢個課題近N年都不停有人講。你見匯控股價反應都OK，但只係升少少，好快已冇人講，亦可能因為十劃都未有一撇。你問我，成事機會都唔係太高，但即管當學術討論下

點解要分拆？「反映價值」。係喎，買其他嘢返嚟時又話協同效應

12. 首先，撇開政治陰謀論不談，本身咁多年都有人講匯控應該分拆亞洲業務上市。事實上啲公司分拆業務上市亦好常見，原因不外乎都係「提升價值」。做唔做到？多數都得嘅，因為公司同投行一定包裝到好好睇睇，同埋一定搵個好嘅時機。

13. 具體即係點？即係你可以當，啲業務分拆咗出嚟上市，先真係體會到價值。另一種講法係「各取所需」，可能有啲人只係想要匯控嘅亞洲業務，做乜迫我要食埋其他嘢？（掉轉，亦可能有人只係想要其他業務），即係套餐會平過散叫咁，否則點會有人叫？

14. 但你話，唔係喎，公司買其他業務返嚟，又話協同效應。冇錯，就係咁混吉。拎返嚟嗰時又話你知可以協同，拆出去又係可以提高價值，任佢玩。唔止，拆到出去隻嘢唔掂時，仲可以私有化收返。「然後好景時又拆返上市」。

15. 當然扯遠少少，好似錄音提過，「Global Bank」呢樣嘢，似乎有點不合時宜。例如你見匯控好似夾在唔同政府間，但又冇一度幫佢撐腰，兩邊不是人咁。但呢啲就唔係本文討論。

咁會點分拆？中間斬一刀一開二？Partition Magic咁？

16. 好啦，一般分拆會係有利股價嘅。咁以下一大段，就會講，實際上點做，你係小股東會發生乜事之類。

17. 首先，先個個簡單假設。現在你見到嘅5號仔，叫做「匯控」，我地不妨假設，入面有兩堆業務，「亞洲」同埋「歐美」，就只有呢兩堆嘢（其實應叫「非亞洲」，但費事亂，有時我會打漏字）。然後我當，而家呢刻，劃條線，分開佢地。暫時「匯控」，就100%持有「匯控亞洲」同埋「匯控歐美」。

18. 以上種種劃界之類，不太難搞，大可以上市重組。另外留意，我知「匯控」唔係渣住恒生100%（62.14%，in case 你想知），但冇問題，我只係將而家所有業務，兩架車裝晒佢。即係「匯控」持有「匯控亞洲」100%，「匯控亞洲」再持有恒生62.14%咁。

19. 然後，做法可以有好多種，千變萬化。但我假設「匯控亞洲」會獨立上市（應該在香港，但並非重點），而「匯控歐美」唔會獨立上市住。亦即係第時你會見到兩間上司公司，「匯控」同埋「匯控亞洲」。

20. 我相信假設「匯控亞洲」會獨立上市，十分合理，否則唔上市嘅嘢，好難咩提升「匯控」嘅價值。另外，「匯控歐美」應該唔會上市，因為拎唔到好價—否則就係諗拆「匯控歐美」獨立上市啦。

21. 仲有，當中仲涉及呢個過程集唔集資嘅問題。亦比較複雜。但，一般都會集，順手嘛。

22. 講最常嘅嘅兩種方法，第一，係完全剝離。即係斬兩開份

23. 相對地易明，即係「完成」後，「匯控」就不再持有「匯控亞洲」，全部唔持有，之後兩間公司近乎再無關係。而留意，「匯控」全走晒「匯控亞洲」，實情上，咪即係剩返「匯控歐美」，所以結果係「匯控」最後變成「匯控歐美」，呢堆嘢「被動」地獨立上咗市。第時就係分開兩間公司，「匯控亞洲」，同埋「匯控」（亦即係根本係「匯控歐美」）。

24. 至於股東，亦好簡單，就係照派「匯控亞洲」嘅股票畀你。到完成後，你就會由原本拎住「匯控」嘅股票，變咗拎住「匯控亞洲」同埋「匯控」（走咗亞洲）（亦即係「匯控歐美」）嘅股票。亦即係，原本你嘅嘢，咪拆開咗做兩個冧把，你鍾意沽是但一隻都可以，兩隻沽晒兩隻渣住亦得。

25. 但以上呢個方法，應該唔會用，只為簡單說明。你只係諗下啲管理層已經夠晒複雜，變咗兩間唔相干嘅公司喎，咁邊個去邊面？定同一班人？都幾煩。

26. 我印象記得（好多年前了！），理文化工（746）當年都係類似咁玩。當年最原本嘅746入面有化工，又有手袋（嚴格嚟講最最最初係手袋先，然後先去投資化工）。最後就係分拆手袋另外上市，整咗隻1488出嚟。就係冇集資，就咁派畀你。搞掂後，746嘅股東，咪收到1488嘅股票，而本身渣住嘅746，就變咗只得返化工業務。

27. 但留意呢個例子中，分拆出去嗰件嘢，係「冇咁值錢」（估值同市值都係）的。仲有留意，兩個業務根本完全唔相關，原本嘅廠呀員工呀多數都分開。但「匯控亞洲」同「匯控歐美」唔係咁嘅一回事。

28. 至於「管理層」嘛，實情李運強借呢壇嘢，分埋家。個仔（二仔，李文恩，理文足球會嗰個）就睇住化工，個女咪睇手袋嗰邊，大約係咁。（後來大股東私有化埋1488定賣咗盤，後話）

其實最似嘅係…….大新金融440分拆大新銀行2356

29. 比較常見嘅情況，就係「匯控亞洲」分開上市，但「匯控」依然持有佢大部份股權，例如70%左右。年代久遠，懶搵，但我相信，大新系（大新金融440是阿媽，大新銀行2356係仔）嘅玩法都係差不多。你有興趣慢慢研究（或者呢度）（你甚至可以睇招股書，我當年睇過）

30. 當年嘅做法，就係原本係先有440大新金融，原本有銀行有保險。然後就分拆2356大新銀行出嚟上市。440就渣住2356 七成幾，大股東家族就渣住440（好似都係七成幾，懶查）。控制權全無影響。留意啲保險業務只係在440入面有，2356係冇的

31. （但留意返，雖然你見中國銀行3988渣中銀香港2388又係六成幾（66.1%），但有一定年紀嘅，會知道係2388上市（2002年），先過3988（2006年）。所以冇錯都係阿媽拆仔出嚟，但有啲唔同）

32. 換著匯控嘅情況，一樣可以差不多。拆出嚟後，「匯控」拎住「匯控亞洲」七成股權咁，又保留晒「匯控歐美」在自己度。

33. 呢度留意兩點，首先管理層甚麼，440同2356都係差不多同一班人，股東會呀業績都根本一次過開，幾咁簡單，匯控都可以係咁。

34. 但留意，你見我話「匯控」渣返「匯控亞洲」七成幾股權—原本係100%喎。點解要少咗？少咗嘅去咗邊？第一個問題易答，上市公司公眾持股要求，你不能拆間公司出嚟但你自己渣住99%（一般街外要有25%，市值夠大可以百份比少啲）。

35. 問題二就有趣啲。既然我一定要由100%減到去75%（舉例），咁兩種做法，冇錯，就係發新股攤薄自己。或者賣舊股減持。

36. 純新股嘅，2356或「匯控亞洲」咪發堆新股，將原本個大股東（440或「匯控」）攤薄到去75%，留意當中集咗資，有錢入去「匯控亞洲」或2356做資本金。

37. 純舊股嘅，仲簡單，咪440或「匯控」沽25% 2356或「匯控亞洲」嘅股票出嚟，然後2356或「匯控亞洲」就會有堆新嘅股東，只持有呢間新嘅公司，冇持有母公司（「匯控」或440，當然你咁啱都持有都冇問題）。留意呢個情況，新公司（2356或「匯控亞洲」）冇任何新資本，反而阿媽（440或「匯控」）就會有錢收到。

38. 實際上會點揀？都幾簡單，why not both？如果我冇睇錯，當年440都係兩樣都有做。

39. 好啦，最後，小股東呢？好簡單，如果你原本渣住440或「匯控」，乜都唔做嘅，留意，你應該唔會有2356或「匯控亞洲」嘅股票。因為公司唔係派息（例如騰訊派京東，你就真係收到京東股票），新上市嘅2356或「匯控亞洲」，咪在你原本嗰股嘅440或「匯控」入面。正如我而家買一手3988，入面係有埋2388，但我不會有2388嘅股票，亦不能就咁只沽走或只保留2388嗰部份。

40. 不過，一般情況，係會畀現有嘅股東優先認購嘅，又甚至乎派特別息，咁就另作別論。440當年亦都係派特別息，同埋有畀股東優先認購2356。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6