ivanliresearch

開場前：經濟師預衰退，ADP職位少過預期。仲得幾多次加息？正場：上次單次加息0.5厘，你做緊乜？我讀緊大學．評點：頭三個月縮表475億咋喎。三個月後？就之後先算啦．接下嚟兩次加息0.5厘，唔會加0.75。第三次呢？之後先算啦．散場：美股大升，但重點係升勢夠全面。唔買等幾時？業績一堆：Airbnb，星巴克，AMD，Uber同埋Lyft (Patreon)

Published:

2022-05-04 23:10:18

Edited:

2022-05-05 00:11:45

Imported:

2022-09

Content

開場前：經濟師預衰退，ADP職位少過預期。仲得幾多次加息？

正場：上次單次加息0.5厘，你做緊乜？我讀緊大學

評點：頭三個月縮表475億咋喎。三個月後？就之後先算啦

接下嚟兩次加息0.5厘，唔會加0.75。第三次呢？之後先算啦

散場：美股大升，但重點係升勢夠全面。唔買等幾時？

我個倉一晚升返4%，幾十隻得一隻唔升（仲要係瑞士股）

業績一堆：Airbnb，星巴克，AMD，Uber同埋Lyft

1. 拿，話咗應該5月會好啲，亦話未加跌定先，議息後可能反彈，冇點你啦。記住，梗係加息前驚一輪，真係加時往往冇嘢。炒預期嘛。好消息係咁，「壞消息」都係咁。

2. 另外，因為Patreon嗰邊嘅技術問題，我視力又唔太好，所以而家放圖片會有啲不同嘅問題。有時你會見到「第一版」（即係你收email）有啲錯漏，正路之後正文會改返。我亦可能索性會用少啲圖，冇計。

3. 如果講碌圖，上個月錄音版就最方便。不過雖然有讀者鍾意，但明顯唔鍾意嘅人更多，啲讀者量都跌穿2000，所以唔再用嗰種方式了。

4. 唔想睇字，或者想坐車聽/公司聽嘅，一路都有語音版的，內容同呢篇一樣。一個Post有齊純聲音（mp3，幫你慳data）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽

開場前：經濟師預衰退，ADP職位少過預期。仲得幾多次加息？

5. 首先畀你睇少少加息前嘅嘢。第一係個市場預期，就人人都估加息0.5%，但亦都唔少人認為會衰退。不過留意，即使係「市場」真金白銀嘅「預期」，一樣話變就變，官員出嚟講幾句就一兩日變晒。何況經濟師之類啲訪問，人人都跟大隊保住份工（我以前返工都係咁）。所以得個知字，知市場大調係乜，但唔代表呢啲專家一定啱，亦唔代表聽日唔會忽然180度轉

6. 第二，留意返個ADP職位增長，都幾差。的確經濟有啲放慢嘅蹟象。

正場：上次單次加息0.5厘，你做緊乜？我讀緊大學

7. 等我用最少嘅字數，最簡單但又保留所有重點咁解你聽

8. 聯儲局加息半厘，超過20年以嚟第一次單次加半厘或以上。上次應該係2000年，我估多數讀者都好細個，我都讀緊書（官方網搵Historical Archive先有）

9. （順手離題少少：你見即使好多做緊金融嘅人，四十歲嘅，根本都冇乜點見過大加息。亦冇經歷過美股2000-2010嘅迷失十年。人係總會畀自己嘅經歷局限，仲往往係最近期嘅記憶，包括我同你，唔好低估呢樣嘢）

10. 但又如何？一早有晒預期，就冇乜特別。重點係其他嘢。你好有學問精神可以睇返議息聲明轉咗乜。

評點：頭三個月縮表475億咋喎。三個月後？就之後先算啦

接下嚟兩次加息0.5厘，唔會加0.75。第三次呢？之後先算啦

11. 但我就快講，點解市場咁開心？幾樣嘢

12. 首先，個縮表速度，似乎畀預期慢。下月開始，3個月各縮475億，然後每個月各縮950億（我可能過幾日討論到底呢個規模即係點）。而市場原本係預下個月開始就每個月950億。好啦，你話，咁3個月後點？係咪3個月後又驚過？「其實應該兩個月後就再驚，因為炒預期，未縮驚定」。但亦好可能聯儲局繼續買時間，觀察下先。

13. 第二，之後嘅加息路線。太遠嘅不講，但你見鮑威爾差不多講明接下嚟兩次都各加0.5厘—但亦在市場預期內。況且，佢亦只係講兩次，亦可能係畀多啲空間自己。更重要係，差不多講到明唔會諗加0.75厘。

14. 結果呢？利率期貨市場，就即時預下次加息0.5厘嘅機會有70%—但留意，呢啲數字，一兩日可以完全變。但暫時聯儲局成功引導到市場，亦都似乎出面多人講估可以「軟著陸」，加息控到通脹又唔衰退—但你見我冇特別講，因為官員呢刻當然樂觀，好難咁快就變臉講衰退。甚至同政治（中期選舉喎）都有關。留意耶倫自己就打晒開口牌話可以軟著陸—話說回頭鮑威爾係共和黨人，但傳統上聯儲局的確比較政治上中立，亦避免幫現任政府抬轎（若主席同總統同一，黨），或特登同總統作對（若主席同總統唔同黨），都真係比較只睇數子同預測嘅。

15. 拿，真係用最少字解晒又不失重點，抵讚啩？