美股4月咁慘烈，5月又點好？買得未？中信銀行998供股大插，其他內銀係咪陸續有嚟？股災未？ (Patreon)

美股4月咁慘烈，5月又點好？買得未？

中信銀行998供股大插，其他內銀係咪陸續有嚟？股災未？

1. 的確之前錄音版係會講市況多，咁趁近日市況靜啲，不妨講啲冇咁貼市嘅嘢，畀啲「深度」你。稍後可能講啲「心法」或「理財」方面嘅嘢添。

美股4月咁慘烈，5月又點好？買得未？

2. 昨日講過4月點慘烈，咁5月又點？其實問我可能冇乜意思。你問我，當然係傾向樂觀，「但我幾時都樂觀」「4月我都樂觀」「到我都唔樂觀時肯定股市見底」

3. 但正經啲，二樣嘢。首先，傳統講Sell in May，係有一定道理（否則唔會有呢句嘢出現），以前都貼過，以半年計，美股11月至4月嘅回報，好過5月至10月好多．但，過去幾年已經唔係，而剛剛嘅11月至4月更係跌到七彩。固然唔知會唔會之後半年更差。但照計…….股票平咗咁多，吸引力都大啲。你睇Facebook出業績後反彈就知

4. 至於5月焦點，始終仲係通脹，債息，議息，美國經濟之類嘅悶嘢。而唔係咩俄烏衝突或者林鄭抗疫。今個星期就會議息，鐵定加息0.5厘。所以你應該留意嘅係展望—但我覺得都係任你講，如果聯儲局話擔心衰退，個市一樣可升（「唔再加息」），也可跌（「經濟唔掂」），掉轉亦係。不過整體嚟講，我估係擔心加息多過擔心衰退，所以如果聯儲局話驚經濟唔掂，股市反而可能好。又睇下我啱唔啱。

5. 仲有，調查話，美股悲觀情緒，已經去到金融海嘯後新高。喂，非同小可喎，即係仲驚過2020年3月嗰時（明明嗰時又話世紀疫情）（事實亦係）。正路地，呢啲絶對係相反指標，別人恐懼時我貪婪，而家唔買等幾時？

6. 你睇其他指標，例如CNN嘅Fear and Greed Index，都係標示相當恐慌（但呢個未去到「極度恐慌」），VIX之前亦都上到去35（而家剛去到30樓下）

7. 所以，你估到了，要買股票，當然係繼續買。我都繼續買，每月分段就最好。至於「有一大舊錢」嗰啲友，實情寫文寫過好多次，不如今個月又寫多次畀你睇。

中信銀行998供股大插，其他內銀係咪陸續有嚟？股災未？

8. 係假期時，公佈第一季業績後，同時公佈埋供股400億人仔的。詳情呢度

9. 首先講下，點解公司要供股。原因似乎相當簡單，就係資本水平唔夠。技術上嚟講，個「資本充足率」唔夠。講過多次銀行先天性質，可以做好大槓杆，但差不多所有國家都會限制。除咗用「存款準備金」，規定你收嘅存款有幾多要放在阿公度不能借出街外，另一方法係要求「資本充足率」。最簡單嘅講法，就係你想做100蚊貸款我要你有10蚊資本咁。一般計法係資本/資產，但邊啲資本邊啲資產就一大堆細節嘢了。唔夠咁點？咁一係你放慢你嘅資產增長，一係你拎多啲資本—點拎多啲資本？可以係減派息，或者係籌新資本，兩樣一齊都得。

10. 資本充足率有三級，各有不同要求，分別係核心一級資本充足率，一級資本充足率，資本充足率。主要分別係，有乜嘢計落「資本」，因為有時有啲怪胎，咩永續債呀次級債呀優先股呀（不一一細解）。當中核心一級資本充足率最嚴，差不多只係計股東資金。

11. 咁你睇呢個表，就係其他銀行最新一季末嘅數字（未包晒所有），最低嘅郵儲行都有9.6%。中信銀行呢？8.7%。明顯偏低

12. 點解會低？好多原因，首先係賺唔到錢，但今次情況唔係。或者派息太慷慨，呢個答你唔到，反正都係阿公會監管，而中信銀行之前都有派息，但派完又供股，都係極常見嘅。

13. 仲有兩種可能（其實同一樣嘢），第一係貸款增長太快，個資本支持唔到。第二係啲非利息收入少—而中信銀行一向都少。關乜事？非利息收入，就做幾多都得，因為唔會令你啲貸款多咗，對資本充足率冇影響。

14. 大陸而家嘅監管，要求資本充足率幾多，我已唔多記得。但都唔戈重要，反正一來唔同級別銀行有唔同要求，另外有時亦有啲「暗啞底」嘅要求。而亦唔使去到紅線先要你集資，見你差不多已經可以。

15. 解完後，再講供股。好多人視之為洪水猛獸，但以往我有兩個講法。首先，衰嘅公司多供股，但不代表供股係衰公司。二來，供股已經係比較公平嘅方法，你可以選擇供唔供，唔供就畀人攤薄—總好過公司無啦啦發新股畀啲唔知乜人，夾硬攤薄你，你有錢想跟機都唔畀機會你。

16. 而由我做金融以來，匯控同渣打固然供過股（渣打應唔止一次），中資行都絶大多數供過。一般都係供嘅有著數，亦唔會好長期影響股價，畢竟一般都係為做更多生意（當然你啲貸款亂咁放導致好多不良貸款就另一回事）

17. 留意公司因為A股H股一齊供，更煩，當然可以兩地唔同價供。400億人仔（大約480億港紙）聽落好多，事實上兩個角度睇。如果你有心機睇業績嘅，公司嘅一級核心資本5300億人仔左右，供股呢舊等於多咗7.5%。而個核心一級資本充足率，應該會由8.7%，升到9.4%，都唔係改善好多，「仲係低過晒表入面堆銀行」

18. 另外，留意返，公司市值（A+H），2450億港紙。你要集480億港紙，即係擴大多20%咁滯。換個講法，你要股數多20%—仲未計供股多數有折讓。所以你見佢話10股供3股（原文係「不多過」）—計落啱數，10股供3股，即係擴大咗30%，咁計埋股價有啲折讓，差不多。

19. 以上就係學術嘢。至於供唔供？有嘅就似乎應該要供，但當然你渣得太少嘅，碎股係問題，手續費又係問題（所以有錢的話唔好買得太少，應該每隻股票都幾皮嘢，唔好幾千蚊）。冇買想搏反彈嘅？又似乎普通，之前講過了，全部業績都放慢咗，另外人仔跌亦係一個問題。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6