美股上星期四真係呃晒，「衰退」仲要大升，點知星期五嘔突晒．業績一樣呃晒，Facebook就大反彈，但星期五到Amazon就大插（但幾合理）．納指4月跌幅，2008年金融海嘯最勁—即係勁過2020年3月！嘩！所以你仲頂得住嘅，畀啲當聲自己。唔易捱的．星期五香港科指升10%。夜晚美股大瀉中概股都仲升。狼來了？習生玩夠啦？明天預告：5月點算好？ (Patreon)

美股上星期四真係呃晒，「衰退」仲要大升，點知星期五嘔突晒．

業績一樣呃晒，Facebook就大反彈，但星期五到Amazon就大插（但幾合理）．

納指4月跌幅，2008年金融海嘯最勁—即係勁過2020年3月！嘩！

所以你仲頂得住嘅，畀啲當聲自己。唔易捱的．

星期五香港科指升10%。夜晚美股大瀉中概股都仲升。狼來了？習生玩夠啦？

明天預告：5月點算好？

1. 呢篇係公開嘅，畀啲未訂嘅睇下到底會係乜。聽日就收錢了。睇啱心水嘅，訂吧。

2. 大家好，嚟到五月。多謝大家一路支持。4月雖然開咗兩次刀（撞鬼），但差不多冇停過Patreon，對得住大家啦？只係4月中為咗休息，開始轉咗錄音版，我個人係唔多鍾意嘅，慳我時間，但對讀者冇益。所以今日起轉返文字版。

3. 當然，眾口難調，有人鍾意文字版，有人唔想睇字。慎防新讀者唔知，唔想睇字，或者想坐車聽/公司聽嘅，一路都有語音版的，內容同呢篇一樣。一個Post有齊純聲音（mp3，幫你慳data）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。

4. 有人話4月啲聲音版太「貼市」，深度唔多夠。我同意的，以後轉返文字版會好啲。不過4月市況夠慘烈，容許我今日再做一次review先。聽日話埋你知5月應該點

美股上星期四真係呃晒，「衰退」仲要大升，點知星期五嘔突晒

業績一樣呃晒，Facebook就大反彈，但星期五到Amazon就大插（但幾合理）

 5. 寫文時係香港星期一晚，遲咗啲，但都回顧下美股上星期五，同埋4月嘅慘烈市況。先講星期五，可以睇信報呢篇（入面有講埋成個4月）

6. 星期五，大家最關心，跌乜，固然市場唔會話你知，但都斷下症。我就認為，都冇乜點解。

7. 你話業績？整體真係唔算特別差，當然業績好都可以跌，但整體你見真係「因為」業績大插嘅大股，好似都屈指可數。Netflix係一隻，波音都算係（但我冇），勉強你可以數埋Google．

8. 當然，仲有星期四收市出業績嘅Amazon，上次錄音版都提過下，轉蝕錢喎，點計市盈率？以前發夢時就唔理呢啲，而家個個先睇派息或回購，再睇盈利，然後睇收入。收入冇嘅就慘死。亦證明我一路講嘅嘢：網購冇你想像中咁好賺。

9. 但，只係一隻Amazon，不足以拖低大市咁多。你見係乜都跌，蘋果業績點睇都唔差，亦唔係太貴，照樣跌。

10. 市況夠晒慘烈，都唔使我多講，道指跌2.8%，標指跌3.6%，納指跌4.2%。但我又再重覆一次，記唔記得早排有幾日係納指跑贏？唔少讀者又身痕，我都話睇一兩日我唔會放心，結果果然如此。近半年嘅大勢，都係舊經濟/價值股跑贏，新經濟/增長股大瀉，發夢股更加唔使講。IWD跑贏IWF十幾%

11. 另一方面。通脹。好啦，你睇PCE（之前出咗CPI），固然升幅係40年新高，但，冇再超出預期，你睇細項（例如按月，或者核心）都係咁，之前出咗CPI亦係咁上下。

12. 當然而家真係多一個問題：滯脹。詳情可以睇我明報篇文，聽日出，或者你睇呢度attachment都有（但未執錯字）。簡單講，以前我唔信呢個風險，而家都覺得唔係大機會，但唔係細機會到可以忽略。個危險係，聯儲局而家先加咗一次息—但上星期你見美國出嘅首季GDP已經收縮，市場唔少人擔心衰退（一般連續兩季收縮就當衰退）。衰退唔係問題，加息又唔係問題，但兩樣一齊就似乎較大問題。而記憶中，近幾十年，冇邊次係聯儲局只係加一次息，大家己經講衰退。

納指4月跌幅，2008年金融海嘯最勁—即係勁過2020年3月！嘩！

所以你仲頂得住嘅，畀啲掌聲自己。唔易捱的

13. 好啦，你睇成個4月，仲開心。可以睇下明報呢篇。你仲訂緊Patreon，又未灰心到低位打靶嘅，畀啲掌聲自己。真的，唔易捱，你已經做得好好。

14. 然後成個4月計，納指跌13%，標指跌9%，道指只跌4%（果然舊經濟跑出）。有幾誇張？標普指數單月跌幅，係2020年3月以嚟最差。至於納指仲誇張，係金融海嘯2008年以嚟最差—即係仲差過2020年3月疫情股災嗰時（不過留意，美股在2020年3月尾反彈得好快）

 15. 不經不覺，標指同納指，已經去到今年嘅低位。（道指就未，果然係舊經濟跑出）。計高位呢？納指已經插咗24%，好多大型科技股分分鐘係一半，發夢股更不用講，而納指已經進入「熊市」（高位跌20%），但應該講過好多次，呢啲指標無乜意義。納指在2月尾時已經試過高位趺20%，但都幾次彈返上去，最近又跌穿返。至於標指，高位回咗14%。上次錄音都有提，有人警告話有機會進入熊市，亦冇乜出奇，跌多6%就係了。

16. 最後，年初至今，納指跌21%，標指跌13%，道指跌9%—上面一大堆數字，係你可以同自己嘅表現比下。輸錢實在正常之極，我都輸錢，但你同指數相比如何？以我所知大家都成倉科技股，都OK，你話你年初至今輸25%，都唔係好過份，即係再差過納指啲。但如果去到30%之類嘅，又係嗰句，檢討下。

17. 況且唔好忘記，你買港股分分鐘有機會輸得少過美股，至少我係。你見恒指今年「只係」跌9%（但多得星期五大反彈，而又未反映美股星期五晚大插，雖然睇夜期ADR之類又唔係好傷），而我仲要跑贏恒指—因為我唔多中資股，中資科技股股更少，所以暫時跑贏不太難，但之後唔知。下段講。

星期五香港科指升10%。夜晚美股大瀉中概股都仲升。狼來了？習生玩夠啦？

18. 雖然香港假期，但都要講講。可能係狼來了？但今次似乎真係中概股同中資科技股翻生。我認為大型科技股（騰訊 阿里巴巴 京東之類）買得過，中概股就都係不了，但當然做好你嘅配置，唔好成副身家瞓落去阿里巴巴，然後下個月輸一半，然後嚟怨我。喂，共產黨嘅嘢，點知佢會唔會忽然又諗第啲嘢？

19. 事實你見科指星期五都彈夠10%（所以我星期五港股倉當然跑輸），而更好玩係，去到星期五晚，美股狂瀉（上面講咗），但你見啲中概股都仲升。難得。

20. 原因？又係因為啲政策。固然咩放寬審計底稿訊息披露，我只會信一半，亦可能係buy time嘅方法。中概股，冇乜盈利，又冇在香港上市嘅，一律唔玩。

21. 但最新傳嘅，就有啲意思。就似乎真係話監管風暴過去，仲可能係啲科技繳出1%股權（咁少？）就算數。政治不講太多，但似乎習生真係玩夠，亦見到大陸嘅疫情拖累經濟（肯定），亦都可能發現真係不能冇咗啲科企（邊個幫你送外賣？）。

22. 所以我懷疑，雖然美股星期五晚狂瀉（星期一未知），但可能星期二港股，都未必會太差。但照舊，睇龍頭，有盈利嗰啲。咁當然唔會升得最快，但，經過過去大半年，你仲未學會教訓？美股嘅科技股都可以咁跌法，何況中資？

23. 呢篇係公開嘅，畀啲未訂嘅睇下到底會係乜。聽日就收錢了。睇啱心水嘅，訂吧。