[FB文] 非金融 ［愁像朔風心裏侵　炎夏有熱熾的歡樂感　煩惱似春風秋雨　季節又似人生］ (Patreon)

FB出左篇文，連結如下：

https://www.facebook.com/100050678310520/posts/539485504417389

愁像朔風心裏侵　炎夏有熱熾的歡樂感　煩惱似春風秋雨　季節又似人生］（＊）

TLDR：十年一劫，隔一排就瀨鑊勁嘅。我講我

1. 呢排好似成日寫「其他嘢」，香港人好有錢，蛋治（即係香港人好有錢），電話騙案（亦即係香港人好有錢）之類，少咗講「自己」。都係有啲原因，而上次篇「三刀」意外地引起咗啲麻煩（而你地唔知，埃汾心裡苦但埃汾不說，是真的）。所以今次唔講病情（還好，至少我啲心情好過早兩星期），講下…..其他自己感想。

2. 你心諗，你啲感想，你啲經歷，關我春事？冇錯係咁，我又唔係名人，甚至唔係高橋名人。所以，我寫自己嘢，定必希望個效果，就係你都諗下自己嘅人生。幸運地，以往啲文都做到呢個功能，唔少人睇完都話我知，令佢地諗返自己嘅嘢。

3. 題呢首歌（唔係張圖）亦係出賣年紀。近年我寫文成日用，特別係寫投資嘅文。生有時，死有時。季節亦似人生。我寫投資文多數引嘅係第一段，「誰亦盼望有一些預感。無奈風雨偏要驟來，叫你失信心」

4. 上次在朋友生日，在佢屋企，大班人食飯。朋友忽然講咗句（大意）：拿，大家嘅人生，都已經行咗一半啦。

5. 的確如此，我從不掩飾自己嘅年紀，而呢班朋友都係中學同學，大家差不多大。根據數字，肯定大家都過咗香港男性預期壽命嘅一半。（當日全男班，但點計都一樣）

6. 都係想講，「人生有幾多個十年」

7. 實情我係唔信呢啲嘢嘅，不過，讀者信，咪講下。而且人總係鍾意Pattern（例如Chris Patten），寫「十年一劫」，一定吸引過「隔一排就瀨鑊勁嘅」

8. 但我真係「十年一劫」，「隔一排就瀨鑊勁嘅」。一字記之曰：2。慈不帶兵，2不養財。婊子無情，戲子無2。（IFC就有間無2，講呃錢真係不亞於193，不過上次靚女讀者請我食就冇所謂，幾時再相逢？） （呢段絶對有游清源寫《信報》《一個人的城市》或《頭文字Y》時嘅風格，我都受咗啲影響）

9.

10. 講既係，似乎逢係2字年尾嘅日子，我都係比較大鑊嘅。

—＝＝＝＝＝＝＝＝＝＝＝＝

11. 今年，就唔使講啦，三份一都未完，已經咁。都話真係44年嚟最低谷。當然你可以好《足球小將》咁講，「比賽剩返五分鐘」「錯，係仲有五分鐘」「今年已經捱過咗三份一」（＊＊＊）

12. 但值得一講嘅係，2012都係好大鑊的。「唔係喎我記得你係嗰年結婚」—正是，唔係搞到好大鑊，點會結婚？都真係有關的。果年都發生好多事，不再一　細講，但很老土地，埃汾太同我走過咗，都經歷咗不少，所以我話結婚（而佢從來冇明迫或暗迫婚，畢竟唔係一齊咗好耐，只係兩三年）。

13. 亦係2012年，我在耆英證券見咗頂。新東家入主，新人事新董事新作風。唔少同事都被炒，我就好彩啲，老細（冇錯係我成日提嘅老馮）攬到我，兩師徒齊齊畀人投閒，開個新TEAM，再呃多咗年幾人工先再畀人炒。但當年就真係由年少氣盛，變到知道「人地要你收皮一樣可以一晚收你皮」。而仲有，打後咁多年，我都搵唔返當年嘅人工。十年喎。（計埋花紅啦）

14. 所以唔係特登拎嚟講，而係2012年，當時我都覺得好大鑊。當然最後又係關關難過都係要過，但我想強調，當年真係有咁嘅自覺（所以，咪結咗婚），估唔到十年後仲大鑊。

15. 然後，夾硬少少講，2002年都係極之頹嘅一年。早兩日講條小朋友，24歲有70萬畀人呃。2002年我咪24歲，真係7000蚊都冇。英國回港，見咗超過100分工（是真的，但我唔係怨市道，我是抵死的），雙失青年，幫人補習咋。當然當年洗費根本唔多，住又住老豆食又食屋企，仲有閒錢，女照溝，當年亦都唔使點用錢，真好。所以嗰一刻未必覺得好差，但明知長此落去就好大鑊。況且，仲要係有比較，我啲朋友，都返咗兩年工，都開始有啲嘢睇。食飯聽佢地講，就不是味兒，所以我好摺，做隱青。唔好忘記，2002年我都仲返銀座麥當勞（梗係天水圍啦，唔係東京，舊年聖誕咪寫過）（實情都係shit job，但話返東京件事型咗十倍）。當然，當年又好似冇覺得真係好大鑊，可能因為仲停留在學生哥嘅想法。有網上有文寫有女溝，食屋企住屋企，咪幾好。唔好同人比就得啦，唔好諗以後就得啦。

16. 1992年呢？噢，太耐了。但當然我都記得。1992年當然都係唔多愉快，雖然再講就夾硬咗啲，因為我嘅初中生涯都係唔太愉快，1990-1993，冇乜分別，並冇覺得1992特別差。點解唔愉快？冇喎，冇乜朋友，又溝唔到女咁咯。喂，青春期嘅少年，係呢啲架啦。話時話，1992年時我啲成績都係麻麻地的（我講嘅麻麻地，即係在「非精英班」我都可能係十幾咁），變咗學霸係後來嘅事，因為後來真係發現除咗讀書實在冇嘢可以有得發圍，靚仔又唔夠人靚仔，無恥又唔夠人無恥（當年啦，後來「改善」好多），打波就更不用講。

—＝＝＝＝＝＝＝＝＝＝＝＝

17. 咁，其實冇嘅，正如我講，最後咪又係一一克服。關關難過關關過，做大事就係不停咁爆鑊不停咁補鑊架啦。咪又係捱得到今日。但諗真啲就知，survivorship bias，如果我中途自殺死咗，你唔會見到今日呢段嘢啦，係咪？同樣地，如果我今年自殺死咗，十年後你唔會見我寫返2022年（但正經，「今年一定唔自殺」「因為剛買咗份大額人壽，要等起碼一年」「但如果夠黑色幽默就係我意外死咗」「我幫你講埋呢句，等你唔使擔心講咗畀我或其他讀者鬧」）

18. 而亦比較勵志，勵志過華潤勵致嘅係，都真係去到4字尾嘅年份，就會有個幾好嘅反彈—雖然，你又會諗，「咁低點後梗係反彈啦，如果唔係嗰個就唔係叫低點」，但，留意都真係OK強勁嘅反彈，即係唔係「見底」後但再低位吽多N年咁。

19. In case 你真係想知，好快話你知。94年，我已經成為咗個學霸，亦都初戀（而似乎兩件事有關），雖然未有性行為（唏我地年代好保守的，而我講過我1998年2月14號先「失身」，我仲寫咗兩篇好長嘅文，就叫《失身記》，你可以Google，用埋我個名），但點都係一個幾強勁嘅反彈，係咪咁話先？

20. 2004年？我離開咗學校村（有人唔知？），冇再教書，轉投金融界，去咗蕉行，遇上標哥。再加上，同年第一次好認真咁去香港國際電影節，睇咗廿幾三十套戲，自此變成一個文青。

21. 至於2014年？「其實我畀耆英證券炒咗」，但賠咗一大舊錢（三個月通知加埋嗰個月嘅糧加埋假期加埋長期散水費，以上法定外，馬拉佬仲添咗幾皮嘢畀我買Roti，多撚謝），然後高人搭路（我本書有寫，而早幾日先同完高人食飯，佢好關心我的），唔使搵工已有下一份工。新工固然係有點……唔係嗰回事，人工又低咗。但重要嘅係，我多咗好多時間寫文，呀廖博士推介我去商台網頁寫文亦係嗰時嘅事。然後就有咗01博評寫文，然後就有咗呢個Facebook Page，然後就有埋Patreon．都真係由2014開始。

—＝＝＝＝＝＝＝＝＝＝＝＝

22. 睇到呢度，我想講—我一樣可以話，1994年係西年，2004年係西年，2014年係西年。1994年我嘅初戀並不太愉快（小朋友係咁架啦，不過女方聽聞更加唔愉快），亦因為咁令女方啲朋友排擠我。

23. 2004年？寫過啦，泡隔離班班主任不遂，冇眼睇自己離開傷心地嘛，然後由學校教師變咗蕉行嘅刁拿聲，人工20000蚊變12000蚊嘛，寫過啦。四成披咳，仲要開支多咗一截。

24. 至於2014年？咪寫咗，畀人炒魷，即時起身走（幸好老細一早話我知，早已執晒嘢）。冇錯之後好快高人幫我搭到路，但，我由太古廣場三期，當年百幾蚊尺租，變咗去返灣仔688（唔係298），三十蚊尺租。都話，太古廣場三期個廁所，乾凈到可以入面打飛機，在入面喊，或者喊住打飛機（我三樣都試過，爭在冇在入面做愛，但當然肯定有人試過），到688年代，個廁所真係污糟到啲有潔癖同事堅拒在公司開大嘅地步，我亦當然冇在入面做任何開大開細外嘅嘢。太古廣場三期樓下嘅「受付孃」（講日文型啲），全部都J得下。去到688年代下面啲女，秦崇秀咁嘅樣（你可以Google），但講具體嘅，我嗰次轉工，又減咗三份一人工，而2013年我剛買樓。

25. 講咁詳細，無非係話你聽—其實都係narrative，睇你點睇。我要嘅，一樣可以寫到1994 2004 2014好慘。初戀鬧反收場喎，減人工喎，畀人炒喎。但亦可以包裝成為好嘅嘢，甚至而家我可以拎我唔教書減四成人工做金融嘅故事，拎嚟也文也武，好似啲廢老講當年打仗咁。

26. 所以，都真係睇你點睇。我亦一樣可以包裝到1992年 2002年 2012年幾好—雖然我仲未諗到點將今年包裝到「幾好」，可能十年後可以。

（＊）鄭國江嘅詞我並不特別喜歡，嫌太老土（其實我都唔係好老），不過呢首《季節》真係好，值得同啲後生推介下。唔止係季節比喻人生填得好，我個題引呢段，剛好春夏秋冬都填晒！或日，炎夏，春風秋雨，冇冬喎。差矣。「朔風」咪就係冬天嘅風，你以為填唔到冬天，其實有填，高！（＊＊）

（＊＊）然後呢度引伸到另一課題，我之前自己FB貼「一日一首譚詠麟」（aka 倫伯真係好撚紅）（後因我開刀已爛尾）時都講過，你只睇歌詞，都分到啲歌嘅年代的。除咗口語流行用語不同，一啲非流行用語，都係而家啲人好少用嘅。例如「朔風」，你而家出街問下有幾多大學生識？更唔好話識得用嚟寫文填詞。但我亦唔係一面倒講新不如舊，咁新填詞人識得填啲流行事物　情非首爾　東京百貨　有冇試過用剪剪剪草彅剛　之類，又係老嘢唔會識嘅。所以，結論就係最好做個一年去幾次日本嘅廢老。

（＊＊＊）無法唔重覆又重覆講呢個故事：2018年世界盃，最後一輪分組賽，德國對南韓，德國尾段失波，命懸一線，離出局爭幾分鐘。失波後湯馬士梅拿走去追住球證，你以為佢去嘈原本球波？唔係，佢係去追住問有幾多時間！然後話畀啲隊友知！幾咁熱血！—當然個結局係之後德國輸多球，恥辱地出局。你估熱血就得？邊個出局唔熱血？