港股：中海外688一年新高，友邦1299都一個月新高。10年債息升穿2.7%，美匯指數升穿100。股災未？香港「唔跟」美國加息，港匯係咁跌喎，股災未？衝動點唱：百度嘅嘢。 (Patreon)

港股：中海外688一年新高，友邦1299都一個月新高。

10年債息升穿2.7%，美匯指數升穿100。股災未？

香港「唔跟」美國加息，港匯係咁跌喎，股災未？

衝動點唱：百度嘅嘢。

港股：中海外688一年新高，友邦1299都一個月新高

1. 港股實則冇乜好講，所謂「林鄭辭職市場開香檳」。結果呢個星期港股仲要跌，奉勸大家睇少啲呢啲評論。

2. 另外，港股想講下中海外688同友邦1299。前者Facebook Page寫咗一大篇，早兩日亦都講過，不再重覆太多。而家52星期新高，今年升咗45%，最強嘅恒指成份股。我一路有買，亦有推。但最初講時18蚊（2020年尾，又話被「制裁」嗰時），唔少讀者有跟，但之後跌到15蚊，當然唔少人都幾擔心，我唔知有幾多去「止蝕」。而家隻嘢26.75。今年升45%，你自己計數，同埋諗下有乜教訓啦。唔該唔好咁短視，呢隻嘢已經極易坐，差不多所有位買都贏錢。

3. 另外，隻友邦1299都不經不覺一個月高，亦係個個月有買，長期有推嘅嘢。故事比較易講，呢排都提過，首先係「通返關大陸人有得再嚟買保險仲唔發達」，另外，近期債息咁升，應該都對公司有利。今年升7%，絶對跑贏指數唔少。問題係你可以睇下個圖，甚麼「俄烏」嗰時，高位跌咗20%，我係咪又去「止蝕」？然後低位都升返近20%。全部係呢個幾月嘅事。

10年債息升穿2.7%，美匯指數升穿100。股災未？

4. 又講下啲宏觀嘢，你見納指繼續都係乜運行。好簡單，都話睇住個債息。而家話口未完，美國10年債息就升到2.7%，呢啲情況下，啲高估值股都係難搞。你係做唔到啲乜的，一係慢慢儲，一係買啲舊經濟股。

5. 同時間，亦都見到美匯指數升破100，一般對股市都唔太好（所以美股今年只係跌咁少我都有啲意外），仲有，如果買歐洲股日本股嘅，就會在匯價上影響到你。可以點？亦係冇得點，而你要估匯價走勢（你可以試下），仲難估過股市。不過稍為值得你高興嘅係，匯率嘅嘢，雖然周期可能長，但好少會跌足十幾年，或者升足十幾年。往往都係上上落落。

6. 至於美匯咁強，原因就好簡單，雖然全世界都好似加息（但中國好似唔係？），但明顯見到美國係最進取，甚至仲會比原本嘅步伐加快。聯邦基金利率又升，咁多數美金拆息都跟升，隻貨幣自然就會強。

香港「唔跟」美國加息，港匯係咁跌喎，股災未？

7. 最後，可以扯到去港紙港息，明報呢篇值得一讀。

8. 香港利息呀，港匯之類，機制都有啲複雜，費事次次重覆，但你真係留意，好多你在網上睇到嘅嘢，係完全錯的。

9. 首先，有人會留意到，上次（3月中）美國加息，香港「冇跟」。你見有人講「唔係聯繋匯率兩地利息同步咩」，呢個已經係一大謬誤，你美國嘅講緊係聯邦基金利率，鮑威爾同班友投票投出嚟。香港？係冇咁嘅嘢的，你唔會見到余偉文出嚟講（金管局有個咩貼現利率，但唔係嗰回事）。正係因為「聯匯」，香港就冇自己嘅貨幣政策，所以唔存在「跟唔跟」。

10. 至於你講銀行嘅最優惠利率prime，商業決定，受好多其他嘢影響，可以唔跟足，亦可以追加．其實大約都同美國同步，但唔係每次都一樣

11. 真係市場機制嘅，係拆息。美國邦聯基金利率升，正路美金拆息就會升。咁正路地，都會帶埋港紙拆息升的。點解？因為如果是但一邊太高，啲人就會沽另一隻，去買高息嗰隻。

12. 咁就會將個港匯，推去兩邊嘅上下限。好簡單地講，港紙息高嘅，人人搶港紙，咁你港紙就會強，最後強到去7.75，就會觸發金管局入去放，之後變返平衡。掉轉，亦大約係咁。

13. 以上呢啲嘢，同乜有關？同銀行嘅利潤好可能有關，同供樓嘅人都有關，而無論你P按定H按都好，美國加息，你當然係會供多咗，遲早問題，最多咪爭一年幾個月咁。

14. 但，除此以外，呢啲嘢，就真係同股市，係冇乜關係的。你見總有人講，嘩，資金流出，港股跌。錯，兩回嚟的，呢啲睇兩邊拆息套利嘅資金，原本就唔係買股票。唔信？你玩咗咁多年，港匯咪又係7.75 -7.85。1%上落。但，你見恒指可以勁升勁跌，同啲港匯係冇乜關的。

15. 所以，第時見到咩港紙跌到7.85。又唔好覺得「因為」咁所以港股差。實情，港股都差咗好多年啦。舊年港紙強過今年好多添，咁恒指舊年點？

衝動點唱：百度嘅嘢

16. 另外，有讀者點唱，叫我講下百度被列入乜乜名單。實情之前都講過，但又講多次。首先，你入咗嗰個乜乜名單，不等於好快會除牌。而百度嘅情況，在香港有上市，美國除牌咪除裨，你見中移動941一樣好地地，當時因為呢啲嘢受壓，直頭係買入機會添

17. 問題係，百度本身係咪一間好嘅公司？我就唔太肯定。如果我係鍾意嘅，就已經買咗啦。如果大家之前唔知，話你知，最初美國有FAAMG，當時中國對應嘅係BAT。百度，阿里巴巴，騰訊。後來各有麻煩，但點講都好，百度嘅各樣嘢，都係及唔上阿里巴巴或者騰訊嘅。你見後來己經唔講BAT，係講ATM，或者ATMXJ（加埋美團，小米，京東）。我就從無考慮過買的

18. 當然，理論上中概股啲審計問題，係朝個好方向發展的，而百度至少在香港上咗市，照計就唔擔心會變廢紙。但值唔值得買，就另一個問題，祝君好運。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6