[FB文] 金融 ［嘩咁大件事冇人講］俄羅斯可能史上第一次違約喎！上次LTCM搞到好大鑊的，你瞓身沽空未？ (Patreon)

FB出左篇文，連結如下：

https://m.facebook.com/story.php?story_fbid=524922675873672&id=100050678310520

［嘩咁大件事冇人講］俄羅斯可能史上第一次違約喎！上次LTCM搞到好大鑊的，你瞓身沽空未？

TLDR：上次俄羅斯主權違約，幾時嘅事？當時又發生乜事？你唔知，但我知。

1. 首先，少少歷史，希望冇記錯，視力唔好唔方便FC．呢度指嘅「俄羅斯」，係包埋蘇俄了，即係呢個「德國捧過幾多次世界盃」嘅問題之類。

2. 而事實上，即使係蘇俄時代，亦都冇試過外幣債違約。咁對上一次係幾時？就真係沙俄年代嘅債，1918年！（冇錯係十月革命後唔認數，BTW，十月革命當然係十一月發生的）

3. 即係，一路有句嘢，講話「核武國唔會違約」。好似一路都係，好似冇聽過有核武國違約，中國都冇。「北韓好似冇乜國債」（其實係有的，但唔知點計）

4. 但，記性好嘅又夠老嘅，記得1998年，LTCM爆煲，導火線正係俄羅斯違約喎。咁又話冇試過？

5. 實情呢……嗰次都係違約，但嗰次仲好笑，因為嗰次俄羅斯係本幣債違約！估你唔到。

6. 一般嚟講，講違約，都係討論外幣債。因為國家就多數有發鈔主權，部機任你印，貶值變廢紙就貴客自理，但照計勞蘇國用小勞蘇幣發債，唔會違約的，因為佢畫幾多畀你都得。

7. 但，俄羅斯嗰次，就係盧布債都違約，吹到你吀啤聲。有得印都唔印，完全估你唔到。

8. 順帶一提，LTCM啲火箭數學家 （God damn Nobel Prize winners，過去半世紀所有讀Finance嘅都讀嗰幾條友嘅嘢 ），「炒股票就叻」，但，「葉利欽飲大兩杯個腦諗乜」呢啲，就真係唔知點price in 在個model（實情都有人做modelling，但你知，最後都係睇俄佬嘅心情，好難估）

9. 所以，當年俄羅斯本幣債違約，震散市場。LTCM呢啲，固然條數之前天下無敵，但最後拆穿咗，都係「推土機前執銀仔」，即係同你啲天才網友Short Vol Short VIX 或者收期權金之類一樣，99%機會都贏少少錢，你咪再槓杆放大佢　—直到一舖輸到跳樓。

10. 不過LTCM唔係你，人地有聯儲局救。甚至最後有人話因為咁而展開咗咗個超寬鬆周期，種下埋2008年金融海嘯嘅禍根。

11. 而在俄羅斯方面，呢次違約，基本上亦造就普京上位。普京正係2000開始掌權，就係多得葉利欽搞經濟一獲泡。

12. 咁講返轉頭，今次，俄羅斯話用盧布還外幣債，得唔得？你話呢？過夜錢拎兩舊豬肉找數得唔得？

13. 咁但，我勸你唔好扮專家，因為我都唔識，好多人都唔識。如何判定「違約」，就真係問專做呢啲嘢嘅律師，「好似話希臘都冇違到約」

14. 況且，違約又點？海牙好似冇小額錢債審裁處的。而你亦好似不能將俄羅斯清盤，去克理姆林宮夾返兩幅畫返嚟，應該有啲難度（雖然，有對沖基金試過鎖咗阿根廷嘅船，你可以去試下）

15. 更好玩嘅係，俄羅斯聲稱唔係冇錢還，唔係唔還，唔係想用盧布還。「錢準備好啦你過嚟拎啦」，但，話因為制裁，「貴國政府唔畀我過數，唔關我事」。

16. 咁呢啲情況下計唔計「違約」，真係問律師先知啦。「錢我就入咗但你間銀行唔肯過數，關我乜事」，我都……唔知點算。睇下啲fine prints點寫，債仔點先算「盡咗責任」。

17. 仲有，如果講政治，國債違約，當然係國家主權嘅行為。而國家理應係對國內民眾負責，而唔係啲境外投資者。所以，Debt Moratorium（講英文型啲），甚至完全唔還，好多時並不被視為「不適當」。而「外間」可以做嘅，就只係下次唔好再信佢。

18. 但，扯，違約多過捧盃嘅阿根廷（是真的），早幾年都照發債啦。賭仔嘅嘢。

19. 拿，「呢啲就大國博奕啦」。

20. 上次俄羅斯違約（1998年嗰次），搞到滿城風雨。今次又點？靠嚇？定真係會用盧布還？收咗盧布又當唔當違約？真係違約，邊個會出事？

21. 就梗係Patreon今日講啦。

22. 其實我份Mater論文原本想做國家違約，但實在太煩，太多書要睇，最後做啲垃圾數字嘢算數，平靚正，幾日寫完。然後真係邪到極，當其時，我個俄羅斯香港朋友就去咗英國探我，但因為我要趕埋份嘢，結果訂咗機票，都冇去到俄羅斯探佢，之後都冇去過，「烏克蘭就去咗三次」。打後佢娶咗件韓妹，啤咗三件，不知幾開心。

＝＝＝＝＝＝＝＝＝＝＝＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6