美股：跟進返縮表規模。債息狂升，仲買發夢股？俄羅斯話用盧布還外債，咁都得？違約有乜後果？歷史又係點？畢菲特買HP喎，全無亮點嘅公司，廢老懵咗？你懵定佢懵？巴郡就快大過Tesla，信唔信？ (Patreon)

美股：跟進返縮表規模。債息狂升，仲買發夢股？

俄羅斯話用盧布還外債，咁都得？違約有乜後果？歷史又係點？

畢菲特買HP喎，全無亮點嘅公司，廢老懵咗？你懵定佢懵？

巴郡就快大過Tesla，信唔信？

美股：跟進返縮表規模。債息狂升，仲買發夢股？

1. 昨日比較早寫完文（因為睇波），當時美股都未收市。都唔記得講，除咗話驚加息債息升之類，另外聯儲局嘅議息紀錄都出咗，好特別嘅嘢冇乜，但留意返話每月縮表嘅上限係950億，算係比較快，之後你亦可以對照下會唔會加速或減速。

2. 港股方面，撇除比唔比卡超之類，都企得算硬。寫稿時美股未收市，但見10年債息上到去2.7%咁滯，都係見到納指繼續跑輸，早早同你講咗點解，當然唔係話清倉科技股，但你應該做好你嘅配置。科技股估值貴，債息升會拖冧，呢樣嘢至少都講咗半年，你應該大把時間去留意到的，冇理由仲係成手都係科技股（仲要唔貴嘅唔買）。

俄羅斯話用盧布還外債，咁都得？違約有乜後果？歷史又係點？

3. 首先講返個故事，表面好易理解，俄羅斯有國債到期，而家情況下當然好難roll over（舊債再續再碌），咁就要還息還本。

4. 咁，話說俄羅斯，就聲稱會以盧布還債。咁得唔得架呢？

5. 答案就唔係你想像咁簡單。首先，國債有外幣債同本幣債啦，咁理論上本幣嘅嘢，印極都有，所以國家本幣債應該冇乜可能還唔到（啲嘢狂印貶值另一回事，貴客自理）。但而家係講外幣債，咁，講明外幣債，你用盧布還。得唔得？就似乎唔得的。

6. 但又問下一步，咁，「唔得」，會點？

7. 正常人地爭你錢，你可能告佢，淋紅油，或者上小額錢債審裁處之類。係公司嘅，你咪清佢盤，然後拍賣佢啲嘢，大約係咁。

8. 但國家呢？就複雜好多。你邊個法庭可以拎俄羅斯政府嘅資產去賣？（雖然，以前都有試過有對沖基金鎖咗阿根廷啲船之類）。冇錯，你可以話，俄羅斯啲外匯儲備咪「凍結」或「充公」咗，但係咪可以賠畀債權人，又另一個問題。即係，「歐洲凍結咗俄羂斯央行啲儲備然後賠畀大陸佬」，你估會唔會？

9. 況且，「違約」係一個相當複雜嘅問題，最好你去問律師。係另外有其他機構去「判斷」係咪違約的。咁你直頭唔找數當然就「違約」，但，找畀某啲人唔找其他呢？如果債務重組呢？有百份之九十債權人同意又點？好多問題，極之複雜。

10. 雖然你叫我估，似乎用盧布還，就當然會被視作「違約」

11. 但正如我所講，違約。你又可以點？去克理姆林宮搶幾幅畫返嚟？似乎唔係咁運作的。

12. 我個人大膽估，俄羅斯此舉，係賊佬試砂煲，試下你班友有乜反應。因為你諗下，債權人收到盧布，固然「街價」同「官價」唔同，會蝕咗一截—但似乎好過乜都冇。會唔會都肯收貨？唔收就乜都冇，拉倒。

13. 俄羅斯點解要試？當然冇人知，但，一方面可能係唔想外匯再流失（近月好似用嚟撐盧布都用得幾勁），二來亦真係試下睇下市場有乜反應。借錢唔環，幾好喎。

14. 仲有，根據俄羅斯嘅講法，係話原本會用美金還，「但畀人制裁過唔到數」，可能亦借呢個機會玩下嘢，迫啲債權人畀壓力政府放鬆制裁

15. 我呢個猜測當然亦有理據，冇耐之前咪試過一次都係咁，放風話用盧布還，最後都係用返外幣。

16. 咁如果俄羅斯真係以盧布還，而被視作「違約」，債權人又唔肯畀佢重組，咁會有乜後果？就真係唔知。

17. 呢個時間，就梗係要識少少歷史。LTCM，或者你有心機，早早應該睇咗When Genius Failed 呢本書（我多次推介）。

18. 極速解你知，LTCM係一個廿幾年前嘅對沖基金，由當時拎諾貝爾獎嘅猛人搞，起初戰無不勝。說穿咗都係 「推土機前執銀仔」（picking up nickels in front of a bulldozer），99.9%嘅情況都會贏少少，然後用槓杆放大佢—直到有一獲畀人車扁（順帶一提，好多讀者叫我評點嘅咩「必勝方法」，short vol又好咩期權金又好，背後都係咁嘅原理，記住係冇免費午餐的，邊有得「穩穩陣陣每年10%」）

19. 而導致LTCM爆煲嘅導火線，就係俄羅斯1998车違約。果時夠晒震憾，因為傳統上有個講法，「核武國唔會違約」。咁但凡事當然有第一次（嗰次仲要係本幣債，俄羅斯嘅嘢，你估唔到，有得印都唔印，吹咩）

20. 打後LTCM爆煲就固然，但亦引嚟金融市場動盪。最後？當然又係聯儲局救市收場。

21. 歷史係咪簡單咁重演？怕且唔係。首先，當年聯儲局，甚至成個金融體系，同而家相比仲係好細，而家聯儲局已經係一頭巨獸，區區一個對沖基金爆煲，算係乜？之前韓仔基金咪爆過，一兩星期已經冇人再講。

22. 況且，當年亦有人覺得，根本唔應該救LTCM。除咗「道德風險」（moral hazard），冇事就收管理費有事就叫政府打救外，亦覺得之後一路維持寬鬆政策，甚至種下2008年金融海嘯嘅禍根云云。

23. 另外，正如我講，當時俄羅斯違約都幾震憾。但而家呢？你睇CDS（Credit default swap，你當係……賭佢爆唔爆煲），都估99%會違約。有晒準備，就難以大幅拖冧市場

24. 咁但，你話到時又因呢啲消息跌返10-20%，就好閒的，股市係可以冇乜事都跌10-20%。你冇去到2008或2020嗰啲規模，都唔好叫「危機」

25. 即係點？即係，驚都冇驚過。但，等你有個準備，唔好到時又驚又問點算又亂咁沽。

畢菲特買HP喎，全無亮點嘅公司，廢老懵咗？你懵定佢懵？

巴郡就快大過Tesla，信唔信？

26. 股神畢菲特嘅巴郡買惠普（HP）喎，唔係成間買起，但似乎都唔少。講緊大約10%左右，幾十億美金，同巴郡嘅現金比當然濕碎。但，唔係太耐之前，巴郡先買過保險公司，

27. 正如上次我都有評，正面嘅你可以話畢菲特都仲買嘢證明股市未係痴線，負面嘅你可以覺得佢受唔住壓力被迫亂買嘢。但我都係傾向信前者。

28. 至於點解買HP？唔知，但大家知巴郡多數唔講咩synergy，好多時完全唔參與公司營運。買嘅原因，多數得一個，就係覺得平。

29. 咁望落，HP又真係幾平。升咗15%上嚟先420億市值，未升之前370億，就用呢個數去計（實情巴郡當然更早買）

30. 公司370億市值，過去12個月收入，640億。嘩，0.5倍price to sales咋，當然不能直接相比，我亦知業務冇乜增長亮點。但你諗下，你地之前幾十倍price to sales追啲發夢股，一旦佢收入增長放慢，自己係冒咗幾大風險？

31. 至於HP，當然係有錢賺的，65億純利左右。370億市值，真係6倍市盈率左右咋，平到笑。果然配合返畢菲特作風。

32. 由舊年下半年，已經開始講價值股應該回歸，不再重覆。但畀多個角度你，你睇今年，巴郡股價一樣升14%，跑贏咩ARKK或者各樣指數成條街，如果冇記錯，舊年佢都係跑贏。之前發夢股喪炒時，個覺得佢廢老，其實照下鏡，會唔會自己太自大？

33. 順帶一講，巴郡照計就冇乜人買（但都有讀者買！幾勁），我有諗過買但都冇買，畢菲特嘅年紀係一個問題，但留意返，IWD嘅最大持股，正係巴郡。仲有，不經不覺，巴郡已經近8000億市值，年初我寫過，今年有機會突破10000億，分分鐘會大過Tesla．

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6