美股：債息一路升，繼續都係睇好價值股多啲。欽點比卡超恒指又大跌，到底市場歡唔歡迎林鄭唔撈？大師冇點你：中海外688 52星期新高。好過中海油883添。Twitter逆市仲有力，唔買都睇下。 (Patreon)

美股：債息一路升，繼續都係睇好價值股多啲。

欽點比卡超恒指又大跌，到底市場歡唔歡迎林鄭唔撈？

大師冇點你：中海外688 52星期新高。好過中海油883添。

Twitter逆市仲有力，唔買都睇下。

美股：債息一路升，繼續都係睇好價值股多啲

1. 可以睇睇美股，真係同我預測差不多，甚麼烏克蘭而家邊有人理，去到4月當然係開始驚5月嘅議息（5月3同4日）縮表甚麼，未加就驚定先，加咗就往往（但唔係一定）冇嘢。

2. 比較關鍵，都係見到呢期啲債息上得幾急。2年嘅固然幾直接反映聯儲局加息，但10年期嘅亦升得快。年頭係1.6厘，而家不過4月頭，已經2.6厘，絶對值得你關心，甚至擔心。

3. 幾肯定嘅係，10年債息照計同股市關係幾大，你問我，我直頭覺得美股仲係咁強都有啲令我意外（年初至今標指先不過跌7%）。另一方面，回少少帶，你睇返2020年。咪話2月尾開始股市狂瀉，跌到3月尾。咁3月尾甚至4月5月你都唔敢買住，係正常的，世紀疫情喎，經濟重創喎。

4. 但你開返個10年美債債息圖睇下，七八九月嗰排，世界又未玩完，10年美債債息，0.6厘0.7厘，嗰啲位真係絶佳買股時機，係咪？

5. 當然，我地就不能坐低等等等，等個債息跌返落1厘樓下（點知等到幾時？），況且到時你又會因為其他嘢唔敢買。但至少你睇到，而家債息咁升法，係應該保守啲嘅。唔係唔買股票，但冇咁進取。

6. 記得舊年年尾我己經講，今年都係睇好價值股，暫時都冇乜變。一拍埋去，你見到好明顯，標指年初至今跌7%，但納指跌夠13%。咁留意標指都唔少科技股或增長股，如果你睇價值股同增長股ETF，分野更加明顯。IWD（價值ETF）今年只係跌2%，每月平均買嘅分分鐘有錢賺，但IWF（增長ETF）跌夠12%

7. 記得早排科技股有一輪跑返贏，都有讀者問，但我都仲係覺得依然睇好價值股多啲（但唔係叫你100%買晒！），而家你見債息升返，個分野係好明顯的。

8. 如果唔明點解嘅，試下好簡單地解：因為科技股嘅「回本期」長，你債息高嗰時，邊得閒同你計咁長遠嘅嘢？況且，你10年後嘅盈利，今日值幾錢？一個關鍵，當然係你個債息係0.5%，定5%。照計中學數學都知，1/1.005．同1/1.05，十次方後，分別都好大下。

欽點比卡超恒指又大跌，到底市場歡唔歡迎林鄭唔撈？

9. 甚麼特首選舉，夠晒反高潮，早早已經沒戲唱，欽點比卡超當選。連往年扮下有兩三人出嚟爭下都慳返。然後你見星期一林鄭話唔連任港股大升，星期二放假，星期三港股又大跌返，咁就知道根本唔係咩特首唔特首嘅問題。（當然，你可以演繹話唔係林鄭市場就好開心，但原來係比卡超，市場就更唔開心，寧願要返林鄭，要事後fit story實得的，但，呢啲就係垃圾評論）

10. 呢排有睇Patreon嘅都知，港股美股都好，配菜係中概股審計甚麼，完全外人冇得估（雖然，似乎係向好嘅方向發展，似乎大陸會傾向繼續畀公司在美國上市，亦唔介意畀人睇更多資料—但有啲公司就唔可以了），而主菜係加息縮表債息升嗰啲。至於咩烏克蘭，已經冇人理，比卡超更加冇人理。

11. 不過話說回頭，雖然香港股市以中資股為主，同特首無關（同美國總統關係應該大啲），但，都仲有啲本地公司，就受返本地嘅嘢影響嘅。

12. 例如你見派消費券，又似乎會放寬返啲社交距離等等，當然有堆本地股炒上咗。而我睇好嘅，依然都係大公司。友邦1299（開關大陸佬再嚟買保險仲唔發？），或者商場（太古地產1972，九倉1997）。至於咩化妝品呀鐘錶金舖快餐店呀之類，你過下日晨炒下就可以，但長期競爭力係低的。（你可以想像，生意好返，當然係加租）

大師冇點你：中海外688 52星期新高。好過中海油883添

13. 同時間，隻中海外688不經不覺創咗52星期新高。呢隻都算推得多，特別係2020年尾畀人話「制裁」嗰時，15蚊左右寫過幾次。我就長期有個個月供的，咁亦因為股價表現好，自然比重佔返多啲（都有讀者問，咁順手答埋，我又唔會因為倉內啲嘢升得多走去沽咁啲去rebalance 嘅，冇必要，頂多係新錢嘅分佈有唔同）

14. 上星期四（入院前）都寫過，中海外係第一季表現第二定第三好嘅恒指成份股，去到呢刻年初至今升43%，僅僅落後中海油883少少。咁中海油你都知啦，油價升佢咪升。但中海外就唔係咁易估到啦，又話地產行業唔掂？事實行業唔掂，整合之後，當然有利大公司，中海外仲要係國企，低負債。所以睇嘢不能咁簡單。

15. 但我仲想補充一點：留意，中海油今年雖然升45%，但，而家12蚊，不過歷史高位係20蚊樓上，你摸咗頂嘅，仲要輸四成。但中海外，而家26蚊，歷史高位？你當32蚊（只係掂咗一掂），真係摸到頂一頂嘅，都輸唔夠兩成，而實際上，根本你絶大多數位買都應該贏錢，每月買嘅更加冇得輸。

16. 固然唔係買咗好多（但都唔少），但呢個例子又係畀你見到，點解我比較少買資源股，或者係任何太過周期嘅嘢。固然差不多所有行業都受經濟周期影響，但比較好嘅公司，就係我下個周期嘅盈利會高過之前。比較唔好嘅公司（例如國泰293），你發現往往十幾廿年前嘅盈利又係咁多，而家（如果市好）又係咁上下，咁你股價點上？

17. 當然不代表周期股不能炒，識炒嘅好好炒添，但多數人都係唔多捉到嘅。

Twitter逆市仲有力，唔買都睇下

18. 但你見，一眾科技股唔掂，Twitter就企得相對硬啲。原因當然亦係Elon Musk，我依然覺得係幾有趣嘅股票，既然你地爛賭，就賭呢隻吧。雖然我提返你，我只係買咗一兩萬蚊港紙，輸晒都唔會有乜感覺，你就自己控制注碼。

19. 首先可以補充返少少，第一，公司公佈返，只要Elon Musk 仲係董事，就唔會持股超過14.9%，所以唔使諗佢會成間買起—但真係要嘅亦都唔難，咪即時辭任埋董事。

20. 呢度帶到去第二個問題，未必好簡大家事，但Elon Musk做嘢一向踩界（我指佢在Twitter上講嘢，唔係造車），之前無啦啦又話私有化然後又話講下笑，仲有公投賣股之類，今次亦都似乎係有啲問題，遲咗N拍先通知證監。到底真係唔敢郁佢點定？大家都要提防呢個風險。

21. 不過我覺得，所有以上認真嘅分析，都不太重要。擺明只係meme股，亦同時畀你見到，今年市況同早兩年真係好唔同。又或者掉轉，到隻Twitter再炒得起，你就知道啲蛇蟲鼠蟻返生，貪婪重新降臨—但往往到你見到呢啲嘢嗰時，已經有啲遲。幾時都係應該早人一步。

22. 所以對我嚟講，與其話呢個係投資（實情係往年開戶時求其搵啲嘢買），不如話係金絲雀（詳情），你睇隻嘢，就知市場氣氛。

23. 當然，你見我其實好少買meme股（唔係冇，但少），咁Twitter，至少都仲係唔係痴線地貴（呢個有點主觀），同埋，間公司仲係正正常常，一路嘅問題都係收入盈利同影響力不成正比，未必冇得解決。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6