埋單：今年第一季，你輸幾多？中概股嘅嘢，點解要買呢？間間餐廳減價，你又飛入去食？單位數市盈率嘅半導體股（梗係美股） (Patreon)

埋單：今年第一季，你輸幾多？

中概股嘅嘢，點解要買呢？間間餐廳減價，你又飛入去食？

單位數市盈率嘅半導體股（梗係美股）

1. 又嚟到新嘅一個月，我星期六一早入院開刀，所以星期五篇文應該星期五晚或星期六天光會有。理論上就星期日出院，再同大家更新情況（想最快知就睇Facebook Page）。但應該盡量繼續寫。

埋單：今年第一季，你輸幾多？

2. 對，寫嗰時美股未收市，但都寫定季結。我係問，你輸幾多。因為你贏錢嘅機會好細，就算贏錢都唔好真係沾沾自喜，例如你乜都冇買只係收咗銀行半厘息都算贏錢，或者你成副身家只係拎咗一萬蚊去抽新股然後第一日升咗兩成食糊，咁都係贏錢。但你明知咁樣冇意思。

3. 冇錯，就係問你輸幾多。輸錢咪輸錢，我都輸錢，冇問題的，我唔明白點解有人覺得輸錢有問題，我應該寫過無數次。你係睇成個過程，一季甚至一兩年輸錢，好閒。事實今季絶大多數股市都跌，日本歐洲美國香港都跌，爭在多定少。

4. 所以輸錢冇問題，但睇下自己輸幾多，同埋輸乜嘢。

5. 好簡單，回歸基本，同指數比。呢一季，恒指跌6%，國指9%，科指20%。美股嘅，道指5%左右，標指都係大約5%，納指10%。

6. 你可以自由搭配，但我粗略咁講，輸錢可接受，個倉跌大約5%嘅，已經相當好，去到輸10%我都覺得冇乜大問題，可接受。但你去到15%以上嘅，就梗係出咗問題！你可以自己檢閱下，其實嚟嚟去去嗰幾樣：唔夠分散，只識高位追，低位亂止蝕亂打靶，或者揀股太差。任何原因都好，可以對症下藥。搞唔掂嘅，好簡單，買多啲盈富基金（減價添）SPY同QQQ。接受自己仲要學習

7. 港股指數勝在成份股少，易計，快手望下。恒指表現最好同第三係中海油883中石油857，升33%同17%，油價升嘛。N年前我有過，而家冇，即係廢話。但第二好嘅中海外688我有，亦寫過推過下，升27%，幫補返啲。咁你可以話我月供咁多隻港股（20隻），大包圍，咁有隻入三甲，唔出奇。但恒指都64隻成份股，你可以計下如果只係by chance，我揀20隻，當中有一隻在三甲嘅機會有幾多。應該幾好玩嘅數學問題，我以前會識答，而家就懶諗了。

8. 仲有，留意，最差嘅係舜宇2382，吉利175，瑞聲2018，三隻都比較貴嘅嘢，而我三隻都冇，從來冇買過。都避開晒三隻。呢三隻嘢一季輸你三四成。你發現買齊最差同最好三隻，都肯定要輸錢，所以都真係要識避。

9. 有趣地（你買咗就唔有趣了），你見科指雖則插得多過恒指好多，但，最差嗰三隻，亦「不過」跌四成幾，可能比你想像中少。但，科指，就差不多全軍覆沒的，搵隻升嘅都難。

10. Anyway，輸錢係唔緊要的，特別係後生嘅，都真係要經歷「交學貴」嘅階段，找講或者人地講幾多次，不及你自己輸一次深刻。最緊要睇你有冇學到啲嘢，同埋，當然係唔好做槓杆。後生嘅，你真係輸晒，都仲有收入有時間，但輸突，就可以引起好多其他連鎖問題。

中概股嘅嘢，點解要買呢？間間餐廳減價，你又飛入去食？

11. 中概股嘅嘢，應該不用我多講啦下話。我唔明白，點解要沾手呢啲嘢。不客氣講句，好得閒？定你太多錢？不如畀啲我。

12. 世上有好多好嘅公司，你可以買到幾多隻？我都已經好花心，但依然好多嘢想買冇買。而隻嘢「跌咗落嚟」，呢個本身並唔係你買嘅理由。如果你一路好鍾意間公司，佢跌咗落嚟，你覺得吸引，想買，我可以理解。但，如果你由頭到尾都冇鍾意間公司，愛奇藝跌咗我又飛入去？即係我不可能見到邊間餐廳大減價就飛入去嘛，你有幾多個胃？況且，因住食到肚屙。

13. 中資股，我已經幾有戒心，你見我都好小心，只係中移動中海外華潤置地。騰訊就小出事，但都冇乜點後悔。平保就出出地事。國企指數ETF 2828 就大出事添。但整體，你見我真係唔多信中資股。

14. 中資科技股，就尤其大問題，你見殺估值嘅問題，美國嗰啲都跌得好慘烈，你中資加埋畀政府搞。然後你仲諗啲蝕錢嘅，仲要美國上市香港冇上嗰啲，真係太過危險。

15. 係，如果最後真係傾得掂數，呢堆嘢可能升好多。但，佢地入面搞乜，你撫心自問，你有乜可能會知？你去分析下香港商場幾時加返租都仲得，或者LuluLemon賣唔賣得都得。但，中美監管機構角力，你根本就係亂咁估。

16. 冇錯，正如啲公司講（愛奇藝，富途），列入個名單，又唔代表短期內會除牌，亦對自身業務近乎冇影響，都係真嘅。但，投資嘅嘢，當然炒預期，啲人驚自然就沽定先，唔使等你真係畀人除牌先。

17. 最好，就唔好掂呢啲嘢啦。真係要掂嘅，都講過，你話百度京東阿里巴巴之類，香港有上市，都仲有得守，頂多瀉一輪（但你肯定你捱得住？），但冇在香港上市嘅，危險之極。

18. 最後贈大家一句，投資嘅嘢，冇難度分。你搞咁多嘢，往往不如人地買隻中移動，甚至買隻SPY。最極端嘅例子，你可以以話馬後炮，但如果渣隻SPY或QQQ之前坐十年，我根本唔使用任何腦，相信跑贏八九成人起碼。

19. 你要悶悶地贏，定好過癮咁輸？當然唔係二分法，但你自己調節個比重咯，小部份錢咪拎去過癮。但冇可能半個倉去買呢啲嘢。

單位數市盈率嘅半導體股（梗係美股）

20. 之前成日講，呢隻貴，嗰隻貴。固然平嘢未必好，但真係講夠平嘅，呢隻啦，單位數市盈率嘅半導體股，再講一次，平梗係有原因，但，值得望下。我未有，有諗過買，但短期都未必會買，都話呢期做兩次手術資金比較緊

21. 美光Micron．做DRAM及NAND晶片。你話有乜好巴閉肯定唔係，但真係唔貴。你見近期業績都好，況且，900億美金市值都唔夠，分分鐘畀人買起都仲得。我就未仔細研究的，亦未打算短期買，但至少有一期我有諗過買嘅。

22. 你睇T12盈利（留意macrotrends個網未有最近一季，但已經好好用），22.6+23+27.2+17.4，90.2億美金，市值900億，10倍市盈率唔夠，怕且唔會點大死得人。

23. 順手講埋，點解用T12？其實最理想應該用分析員估嘅數，美股的話網上都搵到，但較煩，而且成日變。咁如果舊年全年嘅，例如用2021年嘅，我去到2023年頭都仲要用緊（未出2022年全年業績），就太舊了。幸好美股一季出一次，理論上你將最近一季X4都可以。但，用T12住往較好，因為有啲公司有相當大嘅季節性，蘋果正係其中一間。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。