［開刀前最後一擊］港股拗腰升，建行939七連升。同場加映：老問題：有一大舊錢，而家瞓落去好定分段好?中信銀行998不經不覺變咗高息股 (Patreon)

港股拗腰升，建行939七連升。

同場加映：老問題：有一大舊錢，而家瞓落去好定分段好?

中信銀行998不經不覺變咗高息股

1. 又到新一個月，多謝大家。上個月（3月）初開始我就寫返文，好高興大家都接受到而家嘅新模式。寫呢篇文後嘅幾個鐘，我就入院做手術，如無意外就星期日出院。幾時寫得返 Patreon？我都唔太肯定，但我估一星期內應該可以。想知我最新情況嘅，可能睇我Facebook Page或者Instagram最快。

2. 另外，如果有乜好緊急嘅技術問題（但其實投資有乜緊急？），你在Patreon PM，我朋友（即係錄音嗰位）係應該會覆你的。

3. 過幾日後再出文。今次保證唔會2月咁了。今日講少少市況，另外講多啲case study

港股拗腰升，建行939七連升

4. 先快講市況，星期四晚美股，最後一個鐘先急跌，但跌幅亦唔係好誇張，道指跌550點聽落好多，但只係1.6%。有趣係見到港股星期五走勢幾強，低位跌成440點，最後可以倒升收市。今年港股表現唔算太失禮，但都係難坐，特別之前千幾點千幾點咁跌，但你見我真係示範咗唔會嚇到。當然，揀股都係一個問題，暫時我揀啲嘢都OK。

5. 比較強嘅，包括都同你提過嘅長和系，長和1長實1113都升，長江基建1038更強。另外，內銀建行939都不經不覺七連升，呢隻冇買，但有寫過下，都實在係夠高息。今日我會講埋隻中信銀行998，案例分析

同場加映：老問題：有一大舊錢，而家瞓落去好定分段好

6. 如果係每個月有收入嘅（無論打工定幾層樓收租），投資比較簡單。但亦真係唔少讀者話有舊大錢，講緊幾百甚至幾千萬，咁應該分段定一次過？特別係往往呢啲讀者可能係賣咗樓移民之類，可能之後冇收入嘅，係比較頭痕的。如果年紀唔細就仲頭痕，後生讀者真係留意，時間係好大嘅優勢。

7. 呢個問題實在經典，應該放落FAQ，應該答過幾次。長答案係：好難講，如果知道一兩年後實升梗係而家買晒落去，但點會知實升？不過短答案係：分段啦。因為，絶大多數人，成副身家買晒落去，下個月跌20%，保證你嚇到晚晚失眠，如果係冇收入嘅仲驚。而呢啲情況絶對係會出現的。「同埋到時你會鬧我做乜叫你一注買晒，明明我自己就分段買」。

8. 搵返篇舊文畀你睇啦。解答晒你嘅問題，所以點解叫你地要經常睇文。

9. 呀仲有，可能純係我嘅取向，但我真係唔會「拎住一舊大錢」的。都話我銀行長期五位數（有一期係長期四位數添），一超過五位數我就會買股票。大吉利是，我老豆冇錢，我老母就死咗都唔會留任何嘢畀我。至於有讀者知我第時可能搬去台灣，咁但我賣唔賣香港層樓都未知，「況且我層新界樓亦唔係好多錢」，仲有，真係賣咗，咪台灣買返層咯。

10. 信我，拎住舊大錢，係相當麻煩嘅，甚至會影響你投資決定。當年我出大舊花紅（當時覺得幾十萬好多錢啦），都係胡裏胡塗，亂咁買股票，最後都輸咗唔少。

11. 你話咩移民去外國，或者在香港嗰啲，有舊大錢，可能買層樓都係個選擇，煩少好多嘢。

12. 再認真答，如果拎支槍，只能揀買股票，而家瞓身，家分段買？

13. 我會答你：理論上，係瞓身好啲（舊文都有講，入面引嘅嗰篇英文文章都有提）．因為股市呢，真係升嘅機會大過跌。

14. 不過，數係咁計，但你唔係一部冷冰嘅機器。分段買，係比較令你冇咁易痴線嘅。原因係：分段買，但啲嘢最後升，咁你可能賺少咗啲，冇大問題的。分段買，啲嘢牛皮，或者跌，咁你會輸少咗或者有平均成本優勢，仲好。但，一炮過，如果升，當然好，你賺到最盡，覺得自己天才，好彩嗰時冇聽我講。不過，一炮過，如果啲嘢之後大跌—呢種情況，對你心理嘅考驗，極之大。特別係如果你年紀唔細，特別係如果你冇收入。

15. （如果有人之前有睇，呢個分析，同之前講「銀行擠提」「搶唔搶廁紙」差不多，不對稱嘅博奕，出現最壞情況，你好難接受的）

16. 所以，理論上，瞓身。實際上，分段。除非你好後生又預計有幾好嘅收入同埋好強壯嘅心臟。不過我目測，多數讀者個心臟都唔係好夠強。

中信銀行998不經不覺變咗高息股

17. For some reason我好鍾意拎呢隻嘢嚟做例子，其中一個原因當然因為我買過，好多年前了，最初有所謂嘅「五行三保」（識得呢個詞嘅都有返咁上下年紀），就係交通，建行，工行，中行，招行。然後中信銀行就係第六間，2007年上市，剛好係金融海嘯兼「港股直通車」（而家甚麼北水滬港通嘅雛型）撻Q之前，拎嘅估值當然相當貴。我仲記得我係上市第一日走去追，7蚊買，應該打後咁多年都冇見過呢個價。

18. 之前都寫過一篇（自己找吧）講呢間嘢，有時我就會講建行939。唔係叫你買，我亦冇打算買，我亦冇持有。但用嚟示範，咩係de-rating．中資銀行嘅例子，相當極端。盈利同當年上市時比，都升咗好多下，甚至係幾倍。但股價？好多都得返一半，之前甚至係得返三成。因乜？正係因為當年幾十倍市盈率，而家去到…….幾倍。你話估值緊唔緊要？你間公司盈利不停升又如何？（更甚有啲盈利都冇得升，就只係鬥接火棒）

19. 如何避免？亦係有啲難。但另一方面樂觀地睇，至少中資銀行，又真係冇去到輸死你嘅地步，好多中資股可以輸到你死，中資銀行冇。唔好忘記中途仲有派過下息。當然你未必會好安慰，但真係，個盈利一路仲有得升，至少由一場大災難，就變咗小災難，雖然你都要坐好多年。但to be fair，喂，恒指咪又係當年咁嘅水平？國企指數好似仲低過當年添。

20. 我地極快手望下最新個業績，剛出咗，舊年賺556億，人仔喎，居然按年仲升14%，你諗下有幾多中資公司有呢個增長？市值呢，2760億港紙左右。即係，4.1倍市盈率，cheap到你都驚。如果你只睇港股，仲誇張，4蚊股價，每股盈利1.08人仔，好似3倍市盈率。

21.（仲有，小心啲個市值，你睇咩aastock會見到600億，但嗰個只係H股，香港部份，公司有H股同A股，夾埋計的，因為你個純利都係成間公司的。點計？最快手上google finance，大陸網都有，或者上公司年報，會話你知幾多股H股幾多股A股，各自乘返個股價。留意A股H殳係長期都唔同價的，因為冇得互通，唔好諗住平買貴賣，有得咁做嘅一早有人做咗，幾時到你？）

22. 更搞笑嘅係，呢間銀行，原本並唔係高息股，但因為股價太殘，都真係變埋高息股，而佢又真係叫做年年派到喎。未去到真係年年加，但還好。最新一年呢，派息升19%。留意純利只升14%，即係派息比率高咗的。每股股息，0.302人仔，你當0.364港紙。股價4蚊。嘩，9.1厘息，有冇眼花？

23. 講講下，講到我都幾乎想買，但不了。

24. 不過仲有啲啟示，你睇股價，相當強，今年升18%，真係跑贏晒港股美股科技股。但，5年，你都仲要輸22%。就真係你以為去到5厘息好吸引，6厘息好吸引，佢可以一跌跌，跌到8厘息先真係見底。而呢個位都幾難捉。你見建行，甚至中移動嘅情況亦或多或少係咁，一路de rate，但卒之去到某個位，個股息太吸引，但個位都唔易捉。

25. 仲有，就係上次都講過，「中資公司公用股化」。唔知騰訊阿里巴巴之類會唔會咁，但如果會都幾大鑊。但真係，你見中資銀行又係咁，中移動又係變咗咁。

26. 甚至有人同我講，中國人壽都係咁上下，我冇持有，好耐冇睇，嘩，原來得返12蚊，但，因為股價太殘，而息仲係有派。搞搞下，上年派息都0.783。股價就12蚊，都6.5%股息率，估佢唔到。

27. 最後，我甚至懷疑，呢個係國家嘅方向，推啲公司去加大分紅。只係猜想，但你見中移動之前咁講到明，以中資公司嚟講係比較少見的。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。