王維基1137：蝕錢喎，不過仲升咗今年個GMV目標。LuluLemon：梗係好賺，今年差不多收復失地了，但之一一樣3個月跌40%。蘋果：不經不覺又3萬億市值。最賺錢嘅公司，最大市值。有幾難明呢？ (Patreon)

王維基1137：蝕錢喎，不過仲升咗今年個GMV目標。

LuluLemon：梗係好賺，今年差不多收復失地了，但之一一樣3個月跌40%。

蘋果：不經不覺又3萬億市值。最賺錢嘅公司，最大市值。有幾難明呢？

1. 拿，今日講多啲美股啦，聽日都會。但講咗王維基隻1137先

王維基1137：蝕錢喎，不過仲升咗今年個GMV目標。

2. 首先講，公司之前已經出咗盈警，我都寫過。但公司盈警冇講盈利跌幾多，只講全年純利顯著下跌。咁而家呢，全年跌夠92%。全年賺得1500萬。如果冇睇錯，上半年賺緊9500萬，即係下半年倒蝕8000t萬。你話靚唔靚仔？

3. 不過，幾有趣嘅係，睇返個GMV。舊年個GMV一早出咗，結果連佢地舊年年頭自己定嘅目標下限都做唔到，都幾失敗。咁然後原本今年嘅目標係75-80億，而家剛剛在業績中直頭上調到80-85億，嘩。

4. 呢個相信會令投資者比較開心，但係咪因為業績唔得先硬著頭皮咁做嚟買多啲時間？又或者可以想像，今年王生捽數一定捽死。員工自求多福了。

5. 股價？我估先大跌後收窄。但，呢排都唔係好準。之前估中銀香港2388出完業績大跌，結果就大升。

6. 以前都寫過下，個人意見，但你見王維基檔嘢，而家學精咗，想教人地武功（佢自己講嘅），幫人run，多過自己去做。佢在歐洲搞咩無人店，我估都係咁，自己示範單位，然後將啲know how賣畀人。

7. 點解？因為，其實網購平台一啲都唔好搵，只係個個講，做過就知唔好玩。你見香港佢做到咁大，都唔多賺到錢。甚至你睇根本Amazon嘅「本業」都唔多賺到錢。你亦可以話係Amazon頂爛市，個個老奉免運費，咁中小型公司點生存？任你點做都好，去到最尾，你都係要解決送貨上門呢個問題，既然仲要係用人用貨車，啲成本好難有得慳。

8. 一係，等咩無人機（但香港點做？），一係，就等習慣改變，大家開始接受網購係要貴啲，唔係平啲。

LuluLemon：梗係好賺，今年差不多收復失地了，但之一一樣3個月跌40%

9. 之前「預告」過一次，講LuluLemon嘅啟示，結果都冇寫。今日又寫返。

10. 循例講，大家都知啦，瑜珈褲之類，食水極深，女人錢好賺。呢啲就Brand啦，就係擺明大陸嘢可能都差唔多，可能質量有你八成好，但價錢係你三成，但啲人都要來路貨。

11. 我最先聽呢間公司，應該超過十年前，「當時買咗真係發達」，十倍甚至更多，但當然沒有如果。想講埋，話我知嘅，係一個老過我嘅佬。當然你可以當佢係潮人嘅。

12. 然後你諗下，有唔吵咁嘅例子，我根本唔使搞咁多咩fancy嘢又乜技術又乜大數據，我認識Starbucks係2001年前後，在英國讀書時，差不多時間開到香港，同埋全世界，根本極之易睇到有幾咁流行，股票任你買。同樣地，仲有蘋果都係咁。

13. 但，你都知問題在邊。首先，隻隻股票，中途都會有起落架啦，你嗰啲咩10%又止蝕升少少又食糊，就永世唔會搵到大錢，更唔好講有時只係跟埋個市一齊跌，包括肺炎時股災咁。我成日講嘅例子，蘋果2018年，一樣一季跌咗三成，咩事？好似咩事都冇，當然嗰時就話咩貿易戰。打後？仲升咗四倍。我講緊只係2018年尾嘅事咋喎，同而家相距三年多啲

14. 但除咗以上呢啲外，仲有一個問題：再好嘅公司，都有個價。舊年11月美股啲發夢股咪死晒嘅，Lululemon唔係科技股，亦係盈利能力好強嘅，但一樣大跌。點解？貴嘛。隻嘢有冇平過？好似都冇乜。只係舊年11月到今年2月23日呢三個月多啲，跌咗38%。照計買咗嘅好多人又問點算，甚至鬧，或者去止蝕。（BTW，2月23日咩日子？正係俄羅斯開戰）

15. 但，就去到我想講嘅重點啦：你見公司之後股價都升返上嚟，而家離高位都仲有成25%，但剛剛出業績，大升一下後，今年只係跌4%，幾好啦。

16. 教訓？都係嗰啲。首先，唔好以為估值唔重要，呢間公司夠勁啦啩，但一樣可以三個月跌38%。但問題二，我點知幾時先估值合理？答案，係好難的，一般咪就係人人驚嗰時你應該買，但都係難。所以去到第三，最重要：如果你間公司真係一路盈利增長嘅，你買貴咗，一路坐，股價都會慢慢碌返上嚟，但你間公司只係玩接火捧人買我買，最後根本冇盈利甚至收入都唔升嘅，就永不超生了。

17. 咁但，點去判斷間公司有冇盈利？其實又唔係太難，只係人好多時好貪心，因為投資都係炒預期，你扑中一隻人人以為賺唔到錢但最後賺到嘅公司（Tesla，Netflix甚至Amazon），回報可以好驚人。亦係我成日嗰句：Successful investing is having everyone agree with you………..later。記住，later圥係重點。

18. 相反，如果人人都知好賺錢嘅公司，回報就往往冇咁好，雖然都唔一定唔好。你睇蘋果？十幾年前Steve Jobs死嗰時已經人人知道好成功，但之後股價至少仲升咗10倍。

19. 而公司賺唔賺到錢，都未必真係咁難睇。護城河嘛，你睇上面講Starbucks Lululemon嘅例子，根本任何一個普通人都知公司好賺錢。當然，有時啲公司亦可能只係「好似」好勁，實情冇錢賺，甚麼A&F嗰啲咪係，你以為好出名，實情冇乜錢賺。

20. 仲有，你無法承受一隻大公司股票會3個月插38%嘅，咁其實，你都唔好諗住你可以賺到大錢。講過無數次，又想唔會跌又想賺得多，世上冇咁著數嘅事。

蘋果：不經不覺又3萬億市值。最賺錢嘅公司，最大市值。有幾難明呢？

21. 全世界最賺錢嘅公司，最大市值嘅公司，唔使多介紹啦下話？原來不經不覺，已經連升11日，我都冇留意，證明股票真係唔使成日睇，或者至少我唔係隻隻股票都成日睇。呢隻當然係持有，都唔少的，升升下好似變咗倉內最重。

22. 話說，公司第一次去到3萬億美金市值，係今年1月3 日嘅事。嗰時Blomberg都有寫，之前1萬億，或者2萬億，都係見一見，打後無論係蘋果定個市，都有個大啲嘅調整。估唔到去到3萬億一樣係咁，當中有乜原因，我都唔知。

23. 但，明顯地，蘋果去到1萬億後，掂一掂然後跌返穿，當然之後係有升破呢佪位，否則唔會有後來2萬億啦，2萬億時情況亦一樣。

24. 今次呢，原來不經不覺，蘋果已經收復咗今年嘅失地（可想而知跑贏大市，同埋好多其他公司）。股價離歷史高位，只係大約3%左右。至於市值，而家都29000億，離高位亦係差不多3%

25. 做乜咁強？照舊，唔係好答得到你。肯定嘅係，唔算係間極貴嘅公司。但，亦不能算平，T12（過去12個月）純利，1000億，即係都成30倍市盈率，一年前120蚊嗰時就平，但你又有冇買？。

26. 你問我買唔買得？照舊都係畀嗰啲答案你，我都有買，當然買得。但幾時都係，升晒先買，可能你又有機會買完即時捱一陣咯，但根本呢啲係投資嘅一部份，我買隻SPGI嗰時都係咁，仲要個市係好地地而隻嘢一路跌。講到尾係心態問題，到跌嗰時，你又未必敢買啫。所以為乜咁煩？想買咪買。唔一定話真係要完全個個月買指數ETF，我當我五年之中，個個月有錢，有一萬幾千就買，咁，段估唔會隻隻都摸頂啩？就係咁之嘛。

27. 蘋果係一個好好嘅例子，以後你，或者有人再講某啲嘢時，不妨諗下蘋果

28. 如果有人話，大公司冇得升嘅，你諗下，係咩？

29. 如果有人話跌10% 15%要止蝕嘅，你諗下，蘋果升N咁多倍，中途有幾多次調整？

30. 如果有人話公司唔使賺錢嘅，你可以諗下，蘋果絶大多數時間，都係全世界最大市值嘅公司，又同時係最賺錢嘅公司。係咪巧合？

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。