[FB文] 非金融 ［妳追求的是一種浪漫　感覺　還是那不必負責任的熱情］ (Patreon)

FB出左篇文，連結如下：

https://m.facebook.com/story.php?story_fbid=518198416546098&id=100050678310520

［妳追求的是一種浪漫　感覺　還是那不必負責任的熱情］我都想似冬昕有好多好多錢　食好多好多好多好多好多軟雪糕　（都話音樂台，你估講笑？）

1. 聽講話戰爭中，最先陣亡嘅就係真相。而我就估唔到，我呢個治病（唔想講咩「抗病」咁sentimental）途中，最先陣亡嘅，居然係Coke Zero！

TLDR：一個月唔飲得，不如，就由Coke Zero呢樣嘢本身講起？

2. 個故事就有點曲折，原則上西醫嘅嘢，不存在戒口不戒口，醫生都係叫我食返平時食嘅嘢，「咪即係呢個」。咁但，就真係曲折地，結果呢個月，我都係冇飲過Coke Zero．正確嚟講，我係冇飲過任何汽水。呼。

3. 故事有點曲折，不如由，「可口可樂」講起。

4. 我唔知有冇「可樂癮」呢樣嘢，如果有嘅，相信我嘅程度都係中等甚至中至高等。仲係細細個已經有。

5. 根據我老母講（當時未反枱），當年我仲係十分細個，手抱咁大嗰時，有次我老豆就同佢去淺水灣（可見我老豆個人幾咁浪漫，又，大個咗，週末佢都仲會車埋老母同我同我個妹去沙灘，唔係去咖啡灣喎，玩到入西貢喎，都幾係嘢）

6. 咁就話說，買麥當勞（果然夠浪漫，但亦可能只係質畀我食），整咗杯珍寶裝可樂。而家仲有冇呢回事？我都唔肯定，但中學時期好似仲有，都覺得好震憾。講返個珍寶裝可樂，咁呀老豆就諗住玩下咁，畀個B（即係我）吸兩啖咁。誰不知個B呢，居然兩隻手捧住個杯，不停啜，成杯飲晒。「可能就係嗰時開始上癮」

7. 打後嘅事，冇乜特別，都係嗰啲。比較特別係，到我教中學時（2004年，即係我26歲，至少飲咗廿年可樂），有個隔離班學生週記寫我，呀中文老師（冇錯係嗰個）畀返我睇。唔使幻想了，男學生一個，而我後來發現啲學校好鍾意寫啲新嚟嘅老師，因為懶諗題目。

8. 呀學生對我呢位新嚟嘅老師嘅印象，就係佢朝朝早都在小食部拎住罐可樂，風雨不改（啲中文幾好呀下），冬天都係咁，仲經常若有所思（好彩唔係寫「若有所失」）的樣子。

9. 除咗「若有所思」嗰部份未必啱外，其他都肯定係真的。風雨不改固然係，冬天都一樣亦都係。而主要係因為早返工（教書嘛），朝早提下神咁，而當年我又唔多飲咖啡（實情而家都唔多飲），亦唔知小食部有冇咖啡呢樣嘢。

10. 然後，如是者，去到大約2006-7年，可口可樂公司，推出咗佢地當時22年嚟最大嘅一個新產品，正係Coke Zero．十分簡單，怕死嘅我，就轉投咗Coke Zero陣營

11. 值得一講嘅係，都話呢個係當時可口可樂22年最大嘅一個新產品，雖然係行銷高手，但都不容有失，嚴陣以待。況且嗰22年間，世界真係變咗好多。一個字係中國市場，兩個字係全球化，三個字係蘇東波。22年前，中國基本上都未改革開放，窮得很，仲係蘇聯美國冷戰，亦未有互聯網未有Facebook．

12. 當年可樂公司當然就洗好多，好多，好多好多錢。只許成功不許失敗，特別係經過Diet Coke嘅慘烈教訓。而其實Coke Zero原本係打男性市場嘅，所以特登唔講咩Diet呢啲女人嘢。

13. 香港方面，我最記得嘅當然係，你去好多餐廳，都可以免費配飲Coke Zero．外國嘛，仲深刻，咁啱嗰年我去西班牙，就記得佢地在街度整架卡車免費派。我知香港都有，「但真係唔同」，香港就成班阿叔排，啲helper又西口西面咁。在西班牙（當時我在巴塞，to be exact），就係年輕當打嘅鬼妹，強勁嘅音樂，同埋根本唔使點排隊（邊有咁多人？），派玻璃樽裝，人地又開得好熟手，一秒派一兩支咁，十分開心。就在大街派（Las Ramblas）。我朝朝都去拎（都係留咗幾日啫）。

14. 關於Coke Zero，我仲想講樣嘢，就係有啲地方，並唔容易買到罐裝嘅Coke Zero．同好多可樂塔利班唔同，我並不太執著於玻璃樽裝可樂，一來細支（我知有大支裝，但好似而家都少見？），二來，你在咩雲吞麵舖畀你嘅，過半都唔夠凍。一罐凍嘅可樂，當然完勝唔夠凍嘅玻璃樽。

15. 不過，我就都仲有我嘅原則，就係，膠樽裝，真係相當難接受，免得過都唔好。有冇人見我飲過？咁但，都有時有嘅，師傅到（而家後生仔知唔知呢個詞點解）時都冇計。例如在邊會飲膠樽？正係日本！

16. 希望我冇搞錯，日本達人可以指正，但在日本，並唔係咁易買到罐裝Coke Zero．我當然知係有嘅，我都買過，但真係並不太容易。我估超級市場或者網購之類實有，但be practical，作為一個遊客呢，咁你想話行入便利店買，會發現，一百間有九十幾間都只係膠樽。自動售賣機亦都係（況且，日本並不太多可口可樂系嘅機，相對地）。原因？不明。但我隱約記得，在關西，就好似比較多機會有罐裝Coke Zero，神戶就相當多。「果然係外國人嘅門戶」

17. 另一個，比較難搵罐裝Coke Zero嘅地方，冇錯就係台灣。當然難度會比日本低啲，亦因為我已摸熟門路。便利店就唔會有，但家樂福或頂好（即係惠康）就會有，而且有24小時嘅頂好，咪講笑，嗰時我真係會行15分鐘走去買。另外，如果埃汾太居住在台北嗰期，當然就屋企有大量存貨了。仲有，你去嗰啲「勝立百貨」「小北百貨」之類，都會搵到的，仲要係冰凍嘅添。實不相瞞，2020年尾，我在台灣隔離14日，都係網購咗N罐返防疫酒店的。「但頭幾日呢？」。你估到了，就梗係由香港抬咗N罐過去，「有乜問題？」。

18. 當然有啲人堅持Coke Zero係藥水好難飲甚麼，但，事實上呢個係極成功嘅產品，period．最重要都係嗰種，「不必負責任的熱情」，唔會大肚唔會有病嘅中出，唔流血嘅革命，唔下雨嘅天空，不流淚嘅感情。幾咁好呢。當然好似就冇咁著數的，而家又話會致癌了，但，話之佢啦。你唔飲可樂，唔會長命啲的，只係望落去好似長命啲咁啫。

19. 順手講，年輕時，同過個屋企相當窮嘅女仔一齊。佢並不特別貪錢，也不特別上進（否則點會同我一齊），但，好記得同佢我講，個願望就係希望，屋企個雪櫃，永遠都係滿嘅，有食唔完嘅嘢，飲唔完嘅嘢（而條女係唔肥的，放心，至少當年唔肥）。

20. 呢個對於諸多一年去幾次日本嘅香港人嚟誁，當然真係濕碎之極。但當年都係有點震憾咗我嘅心靈。如今呢，「我屋企個雪櫃就大約係咁」，埃汾太長期負責維護（由本人打本），保證有源源不絶嘅Coke Zero，以及各種其他戰各物資（而其實我唔係食好多零食的，至少近年都唔多，同我做過同事應該發現我個位係冇嘢食嘅）（但即係我屋企唔會出現冇廁紙冇雞蛋冇杯麵冇罐頭之類）

21. 然後再想，呢種「all you can eat」，「任你上」（當年嘅Sunday台廣告，當然係出自女人手筆），「自助餐式」，亦都係折射緊嗰種慾望。實情，人嘅嘢，特別係年紀大咗，你食得幾多丫，一定係「蝕」的。但就係嗰種「唔使擔心」「一個價鍾意點食都得」嘅安全感。

22. 同樣地，我算係好肯畀錢上網嘅人。咁最初開始埃瘋3嗰時，就當然係揀無限數據plan（加上，嗰期富貴嘛），我開頭以為唔係好多人會咁，明顯又係貧窮限制想像力，亦係不通世情。諗真啲都知，你見固網寬頻，啲友都係咁架啦，限住限住邊過癮，況且我點知你電訊商點計。梗係寧願一個價，買個安心，唔會唔使就住，唔會月尾大失預算，「電訊商出狗招限你速就另一回事」，「即係好似啲限時放題咁啲嘢叫極都唔出拖到你夠兩個鐘咁」「或者自助餐啲生蠔只出一輪」

23. 甚至對於錢，可能都係咁上下。幾多錢先叫「夠」？寫文都寫過好多次，但都好似冇一個好肯定嘅答案。幾肯定嘅係，「咁你幾百萬港紙就肯定係唔夠嘅」。但。實情幾億港紙，就應該點都係「夠」，咁當然你要玩到鍾意買乜就買乜，聽日想買間舖後日想買間餐廳，就絶對係自己搵煩惱了。

24. 實情我接觸到有啲讀者，都應該係「夠」的了，但總係唔放心。冇錯，亦係希望個雪櫃，點食都仲有。「有仔女嗰啲仲仆街」，係啲仔女仆街，仲要諗埋佢地嗰份，就真係唔知點計。但，你用所謂嘅3% rule（傳統用4%，我地再保守啲），你副身家嘅3%，夠你（同你伴侶啦下，至少你要搞埋你個仔你個孫就幫你唔到）一年開支嘅，咁，照計，你就食嚟食去都係面嗰浸。Work Backwards，你而家用緊幾多錢一年，計到的。通脹？計埋架啦。你兩口子用6皮嘢個月嘅，咁，咪兩千四百萬。六皮個月齋洗都唔夠？你望下香港中位數收入幾多？咁幫你唔到喎，控制下你嘅物慾咯，一係碌大啲舊錢。「咁就記得訂我Patreon．睇少啲垃圾」

25. 係喎，一如以往，離晒題，都冇講點解我唔飲得Coke Zero，應該話唔飲得所有汽水。答案就唔係好似《唐山大地震》咁有陰影，而係，咪話而家食緊隻口服藥降眼壓（排水丸）。隻藥呢，咪話有唔少副作用。

26. 其中一種副作用，就係會改變味覺。於是，我飲汽水，就會有相當怪嘅味道！

27. 作為一個科學人，當然我會做不同嘅實験。我試過飲普通可樂，一樣係變味。我試過飲玉泉忌廉Zero（居然有啲咁嘅嘢），都係變味。但飲奶茶檸茶之類，就冇呢個問題。食嘢，都冇呢個問題。食甜品都冇呢個問題。就唯獨係啲汽水，有呢個問題。

28. 至於點解會咁，就真係問下藥劑師了。我當然唔會得閒到問醫生，相信問佢，佢都只會答「哦係呀呢啲係隻藥嘅副作用，有時好奇怪的，因人而異」

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。