Tesla 送紅股嘅嘢。美國5月加息半里喎，驚唔驚先？預告定：債息倒掛喎，驚唔驚？梗驚。三星亞太REIT 3187　派息 (Patreon)

Tesla 送紅股嘅嘢。

美國5月加息半里喎，驚唔驚先？

預告定：債息倒掛喎，驚唔驚？梗驚。

三星亞太REIT 3187　派息

Tesla 送紅股嘅嘢

1. OK，其實唔係送紅股，係拆股。「但你一樣可以理解做一股送N股紅股」。

2. 記得冇耐前寫Amazon都寫過，呢啲拆股嘅嘢，當然對公司任何基本因素係冇任何影響。但，亦正如之前寫過，你見蘋果又好，Amazon又好，Tesla又好（之前咪拆過一次），宣佈拆之後，股價都係有明顯升幅的。

3. 咁你應唔應該而家追入去？短答案就當然唔應該，升咗啦喎。

4. 話說回頭，如果Tesla呢類情況，比較易有「解釋」，因為真係一隻相當多散戶鍾意嘅cult股，講話咩「拆細令多啲散戶可以入場」嘅講法，好似成立。雖然我個人覺得，美股既然可以一股一股買，而家一股Tesla都好似只係8000蚊港紙咁上下，8000蚊都拎唔出嘅人，係咪應該投資股票呢？我就覺得應該專心做好自己嘅嘢。

5. 講返Tesla本身，今年股價麻麻地，計埋昨晚都仲係跑輸大市。但近期走勢好強，一個月升咗25%。原因？我都唔知，可能係因為近期部份高估值科技股都翻生，亦可能係德國間廠投產，但亦可能係同油價有關　—油價高，電動車咪有吸引力。

6. 然後又係你地最關心嘅問題，買唔買得過？我覺得不了。我係有少量的，但我講緊500蚊樓下買（其實都唔係好耐，就係2020年尾，入標普指數前），我仲執緊一個開，當然冇所謂。但你而家買，另一回事。

7. 你話你想執10% 20%，冇問題的，「但其實買好多嘢都做到」。問題係，公司真係太大了，而我買股票當然係睇倍數計。Tesla會唔會仲升到幾倍？我就幾懷疑。而家1萬億市值，最值錢嘅蘋果都唔夠3萬億，但影響力同盈利能力似乎唔係同一層次。當然，我可能錯啦，但你都可以主觀問下自己，公司有冇可能升幾倍，變到幾萬億市值，影響力去到蘋果微軟咁？

8. 咁當然，另一個可能係，可能若干年後，蘋果已經10萬億市值，Tesla幾萬億，亦係可能嘅，通脹之嘛。

美國5月加息半里喎，驚唔驚先？

9. 順手快手講一樣嘢，下次議息會議係5月頭（一年八次嘛，個半月一次），而家放得風嚟，都差不多。又開始有人估話加50點子（半厘）。

10. 本來券商估就冇乜特別，但更重要係，聯儲局堆官員，輪流出嚟吹風呀下。就似乎想引導下市場咁。

11. 仲有成個月，可以睇埋啲數字先，我依然唔係好覺得會加半厘，雖然而家似乎市場主流有咁嘅預期。同樣地，我亦唔覺得加半厘同四份一厘有乜分別。亦不代表加半厘就跌四份一厘就唔跌會跌少啲。但首先，記住一樣嘢，「可能我錯呢」。第二，到時真係股市跌，又會有好多埋由講。所以話定你知，等你唔好到時措手不及。

預告定：債息倒掛喎，驚唔驚？梗驚

12. 仲有，同你預告定，呢期啲10年債息相當強勢，亦開始有人講債息倒掛甚麼。雖然最後美股倒升收市，但呢個絶對係未來幾個月甚至大半年嘅大課題，希望呢幾日我會詳細講。

13. 但，正如我明報篇文提到（Attachment有，當時都只係講加息50點子嗰樣嘢，未講債息倒掛），呢啲，先係你最需要留意嘅嘢。而唔係咩烏克蘭或者林鄭。

14. 不過你見唔見好奇怪？個個就只係去關心咩烏克蘭俄羅斯，林鄭抗疫，講真，呢啲完全唔會點長期影響市場嘅嘢。得罪講句，我都大半個學院派出身，你見啲人講返以前股市，有幾可會講邊度抗疫邊度打仗？明顯地聯儲局對企業或者股市嘅影響，大好好多好，但你發現，係唔多人會講的。

15. 點解？原因兩個。首先，因為好多人完全唔識。講烏克蘭個個係軍事專家啦，講抗疫又個個係傳染病學專家。但你會唔會見啲師奶 群組講聯儲局加息？唔會的。第二，亦因為以上原因，所以講烏克蘭講防疫，夠juicy，個個有意見，個個識得鬧。但講咩聯儲局？你叫啲網友點搭嘴？所以普通KOL亦唔會講呢啲，因為太趕客。

16. 但，再講一次，八卦度高嘅嘢，往往就係唔重要嘅嘢。你講王力宏許志安，照計仲多人睇過烏克蘭，但，笑下就算，唔使認真。唔好又講到嘩呢單嘢改變世界呀從此男女關係不不一樣。

三星亞太REIT 3187　派息

17. 順手講埋，隻三星亞太REIT 3187出咗派息，話咁快除埋淨，都有啲失望。固然同好多嘢有關，匯水都有關（佢啲嘢唔少都日本澳洲）．幫你睇埋，一年派四次息，咁正路計T12（過去12個月），加埋0.12美金，0.936港元。股價就20.94，即係4.5%股息率，聽落真係唔多吸引，唔好忘記個NAV仲會日日縮啲（因為有開支，每日扣少少你唔覺的）

18. 我就有每個月幾千幾千港紙咁買，呢個月都仲有。但真係分分鐘諗會沽。以一隻REIT嚟講，又唔係特別高息，唯一係做到地區分散，但啲費用都幾貴。今年都仲要跌2%，而我買咁耐，好似計埋平均成本都係潛足咁耐水，咁當然收過下息嘅。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。