[FB文] 非金融 - 定期報告II（隻眼） (Patreon)

FB出左另一篇文，連結如下：

https://m.facebook.com/story.php?story_fbid=517497053282901&id=100050678310520

［定期報告］有病當然要食藥，咁但，齋食藥係解決唔到問題嘅

1. 又，仲有啲其他補充。首先，嗰條咁嘅「亞曼氏管」，都要特登訂。雖然青光眼並唔係好罕見嘅病（for some reason華人係特多嘅），但搞到開呢隻刀嘅都唔係十分多。呀醫生都同我講浸會要「班」條管，講到好似打劫班支槍咁。

2. 冋時間，我仲要有個人工鞏膜，冇錯，就係人地器官捐贈嗰啲。大家記得捐器官，真係幫到人的。亦都已經班咗，要畀返錢醫管局的。

3. 另外，醫生對個手術，都相當有信心嘅。好似聽佢講，以往咁多病人做，冇一個有咩手尾。「當然我冇問佢做過幾多個」「死咗係咪即係冇手尾」

4. 仲有，咪話3月頭覆診眼壓好高嘅？正係因為咁先要開刀嘛。咁但，3月頭到4月頭，咁點呢？有得佢？都唔係嘅。一來怕會傷害啲視神經，二來，手術前眼壓高都唔好，因為要劏開隻眼。「你想像下架飛機飛到一半你打開機艙門會點？」，咁實際上當然唔會啲血呀水呀噴晒出嚟，但，忽然個眼壓由好高變好低，都係危險嘅

5. 咁呢排點降低個眼壓？理論上可以去挑多幾次針，但實際上，首先　次都搞你五千銀，二來痛，但呢兩個都唔係重點。重點係，咁挑法，都真係有啲危險（遲下解），同埋，挑完嗰幾日，就真係視力大降，降到一個我連月台兩邊去邊個方向都未必分到嘅地步，更加唔會寫到文（所以，你見我寫返Patreon，正係差不多3月7，唔再挑針之後）

6. 咁點搞？就係，可以食口服藥的，而且十分見效。我食咗後，兩次定三次覆診，眼壓都係正常水平。「咁唔早講？一天都光晒啦，食藥咪得，開乜刀」

7. 咁你估到了，邊有咁簡單？

8. 藥嘅嘢，副作用比較大。甚至之前個醫生都有提議過我食，但我都冇食，到而家真係冇得揀先食。

9. 隻孳呢，十分舊，所以醫生一路都唔係好建議開，副作用較大。基本上就係「排水丸」嚟的。十分有趣地，啲人克服高山症，都係用冋一隻藥。不過科學嘅嘢，最初偉哥都好似係心臟藥，而有啲青光眼嘅眼藥水，係會令眼睫毛變長的（係！），所以以前有啲女仔拎嚟用，十分痴線。

10. 講返隻藥，一方面排水，亦都抑制咗眼球內房水嘅產生，所以就幾有效的。咁但，係咁架啦，當然副作用比較大。

11. 有乜？首先會手痺腳痺，會食慾不振（你見我ig都有貼），「但我見你老哥仲係咁打邊爐喎」，咁，食得耐咗，會習慣嘅，況且即使頭兩日，都只係胃口差啲，唔係完全食唔落嘢嗰種。

12. 另外，因為「排水」，亦都會令身體流失電解質。咁就比較唔好玩。首先會傷胃，咁醫生會開埋胃藥，但都係會有啲胃痛，不過可忍受。同時間，醫生亦會開「鉀丸」補充返。咁，當然仲會係利尿，同埋輕瀉。「所以我呢排日日食蕉」，既補充啲鉀，又令到冇咁瀉。

13. 不過，以上嗰啲，都係小問題。大啲嘅問題，就係睇唔到嘅。長食會對個心或腎唔好。咁但，我暫時只係食一個月，就唔理住。但亦真係有啲人長食的，去到冇晒其他方法，咁即係都係兩害取其輕，你想睇唔到嘢，定增加生腎石風險？

14. 而但，仲有一種好奇怪嘅副作用，就係會令個味覺都改變的。呢個就下篇文再解。