[FB文] 非金融 - 定期報告（隻眼） (Patreon)

FB出左篇文，連結如下

https://m.facebook.com/story.php?story_fbid=517228693309737&id=100050678310520

［定期報告］下星期呢個時間，我就瞓在醫院，一片黑暗。趁仲有七日（講到就死咁），都又講返個情況先。

TLDR：星期六入院開刀，全身麻醉，預計星期日出院，之後抖返一個星期啦。

1. 實情如果睇我ig或personal Facebook 嘅，會見到我有貼麥旋風。「即係OK」，咁但呢啲，都只係narrative．或者話，好睇我本人嘅「預期」，期望低啲咪有好消息。

2. 前事交代，你好得閒嘅，可以睇返對上一次update（https://fbook.cc/3qDf），呢篇文最底亦會有個覆診全紀錄（ig版冇，冇位），但都唔使再update了，因為近來都冇乜好講

3. 簡單講，1月尾手術後，切開咗個「小梁」，排水。但因為後生又復原力強（我呀），所以埋口埋得好快，排水又會唔多好，眼壓就會升返。升有乜問題？都話會壓死啲視神經，由頭到尾都係呢個問題。咁當中再試過做咗幾次「挑針」（十分痴線的，另文再講），都係用針「破壞」個傷口，加埋啲藥水（很毒的，亦係等啲組織唔好埋口），但挑咗幾次，當然挑完眼壓會即時低，立竿見影，但不長久，又會生返埋，可能一兩星期咁。咁挑下，傷口又埋下，如是搞咗三次，都係唔得。

4. 咁去到呢度呢，用外人嘅諗法，就可以話個手術「失敗」，咁但當然要切嘅又切咗又冇出問題（當時）又降到眼壓嘛，打後你生返埋就另一樣嘢。

5. 於是去到呢度，你可以話：時間又用咗，刀又捱咗，痛又受咗（開刀呀，挑針呀，都痛的），錢又畀咗，睇嘢就仲差過手術前，都幾弊。但當然只係一個narrative，我並不盲目樂觀，但亦唔係一個悲觀嘅人。

6. 然後又點？就係再開刀啦。當然，唔係切多次小梁，就玩第二樣嘢啦。

7. 今次玩嘅，「亞曼氏導管」，亞曼氏係條友（好型，好似「馬蘭頭通道」咁），聽名都知，咪插條管，在眼入面，幫排水。但當然收咗入眼入面，所以第時唔使叫我表演噴水。

8. 聽落，都易明。咁但，外物嘛，當然會有發炎之類嘅可能，就係希望唔好出現呢樣。

9. 複唔複雜？唔知喎，又唔係我開刀。咁但，其實都係個幾鐘貨仔，又唔係開心開腦咁。但，就應該複雜過上次小梁切割，亦正如醫生講，切開個傷口會大啲，時間又會長啲，仲會痛啲咁咯。

10. 咁呀醫生聲稱係畀咗個電視框我嘅，當係上一次嘅延續，跟餐配多個麥炸雞咁。無從驗證，但我相信都係，因為佢呢個手術，收得平過上一個，但正路呢個複雜啲又耐啲。

11. 好啦，麻醉。我唔係醫生啦，但，正所謂感情問題一律建議分手，我懷疑你問醫生呢，一定係叫你全身麻醉，好似劏屍咁，佢最簡單，少啲嘢煩。

12. 咁你話，做局部麻醉得唔得？冇話唔得的，但呀醫生就話比較痛啦，同埋驚做到一半如果我一「谷」就好危險，我問，乜「谷」？即係例如中途打個乞痴呀，咳呀之類，都會比較危險。因為你想像到，你隻眼就劏開咗，　well……..．同埋醫生話，亦都比較痛。雖然唔知點量化，咁上次就唔係十分痛嘅。

13. 咁仲當然，之前我都仲對私家醫院有啲誤解（唔通住公立？），因為我做完手術就包紗布，就即係全盲，上次都係咁，但上次我屋企，真係半夜自己搵尿屙都仲摸到。咁但醫生就叫我放心，人地姑娘好有經驗處理各種奇難雜症架啦。

14. 如是者，最緊要醫生覺得安心，所以我就話，好，全身麻醉啦，入院。

15. 實情呢個決定，3月7日覆診已經做，但大家亦知道醫院啲位比較緊，再加上各樣嘢，好似最快都要去到3月尾，咁我搞埋，就話不如4月頭啦（原因係好好笑的，但都分享。首先原本我傾緊壇talk，3月31日，有錢收的，都幾好，但後來已收皮。第二，亦同信用卡有關，4月頭做就4月尾張單先見，5月尾先找數）

16. 最初，醫生首選係浸會，但冇位，所以係去聖保祿（銅鑼灣）。後來浸會又有位，所以變返浸會，日期不變，咁呀醫生去開，就梗係最好。

17. 時序上，4月2日星期六一朝早入院，下午一點開刀（十分好），正路三四點乜都搞掂，推返上房，但我包住紗布（即係，完全睇唔到嘢，有冇人唔明咩叫完全睇唔到嘢？）兼仲有麻醉藥。正路去到夜晚八九點，我就可以飲水食少少嘢同醒。然後當然又瞓過，第二日星期日早上或中午，醫生會嚟拆紗布，檢查下，冇乜大問題，就出完，星期日晚已返屋企瞓。

18. 我就會打定啲post，叫埃汾太代出，等你知道我平安

19. 正路就冇乜咩傷口埋口塞住嘅問題（插咗支管嘛），回復亦比較快。但當然頭一星期都比較關鍵，所以埃汾太已請一星期假。不過4月8至11日（inclusive），星期五六日一，佢就拎唔到假。所以就有機會要搵朋友或乜幫手了，如果你十分得閒又十分有愛心就話我知，雖然我估多數都唔使嘅，多數只係出去覆診咁。

20. 仲有想講，我見啲友在台灣做，搞足成個星期，不過國情不同啦。佢地做小梁切割都搞三日兩夜。局部麻醉咋喎！香港？我當時夜晚八點報到，醫生九點落刀，好似十點幾十一點搞掂，十二點唔夠我已經坐的士返屋企。

21. 就係咁。你可以做乜？就當然係支持我Patreon．我就真係明白，就咁叫人科水支持就唔得的，甚至播雪花都唔得。所以在我能力範圍內，你見我真係開始寫得返嘢，就已經日日寫返。盡做的了，對得住讀者，

=====

重出江湖！Ivan Patreon 已經2000人訂！多謝大家！比別人知得多。subscribe now（bityl.co/9CyV） ，可以睇返晒以前嘅文。港美市場評點，專題號外，每日一圖，好文推介。每星期6篇，月費100． 畀年費仲有85折，

富途嘅，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

============

附錄：簡史（以後不停更新）

1月 29日，夜晚開刀。30日31日，覆診，眼壓好低，很好。2月1日2日3日，醫生放假。4日，醫生仲係放假，但照原定計劃去佢徒弟度覆診，眼壓好低，原醫生都有遙距畀指示，很好。5日6日。，醫生放假中，但我感覺良好，周圍走，諗住可以好快回復正常。7日，開始睇嘢矇，眼痛頭痛。8日，冇咁痛，但穩陣起見，埃汾太又放假，我又冇乜嘢做，就再去搵呀從弟。好彩有搵，原來個眼壓升得好高。排水排得唔好，可能因為個傷口埋得太好。於是呀醫生親自幫我按摩（係！不過按眼，唔係雀仔按摩），同埋當然係開啲眼藥水。咁本人心情就當然唔多好。9日，再去徒弟覆診，眼壓低咗啲，但依然高。10日，醫生歸位，當然我眼壓仲係高。於是就先做個激光（＄），冇乜效。然後就出絶招啦：挑針（真係挑針，遲下解），旨在整爛（！）個傷口，等佢唔好埋。丫，即時見效喎（係即時！佢挑完幾分鐘就再度）。咁當然相當好。返屋企就有啲痛苦嘅（你可以試下隻眼畀人挑幾針，當然係痛）。11號再覆診，眼壓依然低。咁爽啦，你見12日13日我又周圍走，又去屯門碼頭又乜咁。點知14日返去覆診，諗住吹住口哨，應該兩嘢打發我走叫我一個月後再去啦。丫，又唔係，眼壓又反彈喎。咁你估玩乜？就係，再挑多次針（即係再痛多次），兼且打埋藥水。根據我嘅理解（即係Google），啲藥就化療用（但我唔係化療），亦係旨堑等個傷口唔會埋口。一樣，即時見效，但當然又痛一輪，同埋嗰兩日睇嘢都差，實情嗰日自己返屋企（埃汾太返工嘛，等到佢放假又太夜）都有啲難。主要係因為離開診所後啲麻醉藥開始散，就會相當痛的，同里係咁標眼水，睇路都少少困難。15號覆診，情況幾好，所以食麥旋風，但唔知幾日後又點嘛。16日我去打疫苗，順手休息，到18號再覆診，一樣眼壓低。咁就之後22號再覆診

22號覆診，眼壓依然低，很好，真係準備開香檳了。點知到28號覆診，眼壓又勁升。咁點？又再挑多次針，兼且打藥水，亦即係又痛多次，破財又多次。但呢啲都事小，比較大問題係之後一排（即係而家）睇嘢又會差，但亦冇計。

後事？就係3月7號再去覆診。如果眼壓低？「咪又再睇下一次會唔會反彈」。如果高呢？「咁應該就開第二次刀了」，因為應該都冇乜其他方法。