分享本人今個月最差嘅投資決定 (Patreon)

分享本人今個月最差嘅投資決定

1. 冇呃你，冇標題黨。分享下我3月最差嘅一個投資決定。我買咗乜？近乎冇，冇錯，呢個就係最差嘅投資決定。

2. 唔係玩文字遊戲，記住，唔做決定一樣係一種決定。正如你話投資有風險，唔通唔投資就冇風險？你唔投資，就係坐定定輸錢，因為有通脹（視乎你信官方嘅數字，定你睇巨無霸貴咗幾多，太古城貴咗幾多），只係每年陰乾你少少你唔覺，但積埋多年你都知好係嘢。（但反而叫你每年投資賺少少積上去，你就覺得好慢好唔見效，人係咪好奇怪？）

3. 當然唔係事後見到升又話後悔冇買，唔係咁簡單嘅FOMO（Fear of Missing Out），事實美股今個月唔係升咗好多（但有得升），港股3月仲係跌唔少。

4. 咁問題在邊？問題就係，我連每個月定期買嘅都冇做。港股就有，美股同其他就冇（in case有新讀者唔知，就係每個月買VOO QQQM IWD EMXC VB IDEV，點解就搵舊文）。順手話埋你知，點解港股有美股（及其他）冇，好簡單，因為港股都係經銀行，自動扣數，早早入錢。但美股我係自己個個月買，咁太多自由，就出事啦。

5. 至於點解冇買呢？都有幾個原因（我冇話合理，但解返畀你知）。首先當然係，視力差，咁要用IB之類買股票都有啲難（你睇下啲字幾細，同埋個介面都比較煩）。之不過，反而2月，即係剛做完手術，我都仲係有買的，搵我老婆幫手按，當然會有啲煩。第二，亦係錢嘅問題，都話長期都冇現水，咁上個月又走咗唔少讀者，再加上手術錢之類，前前後後都真係廿幾萬。咁當然我啲戶口可以暫時孖展，息亦唔會太貴，我等保險賠返（如有）咪有返錢。但去到第三，「又見個市又跌又話烏克蘭打仗又乜」，「咁諗住仲有得跌」，咪諗住遲少少先買，結果當然係越升越有。你見到了，我都係人，都會有呢啲心理問題

6. 講真，如果只係三個因素其中兩個，可能我都會照買，但三個開齊，就造成咗呢件事了。

7. 必須要講，實際上金錢嘅分別，真係好細，咪最多錯過5%升幅，仲係講緊只係我今個月買嘅嗰舊錢，唔係成個倉嘅5%，所以對成個倉影響真係微不足道。但都依然令我耿耿於懷，比較唔滿意嘅係自己冇堅守個紀律，好似人地日日跑步咁，今日眼瞓咁聽日跑返多啲，冇話唔得，但就都係唔係咁好。亦至怕有啲人，聽日又聽日，最後就積到唔會再去跑。

8. （順帶一提，我並唔係一個十分有紀律嘅人，十分明顯，但其他方面嘅紀律，同投資嘅紀律，可以係兩回事。投資係性格嘅反映，但往往唔係咁表面。我一樣識啲跑馬拉松嘅朋友，買股票就亂咁嚟的）

9. 諗真啲，好多人投資，實情亦係咁上下。唔一定個個要月供，但例如以前啲讀者，有時都話有一大舊錢，買又驚摸頂之類。我每次都好奇怪，到底之前咁多年佢地點解唔投資，咁固然有啲係意外之財，或者賣咗樓，但更多就係之前一路等等等。

10. 咁我多數都只能講，好難避免摸頂，唯一好啲嘅方法，例如你一千萬，咪分段咁買落去，可能分幾年咁。但，我都有告誡啲讀者，定咗真係點分段，就要執行喎。唔好未夠鐘見到個市旺又飛入去，或者見到好似跌好多又唔敢買。

11. 好多人講各式嘅定時投資法，都講平均成本。但我覺得另一個重點亦係你將個責任「外判」咗出去。大家要承認，人就係咁奴性，冇人迫係會有問題的。強積金點萬惡，都至少有一樣嘢好，就係幫到你儲錢，否則好多人係把口話自己退休自己理，到老咗冇錢又去嘈的（亦點解絶大多數政府都有類似嘅嘢）。供樓一樣，固然畀錢銀行賺，但亦係迫你儲錢。咁定時投資都係，迫你儲錢之餘，亦等你唔好咁自大不停去time the market—當然你可以照樣炒個股，但又係我講嗰句，分核心同配菜咯，一舊錢去定時投資，另一舊先去自己炒

12. 最後補充兩句：首先，你啲月供，應該真係以年計，十年八年，至少都五年七年。有時聽到啲讀者話想月供邊隻嘢，睇一年，我係唔知佢想點的。一年變數仲係太多，未必夠好股票反彈。你睇美股2000-2010，頹足十年（但當然只要你唔係最頂位追，平均成本，就梗係唔使十年先返家）

13. 第二，暫時我都係少買個股。新讀者可以搵返篇「持倉全公開」嘅舊文，手術前後我都仲買咗Unilever（美國上市英國/荷蘭公司），同埋日本嘅日清食品（2897 JP），冇了，呢排都會係買返啲指數之類嘅ETF多。你唔一定要跟我，但我一路講我自己都做唔到自己講嘅嘢，自己嘅個股都係佔太重，指數ETF佔得唔夠多。咁我當然唔會走去沽晒啲個股，所以而家新錢多數都放落去指數ETF度，慢慢戥返均。當然不代表完全唔買個股嘅，可能少啲咯。

14. 最後交代埋，咁我3月頭冇買到要買嘅嘢，最後點？我係早幾日買返的。早幾日眼瞓冇去跑步，隔幾日先去跑返固然唔好，但總好過就咁冇咗件事。唔止係錢嘅問題，亦係習慣嘅問題。有圖有真相。

15. 你仲可以留意一樣嘢。啲嘢之後再升都唔係重點，股票唔係升就跌啦。但你應該留意啲時間，你見我係幾分鐘內解決晒的，計埋我搵埃汾太幫手落，差不多全部都係即成。即使唔係即成嘅，我都好快搞到佢成。講真，閣下落幾千萬盤咩，嗰小小錢，仲要買美股，spread咁細，仲慢慢排？唔好咁縮骨啦，平一仙又點？你望住成晚？時間唔係錢？況且，如果佢一路再升呢？你見我買股票近乎永遠唔排隊的。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。