美股：債息升但科技股照升，搞乜？XXX做乜唔升？你不停暴力按個掣電梯都唔會快啲到的。北約峰會嘅嘢，睇乜？梗係睇軍工股ETF。賽後檢討：之前中資股倒水咁跌，跌乜？同場加映：俄羅斯冇VISA Master用銀聯，咁照計冇Nike都會著安踏？In KS We Trust，業績過後又增持。同場加映　堆七連升嘅港股。 (Patreon)

美股：債息升但科技股照升，搞乜？

XXX做乜唔升？你不停暴力按個掣電梯都唔會快啲到的。

北約峰會嘅嘢，睇乜？梗係睇軍工股ETF。

賽後檢討：之前中資股倒水咁跌，跌乜？

同場加映：俄羅斯冇VISA Master用銀聯，咁照計冇Nike都會著安踏？

In KS We Trust，業績過後又增持。同場加映　堆七連升嘅港股。

今日都係比較散，但啱架啦。反正星期五或週末會有篇比較長嘅文，同你講我3月最錯嘅投資決定。另外，好可能下星期都會維持香港時間午飯過後出文咁，因為十分幸運地我擺脫咗之前一路失眠兼日夜顛倒嘅問題。

美股：債息升但科技股照升。

XXX做乜唔升？你不停暴力按個掣電梯都唔會快啲到的。

1. 甚麼烏克蘭一個月，我都廢事再講。美股方面，快講，走勢實在幾好，慢慢咁升（其實都唔慢了，呢排都1% 1%咁上），唔該大家唔好要求今日買完聽日就升50%然後你食糊然後後日爆煲。面對下現實，過去一個月畀你睇到，耐性十分重要（而一個月亦根本唔係咩耐性）

2. 不用我多講，依然見到係納指跑贏標指，科技股跑出。Tesla好似七連升（可能同油價高有關？定因為德國嘅廠？不重要）。

3. 你見債息係一路升，但科技股都仲係一路跑贏，似乎同一路個講法都有啲矛盾。點解？唔知喎。當然你可以夾硬搵理由，但我簡單啲，就去接受好多嘢，都係大家唔知點解嘅。唔好當自己乜都知。

4. 亦都所以同樣地，雖然舊年下半年開始我已經講價值股回歸，暫時都仲幾啱，但係咪話咁快又轉勢？都答你唔到。但最重要嘅係，我操作上，唔會走去沽晒啲科技股買晒IWD嘛大佬！我唔明做乜大家咁鍾意自己或者某人話睇好一樣嘢，就沽晒其他嘢去買。你有冇諗過一個可能，就係：「如果你錯呢？」。如果你夠誠實，睇返自己嘅往績，應該見到自己錯嘅次數，都唔會少。實情十次你啱到六次已經好叻。

5. 晶片股都強，記得之前有日，隻隻科技股都升，唯獨Nvidia唔升，又有人嚟問做乜唔郁。畀少少耐性啦（況且，有時真係有耐性佢都未必郁）。唔好咁狂躁，電梯唔嚟唔係你係咁按到個掣爛就會嚟快啲到的。老早同你講咗Nvidia 勁貴，之前平嗰時你又唔買？年初至今，跌7%左右，好過大市的，仲想點？

6. 講咗N次，有時根本唔係「間公司買唔買得過」嘅問題，而係估值同時機。但的確呢兩樣嘢都好難衡量，咁所以，首先亦好睇你有幾有耐性，間公司增長夠強嘅，買得貴都好，慢慢都係會返嚟。另外，時機嘅，都講過，梗係你覺得最唔應該買（即係人人都打靶止蝕時），就其實最應該買，但真係會人都癲的，好難克服呢種心理，絶對正常。所以退而求其次，就不如唔好諗咁多，有錢就買，頂多市癲嗰時就買啲冇咁進取嘅嘢，市況慘烈時買啲刺激啲嘅嘢，咁去調節咯。總好過你儲住一舊錢然後全部瞓落去，一買完下星期跌20%，包你發惡夢

7. 不過，我都仲係每日收到好多人問，邊隻邊隻買唔買得。都係回歸基本步，如果你跑輸大市太多嘅，不如就唔好股神上身了，以後大部份錢放指數，小部份慢慢學習下。

北約峰會嘅嘢，睇乜？梗係睇軍工股ETF

8. 首先，係講呢個北約峰會。你鍾意可以睇返成段新聞，用意係，估下我會留意乜？

9. 你應該估到，我留意嘅係，「北約成員國同意增加軍費，將使各國的軍費開支達到或接近各自國內生產總值2%的標準。北約認為，俄羅斯在烏克蘭的軍事行動已經徹底改變了歐洲的安全局勢，北約因此需要作出的戰略調整是長期和持久的」

10. 呢個亦同我估計嘅一樣，但講真亦唔係咩好難估嘅嘢。但我想你留意，最重要係，「長期和持久的」，呢啲趨勢先真係有用，偏偏長期大勢就好難估，估到大勢亦未必可以揀啱嘢買（例如你估到中國經濟增長，但未必估到中國股市好多年都唔掂）

11. 咁但，咁加軍費，當然同之前講嘅一樣，對啲軍工股幾利好。之前講嘅洛歇馬丁（LMT）同NOC（好似冇中文名），過去一個月都升一成，算係幾好。雷神（RTX）就普通啲，但都有4%。

12. 另外，仲有隻ETF買的，ITA。持股睇呢啲。我講嗰三隻當然都係十大持股當中，但應該留意我好少買行業ETF，主要係唔太鍾意佢地選股嘅機制比較…….隨意。指數ETF就唔使講，多數都係睇市值。你見咩IWD嗰啲，都係比較量化。但你咩叫「軍工」就有啲難搞，況且人地ITA都話係Aerospace & Defense，冇話軍工，咁你見波音都渣唔少，固然波音都有一定軍工成份，但亦好受其他嘢影響，咁咯。

賽後檢討：之前中資股倒水咁跌，跌乜？

同場加映：俄羅斯冇VISA Master用銀聯，咁照計冇Nike都會著安踏？

13. 今日星期五，上個星期一二先見港股（主要係中資股）股災，然後又兩日大反彈。固然部份因為中概股問題，至於反彈，你可以話北水帶動。但好多非中概股都狂瀉的，到底當時發生咩事？

14. 當時我已講過，你乜都走去講「林鄭抗疫不力」嘅，真係目光太過淺窄，林鄭聽日封城都好，關美團咩事呢又？

15. 嗰時有提過，麥樸思有提及可能有人驚遲早制裁埋中資股。麥生啲嘢我唔認為好多高見，但今次提嘅嘢有啲道理。況且，沽壓嘅嘢，唔使個消息係真，有人驚就已經得。

16. 好啦，留意啦喎，IIF（唔係IMF）出咗個講法，講話資金流出中國市場，但其他新興市場冇呢個問題，亦可能同擔心中國支持俄羅斯會受制裁有關。

17. 咁事實你亦見到，隻EMXC，表現係大幅好過其他新興市場ETF嘅，因為其他新興市場ETF就有中國嘛。留意EMXC入面已經仲要有埋俄羅斯！但，其他新興市場ETF都會有嘅（不過嚴格嚟講，EMXC嘅俄羅斯比重，會高過其他包埋中國嘅新興市場ETF，簡單數學嚟啫，唔解了）

18. 最後問題，咁你話，資金撤出中國喎。驚唔驚？Yes and No．首先，咪老早叫你買EMXC咯，一向都對中資股有保留（但我唔會完全唔買）。但，你睇啲咩資金報告，落後幾十拍啦。

19. 搵日可能細講，但而家快講先。你見暫時中國，並冇真係好「支持」俄羅斯。當然亦係忌憚西方制裁，軍事上固然不可能（唔通出解放軍咩，你估打韓戰？），金融上，亦似乎唔敢幫俄羅斯避開制裁。咁但，又有其他機會嘅。應該留意到，好多西方品牌撤出咗俄羅斯，而呢個並唔係「制裁」嘅一部份，只係西方品牌顧住市場，仲做俄羅斯生意，就會有其他客人杯葛。咁你見，俄羅斯冇得用VISA Master，咪用銀聯咯，就我所知，呢個並冇違反咩制裁。同樣地，冇Nike著，「不如著安踏啦」，都唔係講笑的，真係有啲新機遇。

20. 但講係咁講，俄羅斯人會唔會著安踏（舉例），就另一個問題。況且，你都真係不能忘記，「其實俄羅斯都好窮下」。可能有讀者唔知，積弱多年後，俄羅斯人均GDP，已經去到同中國差不多，打埋仗後今年肯定係會低過中國了，人口亦都萎縮緊（係萎縮，唔係增長放慢），有幾大消費力，都係一個問題。

In KS We Trust，業績過後又增持。同場加映　琟七連升嘅港股

21. 大師冇點你，亦不難估，一出完業績，李嘉誠又增持長實1113啦。雖然金額唔係好多，亦不見得一定谷得起股價，但始終都係正面嘅信號。

22. 同場加映（留意呢個圖係星期四的），星期四見到，有36隻股票已經七連升．數返日子，就係由上星期三嘅反彈開始，連升七日。未必代表乜，但似乎都係好嘅現象。入面有啲我都係有的，包括中移動941，友邦1299，長和1，恒生11

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。