[FB文] 金融（含大量不雅用語）望向山～～望向水～～清洗嘴邊的暗瘡～～～水中倒影～～～只有一張懵樣］ (Patreon)

FB出左篇文，連結如下：

https://www.facebook.com/ivanliresearch/posts/515824443450162

［望向山～～望向水～～清洗嘴邊的暗瘡～～～水中倒影～～～只有一張懵樣］（＊）都話金融音樂台，有乜唔得？俊？邊撚度俊呀？睇過？

TLDR：Michael Jordan plays ball. Charles Manson kills people. I talk. — Everyone has a talent（＊＊＊）

1. 係喎，俄烏開戰一個月。咁唔高興嘅日子，梗係要睇睇美股過去一個月跌幾多。再講一次，又話世界大戰，核電廠爆炸，油價勁升（係喎），糧價勁升（又係喎），但聯儲局照樣加息（係喎），宣佈加多7次，美債債息亦都升咗好多。

2. 結果？美股升咗4%，我已經冇用昨日嚟做，否則係升8%。當中上星期，美股升幅，係2020年11月以嚟最勁一星期。見到自己錯乜未？定扮睇唔到？

3. 我就當時話你知，驚都冇驚過，你可以搵舊文。雖然我都冇乜咩點買到。因為你睇真啲，根本高位到低位都跌唔夠5%，咁再加埋我做手術都廿幾三十萬（越碌越大，真開心），所以閒錢冇乜。但至少，我一股都冇沽過，每個月定期買嘅美股港股，照買。

4. 我就真係唔知你啲網上專家，點自圓其說了。有邊個當時話升呢？話跌嘅唔代表廢，講真，股市嘅嘢，唔係升就跌。但講到大災難必然大跌嗰啲，well，到底你睇咗啲乜？

5. 我唔係話自己巴閉，而係好多做金融或炒股嘅都會知道股市唔係咁運作，只係一般呢，戇鳩仔係最大聲嘅。大把人都知，呢啲乜春事件，影響好短暫。但人地真分析員當然打工寫報告，唔得閒同你癲，真炒家亦冇咁得閒寫文。係得我咁得閒—同埋你啲垃圾KOL

6. 真的，一個月升4%都唔算多？梗係多啦。唔使查都知，當然係遠高於歷史平均。稍為用下腦（雖然唔少人都冇）都知，美股一年回報平均幾多巴仙？我當你用到20%好未？咁你咪計下一個月即係幾多（鍾意開十二次方根，唔鍾意嘅，20/12都得嘅）

7. 係喎，寫咗好多次，但我就係同一個課題都可以次次用唔同角度寫。

8. 你見我寫文，近年好強調一樣嘢，叫做Edge。若係你有人有嘅嘢，冇乜特別價值。五十年前你識睇年報可能好有用，而家算鳩數吧啦，Playgroup都教啦。

9. 而我深信，在呢個資訊爆炸嘅世代，「搵證據支持自己」嘅能力，價值近乎零。反正大把人話希拉莉係蜥蜴人開間洗衣舖定pizza舖捉小朋友，大把「證據」，只要你肯信。

10. 我覺得呢個年代，懂得分辦垃圾同好東西嘅能力，先係最緊要。偏偏，原來好多人，呢種能力係相當麻麻（所以我仲有得搵食）

11. 真係的，我見啲讀者嚟問我，喂，呢個老師又話點點點，嗰個老師又話點點點。我都只能好客氣咁講，咁，市場就係咁架啦。個個一樣意見，就唔有交易所。你覺得騰訊值300.1，我覺得值300，呢個已經係唔同意見。人人都覺得值301蚊嘅，港交所可以執笠，

12. 但有一樣好明顯嘅，有時網友講自己輸錢嘅經歷。我亦會好客氣咁話佢知，拿，同期呢，標普指數就升咁多，恒指就跌咁多，而你嘅表現就係咁咁咁。咁你話，係咪出咗啲問題呢？跑輸大市好正常，但，爭好遠好遠的話，就當然梗係某啲位有啲問題。特別係，呢個問題，係有解決方法嘅：咁你咪唔好股神上身咯，咪買多啲盈富基金或SPY。廢？但你跑輸呢啲嘢一大截喎。唔好咁自大好。悶？係悶架。但你諗下你歷嚟跑輸指數嘅錢，夠你做好多十分過癮嘅事了。

13. 我覺得呢，終極嘅問題，得一個。市場唔係辯論會。冇錢嘅，話知你水鏡八奇再世，意見價值係零。有錢冇買嘅，一樣。況且大把人，口講一套做又另一套，話爆煲嘅，你估真係瞓身沽空咩。

14. 上星期我在明報寫，啲末日教教主，個撚個酒池肉林搞女信徒，人生不知幾樂觀。悲觀呢啲，水你落搭嘅招牌之嘛。你有幾多個真係同啲信眾一齊夠鐘就去殉道？咪撚玩啦。

15. 唔好同我講你識烏克蘭文乜柒，或者點估中習大大諗乜。我覺得，真正要問嘅問題，只係得一個：

16. 問題就係：過去十年，你嘅身家係咪每年增長？（然後，居然有人要拗咩係net worth，自住樓計唔計。梗係計啦，市值減咗你爭銀行幾多錢。除非你負資產，否則，當然係身家（負資產咪負數），唔好信啲現金流KOL咩「樓係負債」之類嘅垃圾，我N咁多朋友賣咗層香港樓，過去英國或台灣不知幾撚爽，我冇見佢地要「負債」喎）

17. 如果你個老師，唔係年年身家嘅，咁真係冇乜發言權了。因為，過去十年，你計港股夾埋美股，夾埋每年差不多年年都有得升。「咁你自己買晒港股當然係你問題」。況且，仲加埋你除咗投資外搵嘅錢嘛（邊個話你知唔重要？個鳩個就想發夢唔使做幾皮炒上幾千萬）。你過去十年，每年身家都有增長，應該係好合理嘅假設。唯一可以畀你例外嘅，2018年啦，港股美股都跌，單靠你打工搵嘅錢，或者物業升值嘅錢（嗰年樓價升定跌？懶查），或者只係供樓還嘅錢，未必夠你冚股票輸嘅錢，情有可原。（又，唔理樓價都好，供樓當然都令你身家多咗啦，仲令你交少咗租，咁撚簡單嘅常識，居然都仲有KOL可以討論）

18. 真的，後生仔都算。嗰啲四張幾嘢（唔使對號入座，我地圖炮），一事無成，拎緊份可撚恥人工嘅網友，我就唔明邊度嚟嘅自信啦。

19. 原諒我就係咁直，但，你份人工你份身家，當然係反映你嘅才能啦，。唔係完全正比，但有相當大嘅關係。好波嘅球員就高人工，咁當然總有啲呃飯食嘅（富二代嘅另計，除非投啱胎你都當係能力）

20. 真的，四十幾歲人，懷乜撚才不遇？仲話間間公司啲廢老同HR針對你？你唔使去到好巴閉，但，總有個底線下話。撈N咁多年一事無成，你估問題在邊？呢個本身都冇問題，唔係個個都要巴之閉，但仲可以日日上網指點江山分析烏克蘭乜柒對股市影響吨，我就唔知邊度嚟嘅自信，亦唔知啲信徒諗乜了。

21. if you are so god damn smart，why aren’t you rich？或者唔好用rich咁高要求，但，為何咁broke？

22. 留意，找地唔係講晝家或跳橡筋繩大師，呢啲領域，我接受到你話你好叻但搵唔到錢，絶對可能。但，我地講金融喎。你講到叻過啲大行分析員喎，咁你拎唔拎到佢十份一人工？

23. 尼克遜廢除金本位制後，我地生存在人類史上最高度金融化嘅社會，亦係最reward talent（以$嚟講）嘅世界。

24. Come the fuck on，Michael Jordan plays ball. Charles Manson kills people. I talk. — Everyone has a talent．林溢欣教中文都千萬定幾千萬一年啦，唔係因為佢奶楊潤雄春袋喎，完全市場機制喎，絶對貨真價實。曾上游（聽講好似我中學師妹，真係傑出校友）援交都援到買樓啦，有乜問題，笑貧不笑娼，你點評價係另一回事，但亦係一種技能。咖啡兄弟都住天賦海灣啦，幾時都話本城就係男盜女娼。正面啲嘅，啲女Patreon除衫（唔好問我，我冇訂）都話除到買樓啦，完全唔使畀麻甩佬掂，手仔都唔使畀人摸。當然亦係talent．你話好易？你去試下咯。你可以留意下，聽聞搵到最多錢嘅，肯定唔係最大波或最靚嗰啲，當中有好多技巧的（我指行銷技巧，唔係含蕭技巧，都話人地手仔都唔使畀人拖）。如果我有咁嘅天賦，就唔使日日打一萬幾千字啦

25. 有人話我用錢嚟衡量人嘅價值，nonono，我係衡量你嘅意見有幾多含金量。特別係，喂，你唔係文藝評論喎，講股市喎。你繼續講烏克蘭核電廠，就吹你唔脹。但你講股市喎。咁，就真係睇下，你有幾俊啦。

26. 順手講埋，嗰時拍富途片，都有啲留言質疑（大意），超，條友開Patreon搵到錢之嘛，關佢投資乜事。就一半一半。首先，喂，「當時我個Patreon先開咗一年」，「你唔係以為嗰啲叫好多好多錢下話」。

27. 另外我都認真檢視過，似乎去到呢刻呢，我副身家，由投資帶嚟嘅，都係多過打工或Patreon帶嚟嘅。

28. 不過，當然魔鬼在細節，首先，「層樓都係投資」。另外，實情不能咁計，投資帶嚟嘅身家大家明啦，咪升值嘅嘢。但，「打工或Patreon嘅錢」，咁我平時仲拎嚟打邊爐呀一年去幾次日本呀做手術呀供樓架嘛。咁又點計先？剩低嘅咪net wroth，但如果你計未減開支前嘅，咁就梗係多過投資嘅收益啦老細，我打咗廿年工呀（都唔係太多，因為我24歲先打第一份工）

29. 況且，實情我係好少吹噓我嘅投資回報，因為，真係唔係點巴閉。但，美斯個教練唔使好波過佢先可以教佢下話？

（＊）鍾阿B作曲兼主唱嘅呢首《香腸 蚊帳 機關槍》（＊＊），又係出賣年紀，三十五歲以下嘅應該唔會識。固然係林敏聰填詞，但無厘頭得嚟又唔係亂填的。留意第一段點題嘅「機關槍」「蚊帳」同「香腸」，第二段就變咗「果醬」「暖氣音響」「蚊香」。而亦都係有情節的，就係一位super stalker，最後發現呀愛人「今早出嫁　今起改姓張」。而我引嘅嗰句「望向山　望向水　清洗嘴邊的暗瘡 水中倒影　只有一張懵樣」正係結局，成首歌最後一句。幾有深度。

（＊＊）如果冇記錯，正係因為《香腸 蚊帳 機關槍》既成功，同一組合，鍾阿B同林敏聰，當然斬多幾兩。嗰個年代係咁，有《殭屍先生》自然有《殭屍翻生》《殭屍叔叔》，有《鬼打鬼》就有《人嚇人》有《人嚇鬼》《鬼咬鬼》，務求玩撚到爛為止，香港精神。但講返，斬多幾兩嘅一首，叫做《非洲黑森林寫真集一日遊》。先唔好問非洲有冇黑森林，正如我都唔知蘇格蘭場有冇氣墊毛筆。但，建議你搵首歌嚟聽，我懷疑鍾阿B近年有冇再公開唱過？或者甚麼流行經典乜乜乜都冇唱過。因為啲歌詞，夠晒racist，又stereotype，仲要政治不正確之極。同而家迪士尼啲飛機片講到Wakanda原來好先進（不過政權交替依然係靠隻抽）但寶寶不說，實在相映成趣。歌詞甚至寫到明係「剛果」，最正係用咗好多次N word，怕且而家唔出得街。

（＊＊＊）相當鍾意呢段對白。言簡意賅。先係講佐敦，兩個字plays ball．然後係完全唔關事惡名昭彰嘅連環殺手Charles Manson，kills people．再講返自己。好有對比。

=====

重出江湖！Ivan Patreon 已經2000人訂！多謝大家！比別人知得多。subscribe now（bityl.co/9CyV） ，可以睇返晒以前嘅文。港美市場評點，專題號外，每日一圖，好文推介。每星期6篇，月費100． 畀年費仲有85折，

富途嘅，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。