心法：俄烏開戰一個月，美股跌幾多？短打一：中移動941 又加派息。明明之前話美國除牌好大鑊。短打二：騰訊700。短打三：TVB　幾時蝕到執笠？ (Patreon)

心法：俄烏開戰一個月，美股跌幾多？

短打一：中移動941 又加派息。明明之前話美國除牌好大鑊。

短打二：騰訊700。

短打三：TVB　幾時蝕到執笠？

今日遲咗出文，但至少暫時解決咗我呢排失眠兼日夜顛倒嘅問題。

心法：俄烏開戰一個月，美股跌幾多？

1. OK，俄烏開戰一個月，中間油價大升，美國加咗息，仲宣佈今年加7次，仲會縮表，債息亦都勁升。但偏偏美股一個月升咗近4%（如果早一日計係8%添），上星期更加係2020年尾以嚟最強一星期。

2. 照計，你應該學到啲嘢。市場嘅邏輯，從來唔係「你覺得」或者「啲分析覺得」，唔係話「大戶陰謀論」，但，市場唔係講一人一票嘅地方，有意見但冇錢嘅，意見價值近乎零。有錢但唔買嘅，情況一樣。

3. 以上種種重覆多次，但真係萬試萬靈。呢度早早同你講冇驚過，我亦說到做到，只買不沽，仁至義盡。但我明嘅，點解有時都仲係會好擔心？好簡單，呢個係人性。冇問題的，人當然有自己嘅弱點，你掉轉諗，如果人人冇呢啲弱點，個個只買不沽，唔會有咁嘅機會啦。

4. 面對弱點（唔止投資上），不外乎幾樣嘢。首先肯定嘅係，要認清呢樣嘢，接受呢樣嘢，自己都唔信有問題，就好難幫到你。耐唔耐有啲讀者嚟講，自己幾時買股票，輸咗幾錢。我清一色嘅答案係叫佢望下同期恒指或標普指數，你跑輸係正常，但如果爭好遠好遠，就已經見到係問題，可能係揀股，可能係時機

5. 認清咗有呢個弱點後，不外乎兩種做法。一係克服佢，睇多幾次文。咁但，唔係講咁易啦，都話人性，有時係克服唔到的，咁我唔會話「有決心自然克服到」之類。克服唔到嘅，冇問題，但，既然你知有呢個問題，就盡量避免佢令你做錯事。即係，明知自己跑得慢，就唔好同人鬥跑步啦。咁明知自己克服唔到嘅，不如少啲睇股票，少啲諗。或者都係我嗰句，買多啲指數ETF，甚至每個月你份糧就自動扣咗，等你冇咁多閒錢股神上身（留返少少過下癮都可以嘅）。以前聽過啲友（冇話叫你一定學），直頭提實物股票，鎖在個保險箱，等自己冇咁易沽到。

6. 呢個亦真係點解你見好多人可以買樓變到上級中產甚至唔使做，但買股票唔易咁致富。固然你可以話因為港股唔爭氣，而港樓一直升。但美股呢？又有幾多人買美股真係可以師奶買樓咁？當中三個關鍵，以前本書寫過。第一，樓嘅波幅相對低，唔會一日跌咗一成一個星期冇一半。第二，樓嘅交易慢，就當層樓跌咗一成你好驚，你不能半夜去廁所時手痕沽咗佢的。第三，當然係槓杆，樓可以做到大槓杆，成本低，而最重要係，即使負資產，你按時供樓，一般都唔會畀人追你補差價。但股票呢？試下你做八九成孖展，隻嘢跌了三成？你唔抬錢，應該兩三日內就幫你斬晒（甚至唔使）。

7. 至於星期三晚美股，只會速評。見到呢排開始靜返啲（大佬400點嘅道指等於1%多啲咋），實情你唔使理會啲咩　北約增兵油價升之類嘅消息，老早講過，如果係升400點（好似星期二晚咁），又另一個講法啫。

8. 呢個亦係點解叫你地睇長線啲，你睇短線嘅，只會畀呢啲消息帶住走，偏偏明顯呢度冇一個係咩北約專家油價專家，何必搵啲自己冇優勢嘅嘢嚟玩。

9. 都仲係唔明嘅，可以睇返呢節一次。

10. 拿，升市你又話驚摸頂，跌市又話驚未跌夠（或者仲貪心，話想跌到底先撈）。咁而家呢啲市況，就相對地靜啲，適合買的。但當然唔係叫你瞓身買落去。

短打一：中移動941 又加派息。明明之前話美國除牌好大鑊

11. 呢隻真係得意之作，奈何買得好少，但呢一年半都成日在呢度講。冇錯差不多變成公用股，但真係個息口幾吸引，況且，原來仲有增長。你見個業績都幾勁，盈利有得升7%，派息升夠23%，近年都年年升。仲有，5G投資到咗高峰，公司講明派息比率會再升。又係計數時間，唔好講將來先，只講派咗嘅，舊年4.06。股價56.5，7厘息喎大佬。天長地久唔知啦，但照計未來幾年減嘅機會都極細。

12. 呢隻我都有，可惜買得唔夠多。年幾前咩畀美國退市，真係絶佳買入時機。你見到公司有乜影響？

短打二：騰訊700

13. 冇呃你，昨晚同朋友已經估股價會跌（至於估到中移動升好易），我甚至未使望Prosus同Naspers（Facebook Page有寫，呢度都有貼）。不過騰訊啲業績，其實好難睇。又GAAP又non GAAP，況且好多時係睇監管多過佢嘅業績，你見以往都幾難估走勢。但今次既然見話遜預期，加上低位彈咗唔少，就估跌。

14. 不過個跌幅比我想像中細，順手講埋，整體港股都係企得幾硬。我寫呢篇文時（星期四中午），騰訊跌3%，而港股都仲有得升。

15. 快手講埋，星期三港股雖然升幅收窄啲，但你見長和1同恒生11都六連升了（今日暫時仲升緊），前者呢排成日講，後者少啲講，但都係有的。

短打三：TVB　幾時蝕到執笠？

16. 拿，真係冇叫你買，真係唔好買。純技術討論。我就並不特別討厭TVB，實際上我好多年唔睇電視，乜台都係。但，不停蝕錢嘅生意，可以頂幾耐？舊年就蝕6.5億，公司就話最壞情況已過去。咁但，都連蝕咗四年了。

17. 好簡單，望下個股東權益，大約46億咁，玩玩下都唔係剩低好多。好難答你去到邊個位會開始「出大問題」，但，肯定唔使去到負數，你去到只能頂兩三年嘅虧損，都會相當危。當然到時有冇人入主打救就慢慢食花生了。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。