美股：增長股開始跑返贏。同時間Nike業績強，但都仲冇乜力。港股：阿里巴巴加大回購小事，中概股審計先係主菜。煤氣仲跌得多過東航—唔送紅股仲大鑊過空難。新股：意大利遊艇。 (Patreon)

美股：增長股開始跑返贏。同時間Nike業績強，但都仲冇乜力。

港股：阿里巴巴加大回購小事，中概股審計先係主菜。

煤氣仲跌得多過東航—唔送紅股仲大鑊過空難。

新股：意大利遊艇。

美股：增長股開始跑返贏。同時間Nike業績強，但都仲冇乜力

1. 先講美股，穩步上揚，係幾好的，雖然我覺得實在唔平（特別考慮到債息升咗好多），但美股咁多年有邊年平過？

2. 見到啲比較貴嘅科技股，都強，納指繼繼跑出。當然增長（IWF）都係跑贏價值（IWD），但我都係有啲保留。你拉長些少，睇年初至今，IWD仲係贏好多。最重要係，為何我要去「判斷」？我本身亦有一堆科技股（FAAMG我都有齊，仲有Tesla Nvidia），舊年開始買IWD就係為咗戥返勻啲。所以你要睇整體，而唔係聽我，或邊個講，邊樣會好，就沽晒其他嘢去買邊樣。唔同環境下，你堆嘢會有唔同嘅成員跑出。

3. 另外快講隻Nike，有買的，業績係好，但你見都只係跌些少。冇計，實在係貴，但好公司，就唔係咁多會平。所以亦冇計。你見業務正正常常但今年股價都跌兩成，就冇得問「點解」了。「之前升你又唔出聲？」。呢隻，我買嘅價同而家差不多，但好一排之前了（2020年尾？）。咁你事後睇應該舊年11月沽咗佢添，但邊有得咁計

4. 有個Excel的，放埋上嚟畀你玩，但當然以我而家情況就update唔到。你鍾意可以自己填，順手畀你睇下我搞嗰時用幾多時間。

港股：阿里巴巴加大回購小事，中概股審計先係主菜

5. 港股嚟講，亦都靚仔。星期一先嚟一個開得高收Day Low，星期二又嚟升返660點，而找唔知睇走勢嗰啲點捉。

6. 重點當然係中資科技股，特別係阿里巴巴，升返11%，一隻嘢已經帶返恒指173點。頭炮係因為回購加碼，但似乎真正原因係因為中概股會披露更多審計訊息，你可以理解為傾掂數，雖然都講咗成個幾星期。

7. 再宏觀啲講，似乎近期各方面，中美關係都好似有啲緩和嘅蹟象。無論如何，你見啲中概股星期二晚又造返好。

8. 然後當然係你最關心嘅問題，買得未，買乜。答案都係有啲難。先講阿里巴巴，亦有讀者留意我啲月供股票係冇嘅。實情都好一排之前我都有在呢度提過下值得睇，但之後一樣越跌越有，自然就冇再點提，我亦冇買。

9. 我對中資股（唔止係科技股）整體都仲係幾有戒心，即係，你叫我而家去買手阿里巴巴，咁我幾肯定係唔會發生的（但，發生咗會話你知）。不過如果考慮每個月供返啲，就可能諗下。

10. 但始終，將你嘅退休或財務自由計劃，放在一兩個人（當然唔係指馬雲）嘅一念之間，都係比較危險嘅。

11. 又，賭性夠重嘅，可以留意隻騰訊音樂TME。主要唔係因為騰訊，亦唔係因為音樂，係因為會嚟香港上市，有逃生門。但我就唔會買的，所以輸晒都貴客自理。況且，真係你一日未見到佢敲鐘，都唔好當真係上到市。螞蟻嘅教訓太深刻了，中資股嘅嘢（又，認真補充，實情唔使等到敲鐘嗰下先叫上市成功，你可以睇返公司啲招股書，如果我冇記錯，應該係之前一日過咗四點定半夜十二點，就真係不能叫停的了，所以你見上市嗰日朝早啲報紙可以出定廣告話恭喜成功上市，就唔會好似拍戲咁敲鐘嗰下先有差佬或ICAC嚟叫停）

煤氣仲跌得多過東航—唔送紅股仲大鑊過空難

12. 先講東航，相信空難，就一般唔會有讀者好開心嘅。不過掉轉頭，我都係比較「抽離」咁睇。事實空難當日（星期一）我三點幾起咗身，就大約係轉出呢單新聞嘅時間，但我唔係一起身即時睇啦，睇得嚟都收咗市。「咁當然第一時間睇股價」，留意消息出嚟時A股應收咗市（有錯指正）。但香港未收，所以你見股價有跌。

13. 好啦，當時兩個判斷，首先係反映晒未，另外係，「買得未」。

14. 呢啲都係主觀判斷，當然你可以用以往嘅類似意外去相比，例如正常地普通咁一隻機出事，股價總不可能一日跌90%．但都係主觀判斷。不過，通過經験，係令好多主觀判斷嘅質素有提升嘅。呢點你要留意。

15. 考慮到三點幾先傳消息，同埋都好多詳情未知，A股又收咗市，我就估應該未反映晒，當然只係主觀判斷。

16. 咁然後，真係有人問「買唔買得」。咁我答案都係，睇下聽日（星期二）跌幾多先，咁當然星期二我亦係好晏起身。但，如果計兩日夾埋計到低位，東航一度都跌13%左右。假設我有錢又身痕，都未必會買，因為呢個跌幅唔算話太大。

17. 背後仲有好多考慮，固然700隻機跌咁一隻就真係唔係大災難，而亦真係唔多存在「啲客失晒信心以後唔敢坐」嘅問題（你望下蒙牛股價？）。但，始終航空公司並唔係一個好賺錢嘅行業，平時波幅都大，只係跌13%，即使我自己做基金，都唔會有乜意慾。你話跌30%，就可以諗下。

18. 但，最有趣嘅係，煤氣居然係跌得仲多過東航。乜事？就係因為取消咗派紅股。我估到股價會跌，但完全冇估會跌咁多。仲要大成交，廿幾億，幾耐冇見過？

19. 有人補充，話煤氣年年送紅股，但個派息金額冇變，即係變相多咗派息。係丫。原本你有10股每股收咁多息，之後你有11股，每股又係收咁多息，變相係多咗。但呢個同紅股本身無關，你亦頂多只可以話今次冇加派息。

20. 你問我啦喎，我覺得股價跌幅過度的。但係咪代表你應該撈？你可以試下，但到你睇到篇文時，可能都升返（雖然我已經九點前出）。況且，你見我嘅作風，都係長坐啲公司多。雖然煤氣一日跌14%，係幾吸引嘅。

21. 我好似冇乜聽過有讀者有呢隻，有嘅可能都有啲年紀有返咁上下年資，記住，就唔好因為咁震走。

22. 最後一提，真係塞錢入你袋。我打工，到有下屬時，成日同佢地玩嘅遊戲。出完一單消息，例如出盈警，出業績，爆醜聞，唔派紅股，空難，叫佢地估下聽日股價咩反應，當然如果市況太波動你可以計「相對於指數」。好玩的，而呢種遊戲，可以提高你對事物嘅理解。慢慢做個紀錄，慢慢你就知，有乜嘢會影響股價（當然，個股價咁反應係咪「合理」，又係另一個問題）。

新股：意大利遊艇

23. 一般好少講新股，因為十隻有九隻都搵笨，本質使然，我亦唔理解做乜啲人咁鍾意抽（你有冇見我抽過？有嘅，好多年前咯，最後一隻好似係螞蟻，但撻咗Q）。

24. 但呢隻比較有趣，意大利公司，法拉利家族有份，遊艇。印象中，歐洲公司在香港上市唔太多，但往績好似係OK的，例如Prada 1913 同埋 L'Occitane 973／

25. 循例望下數，頭九個月賺3200萬歐元，3.1億港紙。個招股價極濶，21.82至28.24（抽新股又一搵笨地方），但如果上限（大陸網，但OK的），94億港紙市值。計返年度化，即係23倍市盈率左右（佢計到25.6），還好啩？

26. 我就唔會抽的，純學術討論。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。