[FB文] 金融 ［酒肉穿腸過　佛祖心中留］ (Patreon)

FB出左篇文，連結如下：

https://www.facebook.com/ivanliresearch/posts/514485656917374

［酒肉穿腸過　佛祖心中留］更有朝氣，早晨漏～～煤氣。原來唔送紅股，大鑊過空難。

真奇怪，紅股呢啲嘢，真係鏡花水月，都話萻提本無樹 明鏡亦非台。我真係由始到撚都唔明，「因為煤氣派紅股　所以股價年年升」呢個邏輯嘅「因為」「所以」係點嚟的，睇嚟我個CFA都係讀屎片。正如我都唔明「禾拉同列卡特互吐口水」呢個都市傳說點樣傳出去，變咗「史實」

但，真係神化，升700點嘅市中。煤氣就跌夠15%。廿九幾億成交添呀，幾多年冇見？唔送紅股，條數點計？個DCF（講英文型啲）有乜影響呢又？

最正係，成架飛機炒咗落嚟嘅東航（唏700隻機喎），兩日夾埋，我當你計今日最低位，都未使跌15%。原來唔送紅股大鑊過空難。

拿我就好理性（或好冷血，narrative 啫），炒架飛機落嚟死咗人，就十分實在的。紅股呢啲，本來無一物，何處惹塵埃？

昨日Patreon有講過下煤氣，冇講東航，因為好似唔係太好。「今日講就OK啦，因為大家啲記憶都好短暫」

BTW，臨尾抽一抽，俄羅斯入侵烏克蘭一個月，阿波羅核電廠就未爆（今日未爆聽日爆），第三次世界大戰又未打（今日唔打聽日打），咁但對歐洲經濟影響係實在嘅，對通脹影響又實在嘅，油價又升咗。中途仲有聯儲局自2018年第一次加息

借問聲，美股過去一個月跌咗幾多？

2020年3月，我就係死緊好多人世紀疫症仲叫你買股票冇良心嘅仆街死財演。2021年3月，我就係回晒塘叫人睇估值唔識創新股嘅保守廢老，2022年3月，我又變返第三次世界大戰仲叫你買股票嘅仆街死財演。

不過我說到做到，2020年3月我固然買股票，2022年3月我都買股票。2021年3月我都叫人買股票。「挑，又話叫人小心啲？」—係，所以，咪小心地買！大膽的愛，小心的偷。買股票，都可以小心地買，同好癲地買嘅。

絶大多數情況下，人地問我，「而家買唔買得股票」，我多數都係答佢：「直到收市前你都買得」，或者「要聽日開市先買得」。廢？廢得過你嘅問題？你買乜股票先得架？買幾多？你又有幾錢？你今年幾大？你買咗樓未？諗唔諗住移民？老豆有冇樓？係咪留畀你？全部都關事。講真，你要我講一句「買得」，幾咁容易？全年幾時都買得架啦，我都係幾時都買的。但你係咪我？定你係買完跌5%問人點算跌10%止蝕嘅人先？

今晚Patreon就講下東航同煤氣，當然仲有好多其他嘢。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。