港股16年新低，但我堆月供仲在水面，名單成本全公開。港股：開得高收Day Low，但國泰52周新高，挑戰你想像力。拼多多居然賺錢，係咪大陸全面變窮？行家一出手：巴郡又買嘢，今次都算大手。即係股市唔貴？煤氣唔送紅股：萻提本無樹，明鏡亦非台。煤氣唔送紅股：萻提本無樹，明鏡亦非台。 (Patreon)

港股16年新低，但我堆月供仲在水面，名單成本全公開。

港股：開得高收Day Low，但國泰52周新高，挑戰你想像力。

拼多多居然賺錢，係咪大陸全面變窮？

行家一出手：巴郡又買嘢，今次都算大手。即係股市唔貴？

煤氣唔送紅股：萻提本無樹，明鏡亦非台。

今日重量版，理論上第一節我拆出嚟做個週末專題都仲得，但費事日日搞咁夜了。

順手講埋，新讀者未必知，我堆開戶link都仲係用到的，有著數齊齊搵。至於送乜，link入面有，過幾日我會再寫。

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

港股16年新低，但我堆月供仲在水面，名單成本全公開

1. 冇呃你，我啲港股，大部份都係月供，差不多全部在呢個表。咁雖然港股相當唔爭氣，而家又兩萬一，十五年前我初做分析員時又係兩萬一，條數唔知點計。但，我堆嘢，總計都係在水面嘅。咁當然，都有一定歷史，我都唔係好記得幾時開始，有啲早啲有啲遲啲。但當然係以年計，唔好諗住搞啲咩「我打算月供一年」，唔太work的。

2. 都係嗰句，你可以搵返舊文，持倉全公開。就港股嚟講，應該完全冇變，冇新嘢，冇沽貨，但當然每個月有月供加上去。

3. 冇銀碼，只有每隻賺蝕嘅%，但可以話你知，所謂「水面」，都只係僅僅，唔到5%，即係在上星期一二嗰時，應該係去咗水底。咁你可以話，都有啲大鑊，搞咁多年，夾埋5%都冇，跑輸通脹。係！咁但，所以，唔好只係買港股（亦唔好只係買美股，但當然二選一，好似都係美股好啲，但點解要揀？）。咁但，又諗下，港股講到十幾近廿年最低位（而家彈返啲），我都仲係可以叫做水面，算係咁啦。月供，或者其他嘅定期投資，係幫到你嘅。

4. 另外留意，雖然話就話剛剛水面，但我呢度完全冇計派息。留意我呢度嘅股票，唔少派息都幾好，計埋咁多年，都有個影響的，但冇計落去，豪畀你。

5. 記得之前有個讀者send篇文畀我，話有條友批評（個讀者唔係用「批評」咁文雅啦）月供投資法，講如果一路升，你月供就拖低回報。我心諗，鬼唔知咩，如果我知道5年後納指高過而家1倍，咁梗係瞓身買啦！借埋錢都仲買呀。但，邊個可以肯定？另外，亦有一個問題，以前舊文寫過（週末專題嚟的），如果有一大舊錢，而最後真係升市，咁梗係即時買晒落去最好啦。但兩個問題，第一個問題同頭先講嘅一樣，我點知實升？特別係嗰啲「諗住月供一年」嘅，不確定性更大，以前貼過圖，我本書都有，美股，一日正回報嘅機會，多過50%少少，一年呢，好啲，但五年十年呢，再好啲。十年我就幾有信心話美股多數升（都唔係必升），但一年？可能升啩，六成機會？你將個時限縮短，係對自己不利嘅。

6. 另一問題亦係，咁大家一般打工仔，個個月出糧，定期投資，變相幫你儲錢嘛。你唔放落去嘅，有時自己唔知洗咗去邊。又或者儲埋一大舊，然後又驚一大舊錢入市摸頂。

7. 好啦，睇表，你可拎個 Excel去玩（雖然冇乜好玩，唔記得set live update 股價，你可以用Excel set的，持倉全公開都有寫 ）。

8. 價錢，就拎上星期五嘅，因為週末得閒整。另外，次序，係計呢一刻嘅持股總值（$），即係而家港股我最多係港交所。第二係中銀香港。

9. 另外，你見隻安踏，我係分開咗貼的。因為比較特殊，呢隻好早已經月供，但唔知做乜停咗，應該係輸到心灰意冷。點知之後越升越有，你見我一度賺10倍，而家都仲有8倍。但好早已經停咗，所以另外放開，亦唔想佢個超高回報影響個conditional formatting。咁而隻安踏，如果放在個表，應該在中間位置，雖然好早停咗，但升咗N倍，現值都唔細，「早知買多啲」

10. 好啦，可以睇到，回報好好嘅，都冇乜邊隻。就係隻港交所一隻救全家另外隻華潤置地，但都唔係佔好多。如果隻安踏有堅持落去，都會相當好，但當然冇8倍回報了。大原則都係，幾隻好嘅，夠頂好多隻輸—只要唔係輸極多

11. 仲有留意，最底嗰幾隻，長實長和長建電訊盈科，回報都係OK的。但你見排到咁底，就知銀碼細。好似都未夠一年，係開咗呢個Patreon先開始的。但亦見到，似乎真係近期啲揀港股眼光好咗的。

12. 但更有趣嘅係，你話輸得好多架呢？又係冇乜的。國企指數ETF 2828冋平保就真係投降啦，但你見其他，就只得盈富基金要超過10%。拿，呢個另一證據證明啲啲揀股OK，你見大多數我月供嘅嘢，都至少在我組合內，冇盈富基金咁甘。

13. 重要嘅係，股息嘛。有時重要，有時不重要，但月供港股咁多年計回報就重要，因為時間長，而你見我堆嘢都舊經濟有一定派息嘅多。講真，我冇計，但玩咗咁多年，應該盈富基金計埋派息都分分鐘係水面。地鐵恒生領展嗰啲更加一定係。

14. 咁點解港股咁差，堆嘢都真係冇乜幾多隻輸多過10%？就係因為分段。咁你當然亦話變相冇乜邊隻大賺（港交所騰訊都有好過嘅）。但，至少唔好輸大錢嘛。在咁嘅情況下我都唔使輸大錢，算係咁。

15. 當中原因當然係因為你月供的話，自然會高位低位都有買，仲會係低位買多啲高位買少啲，唔係必勝，但有助攤返開你個成本。

16. 有人話，咁同買股票一路溝貨有乜分別？原理上好似一樣，但實際上分別都大。首先，多數啲人所謂溝貨，只會跌時先溝，升嗰時唔會溝的，對不？另外，我當你買完隻股票，跌咗，你有信心又好唔認命又好，溝貨，但你溝得幾多次？三次？五次？我冇見人會溝十次貨。但每月定額，就真係幫你個個月溝的。

17. 當然，都仲要你堆公司，唔好真係一沉不起嗰種。即係你見騰訊都未算，我都仲可以有錢賺。國企指數就…….

18. 再講一次，每個方法都有佢缺點同優點，但定期投資法，整體都係好東西，況且我而家講港股啫，到美股又另一個世界。

港股：開得高收Day Low，但國泰52周新高，挑戰你想像力

19. 上面講得長，呢度只能快講。港股個走勢就認真麻麻，高開低收。中概股星期五晚在美國升都好，星期一晚又無以為繼了。睇法都係一樣，新錢買美股多，港股少，真係有人拎支槍只能買一個市場嘅，都係美股

20. 值得講嘅，除咗長實1113長和1繼續強勢外，當然係一大堆嘅餐廳股。今次呢啲就關林鄭事啦，但特首影響到嘅，亦只係呢啲唔係指數成份股嘅嘢（甚至有人話呢啲決定都要請示中央，我就不深究啦）。不過事後諗，上星期都吹晒風了，你見好多人出嚟講話影響競爭力呀乜鬼。理論上，係有機會星期五買定先嘅。所以都係老教訓，人人都知嘅嘢，未必好有意思。人地未知但你估到嘅嘢，就有用了。與其留恴咩俄烏局勢確診數字，你知呢啲嘢，就先係有用。

21. 但同我我仲想講，國泰293居然係52星期新高。固然係同禁飛令有關，但當然亦係因為估值，同埋炒預期。然後你再諗下，有人話你知，國泰在疫情狂爆，油價破紀錄，客運近乎停晒嘅情況下，居然52星期新高，你信唔信？所以，股票嘅邏輯，真係同好多人嘅直線思考好唔同。呢個例子又畀你反思下

拼多多居然賺錢，係咪大陸全面變窮？

22. 短打三個，第一，拼多多上季居然賺錢，完全係黑人問號。大家唔熟的話，可以上佢地網站睇下，基本上就係一個窮人版淘寶。淘寶都仲要窮人版？冇錯，入面嗰啲嘢，我保證你香港人係唔會用的，但唔好忘記大陸仲有好多好窮嘅人。

23. 呢隻嘢曾幾何時被寄予厚望，但當然係政府出招打螞蟻，同埋中概股風暴之前。亦有人話佢地係做「下沉市場」，居然轉賺，即係中國經濟好唔掂？怕且唔關事，你見個收入增速放到好慢，似乎反而係做得夠大，開始有錢賺咁解。

24. 但當然，冇叫你買，當年我都仲有諗過買，而家？一年跌咗七成。

行家一出手：巴郡又買嘢，今次都算大手。即係股市唔貴？

25. 短打之二，畢菲特嘅巴郡又買嘢，買保險公司，但係財險，唔係人壽。銀碼相對於巴郡嘅現金（1500億美金），都唔算太細了。出手都唔低，52星期新高再有溢價。畢菲特近排都唔少動作，之前又有西方石油。乜啟示？唔知。正路嘅想法，你可以話佢都頻頻出手，可以話股市唔算貴。當然亦可以質疑佢係咪臨老開始急，唔想不停咁畀人問佢等等等到幾時。但整體嚟講，即使去到近年，畢菲特嘅戰績，都仲係相當見得人。所以我比較傾向「似乎股市都唔係癲貴」嘅睇法。

26. 當然，如果熟悉畢菲特或巴郡嘅，都知道佢嘅「本業」係做保險，保險提供資金畀佢去投資，呢個亦好可能係原因。而保險公司啦喎，應該就受惠於債息向上嘅。

煤氣唔送紅股：萻提本無樹，明鏡亦非台。

28. 短打之三，煤氣。我唔關心個業績，但關心個「送紅股」，取消咗，應該會有人覺得好慘。但我想大家認真諗下，咩叫「送紅股」？

29. 以往一路有個講法，話煤氣好，年年送紅股，你啲股票年年多咗，股價又升。但，呢兩樣嘢，係咪因果關係？

30. 我唔100%肯定，但其實，「送紅股」，「咪即係一拆二」咁之嘛，你點會著數咗？固然你手頭有嘅股票多咗，但，股數多咗喎！市值冇變的，公司唔使付出任何嘢。而最重要係，你要除權嘛，原本10股變11股，咁咪原本11蚊變10蚊咯。唔止，你仲要成手碎股。

31. 而我唔知道，「送紅股係良心公司」呢個都市傳說係點傳出去的，亦好似冇乜見人踼爆過，大家可以思考下。但，你鍾意送紅股嘅，照計長實長和年年送都得的，1送100都得。

32. 至於有人計股息計埋紅股，更係痴線。20送1就計多5厘息？咁我1拆2，1送1，咪50厘息？

33. 而我更加唔係好明，佢取消紅股，同保留現金有乜關係。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。