美股：2020年尾以嚟最勁一星期，明明網友又話打仗又話加息。美股：增長股開始跑返贏價值股，係咪轉勢？點解？港股：長和1長實1113逆市升，之後睇乜？美股大波動股ETF，玩唔玩得過？兩倍槓杆ETF，跟唔足喎，誰之過？ (Patreon)

美股：2020年尾以嚟最勁一星期，明明網友又話打仗又話加息。

美股：增長股開始跑返贏價值股，係咪轉勢？點解？

港股：長和1長實1113逆市升，之後睇乜？

美股大波動股ETF，玩唔玩得過？

兩倍槓杆ETF，跟唔足喎，誰之過？

1. 星期五冇文？又唔係，留到星期六先寫啫。應該短期都會係咁安排，等我可以有多啲正常啲嘅瞓覺時間，唔好寫Patreon寫到天光然後瞓到港股收市先起身。（雖然最後我星期五完全瞓唔著）。

2. 例外係4月1日，因為我4月2日一早（講緊朝早6點）入醫院做手術，所以好可能會係冇文嘅。之後？你預我休息返一個星期吧，全身麻醉住醫院喎。但如無特別大意外，照計抖一個星期夠了。

美股：2020年尾以嚟最勁一星期，明明網友又話打仗又話加息

3. 快手講埋，上星期嘅美股，相當好。有幾好？2020年尾後最好嘅一星期。道指同標指升6%，納指升夠8%。

4. 再講一次，而家美股已經明顯高過2月24日俄羅斯入侵烏克蘭時嘅水平，當中仲經歷咗2018年以嚟第一次加息，聯儲局宣佈縮表，油價狂升。你話煩都好，你可以睇下最初又話世界大戰又話高油價又話加息股市會死嘅人，而家又有乜講？而我一直又點講？

美股：增長股開始跑返贏價值股，係咪轉勢？點解？

5. 除咗重覆上面呢啲嘢外，亦留意下，無論係星期五，定成個星期，都係納指跑贏標指，亦見到增長股跑贏價值股（你睇IWD 同 IWF已知）。

6. 可以睇埋啲個股，都係啲高估值股有啲翻生，防守股就受壓（嚴格嚟講，舊經濟/防守股/價值股/標指，或新經濟/科技股/增長股/納指 唔係完全一樣，但唔分咁細）

7. 唔係話加息咩？唔止聯邦基金利率升喎，10年債息都升的，應該不利科技股？之前又話殺估值？

8. 答案嘛，我都唔係好知。夾硬講可能係估債息上升空間不大（越嚟越多人估衰退），但整體，我都冇一個好肯定嘅答案。又或者掉轉睇，你睇年初至今，都仲係價值股大幅跑贏的，係咪咁快轉勢？我覺得唔多似。但當然我可能錯，而我呢個判斷並唔係好有信心的。

港股：長和1長實1113逆市升，之後睇乜？

9. 港股只快講，鍾意嘅照舊睇round up．兩樣嘢，經歷星期一星期二兩日跌兩千幾點，星期三四又兩日升返三千幾點，去到星期五都一度跌過近600點，但又收復失地。另外，星期四提過嘅長和1長實1113都逆市升，可以留意下姓李嘅會唔會增持，幾大機會過幾日會見到。

10. 另外，星期五中概股都全線抽升，可能同拜登習近平通話似乎幾正面有關。可能港股星期一都仲有得升。

美股大波動股ETF，玩唔玩得過？

11. 純學術討論，冇叫你買，我都應該唔會買，但錢太多可以研究下。

12. 是咁的，美股有人申請緊隻「標指最波動成分股ETF」。即係乜？即係標普指數500隻，佢揀最波動嗰100隻出嚟，就買嗰100隻。每季會調整一次。

13. 三樣嘢，首先，呢個咁嘅「指數」，今年遠遠跑贏大市，但不意外，產品必定係呢啲位先會推出嚟，好多人都知呢種技倆，但依然有用。

14. 第二，理論上，volatility is your friend，夠波動嘅嘢，用嚟月供可能就最好，你多啲機會可以低位買到。

15. 仲有第三，大家都知（你唔知我話你知），一般都係股災，跌市時，波動就高（例如VIX）。以前都寫過文，往往VIX升到30時買入去，打後回報就不錯。好啦，既然你啲嘢係高波幅時入選，咁到你變低波幅時，應該係會升的。聽落幾好。

16. 不過，幾時魔鬼都在細節。如果真係高波幅時買落去，聽落幾好。但，一季先檢討一次，到你計到個波幅高嗰時，會唔會已經係好一排之前嘅事？

17. 無論如何，詳情太少，大家買唔買到都仲成問題（Cboe BZX 交易所交易），但作為純知識討論，可以留意下。

兩倍槓杆ETF，跟唔足喎，誰之過？

18. 然後講開波幅，記住啦喎，上星期恒指埋單，升咗858點。升4.2%。

19. 畀你估下，如果我買槓杆ETF，睇啱市，正向兩倍嘅，升幾多？反向兩倍嘅，睇錯市，輸錢好合理，但輸幾多？你係咪答，升8.4%，同跌8.4%？

20. 我地睇下正向2倍嘅7200先，如果我冇睇錯，應該係升6.3%，而唔係8.4%

21. 至於反向2倍嘅7500，當然輸錢，但輸幾多？係輸13.5%，而唔係輸8.4%。贏就唔足，輸就加多啲。

22. 利申，我同南方東英個別人士係朋友，以前都同佢地唔少合作（而家已冇）。但當然呢篇文唔係幫佢地開脫或乜，亦唔係批評佢地，實情，每一間都會有呢個問題。而公司亦一早同你講明

23. 係咪公司呃你？當然唔係，只係你唔熟書啫。如果你睇英文（識英文幾重要！），個名寫明係Daily，人地一向都話係每日跟足兩倍，事實亦係。但點解每日足，成個星期就唔足？就係數學問題。平時唔明顯，市況大波動好明顯。

24. 我當指數今日100點，跌20%，變80，第二日升25%，變返100。打和

25. 但如果兩倍正向槓杆呢？我當隻ETF 10蚊，第一日，放大兩倍，跌40%，去到6蚊。第二日，又係放大兩倍，升50%，但我只係升返去9蚊。見到問題冇？

26. 兩倍反向呢？第一日，放大兩倍，我贏40%，10蚊變14蚊，第二日，放大兩倍，輸50%，14蚊得返7蚊。

27. 當中關鍵，當然係　個好簡單嘅數學常識：一隻股票跌咗50%，你係要升返100%。同樣地，如果係3倍槓杆，你見到仲甘。

28. 當中係咪公司賺咗你？應該唔係，實情太多人都有呢個問題，所以公司次次都主動提醒，只係適合短炒，唔適合長期。呢啲情況下，就真係只能一日起兩日止。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。