聯儲局加息小小補充。美股：「今年又跑輸港股了，梗係林鄭抗疫有力」。但正經，講下美股買乜。港股：加息啦喎，股災未？快講業績：長實1113。快講業績：長和1。美國加息喎，香港做乜唔跟？又話聯繫匯率？ (Patreon)

聯儲局加息小小補充。

美股：「今年又跑輸港股了，梗係林鄭抗疫有力」。

但正經，講下美股買乜。

港股：加息啦喎，股災未？

快講業績：長實1113。

快講業績：長和1。

美國加息喎，香港做乜唔跟？又話聯繫匯率？

聯儲局加息小小補充

1. 昨日講聯儲局加息，漏咗小小嘢。首先應該係加7次息，唔係8次。但留意剩返6次會，即係好可能次次都加。

2. 另外，應該5月就會開始縮表。你話有冇影響？可能係有啲的，驚唔驚？都驚驚地。但點算？冇得點算，幾時都係兩面，你無晒負面因素冇晒不明朗之時，就係啲嘢升晒啦。所以照舊，股照買，唔好太進取。

美股：「又跑輸港股了，梗係林鄭抗疫有力」，但正經，講下買乜。

3. 首先，我唔係支持政府或林鄭的（唔係有人以為我係下話？），但，之前港股跌，又話關抗疫不力事。咁經過兩日反彈，港股今年跑贏美股，又係咪抗疫好有力？見到個講法有幾無聊未？

4. 都有人講近期少寫美股，原因好多。但其中一個亦係，諗唔到有乜好買。但，我又明明話你知，新錢都係買美股多過港股（我都係），長線亦應該係美股好過港股。

5. 有冇矛盾？都唔一定嘅，因為美股我而家真係買ETF多。但，都試下講下個別行業吧。

6. 理論上，應該睇好返啲大型科技股，FAAMG，但當然債息一路上，係有影響嘅，雖然，照計反映咗部份，甚至大部份啦啩。但你盈利太弱嗰啲就算吧啦。

7. 至於，加息，係咪買銀行？可能都唔係，你見銀行股今年都跑輸。原因都寫過，你見長債債息雖然升，但冇短債升得咁快，對銀行息差反而未必好。況且，舊年升唔少啦。仲有，如果經濟衰退，銀行往往冇乜運行，雖然似乎衰退機會又唔似太高。油股呢？喂，升晒啦。雖然你見油價又再反彈

8. 你問我，搞咁多嘢，不如買SPY或QQQ算。或者更好嘅，IWD（實情已經包咗油股銀行股），但記住日子有功，唔好講咩「諗住供一年」

9. 真係要講嘅，我會睇出行股。留意唔係香港同大陸嘅，因為香港同大陸又另一回事，但你見其他地方，係真係開始開關了。

10. 咁你最正路就諗航空公司，國泰293之前講過啦，今年好勁。星航今年都OK，甚至日航全日空（兩隻都有買）今年都唔差。美國嗰啲就反而麻麻地，都可以諗下

11. 可能更好嘅係酒店，或者旅遊網，因為冇油價呢個問題。前者，Marriott，Hilton，Intercon，全部上市，後者嘅，Expedia之類，今年表現OK。

港股：加息啦喎，股災未？

12. 港股嘅，大奇蹟again，唔係我懶，但費事照抄一次，你可以睇返round up，寫得不錯的（利申：雖然即時新聞唔使錢，但我係信報電子版付費讀者，而我做手術之前，都仲係日日買埋印刷版的）

13. 留意下，兩日彈返3000點，之前兩日先跌2000點多啲，兩日賺突。事實而家已經返返去3月頭嘅位。但，點捉？當然學我咁講，睇大成交大插，可能幫到你少少，但比較好嘅方法都係，有錢就買，甚至定期買，睇少啲股票，有益身心。

14. 拿，留意星期四晚啲中概股在美國又跌過啦，星期五港股會點？唔知。

15. 第二，留意返，昨日就唔止只係升中資科企，連星期二三落後嘅匯控5同友邦1299都升。咁係咪升到呢啲嘢都升埋就無以為繼？可能係，但唔好只係依賴單一指標。

快講業績：長實1113

16. 剛出業績，雖然唔係傳統高息股，但個派息令人幾鼓舞，分分鐘觸發市場重估。全年派息升咗22%，計數時間，股息2.2（之前減過的），股價50.55，4.3%股息率，相當不錯。今年股價幾好，但過去五年就橫行。

17. 當然亦都留意，往往業績後姓李嘅就增持，但唔知佢會增持邊隻。好難講。

18. 仲有留意，李澤鉅有講，長實負債率低，有資金，反而其他唔少人情況差，資產價格又回落，正係有機會買好嘢嘅時機。

19. 當然仲有，每隔十年八年，長和系總會搞啲大重組，但唔知等到幾時。

快講業績：長和1

20. 最後到長和，派息升15%，去到2.66（亦係減過的）。股價就55，4.8股息率。股價今年就好，但高位跌咗成半的。

21. 最後，李澤鉅講咗句嘢，都同大家分享下：

22. 問及集團是否仍是世上最「襟捱」的企業之一，李澤鉅說：「冇人想捱，大風大浪捱得起是能力表現。」集團在各地有業務，不會同一時間受到衝擊，資產質素好在風浪中仍賺到錢，加上團隊有財務紀律、手頭資金充足，承受風浪之餘仍有資格擴展、進行大型併購，簡略而言叫做「襟捱」。

23. 實情，你投資都係差不多。

美國加息喎，香港做乜唔跟？又話聯繫匯率？

24. 是真的，匯豐維持最優惠利率不變。點解？

25. 呢個問題呢，每幾年我就要寫一次，反正我最初做蕉行就係做美電（後生仔唔知咩叫美電了）。以前都寫過，有心機你上Facebook Page搵舊文，或者我過幾日再寫

26. 但簡單嚟講，咩係「香港加息」先？美國係聯邦儲備局，但香港，冇自己貨幣政策喎，你幾時有見過任志剛（我知係余偉文）出嚟見記者話加息？香港，你就講銀行嘅prime（p），根本係完全兩回事。

27. 然後你會話，邊有人用p按，過去N年個個都H按，係丫，我都係。但，你個封頂都係睇p，所以有間接影響。另外，你亦可以話，啲拆息（HIBOR，H）一早升咗，所以一樣係供樓會貴咗，亦係真的。

28. 至於個HIBOR同美金嘅拆息點互動，呢啲就更加深嘅問題了.

29. 但總之，大原則係不變的，你供樓嘅息，當然慢慢會加上去。只係好多人對啲基本嘢都混淆晒咁解。

30. 至於樓市嘛，都講過，有壓力測試嘛，一早假設加咗息都唔會超過你份人工幾多幾多%。當然你話疫下你失埋業（好似我咁），又另一回事。但照計呢，即使今年加7次息，香港嘅供樓利息，都近乎係全世界最平的。（當然，以前北歐有啲負按揭息口的妖象，當然要還本，但即係借一萬，但夾埋還九千幾咁）

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。