［FB文］金融．低位打靶嘅野 (Patreon)

FB出左篇文，連接如下：

https://www.facebook.com/ivanliresearch/posts/511035620595711

［低位打靶嘅嘢］時富為大家作出咗一個好好嘅負面教材。講明先，對公司影響就冇乜嘅，但純技術討論。

1. 首先，睇日期，通告星期二15號收市出，就係沽到15日。冇錯，正係跌得最慘烈嗰下。星期一又千幾點，星期二再千幾點。（咁當然，公司話一路有沽嘅，但我相信都係星期一星期二嘅最多）

2. 然後？就梗係，星期三，美團就彈返超過30%！今日升多13%，前後升多50%。左一巴右一巴

3. 如果你問我，做咗都十五年（原來只係咁短時間）金融，有乜定律？就真係，差不多次次跌市，都係一定要有啲人畀人斬倉打靶見血，先會跌定。仲係殺完呢啲人就會急升。當然呢個講法有啲套套邏輯，「梗係之後升先叫見底啦」。但，你真係睇下，每次大跌，都實係有啲做孖展呀，force liquidation 呀，capitulation呀（講英文型啲），fire sale呀咁。

4. 另外，低位嘅反彈，差不多一定係V型，好急的，好少係幾日跌幾千點，然後我幾個月每日幾十點咁爬返上嚟。因為股市係人嘅遊戲，貪念，邊有得忍？

5. 大帥冇點你，當然冇可能100%肯定，但星期二晚我在Patreon寫，咁大成交跌市，似係啲人打靶不問價沽，好多時係見底先兆。

6. 低位打靶好多原因，最多當然係因為孖展，亦有因為規則（例如沽俄羅斯資產）。仲有，係因為止蝕，特別係公司內部嘅指引。

7. 我唔知時富會唔會得閒到整個investment committee，照計應冇咁得閒，呢樣都真係極其無聊嘅嘢，但可能有啲rules，「喂跌10%就要止蝕」，之類。當然亦可能只係老細睇到新聞，阿波羅核電廠爆爆啦，過嚟叫你做。

8. 順帶一提，investment committee，真係相當低智嘅一樣嘢。你可以有hard rule，我在蕉行做刁拿（都話係D拿）時，都好多mandate，新仔你可以炒幾多，試用期過咗又炒幾多，有乜產品可以自己做，有乜你係要老細簽先可以做。輸咗幾錢你嗰日要停賽，累計輸咗幾多你成個月要停賽，全部冇問題

9. 呢啲rules 或者白痴，但畢竟你打人地工，用我常講嘅一句，人地出糧畀你嘛，你唔撚滿意嘅，唔好做，自己翻屋企炒，睇下自己邊度俊。按埋層樓做孖展買Peloton都得的，你爽就好

10. 但，你去到有個 committee，就必然係垃圾。勁人都變垃圾．大家專長未必同，諗嘢又未必同，我下個月退休，公司兩年後輸仆街關我撚事？但你仲要想上位。佢就原來已經拎咗隔離公司offer．坐埋一齊，大家投票，「我地買美團好定買快手好？」，做乜？

11. 正碓嘅做法，係假民主，仲要每個人都知，即係advisory，參謀團。多年前同朋友傾搞檔嘢（後來搞唔成），都有呢個共識。你邊撚有得雙辦事人？有冇見有雙CEO成功？雙領隊？冇的，特別投資，共乜撚嘢識？打唔打靶，撈唔撈底，你總要有個人摱雞，pull the trigger now he's dead。唔撚通投票？得罪講句，嗰啲股都未撚供過嘅COO，又同你一樣一票？

12. 講返，點解蝕幾百萬都要出公告？之前都有解過，上市條例嘅嘢。

13. 但對公司影響，唔算太大。一年都蝕幾千萬啦，幾球嘢，當然都痛，但唔致命。況且，本book都成4億，有排玩。

14. 另外都可能有發現，似乎啲證券公司，特別鍾意炒股，都一半半，首先就因利成便啦，自己走過去就得。仲有，生意淡薄嘛，不如賭博，世界難撈。亦都可能係，以為自己好熟股市啩。「你分析員喎，下個星期升定跌你都唔知？」（我知，就唔係做分析員啦）

15. 但，亦唔止係證券公司啦。以前永義（冇錯係官永義）都好鍾意得閒炒下股票，「華置買恒大就更唔使講」，之前間「安全貨倉」，買實金添。

16. 而好多地產商，都有相當大嘅投資部門，成team人。一來錢太多，二來亦分散下啲業務。好多都買得幾大，但有時亦刻意唔會買到要出公告。比較經典係九倉，嗰時沽Facebook 同 Amazon要出通告．畀你估下，係咪避過一劫？答案，都唔算係。沽Facebook 時200蚊，之後搞到咁大鑊，但而家都係大約200蚊。至於Amazon？　沽嗰時2000，而家，經歷過所謂嘅股災後，Amazon仲係3000蚊一股。但當然好難咁事後睇啦，不過，記住，股票長線係升嘅，至少美股係。