美股：今年加8次息呀，股災未？港股：大奇謮日，但點捉？大師冇點你，3000億成交大跌後就反彈。不過梗係事後睇先易。長江基建1038，上市25年，年年加派息。好過你買啲垃圾高息股。順手快講埋電能6。 (Patreon)

美股：今年加8次息呀，股災未？

港股：大奇蹟日，但點捉？

大師冇點你，3000億成交大跌後就反彈。不過梗係事後睇先易。

長江基建1038，上市25年，年年加派息。好過你買啲垃圾高息股。

順手快講埋電能6。

美股：今年加8次息呀，股災未？

1. 冇錯，2018年以嚟（其實只係3年多啲），第一次加息。關於加息會拖低股市，早就反駁過N次，你可以睇下上次2015年加息後，股市咩情況，特別係2017年。但你話，唔係喎，今次股市高估值。的確算係，但呢個係另一個問題。加息本身唔係你需要擔心嘅嘢，至於估值，你見息都未加，舊年已經開始拖低股市。

2. 另外我有提過，今次會後有經濟數據預測，都緊要，首先係周期嘅第一次。另外，上次係12月，打後3個月的確比較多事發生。篇幅（同埋我嘅情況）所限，只會快講。局方份原文呢度。

3. 實情要睇嘅，呢個圖都睇到大半。記住佢會有埋上一次（12月）自己嘅預測。經濟增長方面，今年預測大幅調低，但打後兩年冇變，「懶到丫」。失業率預測近乎冇改變，可以不理。

4. 萬眾期待係通脹，聯儲局睇PCE，唔係CPI，PCE最新好似按年升6.1%，今年嘅預測當然大幅上調，但亦只係調到4.3%，之後兩年只係上調少少，都唔夠3%。取態？好明顯，依然覺得通脹好快跌落去。

5. 最後，加息路徑。算係有啲意外。表入面係個年尾聯邦基金利率中位數預測，上次係0.9%，即係加4次，今次去到1.9%！加8次！驚未？亦都即係，今年嚟緊次次都加。但去到下年呢，3厘，2024年都係，即係加多4次（1厘）見頂。（我個人覺得係加唔到咁多次嘅）

6. 好啦，加息路經，同上次比，冇乜意思，因為中途好多事，主席都出晒口術。但原本個劇本係講332，今年3次，下年3次，再下次2次。總共8次。而家？今年都加夠8次，下年應該再加4次，收工，咁咯。

7. 即係個劇本係，今年會好果斷加息，但估好快會壓得住通脹，下年只係加4次就夠，2024年已唔使加。

8. 你見市場反應，早段當然升，份嘢一出，就急回，但之後又升返。對我嚟講，不用太放大。反正跌就會有人話暴力加息驚拖低經濟投資者驚，但個路徑太軟，又會畀人覺得辦事不力唔打擊通脹。都係narrative 之嘛

9. 即係點？一切依舊，但今年加8次息似乎機會唔細,，供樓嘅小心啲（雖然我一路都話，加2厘息你就供唔起樓嘅，得罪講句，最初你就唔應該買樓）

港股：大奇蹟日，但點捉？又，升乜？

10. 至於港股嘛，稱得上「大奇蹟日」，詳情照舊可睇信報嘅round up，一日彈9%喎，冇誇張啦。一隻騰訊700，升23%，已經貢獻超過300點升幅。甚麼美團3690京東9618（兩隻我都冇）更加升夠30%，好似真係冇見過。亦畀你見到，都係中資股拖低，亦係中資股帶返起。又咁啱得咁橋，你見A股又強勢反彈的。所以你真係唔使再講咩林鄭，唔好同啲阿叔一樣見識

11. 但，又睇下有乜嘢學到啦喎。

12. 首先，真係別人恐懼時我貪婪，原則上冇錯。但句嘢廢廢地，唔係廢在錯，係廢在，點執行？幾時先夠恐懼？你回想下，星期一又千幾點，星期二又千幾點，每日5%咁跌，星期一夠恐懼啦？你星期一飛入去嘅，好可能星期二已經震走咗。更何況，我上面講嘅係恒指，好多人買嗰啲嘢，邊止跌咁少？

13. 亦係再次證明，啲咩10%止蝕，係冇乜用嘅。個市平穩或升市調整時，固然令你錯失機會。但到急跌時，你朝早買完下午就要止蝕啦。最大鑊係，偏偏呢啲大跌之後，就往往反彈。

14. 但，你話係咪完全冇得捉呢？又唔係。大師冇點你，昨日寫到明，大成交咁跌，啲友不問價咁打靶，往往係見底嘅先兆。講多少少，知唔知點解？因為往往係有啲人畀人追孖展呀，爆煲呀咁，只有嗰啲人先要不問價係咁沽。正如新聞話啲Private Bank追啲客孖展，好合理，你啲抵押品跌咁多，梗係要補倉。咁但，往往嗰啲友本身就係賭仔，就係想槓杆槓杆再槓杆，哪有錢？往往一個浪打埋嚟就死晒。記住啦，真係差不多每次大跌，都要呢啲人見血先會停，務求令呢啲人左一巴右一巴，低位打靶，仲要沽完個市即升。之前有人問我點解叫人唔好做槓杆，而家你大約知。

大師冇點你，3000億成交大跌後就反彈。不過梗係事後睇先易。

15. 不過，整體嚟講，都係極難捉。易捉嘅，我飛咗入去啦，而我冇。但我有一路每月定期買港股（其他股都有）。照舊嗰句金句：你唔敢買，正常，但都唔好走去低位沽。

16. 再畀個例子你，睇下有幾難捉：星期一點千幾點，OK啦。星期二再跌千幾點，但，一度收窄到百幾點的，呃晒，你以為見底飛入去？到尾市就插成千點。點玩？同樣地，星期三，一樣試過升幅收窄到得返百幾點，你又係嚇到沽返出嚟啫。

17. 你問下良心，覺得自己有冇可能捉到？睇啲乜鬼5分鐘圖，大佬，你真係信？嗰啲大師梗可以事後自圓其說，但你自己落場試一次咪知得唔得。我嘅方法簡單得多，睇少啲，有錢就買。事實上，呢三日我都瞓到港股收市先起身。

18. 呀仲有，至於，你最關心嘅，升乜？答案，我都唔係好知。照計同A股好大關係，但A股升乜？就考起，A股啲嘢，一向都好難解。固然你事後搵新聞，又會見到話咩中美審計達成共識呀，嚴打惡意沽空呀，支持境外上市呀，鼓勵咩長線基金入市呀之類的廢話。甚至烏克蘭可能停火都講埋（咁真係似乎有有啲轉機），但，大陸嗰啲嘢，成日都出口術架啦，你見以前冇乜效的。特別係咩審計共識嗰壇嘢，成個星期前咪講過！但你睇早幾日啲中概股？

19. 所以，有時就係冇點解，可能真係夠殘，或者我寧願相信，真係啲友畀人打晒靶後，就見底回升。

20. 呀仲有，睇埋呢個。美銀調查（呢個調查做咗好耐，有啲權威）話，啲機構投資者拋售股票blah blah blah，鬼唔知咩。但留意，入面有講，持有現金水平，兩年最高。呢啲就正面訊號啦。以前都大約講過下，個個都滿倉股票，仲有邊個去買？咪你啲網友去接火捧。機構投資者沽完啲股票有現金，對股市先係好事。但當然呢個係講全球，唔一定係港股

21. 最後留意，在呢個大奇蹟日，居然匯控5係冇得升的。而建行939 長建1038電能6 長實1113呢堆都要跌。有乜共通點？之前企得較硬嘅嘢，咁好合理嘅，中資科企帶動嘛。咁即係，幾時都叫你保持平衡，你唔好話我知，話之前聽我講長建好就沽晒啲騰訊去買長建，而家左一巴右一巴呀，我從來唔會叫你亂沽貨的。

長江基建1038，上市25年，年年加派息。好過你買啲垃圾高息股

22. Speaking of 長江基建1038，只快講，出咗業績，你只睇一樣嘢就得，就係，連續25年加派息。我印象中，近乎冇一間香港公司做到（美國就有唔少）。點解只係25年？因為佢上市就只係25年。年年加，公司亦好自豪，有理由相信佢地點都想守住個招牌。

23. 計數時間，股息2.5，股價50.15，5%股息，仲應該年年有得加，幾好。今年有得升些少，計一年回報就9%，仲想點？但當然要耐性。慢慢儲

順手快講埋電能6

24. 快講埋隻電能 6，留意唔好同隻港燈2638撈亂。都係剛出業績，又係睇派息。全年2.82，股價就49.7，股息率5.6%，近5年都有得加，還不錯。今年有得升計一年就升11。

25. 當然你話，喂，如果港股大反彈，呢啲嘢實跑輸喎。照計都係，但你點知港股實大反彈？我都唔知。所以幾時都係嗰句，保持個平衡組合，唔好個市大升時又問做乜呢隻嗰隻唔郁，到個市跌時又問做乜啲發夢股係咁跌。你當好似個團隊咁，應該乜人都有嘅，唔好個個只係冇腦嘅大隻佬，亦唔係個個都係書生。因為你都唔知個比賽玩乜。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。