[FB文] 非金融 - 拉闊音度 - 繼續Raidas/林夕 (Patreon)

FB出左篇文，連結如下

https://www.facebook.com/100050678310520/posts/509990417366898/?sfnsn=mo

［拉闊音度］寫啲短文，攝下時間，當intermission（講英文型啲），或者當Palate cleanser（講英文型好多），幾度菜之間整個sorbet（講英文型啲）畀你咁。嚟緊仲有其他文，心中想寫嘅都一百幾十篇起碼。成日話「冇靈感」嘅，就唔好食呢行飯，不如轉行種小麥，聽講好快發達。

TLDR：現代都市人日復一日行屍走肉吃喝玩樂瞓覺返工拍拖分手日日如是唔知為乜

1. 希望唔會太長（多數寫完呢句都搞到好長），但想再寫下Raidas，亦講埋林夕。正如舊文講，我唔會話冇Raidas就冇林夕，反之亦然。但，因為係林夕最早期嘅作品，幾值得再研究下。

2. 會有兩篇文，講兩首歌。分別係《某月某日》，同《不願置評》

3. 唔係最熱門嘅歌，但唔算冷門。你見兩首都有MV，就知唔算冷門。

4. 兩首歌拎埋一齊講，因為兩樣嘢。首先，就我有限嘅理解，呢兩首先係十分之「Raidas」電子音樂風格嘅歌，《傾心》唔係，《別人的歌》唔係。但《傳說》同《吸煙的女人》就係。聽一次你就明。

5. 另外，你可以留意，黃耀光嘅歌，幾鍾意第二次副歌之後，再整多段嘢。《傳說》有「重合劍釵　修補破鏡　只有寄情戲曲與文字」，《別人的歌》就有「台下熱烈射燈正閃亮　像千盞欣賞眼睛」。《某月某日》同《不願置評》都有。呢種唔係好創新嘅東西，但，印象中佢地啲歌係比較多嘅。

6. 不過，主要都係講返詞。兩首都係林夕填（廢話），但仲有共通點。就係我現代都市人嘅疏離，刻板，搵到錢啦，有女伴啦，買到樓啦，然後呢？

7. 太後生嘅未必明白，所以要再三強調返，你唔明都好，都留意返個時代背景。

8. 呢兩首歌嘅歌詞，都係十分之「優皮」主題嘅，嘩，呢個詞真係好老餅（而「老餅」呢個詞本身亦好老餅）。優皮是甚麼？我唔直接答你，用例子答你，即係《號外》，丘世文。明冇？都唔明呀？Er…….. Young Urban Professional ，究竟點樣先係一個成功YUPPIES？

9. 真係要明白，嗰個唔係幼稚園學生都一年去幾次日木嘅年代嘛。

10. 社會經濟起飛其次，最重要係，嗰班後生嘅（roughly Raidas 林夕，甚至我老豆老母嗰代），佢地叫做讀過番書，叫做「識嘢」，唔再係工廠妹萬歲　人人為我我為人人。亦冇咗再上一代嗰種同大陸（或台灣）直接嘅連結。仲大刀王五大俠霍元甲咩。

11. 好多分析都會話你知，香港嘅流行曲，廣告，電影，都係嗰個時代興起。唔係偶然，係必然。再之前根本冇「本土認同」呢回事，聽嘅係英文歌，國語小調，睇嘅係國語片（有錢的話）。然後就多得有番書仔，就開始有「身份認同」，有人視香港唔係「借來的地方」，就有許冠傑溫拿，就有電影新浪潮之類。

12. 即係，開始脫離咗生物邏輯層，變咗生物文化層啦。對本土嘅文化，係十分飢渴的，邊個嚟寫我地嘅故事？既然冇得反攻大陸（或統一台灣），咁之後呢度邊個話事？對上班老坑就真係好多都唔識嘢嘛（邊似而家個撚個家長返學校同老師講量力力學），更妙嘅係，啲鬼頭又準備走佬嘛。況且，鬼頭再惡，都寫唔到廣東歌拍唔到港產片。

13. 搵到錢啦，有機會上游變中產啦，買樓啦，四仔主義啦，唔使七十二家房客樓上閂水喉啦。

14. 仲有，個社會係開放咗的，唔再盲婚啞嫁啦，有自由戀愛啦。咁你同而家中學生已經4P玩後庭冇得比，但，相對架啫。

15. 但，人就係咁架啦，太多錢，太多自由，太多女。個人又飄啦，有啲迷失自我啦。

16. 嗰個年代有部份歌，就係寫呢樣嘢。林夕呢兩首歌都或多或少係。

17. 我地聽聽呢首《某月某日》（https://ytube.io/3Qhs）

18. 開首堆詞，我就唔會句句咁討論。因為我欣賞係成個「意境」同埋佢嘅「主題」，你見開首嗰一段，重覆咗四次。但林夕填咗四段，唔太多重覆字。呢啲係要加分的，亦係功力嘅表現。當然，亦可以話會令首歌唔夠「洗腦」，所以有時中間落墨嘅方法就係副歌重覆，但其他唔重覆。

19. 四段，分別係二月五日，二月八日，然後二月某日用咗兩次

20. 第一段寫，「怎樣發起　沒法記起」，第二段係「喜或悲 沒法記起」，第三段係「討論要點 沒法記起」（第四段卒之唔係「沒法記起」）—都係講嗰種，都係咁啦，見邊個，講咗乜，開心唔開心，都唔多記得。

21. 另外，最初係「我和友人聚舊」「我和愛人在故地」，去到後來，就係「我和某人在某地」，而個日期亦由「二月五日」「二月八日」變成「二月某日」（可能呢個係林夕連用兩次「二月某日」嘅原因），見唔見，越嚟越模糊？人物，地點，日期，全部唔記得。

22. 副歌，冇乜特別，唔講

23. 我覺得填得最好，就係最尾嘅嗰段（重覆咗兩次），完全帶出咗「現代都市人日復一日行屍走肉吃喝玩樂瞓覺返工拍拖分手日日如是唔知為乜」嘅感覺

24. 林夕填嘅係：「習慣問候或分手　安慰笑容近況和寄望　因某君寂寞或快樂 於某一天淡忘　習慣會面或告別　淺笑喝茶睡覺和說話　於某一剎那說失意 每日如是」

25. 最尾嘅一句「每日如是」，畫到出腸了。仲有　「因某君寂寞或快樂 於某一天淡忘」同「於某一剎那說失意」，一堆某，呼應返歌名同埋之前填嘅詞，妙。

26. 但我覺得填得最好嘅，就係「習慣問候或分手　安慰笑容近況和寄望」「習慣會面或告別　淺笑喝茶睡覺和說話」。勁在邊？除咗「習慣」外，完全冇重覆。就係嗰種，離離合合，食飯瞓覺返工，旁人關心你，又循例答下咁，每日如是。