港股：半個3月，已跌得多過舊年全年。又仲有港股逆市升嘅，8厘息。美股：納指一個月三次「熊市」但又反彈。聽晚議息睇乜？世界大戰，油價500蚊未？ (Patreon)

港股：半個3月，已跌得多過舊年全年。

又仲有港股逆市升嘅，8厘息。

美股：納指一個月三次「熊市」但又反彈。聽晚議息睇乜？

世界大戰，油價500蚊未？

連續寫七日啦喎，但我慎防有啲人唔知，我而家都仲係手機都睇唔到的，餐牌電梯掣一概睇唔到。我識寫文不等於我好返大半的，所以請你問嘢甚至批評之前，記得呢一點。

港股：半個3月，已跌得多過舊年全年

1. 先講一講港股，情況當然係「還不夠絶望，尚可更絶望」。千幾點千幾點咁跌，「照計四月就見底」。慘況我都不想再多講，自己可以睇返信報嘅round up。舊年你話港股廢？今年三月剛剛一半，只係三月跌嘅點數，已經係多過舊年全年！而有少少數學常識都知，即係計跌幅仲勁過舊年，怕未。

2. 不過可以補充下幾點，首先，成交近3000億，固然代表啲友不問價狂沽，或者有人啲槓杆打靶，但呢啲一般係見底不遠（係啩）。第二，你見A股係勁跌的，至少你大約見到主要真係中資股（或大陸）嘅問題，而你見美國上市隻EWH，絶對冇咁慘烈的

3. 講開，見到星期二晚啲中概股有部份反彈，但我依然係唔多會買的。睇法照舊，你地鍾意一注獨贏嘅（但我一路叫你唔好），就當然係買美股唔係港股。會分散嘅，咪分散，但港股冇理由佔超過一半，可能七成其他地方，三成港股。而港股入面，又應該似乎係香港公司好過大陸公司。

4. 真係咁爛賭要買中概股嘅，就搵啲香港已經上咗市嘅。你啲股票由有上市變冇上市，係極之麻煩嘅一回事。

又仲有啲港股逆市升嘅，8厘息

5. 仲有要提一提，跌成咁，都仲有港股逆市升。年初至今都升的。仲剛剛出業績，出完就升。當然你夾硬去搵實搵到，但天地良心，我一路都想提呢隻嘢，真的。

6. 就係，中信國際電訊1883。中信系嘅嘢，往績其實認真麻麻。但呢隻算係正常啲。

7. 做乜的呢？主要就係澳門電訊。悶，冇乜增長，但息OK好。又係自己睇返，近五年都加到派息，還好。舊年派0.225，股價就2.76，股息率8.2%，有啲防守性。

美股：納指一個月三次「熊市」但又反彈。聽晚議息睇乜？

8. 美股嘅，你見又彈升返。可能係因為俄烏和談似有進展，但講真，你外人跟住呢啲去炒，必定係落後幾十拍，「我係普京或澤連斯基一早買定沽定啦」，所以再講一次，你不能跟在呢啲消息後面。

9. 但你見美股真係強，固然都挫上挫落，但都話，而家同俄羅斯入侵嗰時，其實差不多水平，中間當然好難捉，但你少做少錯，唔好走去亂咁沽。

10. 仲有，上星期都寫過，納指之前已經兩次高位回調20%，但又即反彈。之後又跌穿啦，到星期二晚，又係彈返上嚟。記唔記得我講，睇咩「熊市」根本係廢？因為根本冇證據話跌咗20%就多數會再跌，反而真係計，反彈嘅次數係多啲。有冇點你？（原因好簡單，都話股市係升多過趺）

11. 美股嘅焦點，應該會係聽晚聯儲局議息。結果我話定你知都得，加息25點子。所以睇引導先重要，同埋留意會有經濟數據預測（一年四次），但我估佢地都會只係重覆「不明朗」。不過同時留意兩樣嘢，第一，越嚟越多分析員估美股經濟就快衰退。聯儲局唔會咁快咁樣諗，但，如果之後發展真係咁，咁你想像到，加息真係唔會加得好多次（但留意，加返八次都係相當有可能的，2%咋喎）

12. 順手補充，衰退喎，唔驚？唔驚。上次美股升到癲，咪係2020衰退嗰時！而家經濟好，股市咪跌！一路都係兩樣嘢，同埋股市行先。

13. 第二點嘛，留意呢排油價大跌（下面再講）。呢個亦分分鐘舒緩咗聯儲局加息嘅壓力。實情之前已經有人話（我一半半同意），美國成功將通脹嘅責任踢咗去俄羅斯，而唔係因為自己印錢派錢。

世界大戰，油價500蚊未？

14. 你有買期油嘅（唔會下話？不過有ETF的），當然唔開心，但都睇下。不過更重要嘅，冇買，你先更加要睇，睇故事教訓。

15. 好簡單，油價應該兩日，跌咗近20%。原因？唔知喎，可能係俄烏和談有轉機，可能係啲中東佬增產，可能係中國經濟差。

16. 挑戰你常識嘅係：而家油價，已經同俄羅斯入侵時差不多水平。問你死未。

17. 見唔見網上好多人，又話500美金，又話有排升？又話咩供應鏈呀，唔畀買俄國油呀咁。實情，邊有咁簡單？

18. 所以你見我，從來都唔會叫你去買油。一來我唔識，二來我亦唔認為你識。三來，根本係一個相當被操縱嘅市場，你有乜可能知啲中東佬或俄羅斯佬諗乜？正如我講，投資唔係跳水唔係體操，冇難度分的。因乜要搞啲自己根本唔識嘅嘢？定為咗證明自己好叻？

19. 當然，油股又另一回事，你見今年雪佛龍CVX都仲升好多。但，亦因為佢估值低，價值股嚟的（IWD十大持股之一，Exxon Mobil都係），而2020個市狂升時，佢仲要跌，你咪又鬧廢股。更唔好講又話ESG又話人人用電動車

20. 教訓？我真係冇見過有一個行外人炒油可以搵到大錢。一個都冇。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。