港股三月十個交易日狂瀉3181點 科指暴跌兩成六。區區香港特首，何德何能推冧港股？隻新興市場走中國，有俄羅斯喎，點收科？既然有新興市場走中國，咁有冇得港股走中資？根本「港股」跑贏全世界，但，甚麼是「港股」？IN KS WE Trust：早早叫你買長和系，87%股票跌嘅日子佢都有得升。 (Patreon)

港股三月十個交易日狂瀉3181點 科指暴跌兩成六。

區區香港特首，何德何能推冧港股？

隻新興市場走中國，有俄羅斯喎，點收科？

既然有新興市場走中國，咁有冇得港股走中資？

根本「港股」跑贏全世界，但，甚麼是「港股」？

IN KS WE Trust：早早叫你買長和系，87%股票跌嘅日子佢都有得升。

1. 今日寫啲嘢比較散，但又全部都有啲關連，一口氣睇晒佢吧。另外，上面標題堆嘢，係為咗出summary 吸新讀者，同下面分段唔同的。唔係掛羊頭賣狗肉，上面講嘅嘢，下面全部都有講，只係唔係咁順序。

2. 總之，聽話，由頭睇到尾吧。

3. 港股三月十個交易日狂瀉3181點 科指暴跌兩成六

4. 呢個係信報嘅market round up，寫得相當好，冇濫用「狂瀉」「暴跌」，十個交易日跌3800點，真係「狂瀉」。而科指跌26%，亦係「暴跌」。

5. 但我地睇多少少嘢，恒指呢十個交易日跌嘅3200點，等於14%。至於年初至今呢？恒指跌16%。即係，頭兩個月只係累跌2%（升過一浸添），3月先忽然肚瀉。好啦，100萬嘅問題，3月發生乜事？可以畀你諗下。

6. 但，答「烏克蘭」嘅，水平太低。犯咗一種毛病，我成日講，但總係好多人犯，正常嘅，因為好難避免。因為人就係見到有乜新聞就fit落去。但，之前寫過，由俄羅斯入侵到而家，美股只係跌些少，歐洲股跌多少少，點解完全唔啦更嘅香港會跌多咁多？你話貴，港股又似乎點都唔算極貴。

7. 仲有，留意多樣嘢，星期一87%股票跌（極高嘅比例），但有乜升？首先，係本地銀行，恒生11，中銀香港2388，匯控5，都有2-3%。全部找都有啲。

8. 另外，當然係In KS We Trust，李嘉誠嘅東西。長實1113，長江基建1038，電能6，全部有得升。長和1亦只係微跌。除咗電能外，其他三隻我都有。（舊文有寫我月供乜港股，搵篇叫持倉全公開嘅文吧）

9. 咁當然，又係可以幫補少少，我港股倉真係持續跑贏大市的，雖然你心諗，只係輸好多同輸少啲嘅分別。都係。但我一向哲學都係：唔係奢求咩逆市發圍。逆境時輸得少過人，順境時贏得多過人，幾個周期，自然拉開晒。唔止係講股市。

10. 大家知道，我向來唔鍾意問股市做乜升做乜跌，特別係短期嘅。但，港股積弱咁多年，就真係我都要問下點解。

11. 好啦，你嘅答案係乜？答烏克蘭嘅，上面我已經反駁咗你。

12. 然後我相信，有好多人講林鄭管治無方，抗疫不力，外資失信心之類嘅東西。但，十分抱歉，我係唔同意呢啲講法嘅。我唔會反對你批評佢，但，同股市有何關係？

13. 詳情，你可以睇我在明報嘅文。呢度有埋link，應該睇到。睇唔到就睇attachment個word file．

14. 林鄭管治無方云云，我冇打算幫佢辯護。但同樣地，你發唔發現，你又係見到新聞有乜，就塞落去解釋？

15. 我篇文入面，亦都引咗信報嘅一個專欄（雖然我唔同意，但算OK可讀的，至少係有心寫。你見有唔少人，自己都唔信自己寫嘅垃圾）。入面有講，計特首在位期間，曾蔭權任內股市最好，梁振英第二，老董第三，林鄭應該包尾。當然當中似乎冇計及做咗幾多年，但是但啦。不過，梁振英係咪真係做得好過老董？任你講。

16. 但最重要係，呢啲比較，全無意義。你話唔係喎，人地都係睇美國總統任內股市表現。咁就搞笑啦，區區一個香港市委書記，幾時變咗同美國總統同一回事？

17. 明報幫我改咗呢個題，「特首何德何能搞冧港股」。夠吸睛，亦唔係斷章取義。不過，如果你睇晒我全篇文，你見我有提「不如比較下唔同中國領導人之下，港股表現點」？冇錯，矛頭直指習生，但就廢事寫得咁直接啦，命仔要緊。

18. 你諗真啲都知，成堆重磅中資股，關香港防疫乜事？關林鄭施政乜事？林鄭抗疫不力會震散騰訊股價？seriously？

19. 仲唔信？睇數字。恒指今年跌16%，夠晒差，但國企指數跌夠20%！科指？我都費事睇，只係3月都跌咗26%啦。咁你話，係乜拖低港股？

20. 梗係大陸啦。你話係中概股風暴又好，大陸又爆疫又好，甚至學麥樸思咁講，分分鐘制裁燒到中國都好。呢啲理由，點都合理過咩林鄭。好心，眼光唔好咁窄啦。

22. 但當然核心問題，呢度我都寫過多次。原本你可以話政體同股市冇乜咩好必然既關係，越南夠一黨專政（其實似廿年前嘅中國），股市一樣喪升，對不？等於中資股以前一樣狂炒。問題係，以往嘅中國政府，就容許或容忍企業家賺大錢，而家，就似乎唔係啦。咁在呢啲環境下，股市，就好難有運行的。

23. BTW，呢個又畀你見到，咩「供求定律」垃圾得很，我知，股市梗係有人買就升。但點解有人買先得？最後都係要睇企業盈利。你個體制下，有再好技術再叻嘅企業家又如何？不過你又唔使擔心騰訊會執笠之類。其實大家都見過例子啦，內銀又好，中移動又好，都係有一輪狂放增長，之後就唔畀你再大賺特賺，但又唔會搞到你蝕錢嘅，咪變咗公用股咁。你可以睇下我呢個預言啱唔啱。

24. 仲係唔信下話？頭先咪同你講過，你見逆市有得升嘅，好多都係本地股份。

25. 仲係唔信？畀多隻嘢你，以前都寫過。EWH。美國上市，追MSCI香港指數，冇中資股。表現？今年只係跌8%，差？跑贏晒恒指國指科指就固然。另外，隻新興市場走中國，EMXC，今年都要跌10%。成熟市場（冇美國）IDEV，跌12%，標普指數跌13%，納指跌21%。唯一不及嘅只係價值股IWD，IWD跌6%（幾個月前叫咗你分散架啦），而同系，增長股嘅IWF，跌夠20%。

26. 根本「港股」就跑贏全球。咁你話買EWH得唔得？都真係得的。因為你好少有純香港嘅exposure，盈富2800都好多中資股，「理論上你可以long 2800 short 2828嘅」，實際上，唔好咁無聊啦

27. 仲有少少篇幅，費事拖到聽日先寫。首先，EMXC，新興市場走中國。我話買嘛，我都有買。但，入面有俄羅斯喎，「咪賴晒嘢」？答案：基本上都係。啲指數應該好快會直頭剔除俄羅斯，其實唔剔除，啲嘢都跌咗七八成，加埋盧布係咁瀉，真係同死晒冇乜分別。但，the beauty is，我隻EMXC，係有俄羅斯，但唔係全部係嘛！況且FB寫過（有人投訴呢度冇呀下，所以我以後篇篇貼過嚟，唔好又鬧煩），俄羅斯並非十分金融化嘅社會，啲企業市值唔大的。所以？對EMXC有影響，但死唔晒。今年，咪跌10%。好差咩？好過港股，好過美股，好過成熟市場IDEV。唔好忘記仲有部份係因為啲新興市場貨幣對美金跌。

28. 所以老教訓，分散。你話你自己走去手痕，見舊年俄羅斯股市勁（全球表現頭五位）走去買俄股基金，包你而家喊晒口。

29. 最後，講埋滴滴。原本呢，咩美國除牌，只係一個暫時嘅問題。你見中移動中海油嗰啲，除咪除咯，之後股價不知幾勁。但因為在香港有上市嘛！但滴滴個問題就十分大了，因為似乎政府根本唔畀佢在香港上市。咁點算？唔代表公司會執笠，但啲股票就真係唔知會點。

30. 呢度講遠少少，個人睇法，但似乎，呢啲咩打車平台外賣仔，唔係大陸想見到嘅技術創新。於國家有何益？所以你見真係實整治。未必整死你，但唔會點畀你有好日子過。相反，你做晶片嘅，就國家認可啦。但，「做到先係」，總之你見到，在外國，你可以用創新用技術搵錢，但中國呢，以前可能得，而家就窄咗啲啦。

31. 咁當然，我唔會完全睇淡，「可能我錯呢」，我自己新錢，可能都係七成美股，三成港股咁。咁但，如果你地鍾意一注獨贏嗰啲，就梗係買美股而唔係港股啦。

32. 今日寫得比較長，聽日可能短啲。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。