[FB文] - 非金融．拉闊音度 (Patreon)

FB出左篇文，連結如下：

https://www.facebook.com/ivanliresearch/posts/508052957560644

［拉闊音度］繼續係超級弱視人士，暫時冇乜嘢做到（下個月頭再開刀），所以近日都係聽歌多（唔通睇四仔？雖然都有睇，睇四仔唔係用眼，係用心，「同埋用手」）。得閒同大家分大家分享多啲心得（歌，唔係四仔）。雖然永遠都係想法多多，時間或能力不夠。

TLDR：林夕好早期嘅作品，年紀輕輕已洞悉人性

1. 講到香港八九十年代嘅樂隊或組合潮，第一隊講當然係Beyond．不用討論。然後會係講達明，或者太極。「草蜢就唔係嗰回事啦，聽還聽，但真係唔係嗰回事」。然後夠老嘅可能會講，Raidas．

2. 呢個亦絶對係年紀測試，你後生嘅，都仲會有一定機會識Beyond 達明 太極 草蜢，但Raidas呢，後生嘅好多聽都冇聽過。亦係正常，首先，兩條友近乎消失晒，唱歌（靚仔啲嗰個，至少當年係）陳德彰，消失咗。作曲嘅黃耀光，變咗做佛教音樂（真架），同埋開班教瑜珈，唔知有冇噴火。第二，Raidas當年都紅過下，但好快散band，聽聞係黃耀光同唱片公司音樂理念不同，隊嘢三年唔夠就摺埋。至於陳德彰後來試過單飛，當然仆直。

3. 所以，老嘢玩意。正如我講，Raidas雖然壽命短，但都算紅，都真係有唔少紅嘅歌。你會數邊首？

4. 係咪黃凱芹填詞，相傳寫畀周慧敏嘅《傾心》？（呢件事好撚痴線，黃暗戀周唔痴線，但，首先當時周慧敏男朋友正係Raidas主音陳德彰，玩乜？夫目前犯？都真係樂壇懸案。第二，Raidas差不多所有歌，都係林夕（冇錯，嗰個林夕）填詞，如果我冇睇錯，只有兩首唔係，呢首《傾心》就係其中一首（＊）。有關黃凱芹同林夕，之後再會詳細講

5. 有人會提《傳說》。亦係經典之作，加上早幾年（有冇十年？），志明春嬌唔知邊集都仲有人唱過。況且，林夕迷應該知，呢首歌亦係林夕剛出道嘅作品，坊間一致驚訝原來歌詞可以咁填，呢個廿五歲嘅小朋友真係天才橫溢，《紫釵記》《帝女花》都填埋落去，然後又係老套嗰句，the rest is history，傳說的起點。

6. 或者會有人揀《吸煙的女人》（亦多得TVB嘅《出煙的女人》），一樣係林夕填詞，係佢填嘅第一首詞（嚴格係第二首，不詳解，自己睇維基）。當時佢嘅「新詩式」填法已經引起一定注目。

7. 不過，一如以往，我當然揀啲冇咁大路嘅嘢（實情都大路），我認為佢地最出色嘅作品，係《別人的歌》。（https://ytube.io/3Qd1）

8. 冇錯亦係林夕填詞，都話得兩首唔係。

9. 曲。就唔講啦，反正我唔識，你都唔識。可以講下嘅係，Raidas 嘅風格係玩電子音樂，唔知係乜都唔緊要，聽幾首就feel到，曲風深受八十年代嘅Brit Pop影響，亦有人話佢地根本係抄襲。但至少，據我所知，Raidas好似一首改編歌都冇（太極都有Bon Jovi啦），大多數亦係黃耀光自己作返，所以都真係有當高嘅原創性。（亦點解草蜢真係唔係嗰回事）

10. 不過留意，呢首《別人的歌》，並唔係十分「Raidas」嘅歌。《傾心》都唔係，反而《傳說》，《吸煙的女人》，或者冷門啲嘅《某月某日》《杯中冷巷》《不願置評》就係。自己聽下

11. 講咁多，《別人的歌》出色嘅係填詞，都係林夕填，但並唔需要好似《傳說》咁用好多典故，平平實實用字，一樣填得好好。

12. 要講少少時代背景，話說八十年代，香港流行一種叫「酒廊」嘅物體，亦自然有「酒廊歌手」，類似你睇《梅艷芳》入面嗰啲，或者《少林足球》入面「少林功夫醒」之類，但不一定咁雜，反正我老豆帶一家大細去。有人話「即係Live band」，但又唔多同，反而你可以話似而家街頭Busking（講英文又係型啲）。Anyway，當年除咗新秀，有啲歌手都係咁畀人發掘（例如呂珊），你當好似踢街場畀人睇中咁。或者，在澀谷街頭畀人叫去拍AV咁，都係比喻啫。

13. 但更多嘅酒廊歌手，當然係寂寂無聞，越唱越霉，霉過楊玉梅。而酒廊歌手，當然係唱人地嘅歌。未必冇自己歌，但鬼有人識？老細亦唔會鍾意你咁做。加上有點唱，咁十居其九，啲友梗係點譚詠麟梅艷芳張國榮，唔通叫你唱首自己嘅歌咩。

14. 呢首《別人的歌》，寫嘅就係咁回事，填得相當有畫面，又刻劃埋歌啫嘅心情，仲有情節，相當好。

15. 「為何仍要歌唱不願再細想　每夜卻照常等知音讚賞」　—就係寫我等伯樂，等畀人睇中嘅心情，唔知為乜。

16. 「曾用真心認真唱   藏著辛酸的歌　觀眾的聲音卻常比它更響」　—冇錯，雜啲嘅場，當然係台上有台上唱，台下就自己猜枚劈酒，香港特色。

17. 「人人隨意點唱一樣那些歌　唱罷 也惹來公式的拍掌　其實掌聲屬於　那人盡皆知的歌　演唱的歌手卻如永沒名字」—　呢度寫現場嘅現象，同埋歌者嘅心情。正是人人都係點嗰啲熱門歌星嘅歌，有公式拍掌，但歌者好清醒，係因為首歌，唔係因為你唱。你唱第首歌，就冇人理。你邊位，亦都冇人理。

18. 「驟變的音階 屢次起跌　如同年月蹉跎　別人的歌 別人風光　藏著我一生痛楚」—呢度就帶出咗歌名嘅「別人的歌」，更妙嘅係。用音階屢次起跌（細個同學一定話「女廁起跌」），比喻做年月蹉跎，蹉跎呢個疊韻詞（！）剛好配返一個八度嘅轉折，妙！

19. 「但我不甘心　永遠灰暗　如同陪襯　不相信就這般 無聲的度過」—呢度係第一同第二次副歌嘅最後一句。留意，歌者係樂觀，堅拒認命，不甘心，唔相信就咁一世寂寂無名，係伏線嚟的。記低佢。

20. 然後，冇乜特別，返到最初，副歌重唱一次。但，之後仲有一段高潮位，然後一段純音樂，再先唱多次（第三次）副歌，呢度就有心思啦。

21. 如果你講作曲上，呢種編排唔罕見，當然係比較好牽動聽眾情緒，亦可以畀主唱者「爆」一段，演下唱功，但如果填詞都配合到，就更好啦。

22. 在第二次副歌後，嘅高潮位。林夕填嘅係：

23. 「台下熱烈射燈正閃亮　像千盞欣賞眼睛　從前願望逐漸變真實　如像看見聽眾　個個細聽我的歌」—相當好，卒之有出頭天，願望成真，大團圓結局啦，大家happy 啦

24. 然後係一段純音樂，之後再出第三次副歌，戲肉嚟啦喎，林夕填嘅係：

25. 「漸暗的燈火 卻叫醒我　仍然如舊蹉跎　別人的歌 別人風光　藏著漆黑的痛楚」—屌，真係要講粗口，有冇咁絶！拍手叫好。反高潮，一盤冷水照頭淋，在「高潮」入面嗰堆嘢，你發夢咋，幾廿歲人唔好咁多性幻想，洗洗睡吧，夢裏甚麼都有。聽晚記得準時啲，唔好再唱自己啲歌啦，啲客唔鍾意。仍然如舊蹉跎

26. 絶？未夠絶，睇埋最最後一段，是咁的：

27. 「但我不清楚哪裡保證，何時能突破，只恐怕像首歌重複的度過」—有乜特別？可以比較下，頭兩次副歌，填嘅係「但我不甘心　永遠灰暗　如同陪襯」，而家變咗係，「但我不清楚哪裡，保證何時能突破」。原本係「不相信就這般 無聲的度過」，而家變咗「只恐怕像首歌重複的度過」

28. 由denial 到認命，其實亦係好多人嘅寫照，畢竟睇數字都知，成功嘅只係少數人。用晚晚重複嘅歌，講返自己嘅人生，妙。

29. 呢種手法，吾友 Hong Lam寫林振強填陳慧嫻《Love me once again》都有提過（我地呢啲完全係廢老俱樂部，唔知幾時會院舍爆發）。最初副歌，林振強填嘅係「從前夢想　夢想 你我可再做情侶一雙　舊情從未變涼 無奈我心所想 是妄想　你已粉碎任何夢想 你現在 又怎麼可記起　曾一起快樂過」—連用5個想字，襯返個音。但咪住，最後一下冇用喎，用咗「又怎麼可記起」，諗唔到點再想啦？哈。

30. 去到第二次副歌，做咗少少改動，最後一句「又怎麼可記起」後，唔用「曾一起快樂過」。，而用歌名嘅「love me once again 」

31. 但更絶係最後一次副歌，「無奈我心所想 是妄想　你已粉碎任何夢想」3個想後，原本係「你現在又怎麼可記起」，你以為佢技窮嘛，冇貨賣嘛，填唔到「想」嘛。梗係唔係！留到最後先填。最後填嘅係，「你現在，又怎麼可會想」，然後，就係歌名嘅「love me once again」．男主角玩新女玩得咁開心，點會想復合呢，純係歌者嘅痴心妄想。妙！

32. 我最後只想補充一點：林夕填呢首詞嗰時，只係25歲。重點唔係文學根底，成首歌冇深嘅字（如果你覺得「蹉陀」都好深，你都係轉行種小麥啦），重點係怇對人性嘅嗰種種體會。當然，有理由相信，嗰個年代嘅人，係早熟啲的，未必一定定唔好，但見到分別，當然亦會在其他嘢睇到。

33. 下篇會再補充少少黃凱芹，同埋林夕。

=====

重出江湖！Ivan Patreon 已經2000人訂！多謝大家！比別人知得多。subscribe now（bityl.co/9CyV） ，可以睇返晒以前嘅文。港美市場評點，專題號外，每日一圖，好文推介。每星期6篇，月費100． 畀年費仲有85折，

（＊）應該搞個八九十年代流行文化trivia quiz，終極問題：Raidas所冇歌曲都係林夕填詞，只有兩首唔係。一首係黃凱芹填詞嘅《傾心》，請問另一首係？—答案係：《人海寫真》，小美填詞。痴撚線，我居然會識埋啲咁嘅嘢（＊＊）。但，首歌都唔算冷門（唔好同《人海中我是誰》搞錯，都係Raidas！），因為係當年TVB節目主題曲，個節目叫《人海綠皮書》（又人海！！），黃金時段播，講下真實個案改編咁。

（＊＊）所以的確我玩呢啲quiz係極強嘅，甚至報過名玩《百萬富翁》，可惜抽唔中。可惜，呢啲技能冇乜用（＊＊＊），就唔好講我當年中學點威水呢啲陳年飛機嘢。雖然呢，居然都係有助我溝到靚女師妹嘅，但當然師妹亦冇幫我打飛機，我地年代好純情的。

（＊＊＊）其實講真，好有用，幫到搵錢添，只係唔係咁明顯，同唔係咁快見到，又唔係咁直接。此話何解？無論我寫文，定係做分析員，都幫到手，因為我就係一個知埋晒好多奇怪嘢嘅人。呢個亦係細細個已見到，因為我係個充滿好奇心嘅人，甚至我老豆叫我去打機唔好問咁多嘢（當然唔係粗暴地），倒係我老母好似真係答咗我唔少問題，有時仲同我一齊搵答案，明顯當年啲關係冇咁惡劣。話說回頭，我老豆心情靚時（都多嘅），都教曉我好多無聊嘢，例如咩係「昭和三色」，咩係「大正三色」，甚至乜嘢係昭和乜嘢係大正。當然最重要都係，佢兩位嘅身教，畀我知道，呢個世界係一重又一重謊言包裝出嚟嘅，好多人以為自己想知真相，but you cant handle the truth