311 日本地震 福島核災，然後日經指數點？貝萊德Black Rock俄羅斯資產輸咗170億美金？好似係。除非唔係。友邦1299：還你保費！中移動941，今年升10%，跑贏多數港股美股。仲有得升！ (Patreon)

311 日本地震 福島核災，然後日經指數點？

貝萊德Black Rock俄羅斯資產輸咗170億美金？好似係。除非唔係。

友邦1299：還你保費！

中移動941，今年升10%，跑贏多數港股美股。仲有得升！

1. 你睇我啲港股揀股能力都不錯，地鐵66一樣績後有得升，國泰293都係（呢隻冇買），太古19要跌少少但年初至今都係強。當然仲有今日會講嘅中移動941同友邦，全部都跑贏大市。實情今年港股跑贏真係唔難，你避開晒啲高估值股就得。

2. 既然咁開心，寫咗四日。冇理由唔寫埋第五日丫。但，週末就冇了。

3. 又，講定先，鐵定4月頭入院做手術，今次全身麻醉訓醫院。點都播返一個星期雪花（除非我錄音或拍片）。唔好又鬧。當然有乜冬瓜豆腐就乜都唔使。唔係話大吉利是，而係人生又好，股市又好，就係無常。我1月29號開刀時都冇諗過搞咗咁耐都仲未回復正常視力啦。

311 日本地震 福島核災，然後日經指數點？

4. 呢度有日本港人讀者，但極少。不過好肯定嘅係，香港人關心日本分分鐘多過關心香港。今日（星期五）咁啱係3月11日。以前我對3月11日嘅認知係馬德里高鐵站爆炸案 ,而家當然係日本地震福島核電.

5. 有幾大鑊相信我唔使重複。但，呢度唔係日本風情畫。主要都係同你講股市。股市當然都好大鑊，跌超過10%（好合理吧），好似係史上第三大單日跌幅（不過，現在嘅日經指數，應該係二戰後先有的）

6. 咁但，睇圖啦喎。首先，Spot the 10%。你發現，唔係我mark 住日期，你根本搵唔返嗰一日出嚟。但當然，因為我呢個係長期圖，好似係兩個星期一點。

7. 但亦畀你見到一樣嘢：估下日經指數，用咗幾耐收復失地？答案係，3月22日，11日後已經收復晒，甚至未計停過市同埋星期六日。

8. 仲有，講到世紀大劫難（事實亦係），11年後，日經指數跌咗幾多呢?答案,係升咗164%。

9. 教訓？畫出腸啦。天災人禍，對股市嘅影響，永遠係短暫。當日你覺得好大件事嘅嘢，多年後睇返，根本搵唔到在邊，仲有，樂觀者必勝。

貝萊德Black Rock俄羅斯資產輸咗170億美金？好似係。除非唔係

10. 有人話我呢期好似寫港股多，美股少。冇錯係。原因呢，首先港股多業績，美股出晒。二來當然亦因為我主力都係聽（唔係睇）信報即時新聞多，咁少不免係港股多啲。三來其實都有寫美股，但寫市況同心法多，少寫個股

11. 好，今日寫一隻，BlackRock，我有的。今年股價都跌唔少，跌25%，　但當然我唔會止蝕。跌乜？貴咯。再無敵嘅公司，都有個價，但而家啲估值已經正常返好多。仲有，呢個行業當然順住個股市，股市跌時，一來啲客意慾低，二來AUM都自然跌（股市跌嘛），實受雙重打擊的。

12. 但，今日嘅報導，話佢地嘅俄羅斯資產，輸咗170億美金，差不多total loss。嘩，170億喎。係真唔係？

13. 首先，數字應該係真嘅，公司都確認咗。但，記唔記得，舊年恒大話爆煲時，一樣話公司渣咗好多？咁結果死咗未？

14. 答案好簡單，關鍵問題得一個：係公司自己嘅錢，定客嘅錢？我唔敢100%肯定，但睇上文下理，點都似係客嘅錢。

15. 唔信？睇數字。我會睇數字，好多垃圾評論只係吹水，就係分別。可以睇下。

16. 公司Asset 1700 億。用你嘅常識諗下，有冇可能會170億放在俄羅斯。

17. 如果你堅持，係客戶錢，但公司要上身嘅。咁可以睇下，公司本book，即係股東權益，先360億。你輸咗170億？你可以估下，一間公司冇咗一半book，應該跌幾多。肯定唔係今晚（星期五）咁嘅跌法。

18. 又學到嘢啦，呢啲咪我地，同埋出面啲友嘅分別。

友邦1299：還你保費！

19. 呢隻亦係我有的，除咗月供

20. 係喎，友邦1299星期五朝早出咗業績。佢地向來傳統都係朝早六七點出，十分奇怪，原因不明。但就苦了啲分析員。

21. 業績，冇乜特別好講。保險公司嘅嘢，主要都係睇內含價值，同新業務價值增長。兩者都係悶都不堪嘅嘢（有冇話你知我大學讀精算的），我不打算在呢度解。

22. 不過，比較令人興奮嘅係，公司提出回購，果然即時幫到股價。實情公司有段時間股價好頹，但今年還好，只係跌少少，亦係跑贏大市。

23. 嚟緊仲要睇兩樣嘢，第一係債息。保單係公司嘅長期負債，你一供就幾十年，所以保險公司都拎返長期嘅資產去匹配，所以投資表現同長債債息好有關。比較好嘅係，佢地唔似銀行咁要借短錢，所以唔會受咩息差收窄影響。

24. 第二，當然係通關。眾所周知，大陸佬嚟香港買保險，係一條極大嘅財路。但已經停咗兩年幾。一開返？不得了。當然照舊，等開關先買，就遲了。

25. 我建議你如果月供佢保費，就同時供埋佢股票，拎返自己嗰份／正如我有個朋友，買完層長實樓，個個月供樓之餘又去供長實股票，拎返自己嗰份喎。「所以你見我日日食魚生假裝在日本，同時又買DONKI股票」

中移動941，今年升10%，跑贏多數港股美股。仲有得升！

26. 大陸兩會甚麼，極其奄悶。以前打工就焗睇，但最慘係，根本對你投資都係冇任何幫助的，以前都仲可以捉下啲咩國策受惠股，近年已經冇得點玩。

27. 不過，而家我變成幫你地打工，咁就當然試下在啲最悶嘅嘢之中，搵啲趣味。例如呢單。

28. 話說兩會嘅工作報告，6年嚟，首次冇提「降價提速」。

29. 咩係「降價提速」？照計睇字面都明，又要電訊商減價，又要加快數據速度。同於老細減你人工，仲要你做多啲嘢。所以N年前推嗰時，電訊股股價當然死晒。

30. 但，而家唔再提啦喎，雖然加價言之尚早，但勝在有想像空間。

31. 買乜？當然係中移動941，呢隻亦係有買，近年表現真係唔錯，今年升夠10%，喂，真係跑贏大多數港股美股，頹足多年終有出頭天。憑乜？就係個股息。變咗公用股好耐了

32. 睇返近年，派息冇乜加，但勝在唔使減。當然人民幣強勢就更好，因為公司收入就梗係人民幣。記住喎，自己計一次，舊年（2020）股息3.29，今年（我指2021業績）照計唔會少過舊年，當住一樣。股價51.55。6.4%股息率，執笠爆煲風險近乎係零，但當然，大陸嘅嘢，永遠可以有啲古怪嘢。當年股價見過百幾蚊的。而家嘅股價，等於廿年前咁咋！（咁中途收咗唔少息嘅）

33. 所以買還買，分散呀下。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。