大師冇點你：納指一跌穿熊市關鍵位，就……反彈。業績速評：太古19。今年有得升呀，吹咩。你啲貨有冇？．業績速評：地鐵66。蝕錢都唔減派息呀，何況賺錢？亞馬遜拆細的啟示—Pizza切多幾份，真係飽啲的．業績速評：泓富REIT 808。永遠嘅等待，永遠等待。 (Patreon)

大師冇點你：納指一跌穿熊市關鍵位，就……反彈。

業績速評：太古19。今年有得升呀，吹咩。你啲貨有冇？

業績速評：地鐵66。蝕錢都唔減派息呀，何況賺錢？

亞馬遜拆細的啟示—Pizza切多幾份，真係飽啲的．

業績速評：泓富REIT 808。永遠嘅等待，永遠等待。

比個好消息大家，照計好快唔使忍受錯字連篇。因為我已經學習緊點樣用啲讀屏程式，照計可以大幅減低錯字。

大師冇點你：納指一跌穿熊市關鍵位，就……反彈。

1. 講一講大市嘅小小心法嘢。固然張圖係星期三晚的，寫時時星期四晚，歐美股都跌返啲，但唔影響我寫嘅嘢。

2. 我想講嘅係，記唔記得，之前先講過歐洲股市同埋納指見熊？就係早幾日嘅事。當時我已經話你知，又如何？唔止係話我心口掛個勇字，而係就算你保守都好，即使你知道個股市跌咗20%，請問對你又有乜用？

3. 你話如果我知道，跌咗20%呢個關口，就會血流不止嘅。咁梗係有用。我可能可以忍痛斬纜，或者等遲下先買平貨，甚至傳說中嘅「反手造淡」都仲得。

4. 但，有冇實證支持「跌咗20%就會繼續跌」？明顯冇。

5. 結果，風水佬呃你十年八年，大帥冇點你。星期三晚，歐洲股，同埋納指，咪正又係之前掂一掂熊市位，就即時又反彈。

6. 畀埋數你自己睇，例如納指，熊市位（即係高位跌20%），係12970咁上下。你可以望下圖，三個星期入面，已經兩次跌穿，然後反彈。一次係俄烏開戰前，一次係早幾日。歐洲嘅情況亦一樣。

7. 當然，以上不代表納指就已經見咗底。可能可以第三次試熊然後大瀉。但，至少證明咗，你聽啲人講咩「重要支持位」「心理關口」，絶對係廢的。

8. 順帶一提，英國股市，反而從未入熊。好一排之前都寫過篇文，講英國股市頹咗多年，但真係相當平的，所以你見個抗跌力幾高下。高位好似最多跌過10%咋

業績速評：太古19。今年有得升呀，吹咩。你啲貨有冇？

9. 就真係速評，但咁啱我都有啲，好少，好似係呢一兩年月供嘅東西。中午出，股價即時升7%，可能部份係嚟自之前一日國泰業績強（一來一回蝕少150億呀），部份亦同港股小小反彈有關，但主要都係自己業績強

10. 不過詳情，我就冇細睇了。能力不許可。我有放埋上次個Excel上嚟，你鍾意可以自己填，順便知道我之前整要花幾多功夫。

11. 但仲有一樣嘢，始終我當初買太古，無非因為：夠殘，同埋啲管治都仲係正正常常。係悶，但冇問題的，都算價值股（當然國泰嗰部份就唔太好，但已經極殘）

12. 你可以睇睇個股價，又估下今年跌幾多？答案係仲有得升小小。跑贏晒你啲咩恒指道指納指。

13. 舊年全年派息2.6，股價45.3，嘩，5.7厘息。（又，唔該大家計股息率時，自己去計一次。小學數學。唔好盡信報價機。）。當然個派息都OK，但始終只能當係bonus，並唔係派息好穩定嘅股票。（有冇留意今年個派息率超過100%？原因有點複雜，涉及公司自己嘅policy根據邊個「盈利」派息，但一般冇乜可能長期超過100%）

14. 冇計，因為盈利都唔穩定。國泰已經極唔穩定，仲有啲商場都係。

15. 然後又可以講，呢刻當然相當大劑。國泰就不用講，商場業務亦都死，寫字樓又係死。但股價反而頂得住。

16. 我都講到有啲悶，但真係，你啲組合應該係有攻有守，等你跌市時都有啲股票頂下。唔好輸得太離譜，唔好搞到自亂陣腳。

業績速評：地鐵66。蝕錢都唔減派息呀，何況賺錢？

17. 業績呢度。一樣，都係我有月供的，但呢隻耐好多。股價呢幾年當然麻麻地。先係社運，再係肺炎。車務收入固然就受打擊，仲有站入面嘅租金，仲有佢啲商場。雪上加霜整多單沙中線減值。

18. 但，今年呢？你睇情況就梗係極惡劣，客量大減，商場死晒。股價又唔算好差。跌4%咁咯，都跑贏大市好多。點解？亦係夠殘，同埋真係有啲防守性。

19. 同太古一樣，唔詳細拆，我送個Excel畀你自己慢慢玩

20. 但，至少睇一樣嘢，睇個股息。再講一次，唔該自己計。舊年派息係1.27，股價40.45。3.1厘。高就唔係好高，但勝在十分可靠。

21. 點可靠？公司真係N咁多年冇減過派息。但憑乜？啲生意都係有起有落的，舊年蝕錢添。但真係因為半國企，借錢能力亦強。你見蝕錢嗰年都唔使減派息。

22. 當然了，到疫情消退時（講咗幾耐？），啲車務收入商場收入更加係翻生啦。

23. 但，又補充一句，成日聽啲讀者講，諗住月供XXX，目標兩年（甚至一年我都聽過）。我係心諗，做乜春？你不如諗下，你月供嘅意義係乜。一兩年算係乜？你享受唔到個好處的。當然你話我想買嗰隻股十萬蚊一手，我冇咁多錢，要儲一年兩年，呢個就係理由。但呢啲情況，就唔應該叫月供股票了。（又，個人意見，如果一個月只係儲到五千蚊，絶不失禮，但就唔應該去買隻十萬一手嘅股票了）

亞馬遜拆細的啟示—Pizza切多幾份，真係飽啲的

24. 講開十萬蚊一手，大家知係香港先咁老土（跟英國，仲有日本新加坡都好似係），美股冇呢回事。但有啲股票，入場費都仲係幾貴。例如亞馬遜，3000美金一股。咁當然買一手應該多數人都負擔到，但你話想分段個個月買，就好多人未必可以。

25. 咁而家，玩乜？玩一拆二十！

26. 有乜好評？冇乜好評。實情好多公司都試過，蘋果最出名，Tesla亦有，之前亦有好多人估亞馬遜係下一間。

27. 學院派話你知，大佬，呢啲對股價真係唔會有任何影響。David Webb嘅名言：將個pizza切多幾份唔會飽啲的（認真L可以話，會少咗，因為切嗰時有啲碎咗）

28. 而我亦講過，如果係咁有用，就間間公司都不停拆不停拆啦，股價可以不停升。而今年以前N咁多年表現最好嘅其中一間公司，正係永世都唔會拆股嘅畢菲特巴郡。

29. 不過，實踐是檢驗真理的唯一方法，記得近幾次，蘋果又好Tesla又好，宣佈拆細，股價都即升。今次亞馬遜都不例外

30. 噢，唔記得話你知，聽減肥專家講，將啲嘢切細啲呢，係真係會令你快啲飽的。你睇David Webb 咁瘦，就知佢唔係減肥專家

業績速評：泓富REIT 808。永遠嘅等待，永遠等待。

31. 最後呢間真係快講，長和系啲嘢。有乜場就自己上佢網頁睇。你見舊年個可分派收入都只係跌少少，但，首先REIT嘅可分派收入就唔同你平時理解嘅純利。另外當然2020年己經係相當大鑊。仲有2022年都會幾差。

32. 咁所以，唔好咁講多，睇派息。你見年年都係0.17 0.18 咁上下，近五年冇加過，仲要跌少少。計0.17，股價就2.81，6厘息。還好

33. 股價呢？今年都仲要跌10%，近幾年都係浮浮沉沉

34. 我就冇買的

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。