國泰業績毀三觀系列 （有Excel） (Patreon)

油價又升　客運又死晒　港股又廢，國泰今年跌幾多？

國泰2021下半年盈利勁過2019全年！

國泰炒油賺20億！2019年先十幾億純利

國泰舊年下半年仲要係正正現金流

第一部份：國泰今次業績很強勁

第二部份：睇下國泰歷年業績，了解下間公司同個行業

第一部份：國泰今次業績很強勁

1. 今日好玩，同大家睇睇國泰航空293，雖然應該好少人會買（但我倒覺得不錯），但反正個個都係旅遊專家，亦可以了解下個行業。

2. 點解今日講？因為剛出咗業績。你可以去睇，除咗個別術語外，份業績算解得幾詳盡，每個item 點解升跌都有解你知。亦可以睇返媒體嘅報導。

3. 奉送Excel一個，粒粒皆辛苦，冇投訴啦下話？我仲要係由2019年開始入，畀你睇下疫情前後公司有幾咁大嘅分別（其實2019都有少少受社運打擊，但唔講到去2017 2018咁遠了）

4. 篇文我會先快快講今次業績同埋呢刻嘅事，然後再睇返過去6個半年（即係2019-2021）嘅嘢，順便畀你睇下航空公司嘅數有乜特別。時間同能力所限，只有個income statement，冇Balance Sheet

5. 首先又係畀你估下，又話國際金融中心地位不再啦，人才走晒啦（走咪要坐飛機！），又話防疫措施失敗啦，特首又不知所謂啦，仲要油價勁升。估下，客運死晒，連蝕兩年嘅國泰，股價今年跌幾多？

6. 你見我咁問，當然估到，今年係升嘅！冇錯，中午出完業績升5%（證明業績好勁），而年初至今只係升4%，即係未出業績前全年微跌，但已經好過絶大多數港股，特別係講到業務巴巴閉嗰啲。

7. 又嚟啦喎，又係投資教訓。首先，估值嘛，國泰殘到一個點。二來，炒預期嘛，鬼唔知客運死晒咩，鬼唔知連蝕兩年咩。你再講呢啲，根本對個股價零影響。你頂多話高油價有影響。但，如果開返關呢？你估你肯唔肯畀燃油附加費？呢啲先係預期

8. 我唔知分析員估幾多，但國泰嘅業績，實在相當勁。首先，你見到，2021下半年居然係賺錢嘅，冇花冇假，唔係因為咩一次性賣嘢（相反仲有啲一次性虧損）

9. 而最估唔到係，2021下半年賺嘅錢，係多過2019年。係多過2019年全年！死未！

10. 當然，公司盈利，同現金流可以係兩樣嘢。好景時冇乜人介意，但生死存亡時，你有盈利冇現金流，一樣會死。而國泰下半年，都係正現金流嘅。

11. 做乜咁勁？陣間細解，但首先當然因為控制咗成本，亦即係炒人，冇法。而亦當然唔少成本係隨住啲收入冇咗會自然冇，例如啲咩停泊開支呀著陸開支呀，唔飛自然少好多，部份員工成本都係。但當然，要有個過程，有時間差。同埋有啲開支係冇得減嘅，飛機折舊邊有得減？除非你賣咗佢（或者執笠）（不過，折舊係非現金開支，會影響你盈利，但唔影響個現金流）

12. 另一原因，當然係貨運強，大家都知運費貴，疫情下貿易亦有增冇減。陣間會細講。

13. 但最估唔到嘅係，燃油對沖，俗稱嘅「炒期油」。以往好多人話佢亂咁炒，輸錢。但2021年威水，居然呢部份賺咗20幾億，2020年係輸30億。唔好睇少呢20億　—公司下半年都只係17億純利，實情疫情前嘅2019年都好，全年純利都冇20億。所以你可以話一命救全家，但，啲數又不能咁樣獨立去睇啦。

14. 我呢，就冇諗住買。但你問我，其實買得過，好可能比好多港股值得買。執笠嘅 risk，應該係冇，擺明政府會保住。股價下跌風險我都覺得不大，而家6.6，低位先6.1，唔多信會穿到底。反而最大問題係，upside 有幾多？2019年高位12蚊，但照計飛得返都好，啲客量有排都未去到疫情水平。可能真係10蚊頂盡

第二部份：睇下國泰歷年業績，了解下間公司同個行

15. 好，第二部份，睇埋小小歷史，睇下航空公司嘅數係點。同埋疫情有幾大打擊

16. 首先，講過無數次，航空公司係一個利錢好低嘅行業。證據？睇2019年，叫做正常時期。你睇公司一年1000億生意，好似好誇張（一日收入30億），但純利？20億都冇。因為開支一樣係差不多1000億。

17. 照計你都唔使好叻都諗到，咁嘅情況，只要你生意忽然跌5%10%，都可以好大鑊，因為你啲成本冇可能即時減到咁多。

18. 然後睇下，正常嘅年代，2019年，梗係客運係主要收入，75%收入。貨運佔25%。但舊年呢？貨運佔咗80%了。當然係因為此消彼長。

19. 貨運收入，就由2019年240億，升到舊年360億，冇細睇，但照計價同量都升。客運呢？就當然大大鑊，以前一年740億，舊年？40億都未有。舊年下半年已經好好多，2020下半年同2021上半年先恐怖，每個半年，客運收入10億都冇.

20. 咁拉勻，當然都補唔返。收入咪由以前一年1000億，跌到舊年460億 。一半都冇。跌55%

21. 咁但當然，成本都會跟住減嘅。

22. 又估下，航空公司最大嘅成本係乜？當然係，人工。

23. 真的，你見炒人減薪各樣嘢後，都仲係人工係最大開支。

24. 另外，如得疫情前，油價都係好大開支，不過呢度嘅油價成本，有加埋佢對沖期油嘅賺蝕落去，有點難計。同樣地，疫情前，當然啲著陸費停泊費都係大開支，但而家少咗好多。

25. 整體嚟講，同疫情前比，人工開支減咗一半，燃油呀停泊費嗰啲減咗唔止一半添。不過有樣開支冇乜點減，正係飛機折舊，冇得減的，你飛唔飛都要有呢啲開支。所以拉勻計，總成本亦係減咗55%左右。

26. 至於有啲咩重組開支之類，唔算大數，就不講。但不過，因為利錢薄，往往條數落到呢個位（即係上面堆收入減走開支），都剩返好少，所以有時呢度啲數唔係太大，都影響到個純利。

27. 最後想個個講「優先股」，自己可以Google 下係乜，唔算好常見嘅東西。呢堆嘢就係政府救國泰時拎嘅，每年可以收返國泰嘅息。但佢唔係債券，所以唔係財務開支，係在你個盈利度扣的。不過，國泰一路都冇支付呢堆息。

28. 咁會點？間單講，有拖冇欠。冇得走數的，但爭住先冇後果。另外個息會升上去（但係隨住年份，而唔係因為唔找數罰息），以鼓勵國泰盡快贖返佢。

29. 咁你話，會唔會到國泰好返時，都要扣咗呢啲數先，盈利受影響？就係唔會的，你見嗰個純利，已經扣咗優先股，當然將來你還返呢啲息就要現金，但已經紀錄咗在盤數做負債了。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。