又有文喎，開心唔開心？納指轉熊，歐股轉熊，又如何？理文化工746 小補充—明明之前出盈喜升咗，做乜出業績又再升？公用股：長江基建1038 電盈8 近一年新高，我有買 (Patreon)

版務：又有文喎，開心唔開心？

納指轉熊，歐股轉熊，又如何？

理文化工746 小補充—明明之前出盈喜升咗，做乜出業績又再升？

公用股：長江基建1038 電盈8 近一年新高，我有買

版務：又有文喎，開心唔開心？

1. 昨日半推半就下復出，反應似乎幾好。亦證明似乎真係點都應該寫啲嘢，好過播雪花。而之前我擔心寫唔到以前咁，而索性唔寫，似乎亦唔切合我一貫原則。所以好吧，既然大家付費，點都應該有啲嘢睇，總之唔好雪花。況且，可能呢啲新玩法大家又會鍾意呢。

2. 有個讀者提議，不如我將Facebook 嘅嘢都貼埋過嚟，我都積極考慮中。之前冇咁做嘅原因：第一，怕大家嫌煩嫌重複。第二，有唔少同金融無關嘅文（雖然有啲我覺得寫得好好）。第三，嗰啲文有啲比較低俗又比較粗口甚至亂咁嚟。但既然非常時期，節目短缺，可能都會搬埋過嚟。讀者亦話唔使兩邊追。我放呢邊嗰時會講明係FB文，你唔鍾意嘅就自己skip

3. 不過，今日Patreon繼續有文。將來亦可能類似呢個形式。實情我而家除咗睇明報（只能網頁版，紙版嘅字當然睇唔唔到），仲有就係信報嘅即時新聞。佢個好處係可以讀出嚟！

4. 我會貼啲值得點評嘅新聞過嚟，可以的話（即係，我得閒而嗰期視力又好啲嘅話）畀埋條link你，否則你就按圖自己搵

5. 最後，繼續忍受下email版多錯字，正文會有人執。同埋我已經研究緊啲讀屏軟件之類，因為雖然4月頭再開刀（Facebook都未講），但即使「成功」，可能睇嘢都仲會有一排係差嘅。

納指轉熊，歐股轉熊，又如何？

6. 星期一嘅市況都幾慘烈，港股不用講，但計單日歐美可能有過之而無不及。正如文中提到，法國德國股市都步入熊市，港股就更不用講。美股方面，納指都應該步入咗熊市。呢度嘅熊市，係指高位回落20%。

7. 但你見我講，又如何？倒唔係只係再重複講啲逢低買入嘅嘢，固然冇錯，但畀啲新意大家。跌市當然唔好受，但，你實在冇必要特別去關心20%呢個數字。除非你話，原來跌咗20%後，就多數會跌多啲，咁就值得留意。但事實係咪？就當然唔係。有時會再跌，但有時又會反彈。冇乜結論，所以，熊唔熊市，真係冇乜分別。

8. 如果你真係要問，可以話你知，跌完20%後，當然係升多過跌，反正股市本身係升多過跌，廢話，但有用。

9. 冇咁廢嘅，話你知，其實納指上星期咪已經試過有一下高位跌咗20%咯，但一穿咗就反彈，你走去咩追沽嘅，又係捉錯。但然後星期一又再跌返穿。所以呢啲走勢，邊有得估？唔好浪費心神諗呢啲嘢了。

理文化工746 小補充—明明之前出盈喜升咗，做乜出業績又再升？

10. 星期一講過理文化工，講漏咗樣嘢。記得我講，首先個盈喜本身都唔係特別好大驚喜，咁況且盈喜嗰日都升咗啲。然後星期一出業績，明明就同個盈喜差不多，點解仲有得升？仲要個市插成千點喎。

11. 首先，我成日話，股票唔會話你知點解升同跌。但，細公司，仲要出業績前冇反應，然後下午出完勁升，仲要大市係大插，咁好明顯係「因為」業績。但，明明咪同盈喜差多，點解仲勁升？

12. 你話係管理層指引好？應該唔係。首圥港股好少會出官方指引，同美股唔同。固然可能業績會上管理層充滿信心（我冇去），但呢個都只會係收市嘅事。

13. 咁點解升？冇乜點解。可以好屈機咁話你知，因為公司成交太少，只要求其有條盲毛見到業績，覺得好好，走去買，就會推郁股價。亦都有可能有啲夠長線嘅投資者買，可能唔介意比高幾個%追，因為除咗業績嘅日子，公司都係好少成交的，要買都唔易

14. 呢啲現象真係細公司先會發生，大公司你好少見會有「出咗盈喜盈警而業績都係差不多但股價有幅波動」。

15. 學術啲講，大公司股價夠efficient，細公司有呢啲奇怪嘢，捉到幾好炒。咁係咪應該買細公司？Yes and No．首先，細公司出古惑嘅空間比較多，理文化工就真係作風正派，但唔係間間係咁。二來，大公司啲生意易睇易估啲，細公司真係唔會知，除非你真係好熟間公司先好買。你可以諗下我對理文化工有幾熟，見咗幾多次管理層睇咗幾多次業績跟咗幾多年去咗幾多次廠先夠膽推畀你地。仲有第三，好多人以為細公司回報高啲，但往往忽略咗survivorship bias—無數細公司中途死咗，而你根本今日唔會見到。所以比較好嘅係，你咪睇返啲細股嘅ETF表現，因為例如有公司爆咗煲，會反映在佢地表現的。

公用股：長江基建1038 電盈8 近一年新高，我有買

16. 幾合理地，港股公用股變成咗避風港。有啲人諗，喂唔係喎，加息喎，呢啲公用股唔係應該受壓咩？

17. 呢個嘛，唔好咁表面。首先，唔係全部公用股都一定係高息股。仲有，公用股往往係價值股，近期都強勢。況且近排全世界都係避風意識高漲，呢啲因素，就超過咗「加息不利公用股」嘅影響。

18. 我地睇睇，粵海270（東江水呀）今年升咗6%，港燈2638今年升2%，電能6今年升3%，長江基建1038今年升6%，電盈8今年升9%。唯獨係煤氣3今年就要跌5%。絶大部份，即使只係以absolute return 計都唔失禮（兩個幾月咋喎），計同指數比更加跑贏幾條街。

19. 拿，認叻時間，當中我有嘅係長江基建同埋電盈，就係表現最好嘅兩隻。唔止，我亦在Patreon寫過呢兩隻。唔止，長江基建52星期新高添，電盈早幾日都創過52星期新高，「仲有Mirror 同　viu台效應」。當然冇可能一命救全家，但真係幫補到我組合些少（正如我仲有啲黃金）

20. 但講真，讀者有幾多個跟買？而你應該見到個問題啦。撇除有啲講起8號仔都仲要講幾廿年前啲歷史嘅奇人，事實係8號仔近年只係浮浮沉沉。長江基建呢？之前連跌咗兩三年添。

21. 好簡單嘅例子，又返返去啲基本原理。你不能只係貪啲嘢夠sexy日日升嘅股票，唔同嘅情況會升唔同嘅嘢。仲有，之前唔升唔等於之後唔升，正如之前狂升都唔等於之後狂升。當然仲有，你嘅組合要保持平衡。

22. 甚至你見咩公用股，我都唔止買一隻。你諗下你走去買隻煤氣，一樣今年唔開心，問點解其他公用股升你嗰隻唔升。（因為，貴咯）

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。