版務：又復出（半推半就下）．理文化工：出完業績又係5位PE 8厘息．大師冇點你：軍工股　LMT NOC RTX，但今次我講投資教訓 (Patreon)

版務：又復出（半推半就下）

理文化工：出完業績又係5位PE 8厘息

大師冇點你：軍工股 LMT NOC RTX，但今次我講投資教訓

Email版有錯字勿怪，正文會有人幫我改。我連地鐵出口字母都差不多睇唔到，將就下，OK？

版務：又復出（半推半就下）

1. 呼，又同大家見面。著實並唔完全係我嘅選擇，因為近期我睇嘢都仲係唔多好（其實差過之前），而且4月頭會做多次手術（入院全身麻醉嘅添，遲下Facebook會講）

2. 咁點解會有呢篇文？大約係因為，有人同我反映，似乎有啲讀者唔多高興我播咗咁耐雪花。當然我聽到呢樣嘢會唔多開心，但又掉轉立場睇講句，可能有90%讀者都唔介意我播雪花，但亦即係都有10%，即係200人，係介意嘅。況且亦都有啲新讀者，不見得追隨我好耐，又唔係同我好frd，咁直接講句，冇嘢播咪唔畀錢住，又似乎好合理啫？幫你係人情咋。

3. 當然仲有個問題，可能你地心中都會諗，喂，你Facebook都仲寫好多文喎。算點先？咁，就真係唔同的。嗰啲文用嘅功夫少好多。

4. 但，講咁多乜都假。平時我嘅文或者我本書，都有勉勵其他人，試咗先算，永遠唔會有最好嘅時機，永遠都係未準備好，永遠冇完美。既然係咁，與其我擔心我未能夠寫到「夠好」嘅Patreon，不如，照寫吧。

5. 可能讀者感覺都好啲，諗落都係。我平時幫襯開，你個廚病咗或請假，咁你啲嘢同以前唔同味，顧客都可能可以諒解。但我畀咗錢，你水都冇杯畀我，就講唔過去吧。

6. 當然，呢個亦係我對自己嘅一個……試煉，希望通過虧虧地嘅寫作，搵返啲正能量。唔係好識解，遲下Facebook 寫篇文講

7. 實務上，好簡單，我盡量維持點都寫啲嘢。唔敢畀個實數，但一個星期點都整返幾篇吧。可能同以前完全唔同模式，可能當專欄咁一日千幾二千字，可能拍片，可能寫返啲以前想寫嘅心法，甚至係2021回顧（係未寫的，而2020回顧我係有在呢度寫，亦唔止係講投資），乜都好。但總之，唔好播雪花。

理文化工：出完業績又係5位PE 8厘息

8. 不能不講理文化工746，逆市奇葩。仲有，你可以搵返舊文，我大約係剛剛一年前寫的。當時3.8左右？而家差不多一個開（唔好忘記隻嘢派息都幾好）。然後你可以睇下恒指跌咗幾點，

9. 點解我記得一年前？因為上次又係出咗業績，今次亦係出業績。業績就你自己上港交所搵吧，呢啲我而家無能為力了（但我當然睇咗！），不能以前咁每次畀條link你

10. 首先要講，喂大佬，公司之前一早出咗盈喜。我有寫過的。咁呢度帶出一個投資基本知識：人人都知嘅嘢，唔應該炒兩次。就當個盈喜係好東西，照計嗰時都升咗啦（我記得嗰時都有升）。

11. 何況，有時盈喜未必係好東西。例如乜？例如我公司舊年賺100蚊，今年半年賺300蚊，然後我年尾出個盈喜話全年盈利按年升100%—咁即係下半年輸錢喎！

12. 除非，你個業績，係畀個盈喜更勁咯。例如盈喜話升100%，你出嚟升200%咯（但我懷疑咁樣會有問題的，點同證監解釋？）

13. Anyway，睇返，之前公司出盈喜，話全年純利按年升1.5倍—即係，舊年100今年250（而唔係舊年100今年150）。當時我已經話，並唔算十分出色。

14. 咁而家出埋實數，睇啦喎。結果係升1.57倍，咁你可以話好過盈喜些少嘅。實數呢？2021年賺12.88億（記住個數），但上半年已賺5.87億嘛，即係下半年賺7.01億。咁其實下半年都好過上半年一截丫，點解出盈喜嗰時我嗰時仲話唔係十分出色？因為，東岳189，下半年同上半年比，係勁咗好多的。咁但，當然兩間公司唔係完全一樣。

15. 好啦，計計數。隻嘢，60億市值，頭先話12.88億純利，即係5倍市盈率唔夠。另外，公司全年派息0.58， 每股盈利1.51。三成幾近四成，都係以往水平。股價就7.2，即係8%股息率。「拿，成日問有乜高息嘅，呢度咪有」

16. 順手解埋101嘢，你見有兩個每股盈利，一個1.56，一個1.51。有乜分別？前者係基本，後者係計「全面攤薄」。即係乜？即係計股數時，我計埋有啲人有機會行使啲工具，令到股數忽然多咗。有時係啲可換股債券，更普遍係啲管理層嘅option．呢個情況，就係大股東李生（冇錯，搞波嗰個）嘅option咯。咁計邊個？一般都計全面攤薄，即係細啲嘅數1.51

17. 至於你最關心嘅，追渣沽。睇平貴，就真係平嘅。記得舊年我寫時，都係講5倍市盈率8率息。做乜升咗咁多仲係5倍市盈率8厘息？就係因為個盈利都跟住上嘛。

18. That said，亦都一路有講，始終週期嘢，唔係可以放心坐過世嘅股票。未買嘅，我覺得未必需要買。買咗嘅，可以沽一半先。

19. 最大問題當然係啲化工品周期，你唔會知。當然你可以日日上網望二氯甲烷或者哥羅芳價格嘅。

大師冇點你：軍工股　LMT NOC RTX，但今次我講投資教訓

20. 放心，大市我實會寫（雖然，有乜好寫？）。俄烏就寫過，我覺得已經寫到爛，一街都寫，但有必要嘅我都會寫寫下。

21. 但，呢三隻軍工股，冇呃你，中到應。正係我上一篇Patreon寫嘅。大約都升到10%，相當交到功課。

22. 我亦都知道有啲讀者有買。問我好唔好沽？當然唔好。至於冇買嘅呢？而家想買得唔得？當然都得，「但唔係叫你沽晒其他嘢瞓身落去」

23. 點解睇好，上次講過，不再重複。但記住唔係睇呢排嘅戰爭，而係之後人人都加大國防開支。同埋你見北約依然好抗拒直接出兵，但提供武器就絶不介意

24. 不過照舊，我唔會滿足於只係畀冧把，亦希望大家唔好只係咁。重要嘅亦係背後嘅一套想法，呢啲反而我呢排Facebook 寫得多。

25. 呢幾隻嘢，唔冷門，差不多一講打仗就有人講。但我一路強調唔係睇而家，而係睇將來。

26. 個道理亦都好簡單：只係呢刻嘅嘢，你睇啱，唔會幫你賺到大錢，甚至可能要輸錢。因為往往估值反映晒。

27. 我在Facebook叫啲人反問下自己，你嘅投資回報，係因何而嚟？（老餅時間，我諗起曹劌論戰），如果你只係人炒你又炒，只係運氣，只係夠大膽（賭場大把勇士），當然都有機會羸到錢，但多數唔長久。

28. 好少少嘅答案，可能係你嘅觀察力，例如你好早知道Lululemon會風行全球之類。但，三四十年前都仲得，而家呢套都越嚟越難，因為資訊越嚟越快。

29. 咁有乜先係恒久？有咩係市場上，你可以有而人地冇？

30. 呢度嘅長期讀者應該知道。其實股票嘅回報，正係嚟自你承受風險嘅能力。人地兩嘢嚇走，你忍得痛，你咪叻過人。

31. 又或者，係你可以逆群眾而行嘅能力。別人恐懼時你貪婪。

32. 當然最後，就係你可以有耐性，因為大多數人都冇。冇錯，呢個亦係一種逆群眾而行嘅能力

33. 嗒真啲，包保對你功力有幫助。

34. 至於好唔好「食糊」？痴線啦，講過無數次，買股票梗係要贏得大。贏少少走，點補返輸嗰啲？

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。