有人話講烏克蘭，就講吧 (Patreon)

依然都係一股都冇沽過

俄股ETF EURS（冇買，亦冇叫你買）

而家市況夠明朗

不過今次有樣嘢唔同

烏克蘭形勢之我見

冧把幾個

結語

好啦，天時地利人和（？），話咁快就有復出後第二篇。

既然人人都想講烏克蘭，咁我又即管講兩句。但我都係要講，我近乎係全不關心。你話，喂，啲股票係咁跌喎。咁當然係啦，當然有損失，冇可能話畀你知會避到，除非你唔買（但，「你啲強積金呢？」）

依然都係一股都冇沽過

咁首先畀個信心你，我依然都係一股都冇沽過。傻的嗎？同人地人踩人。跌晒先沽，有咁笨？當然你可以唔同意我，但至少呢個一路係我嘅作風，從來冇老點你，係咪？

但因為實在手頭冇乜錢（做個手術近廿萬，你估講笑？），所以，除咗每個月買開嘅嘢外，我都冇乜點再特別加

（話時話，買咗日本股　日清食品　2897。好似未同大家講？日本嗰隻，唔係香港1475，日本嗰間係母公司。一手都六萬幾港紙，所以真係冇晒錢）

俄股ETF EURS（冇買，亦冇叫你買）

關於俄羅斯股市云云，Facebook Page已經有寫。之前嘅專題文咁啱有寫過ERUS，我就真係有諗過買些少，但真係只係為咗買些少。為乜？就係為咗認下叻。你要留意，好多KOL都係咁玩，雞仔注，中咗就股神。我亦唔係扮清高，只係既然我呢排都要休息，就唔搞咁多嘢了（但，都真係仲有啲後悔冇買）

不過我估呢度，應該冇乜人真係走買買俄股嘅。所以都係講返港股美股。

你要記住嘅係，投資冇難度分計。你根本唔使做smart ass，往往買一隻SPY或者QQQ，已經勁過晒嗰啲多多理論嘅人（包括我）

而家市況夠明朗

好肯定嘅係，市場點都係炒預期的。之前一路都話「不明朗」，我就話，個世界永遠都係不明朗架啦。

但而家，就真係相當明朗喎。開打埋啦，我相信冇乜唔明朗。

下面我會再詳細講，我對個局勢嘅預測（未必啱，亦未必有用，但即管分享下），我對我嘅估計都有一定信心。但講定結論。在任何我想像到嘅況下，我都想像唔到，呢堆咩戰爭，會影響美國，中國，甚至歐洲公司嘅基本面。就算有些少，都已經肯定反映晒。

除非你係嗰啲「無限上綱」，乜都講蝴蝶效應，話第三次世界大戰呀冚球鏟呀咁。你身邊總有一兩個呢啲咁嘅友，但你見佢發達未？

應該列舉過，無數咁多次，呢啲咩政治事件，唔會對股市有乜長遠影響。

不過今次有樣嘢好唔同

你講到世界大戰都好，扯，美股經歷過兩次大戰添，一樣照係長升長有。你會話，「今次唔同，因為俄羅斯有核彈」。但，扯，正如我FB Page講，同一估玩法，已經玩咗三次。南奧塞梯（高加索）玩過一次，克里米亞又玩咗次，我睇唔到，點解烏克蘭又會好唔同。

但，今次有一個最大嘅唔同：就係股市貴，美股不用講，歐洲股亦唔係平，你睇香港，啲科技股亦都唔係算平的（當然點先叫平係個好深嘅問題，但即係，你年紀夠大，應該記得以前啲市盈率係單位數的）

呢個先係最大嘅唔同嘛！

正如我成日講，股市唔會話你知因乜跌。咁但，既然俄股咁跌，大家就當係「因為」烏克蘭而跌。

但我嘅睇法唔同，我認為好大程度，都係因為估值作怪。唔係因為烏克蘭，都會因為其他嘢跌。證據？好簡單，美股係咪呢幾日先開始跌？

當然呢啲咁理論層面嘅嘢，你覺得冇乜幫助。但我覺得重要的。之前寫過篇文（唔係好耐，自己搵吧），市值嘅嘢，咪盈利　X 市盈率。前者我唔覺得有乜好大影響，好大程度呢輪大跌，係因為氣氛差。

咁就應該係好事嚟的，因為，氣氛嘅嘢，好似鐘擺咁。差到一個位又會輚返頭。咁你梗係應該氣氛差時買啦，但當然實際上好難。咁退而求其次，試下唔好受個市場氣氛左右咯。

好難咩？我咪而家做緊。我下個月一樣會買我每月買嘅嘢。

你見我有啲股票，高位跌兩三成我都冇乜驚，因為我可能執緊幾倍。JP Morgan，Apple，迪士尼都係。知唔知有乜共通點？共通點係，我當然係買得早。否則冇可能有咁靚嘅價（除非2020年3月，但好高難度）

咁，而家呢啲市況，咪畀機會你可以平平地買啲股票咯。否則你只會end up係舊年走去摸頂嘅人

烏克蘭形勢之我見

呢段夠晒維園阿伯，但有人想聽，我都講下。況且，同下一段有關（有冧吧喎），況且，我估我嘅睇法，點都好過你啲網友。「話晒我去過三次烏克蘭」

並唔使講咩好大嘅陰謀，普京講到好明，就係針對北約東擴，踩到埋門口，不能容忍。當然你亦可以話普京睇準咗北約各國（包括美國），唔會為未入北純嘅烏克蘭全面開戰。事實亦好明顯，你亦不能話德國法國美國等等搵笨，人地一早講明冇打算派軍人。

咁發展落去，相信烏克蘭一己之力，應該唔會捱到好耐。之後會點，就唔知，但亦不太重要。因為歐洲同美國依然唔會同俄羅斯正面衝突。制裁就固然會，但唔見得會成為咩全球危機。

當然另外有個講法（我都信的），普京係新沙皇，矢志光復俄羅斯，變返蘇聯時期咁嘅超級大國。事實你見普京講過無數咁多次，蘇聯解體絶對係個災難，根本唔應該畀你班友自治（普京自己都身受其害要渣的士）

咁所以，有人用納粹德國做比喻，「表面上都有啲似」。普京固然講「烏克蘭自古以來就點點點」，同納粹時講「蘇台德區自古就係乜乜乜」差不多。而你有讀歷史都知，當時列強都冇乜大反彈。

如果你計蘇聯版圖，而家最驚嘅，當然係波羅的海三國，愛沙尼亞拉脫維亞立陶宛，當然驚下一個就到佢地。但，又真係不能咁簡單推演。同烏克蘭唔同，呢三國係北約成員國，烏克蘭唔係。俗啲講，北約置烏克蘭不理（都真係唔多理），仲講得通。但如果成員國都唔理，就好難落台。所以我個人估，烏克蘭之後，俄羅斯就會靜一排（或者轉移去中亞高加索，但唔講咁遠）

講咗咁多廢話，都係想講一句：歐洲美國又好，俄羅斯又好，大家都唔想全面開戰。既然係咁，我睇唔到今次同甚麼南奧塞梯或克里米亞有乜唔同。克里米亞後，又有冇世界大戰呢？

冧把幾個

多謝大家容忍我上面堆廢話，因為用嚟舖排今次呢段。

首先，你要明白，股市係郁得好快嘅。你只係因為咩油價升買油股呀，避險升買金呀，慢咗幾拍了。你估得你先知？

除非你睇到一啲，未完全price in 晒嘅大 trend

我睇到嘅就係：人人自危

我並非網上嗰啲唯恐天下不亂嘅鍵盤戰士，作為一個金融人，「我當然最想見到世界和平」。但不幸地，烏克蘭事件，畀你見到，好多時，都真係講拳頭硬。

然後，另一個教訓就係：你自己嘅安全，真係不能假手於人。

北約呢類嘅set up，一路都有free rider嘅問題，講就話一個成員國受攻擊，就八方呼應。但實際呢？實際上，北約最大嘅軍隊，當然係美國。第二大，就係土其其。你可以想像下，東歐甚麼嘅事，佢地會有幾關心（正如今次你見到）

當然，烏克蘭唔係北約成員國，就咁「犧牲」咗。但其他成員國，你估會唔會唔驚？真係旨意晒美國土耳其（更唔好講土耳其同其他歐盟國越行越遠，或者美國在阿富汗嘅前科）。

所以，講咁多，與其搵隊保安。不如，自己買支槍啦。

睇軍工股，好多人都有講。又係嗰三寶，洛歇馬丁LMT，雷神RTX，Northrop Grumman（NOC），但睇嘅唔係今次戰爭（好快收工），而係，未來十幾廿年，人人都要自保。對，唔止歐洲，可能包埋亞洲。

你見三隻嘢，今年都有得升，大幅跑贏大市。但睇啲估值，並唔係十分貴，有閒錢不妨買下，但當然照舊，係睇好長遠的。分分鐘今次烏克蘭事件後，又再悶一排，甚至跌一排，就唔好到時又話唔郁了。

呀仲有，其實你見到啲網絡保安股都幾勁，例如隻CrowdStrike星期四都勁升。但隻嘢就仲係超貴，又唔賺錢的，之前高位插咗一半。

結語

大家可以自己做個實驗，估下，幾耐之後，冇人會再講烏克蘭俄羅斯？一年之後，基本上肯定唔會。我估三個月後已經冇人再講，甚至係一個月後。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。